Utshovঅধ্যায় 56
56.1
ধৃতরাষ্ট্র উবাচ
ততো ভগ্নেষু সৈন্যেষু ভীমসেনেন সংয়ুগে
দুর্যোধনোঽব্রবীত্কিং নু সৌবলো বাপি সংজয়
56.2
কর্ণো বা জয়তাং শ্রেষ্ঠো যোধা বা মামকা যুধি
কৃপো বা কৃতবর্মা চ দ্রৌণির্দুঃশাসনোঽপি বা
56.3
অত্যদ্ভুতমিদং মন্যে পাণ্ডবেয়স্য বিক্রমম্
যথাপ্রতিজ্ঞং যোধানাং রাধেয়ঃ কৃতবানপি
56.4
কুরূণামপি সর্বেষাং কর্ণঃ শত্রুনিষূদনঃ
শর্ম বর্ম প্রতিষ্ঠা চ জীবিতাশা চ সংজয়
56.5
তত্প্রভগ্নং বলং দৃষ্ট্বা কৌন্তেয়েনামিতৌজসা
রাধেয়ানামধিরথঃ কর্ণঃ কিমকরোদ্যুধি
56.6
পুত্রা বা মম দুর্ধর্ষা রাজানো বা মহারথাঃ
এতন্মে সর্বমাচক্ষ্ব কুশলো হ্যসি সংজয়
56.7
সংজয় উবাচ
অপরাহ্ণে মহারাজ সূতপুত্রঃ প্রতাপবান্
জঘান সোমকান্সর্বান্ভীমসেনস্য পশ্যতঃ
ভীমোঽপ্যতিবলঃ সৈন্যং ধার্তরাষ্ট্রং ব্যপোথয়ৎ
56.8
দ্রাব্যমাণং বলং দৃষ্ট্বা ভীমসেনেন ধীমতা
যন্তারমব্রবীত্কর্ণঃ পাঞ্চালানেব মা বহ
56.9
মদ্ররাজস্ততঃ শল্যঃ শ্বেতানশ্বান্মহাজবান্
প্রাহিণোচ্চেদিপাঞ্চালান্করূষাংশ্চ মহাবলঃ
56.10
প্রবিশ্য চ স তাং সেনাং শল্যঃ পরবলার্দনঃ
ন্যয়চ্ছত্তুরগান্হৃষ্টো যত্র যত্রৈচ্ছদগ্রণীঃ
56.11
তং রথং মেঘসংকাশং বৈয়াঘ্রপরিবারণম্
সংদৃশ্য পাণ্ডুপাঞ্চালাস্ত্রস্তা আসন্বিশাং পতে
56.12
ততো রথস্য নিনদঃ প্রাদুরাসীন্মহারণে
পর্জন্যসমনির্ঘোষঃ পর্বতস্যেব দীর্যতঃ
56.13
ততঃ শরশতৈস্তীক্ষ্ণৈঃ কর্ণোঽপ্যাকর্ণনিঃসৃতৈঃ
জঘান পাণ্ডববলং শতশোঽথ সহস্রশঃ
56.14
তং তথা সমরে কর্ম কুর্বাণমতিমানুষম্
পরিবব্রুর্মহেষ্বাসাঃ পাণ্ডবানাং মহারথাঃ
56.15
তং শিখণ্ডী চ ভীমশ্চ ধৃষ্টদ্যুম্নশ্চ পার্ষতঃ
নকুলঃ সহদেবশ্চ দ্রৌপদেয়াঃ সসাত্যকাঃ
পরিবব্রুর্জিঘাংসন্তো রাধেয়ং শরবৃষ্টিভিঃ
56.16
সাত্যকিস্তু ততঃ কর্ণং বিংশত্যা নিশিতৈঃ শরৈঃ
অতাডয়দ্রণে শূরো জত্রুদেশে নরোত্তমঃ
56.17
শিখণ্ডী পঞ্চবিংশত্যা ধৃষ্টদ্যুম্নশ্চ পঞ্চভিঃ
দ্রৌপদেয়াশ্চতুঃষষ্ট্যা সহদেবশ্চ সপ্তভিঃ
নকুলশ্চ শতেনাজৌ কর্ণং বিব্যাধ সায়কৈঃ
56.18
ভীমসেনস্তু রাধেয়ং নবত্যা নতপর্বণাম্
বিব্যাধ সমরে ক্রুদ্ধো জত্রুদেশে মহাবলঃ
56.19
ততঃ প্রহস্যাধিরথির্বিক্ষিপন্ধনুরুত্তমম্
মুমোচ নিশিতান্বাণান্পীডয়ন্সুমহাবলঃ
তান্প্রত্যবিধ্যদ্রাধেয়ঃ পঞ্চভিঃ পঞ্চভিঃ শরৈঃ
56.20
সাত্যকেস্তু ধনুশ্ছিত্ত্বা ধ্বজং চ পুরুষর্ষভঃ
অথৈনং নবভির্বাণৈরাজঘান স্তনান্তরে
56.21
ভীমসেনস্তু তং ক্রুদ্ধো বিব্যাধ ত্রিংশতা শরৈঃ
সারথিং চ ত্রিভির্বাণৈরাজঘান পরংতপঃ
56.22
বিরথান্দ্রৌপদেয়াংশ্চ চকার পুরুষর্ষভঃ
অক্ষ্ণোর্নিমেষমাত্রেণ তদদ্ভুতমিবাভবৎ
56.23
বিমুখীকৃত্য তান্সর্বাঞ্শরৈঃ সংনতপর্বভিঃ
পাঞ্চালানহনচ্ছূরশ্চেদীনাং চ মহারথান্
56.24
তে বধ্যমানাঃ সমরে চেদিমত্স্যা বিশাং পতে
কর্ণমেকমভিদ্রুত্য শরসংঘৈঃ সমার্দয়ন্
তাঞ্জঘান শিতৈর্বাণৈঃ সূতপুত্রো মহারথঃ
56.25
এতদত্যদ্ভুতং কর্ণে দৃষ্টবানস্মি ভারত
যদেকঃ সমরে শূরান্সূতপুত্রঃ প্রতাপবান্
56.26
যতমানান্পরং শক্ত্যায়োধয়ত্তাংশ্চ ধন্বিনঃ
পাণ্ডবেয়ান্মহারাজ শরৈর্বারিতবান্রণে
56.27
তত্র ভারত কর্ণস্য লাঘবেন মহাত্মনঃ
তুতুষুর্দেবতাঃ সর্বাঃ সিদ্ধাশ্চ পরমর্ষয়ঃ
56.28
অপূজয়ন্মহেষ্বাসা ধার্তরাষ্ট্রা নরোত্তমম্
কর্ণং রথবরশ্রেষ্ঠং শ্রেষ্ঠং সর্বধনুষ্মতাম্
56.29
ততঃ কর্ণো মহারাজ দদাহ রিপুবাহিনীম্
কক্ষমিদ্ধো যথা বহ্নির্নিদাঘে জ্বলিতো মহান্
56.30
তে বধ্যমানাঃ কর্ণেন পাণ্ডবেয়াস্ততস্ততঃ
প্রাদ্রবন্ত রণে ভীতাঃ কর্ণং দৃষ্ট্বা মহাবলম্
56.31
তত্রাক্রন্দো মহানাসীত্পাঞ্চালানাং মহারণে
বধ্যতাং সায়কৈস্তীক্ষ্ণৈঃ কর্ণচাপবরচ্যুতৈঃ
56.32
তেন শব্দেন বিত্রস্তা পাণ্ডবানাং মহাচমূঃ
কর্ণমেকং রণে যোধং মেনিরে তত্র শাত্রবাঃ
56.33
তত্রাদ্ভুতং পরং চক্রে রাধেয়ঃ শত্রুকর্শনঃ
যদেকং পাণ্ডবাঃ সর্বে ন শেকুরভিবীক্ষিতুম্
56.34
যথৌঘঃ পর্বতশ্রেষ্ঠমাসাদ্যাভিপ্রদীর্যতে
তথা তত্পাণ্ডবং সৈন্যং কর্ণমাসাদ্য দীর্যতে
56.35
কর্ণোঽপি সমরে রাজন্বিধূমোঽগ্নিরিব জ্বলন্
দহংস্তস্থৌ মহাবাহুঃ পাণ্ডবানাং মহাচমূম্
56.36
শিরাংসি চ মহারাজ কর্ণাংশ্চঞ্চলকুণ্ডলান্
বাহূংশ্চ বীরো বীরাণাং চিচ্ছেদ লঘু চেষুভিঃ
56.37
হস্তিদন্তান্ত্সরূন্খড্গান্ধ্বজাঞ্শক্তীর্হয়ান্গজান্
রথাংশ্চ বিবিধান্রাজন্পতাকা ব্যজনানি চ
56.38
অক্ষেষায়ুগয়োক্ত্রাণি চক্রাণি বিবিধানি চ
চিচ্ছেদ শতধা কর্ণো যোধব্রতমনুষ্ঠিতঃ
56.39
তত্র ভারত কর্ণেন নিহতৈর্গজবাজিভিঃ
অগম্যরূপা পৃথিবী মাংসশোণিতকর্দমা
56.40
বিষমং চ সমং চৈব হতৈরশ্বপদাতিভিঃ
রথৈশ্চ কুঞ্জরৈশ্চৈব ন প্রাজ্ঞায়ত কিংচন
56.41
নাপি স্বে ন পরে যোধাঃ প্রাজ্ঞায়ন্ত পরস্পরম্
ঘোরে শরান্ধকারে তু কর্ণাস্ত্রে চ বিজৃম্ভিতে
56.42
রাধেয়চাপনির্মুক্তৈঃ শরৈঃ কাঞ্চনভূষিতৈঃ
সংছাদিতা মহারাজ যতমানা মহারথাঃ
56.43
তে পাণ্ডবেয়াঃ সমরে কর্ণেন স্ম পুনঃ পুনঃ
অভজ্যন্ত মহারাজ যতমানা মহারথাঃ
56.44
মৃগসংঘান্যথা ক্রুদ্ধঃ সিংহো দ্রাবয়তে বনে
কর্ণস্তু সমরে যোধাংস্তত্র তত্র মহায়শাঃ
কালয়ামাস তত্সৈন্যং যথা পশুগণান্বৃকঃ
56.45
দৃষ্ট্বা তু পাণ্ডবীং সেনাং ধার্তরাষ্ট্রাঃ পরাঙ্মুখীম্
অভিজগ্মুর্মহেষ্বাসা রুবন্তো ভৈরবান্রবান্
56.46
দুর্যোধনো হি রাজেন্দ্র মুদা পরময়া যুতঃ
বাদয়ামাস সংহৃষ্টো নানাবাদ্যানি সর্বশঃ
56.47
পাঞ্চালাপি মহেষ্বাসা ভগ্না ভগ্না নরোত্তমাঃ
ন্যবর্তন্ত যথা শূরা মৃত্যুং কৃত্বা নিবর্তনম্
56.48
তান্নিবৃত্তান্রণে শূরান্রাধেয়ঃ শত্রুতাপনঃ
অনেকশো মহারাজ বভঞ্জ পুরুষর্ষভঃ
56.49
তত্র ভারত কর্ণেন পাঞ্চালা বিংশতী রথাঃ
নিহতাঃ সাদয়ঃ ক্রোধাচ্চেদয়শ্চ পরঃশতাঃ
56.50
কৃত্বা শূন্যান্রথোপস্থান্বাজিপৃষ্ঠাংশ্চ ভারত
নির্মনুষ্যান্গজস্কন্ধান্পাদাতাংশ্চৈব বিদ্রুতান্
56.51
আদিত্য ইব মধ্যাহ্নে দুর্নিরীক্ষ্যঃ পরংতপঃ
কালান্তকবপুঃ ক্রূরঃ সূতপুত্রশ্চচার হ
56.52
এবমেতান্মহারাজ নরবাজিরথদ্বিপান্
হত্বা তস্থৌ মহেষ্বাসঃ কর্ণোঽরিগণসূদনঃ
56.53
যথা ভূতগণান্হত্বা কালস্তিষ্ঠেন্মহাবলঃ
তথা স সোমকান্হত্বা তস্থাবেকো মহারথঃ
56.54
তত্রাদ্ভুতমপশ্যাম পাঞ্চালানাং পরাক্রমম্
বধ্যমানাপি কর্ণেন নাজহূ রণমূর্ধনি
56.55
রাজা দুঃশাসনশ্চৈব কৃপঃ শারদ্বতস্তথা
অশ্বত্থামা কৃতবর্মা শকুনিশ্চাপি সৌবলঃ
ন্যহনন্পাণ্ডবীং সেনাং শতশোঽথ সহস্রশঃ
56.56
কর্ণপুত্রৌ চ রাজেন্দ্র ভ্রাতরৌ সত্যবিক্রমৌ
অনাশয়েতাং বলিনঃ পাঞ্চালান্বৈ ততস্ততঃ
তত্র যুদ্ধং তদা হ্যাসীত্ক্রূরং বিশসনং মহৎ
56.57
তথৈব পাণ্ডবাঃ শূরা ধৃষ্টদ্যুম্নশিখণ্ডিনৌ
দ্রৌপদেয়াশ্চ সংক্রুদ্ধা অভ্যঘ্নংস্তাবকং বলম্
56.58
এবমেষ ক্ষয়ো বৃত্তঃ পাণ্ডবানাং ততস্ততঃ
তাবকানামপি রণে ভীমং প্রাপ্য মহাবলম্