Utshovঅধ্যায় 55
55.1
সংজয় উবাচ
শ্রুত্বা চ রথনির্ঘোষং সিংহনাদং চ সংয়ুগে
অর্জুনঃ প্রাহ গোবিন্দং শীঘ্রং চোদয় বাজিনঃ
55.2
অর্জুনস্য বচঃ শ্রুত্বা গোবিন্দোঽর্জুনমব্রবীৎ
এষ গচ্ছামি সুক্ষিপ্রং যত্র ভীমো ব্যবস্থিতঃ
55.3
আয়ান্তমশ্বৈর্হিমশঙ্খবর্ণৈঃ; সুবর্ণমুক্তামণিজালনদ্ধৈঃ
জম্ভং জিঘাংসুং প্রগৃহীতবজ্রং; জয়ায় দেবেন্দ্রমিবোগ্রমন্যুম্
55.4
রথাশ্বমাতঙ্গপদাতিসংঘা; বাণস্বনৈর্নেমিখুরস্বনৈশ্চ
সংনাদয়ন্তো বসুধাং দিশশ্চ; ক্রুদ্ধা নৃসিংহা জয়মভ্যুদীয়ুঃ
55.5
তেষাং চ পার্থস্য মহত্তদাসী;দ্দেহাসুপাপ্মক্ষপণং সুয়ুদ্ধম্
ত্রৈলোক্যহেতোরসুরৈর্যথাসী;দ্দেবস্য বিষ্ণোর্জয়তাং বরস্য
55.6
তৈরস্তমুচ্চাবচমায়ুধৌঘ;মেকঃ প্রচিচ্ছেদ কিরীটমালী
ক্ষুরার্ধচন্দ্রৈর্নিশিতৈশ্চ বাণৈঃ; শিরাংসি তেষাং বহুধা চ বাহূন্
55.7
ছত্রাণি বালব্যজনানি কেতূ;নশ্বান্রথান্পত্তিগণান্দ্বিপাংশ্চ
তে পেতুরুর্ব্যাং বহুধা বিরূপা; বাতপ্রভগ্নানি যথা বনানি
55.8
সুবর্ণজালাবততা মহাগজাঃ; সবৈজয়ন্তীধ্বজয়োধকল্পিতাঃ
সুবর্ণপুঙ্খৈরিষুভিঃ সমাচিতা;শ্চকাশিরে প্রজ্বলিতা যথাচলাঃ
55.9
বিদার্য নাগাংশ্চ রথাংশ্চ বাজিনঃ; শরোত্তমৈর্বাসববজ্রসংনিভৈঃ
দ্রুতং যয়ৌ কর্ণজিঘাংসয়া তথা; যথা মরুত্বান্বলভেদনে পুরা
55.10
ততঃ স পুরুষব্যাঘ্রঃ সূতসৈন্যমরিংদম
প্রবিবেশ মহাবাহুর্মকরঃ সাগরং যথা
55.11
তং দৃষ্ট্বা তাবকা রাজন্রথপত্তিসমন্বিতাঃ
গজাশ্বসাদিবহুলাঃ পাণ্ডবং সমুপাদ্রবন্
55.12
তত্রাভিদ্রবতাং পার্থমারাবঃ সুমহানভূৎ
সাগরস্যেব মত্তস্য যথা স্যাত্সলিলস্বনঃ
55.13
তে তু তং পুরুষব্যাঘ্রং ব্যাঘ্রা ইব মহারথাঃ
অভ্যদ্রবন্ত সংগ্রামে ত্যক্ত্বা প্রাণকৃতং ভয়ম্
55.14
তেষামাপততাং তত্র শরবর্ষাণি মুঞ্চতাম্
অর্জুনো ব্যধমত্সৈন্যং মহাবাতো ঘনানিব
55.15
তেঽর্জুনং সহিতা ভূত্বা রথবংশৈঃ প্রহারিণঃ
অভিয়ায় মহেষ্বাসা বিব্যধুর্নিশিতৈঃ শরৈঃ
55.16
ততোঽর্জুনঃ সহস্রাণি রথবারণবাজিনাম্
প্রেষয়ামাস বিশিখৈর্যমস্য সদনং প্রতি
55.17
তে বধ্যমানাঃ সমরে পার্থচাপচ্যুতৈঃ শরৈঃ
তত্র তত্র স্ম লীয়ন্তে ভয়ে জাতে মহারথাঃ
55.18
তেষাং চতুঃশতান্বীরান্যতমানান্মহারথান্
অর্জুনো নিশিতৈর্বাণৈরনয়দ্যমসাদনম্
55.19
তে বধ্যমানাঃ সমরে নানালিঙ্গৈঃ শিতৈঃ শরৈঃ
অর্জুনং সমভিত্যজ্য দুদ্রুবুর্বৈ দিশো ভয়াৎ
55.20
তেষাং শব্দো মহানাসীদ্দ্রবতাং বাহিনীমুখে
মহৌঘস্যেব ভদ্রং তে গিরিমাসাদ্য দীর্যতঃ
55.21
তাং তু সেনাং ভৃশং বিদ্ধ্বা দ্রাবয়িত্বার্জুনঃ শরৈঃ
প্রায়াদভিমুখঃ পার্থঃ সূতানীকানি মারিষ
55.22
তস্য শব্দো মহানাসীত্পরানভিমুখস্য বৈ
গরুডস্যেব পততঃ পন্নগার্থে যথা পুরা
55.23
তং তু শব্দমভিশ্রুত্য ভীমসেনো মহাবলঃ
বভূব পরমপ্রীতঃ পার্থদর্শনলালসঃ
55.24
শ্রুত্বৈব পার্থমায়ান্তং ভীমসেনঃ প্রতাপবান্
ত্যক্ত্বা প্রাণান্মহারাজ সেনাং তব মমর্দ হ
55.25
স বায়ুবেগপ্রতিমো বায়ুবেগসমো জবে
বায়ুবদ্ব্যচরদ্ভীমো বায়ুপুত্রঃ প্রতাপবান্
55.26
তেনার্দ্যমানা রাজেন্দ্র সেনা তব বিশাং পতে
ব্যভ্রাম্যত মহারাজ ভিন্না নৌরিব সাগরে
55.27
তাং তু সেনাং তদা ভীমো দর্শয়ন্পাণিলাঘবম্
শরৈরবচকর্তোগ্রৈঃ প্রেষয়িষ্যন্যমক্ষয়ম্
55.28
তত্র ভারত ভীমস্য বলং দৃষ্ট্বাতিমানুষম্
ব্যত্রস্যন্ত রণে যোধাঃ কালস্যেব যুগক্ষয়ে
55.29
তথার্দিতান্ভীমবলান্ভীমসেনেন ভারত
দৃষ্ট্বা দুর্যোধনো রাজা ইদং বচনমব্রবীৎ
55.30
সৈনিকান্স মহেষ্বাসো যোধাংশ্চ ভরতর্ষভ
সমাদিশদ্রণে সর্বান্হত ভীমমিতি স্ম হ
তস্মিন্হতে হতং মন্যে সর্বসৈন্যমশেষতঃ
55.31
প্রতিগৃহ্য চ তামাজ্ঞাং তব পুত্রস্য পার্থিবাঃ
ভীমং প্রচ্ছাদয়ামাসুঃ শরবর্ষৈঃ সমন্ততঃ
55.32
গজাশ্চ বহুলা রাজন্নরাশ্চ জয়গৃদ্ধিনঃ
রথা হয়াশ্চ রাজেন্দ্র পরিবব্রুর্বৃকোদরম্
55.33
স তৈঃ পরিবৃতঃ শূরৈঃ শূরো রাজন্সমন্ততঃ
শুশুভে ভরতশ্রেষ্ঠ নক্ষত্রৈরিব চন্দ্রমাঃ
55.34
স ররাজ তথা সংখ্যে দর্শনীয়ো নরোত্তমঃ
নির্বিশেষং মহারাজ যথা হি বিজয়স্তথা
55.35
তত্র তে পার্থিবাঃ সর্বে শরবৃষ্টীঃ সমাসৃজন্
ক্রোধরক্তেক্ষণাঃ ক্রূরা হন্তুকামা বৃকোদরম্
55.36
স বিদার্য মহাসেনাং শরৈঃ সংনতপর্বভিঃ
নিশ্চক্রাম রণাদ্ভীমো মত্স্যো জালাদিবাম্ভসি
55.37
হত্বা দশ সহস্রাণি গজানামনিবর্তিনাম্
নৃণাং শতসহস্রে দ্বে দ্বে শতে চৈব ভারত
55.38
পঞ্চ চাশ্বসহস্রাণি রথানাং শতমেব চ
হত্বা প্রাস্যন্দয়দ্ভীমো নদীং শোণিতকর্দমাম্
55.39
শোণিতোদাং রথাবর্তাং হস্তিগ্রাহসমাকুলাম্
নরমীনামশ্বনক্রাং কেশশৈবলশাদ্বলাম্
55.40
সংছিন্নভুজনাগেন্দ্রাং বহুরত্নাপহারিণীম্
ঊরুগ্রাহাং মজ্জপঙ্কাং শীর্ষোপলসমাকুলাম্
55.41
ধনুষ্কাশাং শরাবাপাং গদাপরিঘকেতনাম্
যোধব্রাতবতীং সংখ্যে বহন্তীং যমসাদনম্
55.42
ক্ষণেন পুরুষব্যাঘ্রঃ প্রাবর্তয়ত নিম্নগাম্
যথা বৈতরণীমুগ্রাং দুস্তরামকৃতাত্মভিঃ
55.43
যতো যতঃ পাণ্ডবেয়ঃ প্রবৃত্তো রথসত্তমঃ
ততস্ততোঽপাতয়ত যোধাঞ্শতসহস্রশঃ
55.44
এবং দৃষ্ট্বা কৃতং কর্ম ভীমসেনেন সংয়ুগে
দুর্যোধনো মহারাজ শকুনিং বাক্যমব্রবীৎ
55.45
জয় মাতুল সংগ্রামে ভীমসেনং মহাবলম্
অস্মিঞ্জিতে জিতং মন্যে পাণ্ডবেয়ং মহাবলম্
55.46
ততঃ প্রায়ান্মহারাজ সৌবলেয়ঃ প্রতাপবান্
রণায় মহতে যুক্তো ভ্রাতৃভিঃ পরিবারিতঃ
55.47
স সমাসাদ্য সংগ্রামে ভীমং ভীমপরাক্রমম্
বারয়ামাস তং বীরো বেলেব মকরালয়ম্
স ন্যবর্তত তং ভীমো বার্যমাণঃ শিতৈঃ শরৈঃ
55.48
শকুনিস্তস্য রাজেন্দ্র বামে পার্শ্বে স্তনান্তরে
প্রেষয়ামাস নারাচান্রুক্মপুঙ্খাঞ্শিলাশিতান্
55.49
বর্ম ভিত্ত্বা তু সৌবর্ণং বাণাস্তস্য মহাত্মনঃ
ন্যমজ্জন্ত মহারাজ কঙ্কবর্হিণবাসসঃ
55.50
সোঽতিবিদ্ধো রণে ভীমঃ শরং হেমবিভূষিতম্
প্রেষয়ামাস সহসা সৌবলং প্রতি ভারত
55.51
তমায়ান্তং শরং ঘোরং শকুনিঃ শত্রুতাপনঃ
চিচ্ছেদ শতধা রাজন্কৃতহস্তো মহাবলঃ
55.52
তস্মিন্নিপতিতে ভূমৌ ভীমঃ ক্রুদ্ধো বিশাং পতে
ধনুশ্চিচ্ছেদ ভল্লেন সৌবলস্য হসন্নিব
55.53
তদপাস্য ধনুশ্ছিন্নং সৌবলেয়ঃ প্রতাপবান্
অন্যদাদত্ত বেগেন ধনুর্ভল্লাংশ্চ ষোডশ
55.54
তৈস্তস্য তু মহারাজ ভল্লৈঃ সংনতপর্বভিঃ
চতুর্ভিঃ সারথিং হ্যার্চ্ছদ্ভীমং পঞ্চভিরেব চ
55.55
ধ্বজমেকেন চিচ্ছেদ ছত্রং দ্বাভ্যাং বিশাং পতে
চতুর্ভিশ্চতুরো বাহান্বিব্যাধ সুবলাত্মজঃ
55.56
ততঃ ক্রুদ্ধো মহারাজ ভীমসেনঃ প্রতাপবান্
শক্তিং চিক্ষেপ সমরে রুক্মদণ্ডাময়স্ময়ীম্
55.57
সা ভীমভুজনির্মুক্তা নাগজিহ্বেব চঞ্চলা
নিপপাত রথে তূর্ণং সৌবলস্য মহাত্মনঃ
55.58
ততস্তামেব সংগৃহ্য শক্তিং কনকভূষণাম্
ভীমসেনায় চিক্ষেপ ক্রুদ্ধরূপো বিশাং পতে
55.59
সা নির্ভিদ্য ভুজং সব্যং পাণ্ডবস্য মহাত্মনঃ
পপাত চ ততো ভূমৌ যথা বিদ্যুন্নভশ্চ্যুতা
55.60
অথোত্ক্রুষ্টং মহারাজ ধার্তরাষ্ট্রৈঃ সমন্ততঃ
ন তু তং মমৃষে ভীমঃ সিংহনাদং তরস্বিনাম্
55.61
স সংগৃহ্য ধনুঃ সজ্যং ত্বরমাণো মহারথঃ
মুহূর্তাদিব রাজেন্দ্র ছাদয়ামাস সায়কৈঃ
সৌবলস্য বলং সংখ্যে ত্যক্ত্বাত্মানং মহাবলঃ
55.62
তস্যাশ্বাংশ্চতুরো হত্বা সূতং চৈব বিশাং পতে
ধ্বজং চিচ্ছেদ ভল্লেন ত্বরমাণঃ পরাক্রমী
55.63
হতাশ্বং রথমুত্সৃজ্য ত্বরমাণো নরোত্তমঃ
তস্থৌ বিস্ফারয়ংশ্চাপং ক্রোধরক্তেক্ষণঃ শ্বসন্
শরৈশ্চ বহুধা রাজন্ভীমমার্চ্ছত্সমন্ততঃ
55.64
প্রতিহত্য তু বেগেন ভীমসেনঃ প্রতাপবান্
ধনুশ্চিচ্ছেদ সংক্রুদ্ধো বিব্যাধ চ শিতৈঃ শরৈঃ
55.65
সোঽতিবিদ্ধো বলবতা শত্রুণা শত্রুকর্শনঃ
নিপপাত ততো ভূমৌ কিংচিত্প্রাণো নরাধিপ
55.66
ততস্তং বিহ্বলং জ্ঞাত্বা পুত্রস্তব বিশাং পতে
অপোবাহ রথেনাজৌ ভীমসেনস্য পশ্যতঃ
55.67
রথস্থে তু নরব্যাঘ্রে ধার্তরাষ্ট্রাঃ পরাঙ্মুখাঃ
প্রদুদ্রুবুর্দিশো ভীতা ভীমাজ্জাতে মহাভয়ে
55.68
সৌবলে নির্জিতে রাজন্ভীমসেনেন ধন্বিনা
ভয়েন মহতা ভগ্নঃ পুত্রো দুর্যোধনস্তব
অপায়াজ্জবনৈরশ্বৈঃ সাপেক্ষো মাতুলং প্রতি
55.69
পরাঙ্মুখং তু রাজানং দৃষ্ট্বা সৈন্যানি ভারত
বিপ্রজগ্মুঃ সমুত্সৃজ্য দ্বৈরথানি সমন্ততঃ
55.70
তান্দৃষ্ট্বাতিরথান্সর্বান্ধার্তরাষ্ট্রান্পরাঙ্মুখান্
জবেনাভ্যপতদ্ভীমঃ কিরঞ্শরশতান্বহূন্
55.71
তে বধ্যমানা ভীমেন ধার্তরাষ্ট্রাঃ পরাঙ্মুখাঃ
কর্ণমাসাদ্য সমরে স্থিতা রাজন্সমন্ততঃ
স হি তেষাং মহাবীর্যো দ্বীপোঽভূত্সুমহাবলঃ
55.72
ভিন্ননৌকা যথা রাজন্দ্বীপমাসাদ্য নির্বৃতাঃ
ভবন্তি পুরুষব্যাঘ্র নাবিকাঃ কালপর্যয়ে
55.73
তথা কর্ণং সমাসাদ্য তাবকা ভরতর্ষভ
সমাশ্বস্তাঃ স্থিতা রাজন্সংপ্রহৃষ্টাঃ পরস্পরম্
সমাজগ্মুশ্চ যুদ্ধায় মৃত্যুং কৃত্বা নিবর্তনম্