Utshovঅধ্যায় 54
54.1
সংজয় উবাচ
অথ ত্বিদানীং তুমুলে বিমর্দে; দ্বিষদ্ভিরেকো বহুভিঃ সমাবৃতঃ
মহাভয়ে সারথিমিত্যুবাচ; ভীমশ্চমূং বারয়ন্ধার্তরাষ্ট্রীম্
ত্বং সারথে যাহি জবেন বাহৈ;র্নয়াম্যেতান্ধার্তরাষ্ট্রান্যমায়
54.2
সংচোদিতো ভীমসেনেন চৈবং; স সারথিঃ পুত্রবলং ত্বদীয়ম্
প্রায়াত্ততঃ সারথিরুগ্রবেগো; যতো ভীমস্তদ্বলং গন্তুমৈচ্ছৎ
54.3
ততোঽপরে নাগরথাশ্বপত্তিভিঃ; প্রত্যুদ্যয়ুঃ কুরবস্তং সমন্তাৎ
ভীমস্য বাহাগ্র্যমুদারবেগং; সমন্ততো বাণগণৈর্নিজঘ্নুঃ
54.4
ততঃ শরানাপততো মহাত্মা; চিচ্ছেদ বাণৈস্তপনীয়পুঙ্খৈঃ
তে বৈ নিপেতুস্তপনীয়পুঙ্খা; দ্বিধা ত্রিধা ভীমশরৈর্নিকৃত্তাঃ
54.5
ততো রাজন্নাগরথাশ্বয়ূনাং; ভীমাহতানাং তব রাজমধ্যে
ঘোরো নিনাদঃ প্রবভৌ নরেন্দ্র; বজ্রাহতানামিব পর্বতানাম্
54.6
তে বধ্যমানাশ্চ নরেন্দ্রমুখ্যা; নির্ভিন্না বৈ ভীমসেনপ্রবেকৈঃ
ভীমং সমন্তাত্সমরেঽধ্যরোহ;ন্বৃক্ষং শকুন্তা ইব পুষ্পহেতোঃ
54.7
ততোঽভিপাতং তব সৈন্যমধ্যে; প্রাদুশ্চক্রে বেগমিবাত্তবেগঃ
যথান্তকালে ক্ষপয়ন্দিধক্ষু;র্ভূতান্তকৃত্কাল ইবাত্তদণ্ডঃ
54.8
তস্যাতিবেগস্য রণেঽতিবেগং; নাশক্নুবন্ধারয়িতুং ত্বদীয়াঃ
ব্যাত্তাননস্যাপততো যথৈব; কালস্য কালে হরতঃ প্রজা বৈ
54.9
ততো বলং ভারত ভারতানাং; প্রদহ্যমানং সমরে মহাত্মন্
ভীতং দিশোঽকীর্যত ভীমনুন্নং; মহানিলেনাভ্রগণো যথৈব
54.10
ততো ধীমান্সারথিমব্রবীদ্বলী; স ভীমসেনঃ পুনরেব হৃষ্টঃ
সূতাভিজানীহি পরান্স্বকান্বা; রথান্ধ্বজাংশ্চাপততঃ সমেতান্
যুধ্যন্নহং নাভিজানামি কিংচি;ন্মা সৈন্যং স্বং ছাদয়িষ্যে পৃষত্কৈঃ
54.11
অরীন্বিশোকাভিনিরীক্ষ্য সর্বতো; মনস্তু চিন্তা প্রদুনোতি মে ভৃশম্
রাজাতুরো নাগমদ্যত্কিরীটী; বহূনি দুঃখান্যভিজাতোঽস্মি সূত
54.12
এতদ্দুঃখং সারথে ধর্মরাজো; যন্মাং হিত্বা যাতবাঞ্শত্রুমধ্যে
নৈনং জীবন্নাপি জানাম্যজীব;ন্বীভত্সুং বা তন্মমাদ্যাতিদুঃখম্
54.13
সোঽহং দ্বিষত্সৈন্যমুদগ্রকল্পং; বিনাশয়িষ্যে পরমপ্রতীতঃ
এতান্নিহত্যাজিমধ্যে সমেতা;ন্প্রীতো ভবিষ্যামি সহ ত্বয়াদ্য
54.14
সর্বাংস্তূণীরান্মার্গণান্বান্ববেক্ষ্য; কিং শিষ্টং স্যাত্সায়কানাং রথে মে
কা বা জাতিঃ কিং প্রমাণং চ তেষাং; জ্ঞাত্বা ব্যক্তং তন্মমাচক্ষ্ব সূত
54.15
বিশোক উবাচ
ষণ্মার্গণানাময়ুতানি বীর; ক্ষুরাশ্চ ভল্লাশ্চ তথায়ুতাখ্যাঃ
নারাচানাং দ্বে সহস্রে তু বীর; ত্রীণ্যেব চ প্রদরাণাং চ পার্থ
54.16
অস্ত্যায়ুধং পাণ্ডবেয়াবশিষ্টং; ন যদ্বহেচ্ছকটং ষড্গবীয়ম্
এতদ্বিদ্বন্মুঞ্চ সহস্রশোঽপি; গদাসিবাহুদ্রবিণং চ তেঽস্তি
54.17
ভীম উবাচ
সূতাদ্যেমং পশ্য ভীমপ্রমুক্তৈঃ; সংভিন্দদ্ভিঃ পার্থিবানাশুবেগৈঃ
উগ্রৈর্বাণৈরাহবং ঘোররূপং; নষ্টাদিত্যং মৃত্যুলোকেন তুল্যম্
54.18
অদ্যৈব তদ্বিদিতং পার্থিবানাং; ভবিষ্যতি আকুমারং চ সূত
নিমগ্নো বা সমরে ভীমসেন; একঃ কুরূন্বা সমরে বিজেতা
54.19
সর্বে সংখ্যে কুরবো নিষ্পতন্তু; মাং বা লোকাঃ কীর্তয়ন্ত্বাকুমারম্
সর্বানেকস্তানহং পাতয়িষ্যে; তে বা সর্বে ভীমসেনং তুদন্তু
54.20
আশাস্তারঃ কর্ম চাপ্যুত্তমং বা; তন্মে দেবাঃ কেবলং সাধয়ন্তু
আয়াত্বিহাদ্যার্জুনঃ শত্রুঘাতী; শক্রস্তূর্ণং যজ্ঞ ইবোপহূতঃ
54.21
ঈক্ষস্বৈতাং ভারতীং দীর্যমাণা;মেতে কস্মাদ্বিদ্রবন্তে নরেন্দ্রাঃ
ব্যক্তং ধীমান্সব্যসাচী নরাগ্র্যঃ; সৈন্যং হ্যেতচ্ছাদয়ত্যাশু বাণৈঃ
54.22
পশ্য ধ্বজাংশ্চ দ্রবতো বিশোক; নাগান্হয়ান্পত্তিসংঘাংশ্চ সংখ্যে
রথান্বিশীর্ণাঞ্শরশক্তিতাডিতা;ন্পশ্যস্বৈতান্রথিনশ্চৈব সূত
54.23
আপূর্যতে কৌরবী চাপ্যভীক্ষ্ণং; সেনা হ্যসৌ সুভৃশং হন্যমানা
ধনংজয়স্যাশনিতুল্যবেগৈ;র্গ্রস্তা শরৈর্বর্হিসুবর্ণবাজৈঃ
54.24
এতে দ্রবন্তি স্ম রথাশ্বনাগাঃ; পদাতিসংঘানবমর্দয়ন্তঃ
সংমুহ্যমানাঃ কৌরবাঃ সর্ব এব; দ্রবন্তি নাগা ইব দাবভীতাঃ
হাহাকৃতাশ্চৈব রণে বিশোক; মুঞ্চন্তি নাদান্বিপুলান্গজেন্দ্রাঃ
54.25
বিশোক উবাচ
সর্বে কামাঃ পাণ্ডব তে সমৃদ্ধাঃ; কপিধ্বজো দৃশ্যতে হস্তিসৈন্যে
নীলাদ্ধনাদ্বিদ্যুতমুচ্চরন্তীং; তথাপশ্যং বিস্ফুরদ্বৈ ধনুস্তৎ
54.26
কপির্হ্যসৌ বীক্ষ্যতে সর্বতো বৈ; ধ্বজাগ্রমারুহ্য ধনংজয়স্য
দিবাকরাভো মণিরেষ দিব্যো; বিভ্রাজতে চৈব কিরীটসংস্থঃ
54.27
পার্শ্বে ভীমং পাণ্ডুরাভ্রপ্রকাশং; পশ্যেমং ত্বং দেবদত্তং সুঘোষম্
অভীশুহস্তস্য জনার্দনস্য; বিগাহমানস্য চমূং পরেষাম্
54.28
রবিপ্রভং বজ্রনাভং ক্ষুরান্তং; পার্শ্বে স্থিতং পশ্য জনার্দনস্য
চক্রং যশো বর্ধয়ত্কেশবস্য; সদার্চিতং যদুভিঃ পশ্য বীর
54.29
ভীম উবাচ
দদামি তে গ্রামবরাংশ্চতুর্দশ; প্রিয়াখ্যানে সারথে সুপ্রসন্নঃ
দসীশতং চাপি রথাংশ্চ বিংশতিং; যদর্জুনং বেদয়সে বিশোক