অধ্যায় 53

53.1

সংজয় উবাচ
তেষামনীকানি বৃহদ্ধ্বজানি; রণে সমৃদ্ধানি সমাগতানি
গর্জন্তি ভেরীনিনদোন্মুখানি; মেঘৈর্যথা মেঘগণাস্তপান্তে

মহাগজাভ্রাকুলমস্ত্রতোয়ং; বাদিত্রনেমীতলশব্দবচ্চ
হিরণ্যচিত্রায়ুধবৈদ্যুতং চ; মহারথৈরাবৃতশব্দবচ্চ

তদ্ভীমবেগং রুধিরৌঘবাহি; খড্গাকুলং ক্ষত্রিয়জীববাহি
অনার্তবং ক্রূরমনিষ্টবর্ষং; বভূব তত্সংহরণং প্রজানাম্

রথান্সসূতান্সহয়ান্গজাংশ্চ; সর্বানরীন্মৃত্যুবশং শরৌঘৈঃ
নিন্যে হয়াংশ্চৈব তথা সসাদী;ন্পদাতিসংঘাংশ্চ তথৈব পার্থঃ

কৃপঃ শিখণ্ডী চ রণে সমেতৌ; দুর্যোধনং সাত্যকিরভ্যগচ্ছত
শ্রুতশ্রবা দ্রোণসুতেন সার্ধং; যুধামন্যুশ্চিত্রসেনেন চাপি

কর্ণস্য পুত্রস্তু রথী সুষেণং; সমাগতঃ সৃঞ্জয়াংশ্চোত্তমৌজাঃ
গান্ধাররাজং সহদেবঃ ক্ষুধার্তো; মহর্ষভং সিংহ ইবাভ্যধাবৎ

শতানীকো নাকুলিঃ কর্ণপুত্রং; যুবা যুবানং বৃষসেনং শরৌঘৈঃ
সমার্দয়ত্কর্ণসুতশ্চ বীরঃ; পাঞ্চালেয়ং শরবর্ষৈরনেকৈঃ

রথর্ষভঃ কৃতবর্মাণমার্চ্ছ;ন্মাদ্রীপুত্রো নকুলশ্চিত্রয়োধী
পাঞ্চালানামধিপো যাজ্ঞসেনিঃ; সেনাপতিং কর্ণমার্চ্ছত্সসৈন্যম্

দুঃশাসনো ভারত ভারতী চ; সংশপ্তকানাং পৃতনা সমৃদ্ধা
ভীমং রণে শস্ত্রভৃতাং বরিষ্ঠং; তদা সমার্চ্ছত্তমসহ্যবেগম্

কর্ণাত্মজং তত্র জঘান শূর;স্তথাচ্ছিনচ্চোত্তমৌজাঃ প্রসহ্য
তস্যোত্তমাঙ্গং নিপপাত ভূমৌ; নিনাদয়দ্গাং নিনদেন খং চ

সুষেণশীর্ষং পতিতং পৃথিব্যাং; বিলোক্য কর্ণোঽথ তদার্তরূপঃ
ক্রোধাদ্ধয়াংস্তস্য রথং ধ্বজং চ; বাণৈঃ সুধারৈর্নিশিতৈর্ন্যকৃন্তৎ

স তূত্তমৌজা নিশিতৈঃ পৃষত্কৈ;র্বিব্যাধ খড্গেন চ ভাস্বরেণ
পার্ষ্ণিং হয়াংশ্চৈব কৃপস্য হত্বা; শিখণ্ডিবাহং স ততোঽভ্যরোহৎ

কৃপং তু দৃষ্ট্বা বিরথং রথস্থো; নৈচ্ছচ্ছরৈস্তাডয়িতুং শিখণ্ডী
তং দ্রৌণিরাবার্য রথং কৃপং স্ম; সমুজ্জহ্রে পঙ্কগতাং যথা গাম্

হিরণ্যবর্মা নিশিতৈঃ পৃষত্কৈ;স্তবাত্মজানামনিলাত্মজো বৈ
অতাপয়ত্সৈন্যমতীব ভীমঃ; কালে শুচৌ মধ্যগতো যথার্কঃ