Utshovঅধ্যায় 52
52.1
সংজয় উবাচ
স কেশবস্য বীভত্সুঃ শ্রুত্বা ভারত ভাষিতম্
বিশোকঃ সংপ্রহৃষ্টশ্চ ক্ষণেন সমপদ্যত
52.2
ততো জ্যামনুমৃজ্যাশু ব্যাক্ষিপদ্গাণ্ডিবং ধনুঃ
দধ্রে কর্ণবিনাশায় কেশবং চাভ্যভাষত
52.3
ত্বয়া নাথেন গোবিন্দ ধ্রুব এষ জয়ো মম
প্রসন্নো যস্য মেঽদ্য ত্বং ভূতভব্যভবত্প্রভুঃ
52.4
ত্বত্সহায়ো হ্যহং কৃষ্ণ ত্রীঁল্লোকান্বৈ সমাগতান্
প্রাপয়েয়ং পরং লোকং কিমু কর্ণং মহারণে
52.5
পশ্যামি দ্রবতীং সেনাং পাঞ্চালানাং জনার্দন
পশ্যামি কর্ণং সমরে বিচরন্তমভীতবৎ
52.6
ভার্গবাস্ত্রং চ পশ্যামি বিচরন্তং সমন্ততঃ
সৃষ্টং কর্ণেন বার্ষ্ণেয় শক্রেণেব মহাশনিম্
52.7
অয়ং খলু স সংগ্রামো যত্র কৃষ্ণ ময়া কৃতম্
কথয়িষ্যন্তি ভূতানি যাবদ্ভূমির্ধরিষ্যতি
52.8
অদ্য কৃষ্ণ বিকর্ণা মে কর্ণং নেষ্যন্তি মৃত্যবে
গাণ্ডীবমুক্তাঃ ক্ষিণ্বন্তো মম হস্তপ্রচোদিতাঃ
52.9
অদ্য রাজা ধৃতরাষ্ট্রঃ স্বাং বুদ্ধিমবমংস্যতে
দুর্যোধনমরাজ্যার্হং যয়া রাজ্যেঽভ্যষেচয়ৎ
52.10
অদ্য রাজ্যাত্সুখাচ্চৈব শ্রিয়ো রাষ্ট্রাত্তথা পুরাৎ
পুত্রেভ্যশ্চ মহাবাহো ধৃতরাষ্ট্রো বিয়োক্ষ্যতে
52.11
অদ্য দুর্যোধনো রাজা জীবিতাচ্চ নিরাশকঃ
ভবিষ্যতি হতে কর্ণে কৃষ্ণ সত্যং ব্রবীমি তে
52.12
অদ্য দৃষ্ট্বা ময়া কর্ণং শরৈর্বিশকলীকৃতম্
স্মরতাং তব বাক্যানি শমং প্রতি জনেশ্বরঃ
52.13
অদ্যাসৌ সৌবলঃ কৃষ্ণ গ্লহং জানাতু বৈ শরান্
দুরোদরং চ গাণ্ডীবং মণ্ডলং চ রথং মম
52.14
যোঽসৌ রণে নরং নান্যং পৃথিব্যামভিমন্যতে
তস্যাদ্য সূতপুত্রস্য ভূমিঃ পাস্যতি শোণিতম্
গাণ্ডীবসৃষ্টা দাস্যন্তি কর্ণস্য পরমাং গতিম্
52.15
অদ্য তপ্স্যতি রাধেয়ঃ পাঞ্চালীং যত্তদাব্রবীৎ
সভামধ্যে বচঃ ক্রূরং কুত্সয়ন্পাণ্ডবান্প্রতি
52.16
যে বৈ ষণ্ঢতিলাস্তত্র ভবিতারোঽদ্য তে তিলাঃ
হতে বৈকর্তনে কর্ণে সূতপুত্রে দুরাত্মনি
52.17
অহং বঃ পাণ্ডুপুত্রেভ্যস্ত্রাস্যামীতি যদব্রবীৎ
অনৃতং তত্করিষ্যন্তি মামকা নিশিতাঃ শরাঃ
52.18
হন্তাহং পাণ্ডবান্সর্বান্সপুত্রানিতি যোঽব্রবীৎ
তমদ্য কর্ণং হন্তাস্মি মিষতাং সর্বধন্বিনাম্
52.19
যস্য বীর্যে সমাশ্বস্য ধার্তরাষ্ট্রো বৃহন্মনাঃ
অবামন্যত দুর্বুদ্ধির্নিত্যমস্মান্দুরাত্মবান্
তমদ্য কর্ণং রাধেয়ং হন্তাস্মি মধুসূদন
52.20
অদ্য কর্ণে হতে কৃষ্ণ ধার্তরাষ্ট্রাঃ সরাজকাঃ
বিদ্রবন্তু দিশো ভীতাঃ সিংহত্রস্তা মৃগা ইব
52.21
অদ্য দুর্যোধনো রাজা পৃথিবীমন্ববেক্ষতাম্
হতে কর্ণে ময়া সংখ্যে সপুত্রে সসুহৃজ্জনে
52.22
অদ্য কর্ণং হতং দৃষ্ট্বা ধার্তরাষ্ট্রোঽত্যমর্ষণঃ
জানাতু মাং রণে কৃষ্ণ প্রবরং সর্বধন্বিনাম্
52.23
অদ্যাহমনৃণঃ কৃষ্ণ ভবিষ্যামি ধনুর্ভৃতাম্
ক্রোধস্য চ কুরূণাং চ শরাণাং গাণ্ডিবস্য চ
52.24
অদ্য দুঃখমহং মোক্ষ্যে ত্রয়োদশসমার্জিতম্
হত্বা কর্ণং রণে কৃষ্ণ শম্বরং মঘবানিব
52.25
অদ্য কর্ণে হতে যুদ্ধে সোমকানাং মহারথাঃ
কৃতং কার্যং চ মন্যন্তাং মিত্রকার্যেপ্সবো যুধি
52.26
ন জানে চ কথং প্রীতিঃ শৈনেয়স্যাদ্য মাধব
ভবিষ্যতি হতে কর্ণে ময়ি চাপি জয়াধিকে
52.27
অহং হত্বা রণে কর্ণং পুত্রং চাস্য মহারথম্
প্রীতিং দাস্যামি ভীমস্য যময়োঃ সাত্যকেরপি
52.28
ধৃষ্টদ্যুম্নশিখণ্ডিভ্যাং পাঞ্চালানাং চ মাধব
অধ্যানৃণ্যং গমিষ্যামি হত্বা কর্ণং মহারণে
52.29
অদ্য পশ্যন্তু সংগ্রামে ধনংজয়মমর্ষণম্
যুধ্যন্তং কৌরবান্সংখ্যে পাতয়ন্তং চ সূতজম্
ভবত্সকাশে বক্ষ্যে চ পুনরেবাত্মসংস্তবম্
52.30
ধনুর্বেদে মত্সমো নাস্তি লোকে; পরাক্রমে বা মম কোঽস্তি তুল্যঃ
কো বাপ্যন্যো মত্সমোঽস্তি ক্ষমায়াং; তথা ক্রোধে সদৃশোঽন্যো ন মেঽস্তি
52.31
অহং ধনুষ্মানসুরান্সুরাংশ্চ; সর্বাণি ভূতানি চ সংগতানি
স্ববাহুবীর্যাদ্গময়ে পরাভবং; মত্পৌরুষং বিদ্ধি পরঃ পরেভ্যঃ
52.32
শরার্চিষা গাণ্ডিবেনাহমেকঃ; সর্বান্কুরূন্বাহ্লিকাংশ্চাভিপত্য
হিমাত্যয়ে কক্ষগতো যথাগ্নি;স্তহা দহেয়ং সগণান্প্রসহ্য
52.33
পাণৌ পৃষত্কা লিখিতা মমৈতে; ধনুশ্চ সব্যে নিহিতং সবাণম্
পাদৌ চ মে সরথৌ সধ্বজৌ চ; ন মাদৃশং যুদ্ধগতং জয়ন্তি