Utshovঅধ্যায় 51
51.1
সংজয় উবাচ
ততঃ পুনরমেয়াত্মা কেশবোঽর্জুনমব্রবীৎ
কৃতসংকল্পমায়স্তং বধে কর্ণস্য সর্বশঃ
51.2
অদ্য সপ্তদশাহানি বর্তমানস্য ভারত
বিনাশস্যাতিঘোরস্য নরবারণবাজিনাম্
51.3
ভূত্বা হি বিপুলা সেনা তাবকানাং পরৈঃ সহ
অন্যোন্যং সমরে প্রাপ্য কিংচিচ্ছেষা বিশাং পতে
51.4
ভূত্বা হি কৌরবাঃ পার্থ প্রভূতগজবাজিনঃ
ত্বাং বৈ শত্রুং সমাসাদ্য বিনষ্টা রণমূর্ধনি
51.5
এতে চ সর্বে পাঞ্চালাঃ সৃঞ্জয়াশ্চ সহান্বয়াঃ
ত্বাং সমাসাদ্য দুর্ধর্ষং পাণ্ডবাশ্চ ব্যবস্থিতাঃ
51.6
পাঞ্চালৈঃ পাণ্ডবৈর্মত্স্যৈঃ কারূষৈশ্চেদিকেকয়ৈঃ
ত্বয়া গুপ্তৈরমিত্রঘ্ন কৃতঃ শত্রুগণক্ষয়ঃ
51.7
কো হি শক্তো রণে জেতুং কৌরবাংস্তাত সংগতান্
অন্যত্র পাণ্ডবান্যুদ্ধে ত্বয়া গুপ্তান্মহারথান্
51.8
ত্বং হি শক্তো রণে জেতুং সসুরাসুরমানুষান্
ত্রীঁল্লোকান্সমমুদ্যুক্তান্কিং পুনঃ কৌরবং বলম্
51.9
ভগদত্তং হি রাজানং কোঽন্যঃ শক্তস্ত্বয়া বিনা
জেতুং পুরুষশার্দূল যোঽপি স্যাদ্বাসবোপমঃ
51.10
তথেমাং বিপুলাং সেনাং গুপ্তাং পার্থ ত্বয়ানঘ
ন শেকুঃ পার্থিবাঃ সর্বে চক্ষুর্ভিরভিবীক্ষিতুম্
51.11
তথৈব সততং পার্থ রক্ষিতাভ্যাং ত্বয়া রণে
ধৃষ্টদ্যুম্নশিখণ্ডিভ্যাং ভীষ্মদ্রোণৌ নিপাতিতৌ
51.12
কো হি শক্তো রণে পার্থ পাঞ্চালানাং মহারথৌ
ভীষ্মদ্রোণৌ যুধা জেতুং শক্রতুল্যপরাক্রমৌ
51.13
কো হি শাংতনবং সংখ্যে দ্রোণং বৈকর্তনং কৃপম্
দ্রৌণিং চ সৌমদত্তিং চ কৃতবর্মাণমেব চ
সৈন্ধবং মদ্ররাজং চ রাজানং চ সুয়োধনম্
51.14
বীরান্কৃতাস্ত্রান্সমরে সর্বানেবানুবর্তিনঃ
অক্ষৌহিণীপতীনুগ্রান্সংরব্ধান্যুদ্ধদুর্মদান্
51.15
শ্রেণ্যশ্চ বহুলাঃ ক্ষীণাঃ প্রদীর্ণাশ্বরথদ্বিপাঃ
নানাজনপদাশ্চোগ্রাঃ ক্ষত্রিয়াণামমর্ষিণাম্
51.16
গোবাসদাসমীয়ানাং বসাতীনাং চ ভারত
ব্রাত্যানাং বাটধানানাং ভোজানাং চাপি মানিনাম্
51.17
উদীর্ণাশ্চ মহাসেনা ব্রহ্মক্ষত্রস্য ভারত
ত্বাং সমাসাদ্য নিধনং গতাঃ সাশ্বরথদ্বিপাঃ
51.18
উগ্রাশ্চ ক্রূরকর্মাণস্তুখারা যবনাঃ খশাঃ
দার্বাভিসারা দরদাঃ শকা রমঠতঙ্গণাঃ
51.19
অন্ধ্রকাশ্চ পুলিন্দাশ্চ কিরাতাশ্চোগ্রবিক্রমাঃ
ম্লেচ্ছাশ্চ পার্বতীয়াশ্চ সাগরানূপবাসিনঃ
সংরম্ভিণো যুদ্ধশৌণ্ডা বলিনো দৃব্ধপাণয়ঃ
51.20
এতে সুয়োধনস্যার্থে সংরব্ধাঃ কুরুভিঃ সহ
ন শক্যা যুধি নির্জেতুং ত্বদন্যেন পরংতপ
51.21
ধার্তরাষ্ট্রমুদগ্রং হি ব্যূঢং দৃষ্ট্বা মহাবলম্
যস্য ত্বং ন ভবেস্ত্রাতা প্রতীয়াত্কো নু মানবঃ
51.22
তত্সাগরমিবোদ্ধূতং রজসা সংবৃতং বলম্
বিদার্য পাণ্ডবৈঃ ক্রুদ্ধৈস্ত্বয়া গুপ্তৈর্হতং বিভো
51.23
মাগধানামধিপতির্জয়ত্সেনো মহাবলঃ
অদ্য সপ্তৈব চাহানি হতঃ সংখ্যেঽভিমন্যুনা
51.24
ততো দশ সহস্রাণি গজানাং ভীমকর্মণাম্
জঘান গদয়া ভীমস্তস্য রাজ্ঞঃ পরিচ্ছদম্
ততোঽন্যেঽপি হতা নাগা রথাশ্চ শতশো বলাৎ
51.25
তদেবং সমরে তাত বর্তমানে মহাভয়ে
ভীমসেনং সমাসাদ্য ত্বাং চ পাণ্ডব কৌরবাঃ
সবাজিরথনাগাশ্চ মৃত্যুলোকমিতো গতাঃ
51.26
তথা সেনামুখে তত্র নিহতে পার্থ পাণ্ডবৈঃ
ভীষ্মঃ প্রাসৃজদুগ্রাণি শরবর্ষাণি মারিষ
51.27
স চেদিকাশিপাঞ্চালান্করূষান্মত্স্যকেকয়ান্
শরৈঃ প্রচ্ছাদ্য নিধনমনয়ত্পরুষাস্ত্রবিৎ
51.28
তস্য চাপচ্যুতৈর্বাণৈঃ পরদেহবিদারণৈঃ
পূর্ণমাকাশমভবদ্রুক্মপুঙ্খৈরজিহ্মগৈঃ
51.29
গত্যা দশম্যা তে গত্বা জঘ্নুর্বাজিরথদ্বিপান্
হিত্বা নব গতীর্দুষ্টাঃ স বাণান্ব্যায়তোঽমুচৎ
51.30
দিনানি দশ ভীষ্মেণ নিঘ্নতা তাবকং বলম্
শূন্যাঃ কৃতা রথোপস্থা হতাশ্চ গজবাজিনঃ
51.31
দর্শয়িত্বাত্মনো রূপং রুদ্রোপেন্দ্রসমং যুধি
পাণ্ডবানামনীকানি প্রবিগাহ্য ব্যশাতয়ৎ
51.32
বিনিঘ্নন্পৃথিবীপালাংশ্চেদিপাঞ্চালকেকয়ান্
ব্যদহত্পাণ্ডবীং সেনাং নরাশ্বগজসংকুলাম্
51.33
মজ্জন্তমপ্লবে মন্দমুজ্জিহীর্ষুঃ সুয়োধনম্
তথা চরন্তং সমরে তপন্তমিব ভাস্করম্
ন শেকুঃ সৃঞ্জয়া দ্রষ্টুং তথৈবান্যে মহীক্ষিতঃ
51.34
বিচরন্তং তথা তং তু সংগ্রামে জিতকাশিনম্
সর্বোদ্যোগেন সহসা পাণ্ডবাঃ সমুপাদ্রবন্
51.35
স তু বিদ্রাব্য সমরে পাণ্ডবান্সৃঞ্জয়ানপি
এক এব রণে ভীষ্ম একবীরত্বমাগতঃ
51.36
তং শিখণ্ডী সমাসাদ্য ত্বয়া গুপ্তো মহারথম্
জঘান পুরুষব্যাঘ্রং শরৈঃ সংনতপর্বভিঃ
51.37
স এষ পতিতঃ শেতে শরতল্পে পিতামহঃ
ত্বাং প্রাপ্য পুরুষব্যাঘ্র গৃধ্রঃ প্রাপ্যেব বায়সম্
51.38
দ্রোণঃ পঞ্চ দিনান্যুগ্রো বিধম্য রিপুবাহিনীঃ
কৃত্বা ব্যূহং মহায়ুদ্ধে পাতয়িত্বা মহারথান্
51.39
জয়দ্রথস্য সমরে কৃত্বা রক্ষাং মহারথঃ
অন্তকপ্রতিমশ্চোগ্রাং রাত্রিং যুদ্ধ্বাদহত্প্রজাঃ
51.40
অদ্যেতি দ্বে দিনে বীরো ভারদ্বাজঃ প্রতাপবান্
ধৃষ্টদ্যুম্নং সমাসাদ্য স গতঃ পরমাং গতিম্
51.41
যদি চৈব পরান্যুদ্ধে সূতপুত্রমুখান্রথান্
নাবারয়িষ্যঃ সংগ্রামে ন স্ম দ্রোণো ব্যনঙ্ক্ষ্যত
51.42
ভবতা তু বলং সর্বং ধার্তরাষ্ট্রস্য বারিতম্
ততো দ্রোণো হতো যুদ্ধে পার্ষতেন ধনংজয়
51.43
ক ইবান্যো রণে কুর্যাত্ত্বদন্যঃ ক্ষত্রিয়ো যুধি
যাদৃশং তে কৃতং পার্থ জয়দ্রথবধং প্রতি
51.44
নিবার্য সেনাং মহতীং হত্বা শূরাংশ্চ পার্থিবান্
নিহতঃ সৈন্ধবো রাজা ত্বয়াস্ত্রবলতেজসা
51.45
আশ্চর্যং সিন্ধুরাজস্য বধং জানন্তি পার্থিবাঃ
অনাশ্চর্যং হি তত্ত্বত্তস্ত্বং হি পার্থ মহারথঃ
51.46
ত্বাং হি প্রাপ্য রণে ক্ষত্রমেকাহাদিতি ভারত
তপ্যমানমসংয়ুক্তং ন ভবেদিতি মে মতিঃ
51.47
সেয়ং পার্থ চমূর্ঘোরা ধার্তরাষ্ট্রস্য সংয়ুগে
হতা সসর্ববীরা হি ভীষ্মদ্রোণৌ যদা হতৌ
51.48
শীর্ণপ্রবরয়োধাদ্য হতবাজিনরদ্বিপা
হীনা সূর্যেন্দুনক্ষত্রৈর্দ্যৌরিবাভাতি ভারতী
51.49
বিধ্বস্তা হি রণে পার্থ সেনেয়ং ভীমবিক্রমাৎ
আসুরীব পুরা সেনা শক্রস্যেব পরাক্রমৈঃ
51.50
তেষাং হতাবশিষ্টাস্তু পঞ্চ সন্তি মহারথাঃ
অশ্বত্থামা কৃতবর্মা কর্ণো মদ্রাধিপঃ কৃপঃ
51.51
তাংস্ত্বমদ্য নরব্যাঘ্র হত্বা পঞ্চ মহারথান্
হতামিত্রঃ প্রয়চ্ছোর্বীং রাজ্ঞঃ সদ্বীপপত্তনাম্
51.52
সাকাশজলপাতালাং সপর্বতমহাবনাম্
প্রাপ্নোত্বমিতবীর্যশ্রীরদ্য পার্থো বসুংধরাম্
51.53
এতাং পুরা বিষ্ণুরিব হত্বা দৈতেয়দানবান্
প্রয়চ্ছ মেদিনীং রাজ্ঞে শক্রায়েব যথা হরিঃ
51.54
অদ্য মোদন্তু পাঞ্চালা নিহতেষ্বরিষু ত্বয়া
বিষ্ণুনা নিহতেষ্বেব দানবেয়েষু দেবতাঃ
51.55
যদি বা দ্বিপদাং শ্রেষ্ঠ দ্রোণং মানয়তো গুরুম্
অশ্বত্থাম্নি কৃপা তেঽস্তি কৃপে চাচার্যগৌরবাৎ
51.56
অত্যন্তোপচিতান্বা ত্বং মানয়ন্ভ্রাতৃবান্ধবান্
কৃতবর্মাণমাসাদ্য ন নেষ্যসি যমক্ষয়ম্
51.57
ভ্রাতরং মাতুরাসাদ্য শল্যং মদ্রজনাধিপম্
যদি ত্বমরবিন্দাক্ষ দয়াবান্ন জিঘাংসসি
51.58
ইমং পাপমতিং ক্ষুদ্রমত্যন্তং পাণ্ডবান্প্রতি
কর্ণমদ্য নরশ্রেষ্ঠ জহ্যাশু নিশিতৈঃ শরৈঃ
51.59
এতত্তে সুকৃতং কর্ম নাত্র কিংচিন্ন যুজ্যতে
বয়মপ্যত্র জানীমো নাত্র দোষোঽস্তি কশ্চন
51.60
দহনে যত্সপুত্রায়া নিশি মাতুস্তবানঘ
দ্যূতার্থে যচ্চ যুষ্মাসু প্রাবর্তত সুয়োধনঃ
তত্র সর্বত্র দুষ্টাত্মা কর্ণো মূলমিহার্জুন
51.61
কর্ণাদ্ধি মন্যতে ত্রাণং নিত্যমেব সুয়োধনঃ
ততো মামপি সংরব্ধো নিগ্রহীতুং প্রচক্রমে
51.62
স্থিরা বুদ্ধির্নরেন্দ্রস্য ধার্তরাষ্ট্রস্য মানদ
কর্ণঃ পার্থান্রণে সর্বান্বিজেষ্যতি ন সংশয়ঃ
51.63
কর্ণমাশ্রিত্য কৌন্তেয় ধার্তরাষ্ট্রেণ বিগ্রহঃ
রোচিতো ভবতা সার্ধং জানতাপি বলং তব
51.64
কর্ণো হি ভাষতে নিত্যমহং পার্থান্সমাগতান্
বাসুদেবং সরাজানং বিজেষ্যামি মহারণে
51.65
প্রোত্সাহয়ন্দুরাত্মানং ধার্তরাষ্ট্রং সুদুর্মতিঃ
সমিতৌ গর্জতে কর্ণস্তমদ্য জহি ভারত
51.66
যচ্চ যুষ্মাসু পাপং বৈ ধার্তরাষ্ট্রঃ প্রয়ুক্তবান্
তত্র সর্বত্র দুষ্টাত্মা কর্ণঃ পাপমতির্মুখম্
51.67
যচ্চ তদ্ধার্তরাষ্ট্রাণাং ক্রূরৈঃ ষড্ভির্মহারথৈঃ
অপশ্যং নিহতং বীরং সৌভদ্রমৃষভেক্ষণম্
51.68
দ্রোণদ্রৌণিকৃপান্বীরান্কম্পয়ন্তো মহারথান্
নির্মনুষ্যাংশ্চ মাতঙ্গান্বিরথাংশ্চ মহারথান্
51.69
ব্যশ্বারোহাংশ্চ তুরগান্পত্তীন্ব্যায়ুধজীবিতান্
কুর্বন্তমৃষভস্কন্ধং কুরুবৃষ্ণিয়শস্করম্
51.70
বিধমন্তমনীকানি ব্যথয়ন্তং মহারথান্
মনুষ্যবাজিমাতঙ্গান্প্রহিণ্বন্তং যমক্ষয়ম্
51.71
শরৈঃ সৌভদ্রমায়স্তং দহন্তমিব বাহিনীম্
তন্মে দহতি গাত্রাণি সখে সত্যেন তে শপে
51.72
যত্তত্রাপি চ দুষ্টাত্মা কর্ণোঽভ্যদ্রুহ্যত প্রভো
অশক্নুবংশ্চাভিমন্যোঃ কর্ণঃ স্থাতুং রণেঽগ্রতঃ
51.73
সৌভদ্রশরনির্ভিন্নো বিসংজ্ঞঃ শোণিতোক্ষিতঃ
নিঃশ্বসন্ক্রোধসংদীপ্তো বিমুখঃ সায়কার্দিতঃ
51.74
অপয়ানকৃতোত্সাহো নিরাশশ্চাপি জীবিতে
তস্থৌ সুবিহ্বলঃ সংখ্যে প্রহারজনিতশ্রমঃ
51.75
অথ দ্রোণস্য সমরে তত্কালসদৃশং তদা
শ্রুত্বা কর্ণো বচঃ ক্রূরং ততশ্চিচ্ছেদ কার্মুকম্
51.76
ততশ্ছিন্নায়ুধং তেন রণে পঞ্চ মহারথাঃ
স চৈব নিকৃতিপ্রজ্ঞঃ প্রাবধীচ্ছরবৃষ্টিভিঃ
51.77
যচ্চ কর্ণোঽব্রবীত্কৃষ্ণাং সভায়াং পরুষং বচঃ
প্রমুখে পাণ্ডবেয়ানাং কুরূণাং চ নৃশংসবৎ
51.78
বিনষ্টাঃ পাণ্ডবাঃ কৃষ্ণে শাশ্বতং নরকং গতাঃ
পতিমন্যং পৃথুশ্রোণি বৃণীষ্ব মিতভাষিণি
51.79
লেখাভ্রু ধৃতরাষ্ট্রস্য দাসী ভূত্বা নিবেশনম্
প্রবিশারালপক্ষ্মাক্ষি ন সন্তি পতয়স্তব
51.80
ইত্যুক্তবানধর্মজ্ঞস্তদা পরমদুর্মতিঃ
পাপঃ পাপং বচঃ কর্ণঃ শৃণ্বতস্তব ভারত
51.81
তস্য পাপস্য তদ্বাক্যং সুবর্ণবিকৃতাঃ শরাঃ
শময়ন্তু শিলাধৌতাস্ত্বয়াস্তা জীবিতচ্ছিদঃ
51.82
যানি চান্যানি দুষ্টাত্মা পাপানি কৃতবাংস্ত্বয়ি
তান্যদ্য জীবিতং চাস্য শময়ন্তু শরাস্তব
51.83
গাণ্ডীবপ্রহিতান্ঘোরানদ্য গাত্রৈঃ স্পৃশঞ্শরান্
কর্ণঃ স্মরতু দুষ্টাত্মা বচনং দ্রোণভীষ্ময়োঃ
51.84
সুবর্ণপুঙ্খা নারাচাঃ শত্রুঘ্না বৈদ্যুতপ্রভাঃ
ত্বয়াস্তাস্তস্য মর্মাণি ভিত্ত্বা পাস্যন্তি শোণিতম্
51.85
উগ্রাস্ত্বদ্ভুজনির্মুক্তা মর্ম ভিত্ত্বা শিতাঃ শরাঃ
অদ্য কর্ণং মহাবেগাঃ প্রেষয়ন্তু যমক্ষয়ম্
51.86
অদ্য হাহাকৃতা দীনা বিষণ্ণাস্ত্বচ্ছরার্দিতাঃ
প্রপতন্তং রথাত্কর্ণং পশ্যন্তু বসুধাধিপাঃ
51.87
অদ্য স্বশোণিতে মগ্নং শয়ানং পতিতং ভুবি
অপবিদ্ধায়ুধং কর্ণং পশ্যন্তু সুহৃদো নিজাঃ
51.88
হস্তিকক্ষ্যো মহানস্য ভল্লেনোন্মথিতস্ত্বয়া
প্রকম্পমানঃ পততু ভূমাবাধিরথের্ধ্বজঃ
51.89
ত্বয়া শরশতৈশ্ছিন্নং রথং হেমবিভূষিতম্
হতয়োধং সমুত্সৃজ্য ভীতঃ শল্যঃ পলায়তাম্
51.90
ততঃ সুয়োধনো দৃষ্ট্বা হতমাধিরথিং ত্বয়া
নিরাশো জীবিতে ত্বদ্য রাজ্যে চৈব ধনংজয়
51.91
এতে দ্রবন্তি পাঞ্চালা বধ্যমানাঃ শিতৈঃ শরৈঃ
কর্ণেন ভরতশ্রেষ্ঠ পাণ্ডবানুজ্জিহীর্ষবঃ
51.92
পাঞ্চালান্দ্রৌপদেয়াংশ্চ ধৃষ্টদ্যুম্নশিখণ্ডিনৌ
ধৃষ্টদ্যুম্নতনূজাংশ্চ শতানীকং চ নাকুলিম্
51.93
নকুলং সহদেবং চ দুর্মুখং জনমেজয়ম্
সুবর্মাণং সাত্যকিং চ বিদ্ধি কর্ণবশং গতান্
51.94
অভ্যাহতানাং কর্ণেন পাঞ্চালানাং মহারণে
শ্রূয়তে নিনদো ঘোরস্ত্বদ্বন্ধূনাং পরংতপ
51.95
ন ত্বেব ভীতাঃ পাঞ্চালাঃ কথংচিত্স্যুঃ পরাঙ্মুখাঃ
ন হি মৃত্যুং মহেষ্বাসা গণয়ন্তি মহারথাঃ
51.96
য একঃ পাণ্ডবীং সেনাং শরৌঘৈঃ সমবেষ্টয়ৎ
তং সমাসাদ্য পাঞ্চালা ভীষ্মং নাসন্পরাঙ্মুখাঃ
51.97
তথা জ্বলন্তমস্ত্রাগ্নিং গুরুং সর্বধনুষ্মতাম্
নির্দহন্তং সমারোহন্দুর্ধর্ষং দ্রোণমোজসা
51.98
তে নিত্যমুদিতা জেতুং যুদ্ধে শত্রূনরিংদমাঃ
ন জাত্বাধিরথের্ভীতাঃ পাঞ্চালাঃ স্যুঃ পরাঙ্মুখাঃ
51.99
তেষামাপততাং শূরঃ পাঞ্চালানাং তরস্বিনাম্
আদত্তেঽসূঞ্শরৈঃ কর্ণঃ পতংগানামিবানলঃ
51.100
তাংস্তথাভিমুখান্বীরান্মিত্রার্থে ত্যক্তজীবিতান্
ক্ষয়ং নয়তি রাধেয়ঃ পাঞ্চালাঞ্শতশো রণে
51.101
অস্ত্রং হি রামাত্কর্ণেন ভার্গবাদৃষিসত্তমাৎ
যদুপাত্তং পুরা ঘোরং তস্য রূপমুদীর্যতে
51.102
তাপনং সর্বসৈন্যানাং ঘোররূপং সুদারুণম্
সমাবৃত্য মহাসেনাং জ্বলতি স্বেন তেজসা
51.103
এতে চরন্তি সংগ্রামে কর্ণচাপচ্যুতাঃ শরাঃ
ভ্রমরাণামিব ব্রাতাস্তাপয়ন্তঃ স্ম তাবকান্
51.104
এতে চরন্তি পাঞ্চালা দিক্ষু সর্বাসু ভারত
কর্ণাস্ত্রং সমরে প্রাপ্য দুর্নিবারমনাত্মভিঃ
51.105
এষ ভীমো দৃঢক্রোধো বৃতঃ পার্থ সমন্ততঃ
সৃঞ্জয়ৈর্যোধয়ন্কর্ণং পীড্যতে স্ম শিতৈঃ শরৈঃ
51.106
পাণ্ডবান্সৃঞ্জয়াংশ্চৈব পাঞ্চালাংশ্চৈব ভারত
হন্যাদুপেক্ষিতঃ কর্ণো রোগো দেহমিবাততঃ
51.107
নান্যং ত্বত্তোঽভিপশ্যামি যোধং যৌধিষ্ঠিরে বলে
যঃ সমাসাদ্য রাধেয়ং স্বস্তিমানাব্রজেদ্গৃহম্
51.108
তমদ্য নিশিতৈর্বাণৈর্নিহত্য ভরতর্ষভ
যথাপ্রতিজ্ঞং পার্থ ত্বং কৃত্বা কীর্তিমবাপ্নুহি
51.109
ত্বং হি শক্তো রণে জেতুং সকর্ণানপি কৌরবান্
নান্যো যুধি যুধাং শ্রেষ্ঠ সত্যমেতদ্ব্রবীমি তে
51.110
এতত্কৃত্বা মহত্কর্ম হত্বা কর্ণং মহারথম্
কৃতার্থঃ সফলঃ পার্থ সুখী ভব নরোত্তম