Utshovঅধ্যায় 50
50.1
সংজয় উবাচ
ইতি স্ম কৃষ্ণবচনাত্প্রত্যুচ্চার্য যুধিষ্ঠিরম্
বভূব বিমনাঃ পার্থঃ কিংচিত্কৃত্বেব পাতকম্
50.2
ততোঽব্রবীদ্বাসুদেবঃ প্রহসন্নিব পাণ্ডবম্
কথং নাম ভবেদেতদ্যদি ত্বং পার্থ ধর্মজম্
অসিনা তীক্ষ্ণধারেণ হন্যা ধর্মে ব্যবস্থিতম্
50.3
ত্বমিত্যুক্ত্বৈব রাজানমেবং কশ্মলমাবিশঃ
হত্বা তু নৃপতিং পার্থ অকরিষ্যঃ কিমুত্তরম্
এবং সুদুর্বিদো ধর্মো মন্দপ্রজ্ঞৈর্বিশেষতঃ
50.4
স ভবান্ধর্মভীরুত্বাদ্ধ্রুবমৈষ্যন্মহত্তমঃ
নরকং ঘোররূপং চ ভ্রাতুর্জ্যেষ্ঠস্য বৈ বধাৎ
50.5
স ত্বং ধর্মভৃতাং শ্রেষ্ঠং রাজানং ধর্মসংহিতম্
প্রসাদয় কুরুশ্রেষ্ঠমেতদত্র মতং মম
50.6
প্রসাদ্য ভক্ত্যা রাজানং প্রীতং চৈব যুধিষ্ঠিরম্
প্রয়ামস্ত্বরিতা যোদ্ধুং সূতপুত্ররথং প্রতি
50.7
হত্বা সুদুর্জয়ং কর্ণং ত্বমদ্য নিশিতৈঃ শরৈঃ
বিপুলাং প্রীতিমাধত্স্ব ধর্মপুত্রস্য মানদ
50.8
এতদত্র মহাবাহো প্রাপ্তকালং মতং মম
এবং কৃতে কৃতং চৈব তব কার্যং ভবিষ্যতি
50.9
ততোঽর্জুনো মহারাজ লজ্জয়া বৈ সমন্বিতঃ
ধর্মরাজস্য চরণৌ প্রপেদে শিরসানঘ
50.10
উবাচ ভরতশ্রেষ্ঠ প্রসীদেতি পুনঃ পুনঃ
ক্ষমস্ব রাজন্যত্প্রোক্তং ধর্মকামেন ভীরুণা
50.11
পাদয়োঃ পতিতং দৃষ্ট্বা ধর্মরাজো যুধিষ্ঠিরঃ
ধনংজয়মমিত্রঘ্নং রুদন্তং ভরতর্ষভ
50.12
উত্থাপ্য ভ্রাতরং রাজা ধর্মরাজো ধনংজয়ম্
সমাশ্লিষ্য চ সস্নেহং প্ররুরোদ মহীপতিঃ
50.13
রুদিত্বা তু চিরং কালং ভ্রাতরৌ সুমহাদ্যুতী
কৃতশৌচৌ নরব্যাঘ্রৌ প্রীতিমন্তৌ বভূবতুঃ
50.14
তত আশ্লিষ্য স প্রেম্ণা মূর্ধ্নি চাঘ্রায় পাণ্ডবম্
প্রীত্যা পরময়া যুক্তঃ প্রস্ময়ংশ্চাব্রবীজ্জয়ম্
50.15
কর্ণেন মে মহাবাহো সর্বসৈন্যস্য পশ্যতঃ
কবচং চ ধ্বজশ্চৈব ধনুঃ শক্তির্হয়া গদা
শরৈঃ কৃত্তা মহেষ্বাস যতমানস্য সংয়ুগে
50.16
সোঽহং জ্ঞাত্বা রণে তস্য কর্ম দৃষ্ট্বা চ ফল্গুন
ব্যবসীদামি দুঃখেন ন চ মে জীবিতং প্রিয়ম্
50.17
তমদ্য যদি বৈ বীর ন হনিষ্যসি সূতজম্
প্রাণানেব পরিত্যক্ষ্যে জীবিতার্থো হি কো মম
50.18
এবমুক্তঃ প্রত্যুবাচ বিজয়ো ভরতর্ষভ
সত্যেন তে শপে রাজন্প্রসাদেন তবৈব চ
ভীমেন চ নরশ্রেষ্ঠ যমাভ্যাং চ মহীপতে
50.19
যথাদ্য সমরে কর্ণং হনিষ্যামি হতোঽথ বা
মহীতলে পতিষ্যামি সত্যেনায়ুধমালভে
50.20
এবমাভাষ্য রাজানমব্রবীন্মাধবং বচঃ
অদ্য কর্ণং রণে কৃষ্ণ সূদয়িষ্যে ন সংশয়ঃ
তদনুধ্যাহি ভদ্রং তে বধং তস্য দুরাত্মনঃ
50.21
এবমুক্তোঽব্রবীত্পার্থং কেশবো রাজসত্তম
শক্তোঽস্মি ভরতশ্রেষ্ঠ যত্নং কর্তুং যথাবলম্
50.22
এবং চাপি হি মে কামো নিত্যমেব মহারথ
কথং ভবান্রণে কর্ণং নিহন্যাদিতি মে মতিঃ
50.23
ভূয়শ্চোবাচ মতিমান্মাধবো ধর্মনন্দনম্
যুধিষ্ঠিরেমং বীভত্সুং ত্বং সান্ত্বয়িতুমর্হসি
অনুজ্ঞাতুং চ কর্ণস্য বধায়াদ্য দুরাত্মনঃ
50.24
শ্রুত্বা হ্যয়মহং চৈব ত্বাং কর্ণশরপীডিতম্
প্রবৃত্তিং জ্ঞাতুমায়াতাবিহ পাণ্ডবনন্দন
50.25
দিষ্ট্যাসি রাজন্নিরুজো দিষ্ট্যা ন গ্রহণং গতঃ
পরিসান্ত্বয় বীভত্সুং জয়মাশাধি চানঘ
50.26
যুধিষ্ঠির উবাচ
এহ্যেহি পার্থ বীভত্সো মাং পরিষ্বজ পাণ্ডব
বক্তব্যমুক্তোঽস্ম্যহিতং ত্বয়া ক্ষান্তং চ তন্ময়া
50.27
অহং ত্বামনুজানামি জহি কর্ণং ধনংজয়
মন্যুং চ মা কৃথাঃ পার্থ যন্ময়োক্তোঽসি দারুণম্
50.28
সংজয় উবাচ
ততো ধনংজয়ো রাজঞ্শিরসা প্রণতস্তদা
পাদৌ জগ্রাহ পাণিভ্যাং ভ্রাতুর্জ্যেষ্ঠস্য মারিষ
50.29
সমুত্থাপ্য ততো রাজা পরিষ্বজ্য চ পীডিতম্
মূর্ধ্ন্যুপাঘ্রায় চৈবৈনমিদং পুনরুবাচ হ
50.30
ধনংজয় মহাবাহো মানিতোঽস্মি দৃঢং ত্বয়া
মাহাত্ম্যং বিজয়ং চৈব ভূয়ঃ প্রাপ্নুহি শাশ্বতম্
50.31
অর্জুন উবাচ
অদ্য তং পাপকর্মাণং সানুবন্ধং রণে শরৈঃ
নয়াম্যন্তং সমাসাদ্য রাধেয়ং বলগর্বিতম্
50.32
যেন ত্বং পীডিতো বাণৈর্দৃঢমায়ম্য কার্মুকম্
তস্যাদ্য কর্মণঃ কর্ণঃ ফলং প্রাপ্স্যতি দারুণম্
50.33
অদ্য ত্বামহমেষ্যামি কর্ণং হত্বা মহীপতে
সভাজয়িতুমাক্রন্দাদিতি সত্যং ব্রবীমি তে
50.34
নাহত্বা বিনিবর্তেঽহং কর্ণমদ্য রণাজিরাৎ
ইতি সত্যেন তে পাদৌ স্পৃশামি জগতীপতে
50.35
সংজয় উবাচ
প্রসাদ্য ধর্মরাজানং প্রহৃষ্টেনান্তরাত্মনা
পার্থঃ প্রোবাচ গোবিন্দং সূতপুত্রবধোদ্যতঃ
50.36
কল্প্যতাং চ রথো ভূয়ো যুজ্যন্তাং চ হয়োত্তমাঃ
আয়ুধানি চ সর্বাণি সজ্জ্যন্তাং বৈ মহারথে
50.37
উপাবৃত্তাশ্চ তুরগাঃ শিক্ষিতাশ্চাশ্বসাদিনঃ
রথোপকরণৈঃ সর্বৈরুপায়ান্তু ত্বরান্বিতাঃ
50.38
এবমুক্তে মহারাজ ফল্গুনেন মহাত্মনা
উবাচ দারুকং কৃষ্ণঃ কুরু সর্বং যথাব্রবীৎ
অর্জুনো ভরতশ্রেষ্ঠঃ শ্রেষ্ঠঃ সর্বধনুষ্মতাম্
50.39
আজ্ঞপ্তস্ত্বথ কৃষ্ণেন দারুকো রাজসত্তম
যোজয়ামাস স রথং বৈয়াঘ্রং শত্রুতাপনম্
50.40
যুক্তং তু রথমাস্থায় দারুকেণ মহাত্মনা
আপৃচ্ছ্য ধর্মরাজানং ব্রাহ্মণান্স্বস্তি বাচ্য চ
সমঙ্গলস্বস্ত্যয়নমারুরোহ রথোত্তমম্
50.41
তস্য রাজা মহাপ্রাজ্ঞো ধর্মরাজো যুধিষ্ঠিরঃ
আশিষোঽয়ুঙ্ক্ত পরমা যুক্তাঃ কর্ণবধং প্রতি
50.42
তং প্রয়ান্তং মহেষ্বাসং দৃষ্ট্বা ভূতানি ভারত
নিহতং মেনিরে কর্ণং পাণ্ডবেন মহাত্মনা
50.43
বভূবুর্বিমলাঃ সর্বা দিশো রাজন্সমন্ততঃ
চাষাশ্চ শতপত্রাশ্চ ক্রৌঞ্চাশ্চৈব জনেশ্বর
প্রদক্ষিণমকুর্বন্ত তদা বৈ পাণ্ডুনন্দনম্
50.44
বহবঃ পক্ষিণো রাজন্পুংনামানঃ শুভাঃ শিবাঃ
ত্বরয়ন্তোঽর্জুনং যুদ্ধে হৃষ্টরূপা ববাশিরে
50.45
কঙ্কা গৃধ্রা বডাশ্চৈব বায়সাশ্চ বিশাং পতে
অগ্রতস্তস্য গচ্ছন্তি ভক্ষ্যহেতোর্ভয়ানকাঃ
50.46
নিমিত্তানি চ ধন্যানি পার্থস্য প্রশশংসিরে
বিনাশমরিসৈন্যানাং কর্ণস্য চ বধং তথা
50.47
প্রয়াতস্যাথ পার্থস্য মহান্স্বেদো ব্যজায়ত
চিন্তা চ বিপুলা জজ্ঞে কথং ন্বেতদ্ভবিষ্যতি
50.48
ততো গাণ্ডীবধন্বানমব্রবীন্মধুসূদনঃ
দৃষ্ট্বা পার্থং তদায়স্তং চিন্তাপরিগতং তদা
50.49
গাণ্ডীবধন্বন্সংগ্রামে যে ত্বয়া ধনুষা জিতাঃ
ন তেষাং মানুষো জেতা ত্বদন্য ইহ বিদ্যতে
50.50
দৃষ্টা হি বহবঃ শূরাঃ শক্রতুল্যপরাক্রমাঃ
ত্বাং প্রাপ্য সমরে বীরং যে গতাঃ পরমাং গতিম্
50.51
কো হি দ্রোণং চ ভীষ্মং চ ভগদত্তং চ মারিষ
বিন্দানুবিন্দাবাবন্ত্যৌ কাম্বোজং চ সুদক্ষিণম্
50.52
শ্রুতায়ুষং মহাবীর্যমচ্যুতায়ুষমেব চ
প্রত্যুদ্গম্য ভবেত্ক্ষেমী যো ন স্যাত্ত্বমিব ক্ষমী
50.53
তব হ্যস্ত্রাণি দিব্যানি লাঘবং বলমেব চ
বেধঃ পাতশ্চ লক্ষশ্চ যোগশ্চৈব তবার্জুন
অসংমোহশ্চ যুদ্ধেষু বিজ্ঞানস্য চ সংনতিঃ
50.54
ভবান্দেবাসুরান্সর্বান্হন্যাত্সহচরাচরান্
পৃথিব্যাং হি রণে পার্থ ন যোদ্ধা ত্বত্সমঃ পুমান্
50.55
ধনুর্গ্রহা হি যে কেচিত্ক্ষত্রিয়া যুদ্ধদুর্মদাঃ
আ দেবাত্ত্বত্সমং তেষাং ন পশ্যামি শৃণোমি বা
50.56
ব্রহ্মণা চ প্রজাঃ সৃষ্টা গাণ্ডীবং চ মহাদ্ভুতম্
যেন ত্বং যুধ্যসে পার্থ তস্মান্নাস্তি ত্বয়া সমঃ
50.57
অবশ্যং তু ময়া বাচ্যং যত্পথ্যং তব পাণ্ডব
মাবমংস্থা মহাবাহো কর্ণমাহবশোভিনম্
50.58
কর্ণো হি বলবান্ধৃষ্টঃ কৃতাস্ত্রশ্চ মহারথঃ
কৃতী চ চিত্রয়োধী চ দেশে কালে চ কোবিদঃ
50.59
তেজসা বহ্নিসদৃশো বায়ুবেগসমো জবে
অন্তকপ্রতিমঃ ক্রোধে সিংহসংহননো বলী
50.60
অয়োরত্নির্মহাবাহুর্ব্যূঢোরস্কঃ সুদুর্জয়ঃ
অতিমানী চ শূরশ্চ প্রবীরঃ প্রিয়দর্শনঃ
50.61
সর্বৈর্যোধগুণৈর্যুক্তো মিত্রাণামভয়ংকরঃ
সততং পাণ্ডবদ্বেষী ধার্তরাষ্ট্রহিতে রতঃ
50.62
সর্বৈরবধ্যো রাধেয়ো দেবৈরপি সবাসবৈঃ
ঋতে ত্বামিতি মে বুদ্ধিস্ত্বমদ্য জহি সূতজম্
50.63
দেবৈরপি হি সংয়ত্তৈর্বিভ্রদ্ভির্মাংসশোণিতম্
অশক্যঃ সমরে জেতুং সর্বৈরপি যুয়ুত্সুভিঃ
50.64
দুরাত্মানং পাপমতিং নৃশংসং; দুষ্টপ্রজ্ঞং পাণ্ডবেয়েষু নিত্যম্
হীনস্বার্থং পাণ্ডবেয়ৈর্বিরোধে; হত্বা কর্ণং ধিষ্ঠিতার্থো ভবাদ্য
50.65
বীরং মন্যত আত্মানং যেন পাপঃ সুয়োধনঃ
তমদ্য মূলং পাপানাং জয় সৌতিং ধনংজয়