Utshovঅধ্যায় 49
49.1
সংজয় উবাচ
যুধিষ্ঠিরেণৈবমুক্তঃ কৌন্তেয়ঃ শ্বেতবাহনঃ
অসিং জগ্রাহ সংক্রুদ্ধো জিঘাংসুর্ভরতর্ষভম্
49.2
তস্য কোপং সমুদ্বীক্ষ্য চিত্তজ্ঞঃ কেশবস্তদা
উবাচ কিমিদং পার্থ গৃহীতঃ খড্গ ইত্যুত
49.3
নেহ পশ্যামি যোদ্ধব্যং তব কিংচিদ্ধনংজয়
তে ধ্বস্তা ধার্তরাষ্ট্রা হি সর্বে ভীমেন ধীমতা
49.4
অপয়াতোঽসি কৌন্তেয় রাজা দ্রষ্টব্য ইত্যপি
স রাজা ভবতা দৃষ্টঃ কুশলী চ যুধিষ্ঠিরঃ
49.5
তং দৃষ্ট্বা নৃপশার্দূলং শার্দূলসমবিক্রমম্
হর্ষকালে তু সংপ্রাপ্তে কস্মাত্ত্বা মন্যুরাবিশৎ
49.6
ন তং পশ্যামি কৌন্তেয় যস্তে বধ্যো ভবেদিহ
কস্মাদ্ভবান্মহাখড্গং পরিগৃহ্ণাতি সত্বরম্
49.7
তত্ত্বা পৃচ্ছামি কৌন্তেয় কিমিদং তে চিকীর্ষিতম্
পরামৃশসি যত্ক্রুদ্ধঃ খড্গমদ্ভুতবিক্রম
49.8
এবমুক্তস্তু কৃষ্ণেন প্রেক্ষমাণো যুধিষ্ঠিরম্
অর্জুনঃ প্রাহ গোবিন্দং ক্রুদ্ধঃ সর্প ইব শ্বসন্
49.9
দদ গাণ্ডীবমন্যস্মা ইতি মাং যোঽভিচোদয়েৎ
ছিন্দ্যামহং শিরস্তস্য ইত্যুপাংশুব্রতং মম
49.10
তদুক্তোঽহমদীনাত্মন্রাজ্ঞামিতপরাক্রম
সমক্ষং তব গোবিন্দ ন তত্ক্ষন্তুমিহোত্সহে
49.11
তস্মাদেনং বধিষ্যামি রাজানং ধর্মভীরুকম্
প্রতিজ্ঞাং পালয়িষ্যামি হত্বেমং নরসত্তমম্
এতদর্থং ময়া খড্গো গৃহীতো যদুনন্দন
49.12
সোঽহং যুধিষ্ঠিরং হত্বা সত্যেঽপ্যানৃণ্যতাং গতঃ
বিশোকো বিজ্বরশ্চাপি ভবিষ্যামি জনার্দন
49.13
কিং বা ত্বং মন্যসে প্রাপ্তমস্মিন্কালে সমুত্থিতে
ত্বমস্য জগতস্তাত বেত্থ সর্বং গতাগতম্
তত্তথা প্রকরিষ্যামি যথা মাং বক্ষ্যতে ভবান্
49.14
কৃষ্ণ উবাচ
ইদানীং পার্থ জানামি ন বৃদ্ধাঃ সেবিতাস্ত্বয়া
অকালে পুরুষব্যাঘ্র সংরম্ভক্রিয়য়ানয়া
ন হি ধর্মবিভাগজ্ঞঃ কুর্যাদেবং ধনংজয়
49.15
অকার্যাণাং চ কার্যাণাং সংয়োগং যঃ করোতি বৈ
কার্যাণামক্রিয়াণাং চ স পার্থ পুরুষাধমঃ
49.16
অনুসৃত্য তু যে ধর্মং কবয়ঃ সমুপস্থিতাঃ
সমাসবিস্তরবিদাং ন তেষাং বেত্থ নিশ্চয়ম্
49.17
অনিশ্চয়জ্ঞো হি নরঃ কার্যাকার্যবিনিশ্চয়ে
অবশো মুহ্যতে পার্থ যথা ত্বং মূঢ এব তু
49.18
ন হি কার্যমকার্যং বা সুখং জ্ঞাতুং কথংচন
শ্রুতেন জ্ঞায়তে সর্বং তচ্চ ত্বং নাববুধ্যসে
49.19
অবিজ্ঞানাদ্ভবান্যচ্চ ধর্মং রক্ষতি ধর্মবিৎ
প্রাণিনাং হি বধং পার্থ ধার্মিকো নাববুধ্যতে
49.20
প্রাণিনামবধস্তাত সর্বজ্যায়ান্মতো মম
অনৃতং তু ভবেদ্বাচ্যং ন চ হিংস্যাত্কথংচন
49.21
স কথং ভ্রাতরং জ্যেষ্ঠং রাজানং ধর্মকোবিদম্
হন্যাদ্ভবান্নরশ্রেষ্ঠ প্রাকৃতোঽন্যঃ পুমানিব
49.22
অয়ুধ্যমানস্য বধস্তথাশস্ত্রস্য ভারত
পরাঙ্মুখস্য দ্রবতঃ শরণং বাভিগচ্ছতঃ
কৃতাঞ্জলেঃ প্রপন্নস্য ন বধঃ পূজ্যতে বুধৈঃ
49.23
ত্বয়া চৈব ব্রতং পার্থ বালেনৈব কৃতং পুরা
তস্মাদধর্মসংয়ুক্তং মৌঢ্যাত্কর্ম ব্যবস্যসি
49.24
স গুরুং পার্থ কস্মাত্ত্বং হন্যা ধর্মমনুস্মরন্
অসংপ্রধার্য ধর্মাণাং গতিং সূক্ষ্মাং দুরন্বয়াম্
49.25
ইদং ধর্মরহস্যং চ বক্ষ্যামি ভরতর্ষভ
যদ্ব্রূয়াত্তব ভীষ্মো বা ধর্মজ্ঞো বা যুধিষ্ঠিরঃ
49.26
বিদুরো বা তথা ক্ষত্তা কুন্তী বাপি যশস্বিনী
তত্তে বক্ষ্যামি তত্ত্বেন তন্নিবোধ ধনংজয়
49.27
সত্যস্য বচনং সাধু ন সত্যাদ্বিদ্যতে পরম্
তত্ত্বেনৈতত্সুদুর্জ্ঞেয়ং যস্য সত্যমনুষ্ঠিতম্
49.28
ভবেত্সত্যমবক্তব্যং বক্তব্যমনৃতং ভবেৎ
সর্বস্বস্যাপহারে তু বক্তব্যমনৃতং ভবেৎ
49.29
প্রাণাত্যয়ে বিবাহে চ বক্তব্যমনৃতং ভবেৎ
যত্রানৃতং ভবেত্সত্যং সত্যং চাপ্যনৃতং ভবেৎ
49.30
তাদৃশং পশ্যতে বালো যস্য সত্যমনুষ্ঠিতম্
সত্যানৃতে বিনিশ্চিত্য ততো ভবতি ধর্মবিৎ
49.31
কিমাশ্চর্যং কৃতপ্রজ্ঞঃ পুরুষোঽপি সুদারুণঃ
সুমহত্প্রাপ্নুয়াত্পুণ্যং বলাকোঽন্ধবধাদিব
49.32
কিমাশ্চর্যং পুনর্মূঢো ধর্মকামোঽপ্যপণ্ডিতঃ
সুমহত্প্রাপ্নুয়াত্পাপমাপগামিব কৌশিকঃ
49.33
অর্জুন উবাচ
আচক্ষ্ব ভগবন্নেতদ্যথা বিদ্যামহং তথা
বলাকান্ধাভিসংবদ্ধং নদীনাং কৌশিকস্য চ
49.34
কৃষ্ণ উবাচ
মৃগব্যাধোঽভবত্কশ্চিদ্বলাকো নাম ভারত
যাত্রার্থং পুত্রদারস্য মৃগান্হন্তি ন কামতঃ
49.35
সোঽন্ধৌ চ মাতাপিতরৌ বিভর্ত্যন্যাংশ্চ সংশ্রিতান্
স্বধর্মনিরতো নিত্যং সত্যবাগনসূয়কঃ
49.36
স কদাচিন্মৃগাঁল্লিপ্সুর্নান্ববিন্দত্প্রয়ত্নবান্
অথাপশ্যত্স পীতোদং শ্বাপদং ঘ্রাণচক্ষুষম্
49.37
অদৃষ্টপূর্বমপি তত্সত্ত্বং তেন হতং তদা
অন্বেব চ ততো ব্যোম্নঃ পুষ্পবর্ষমবাপতৎ
49.38
অপ্সরোগীতবাদিত্রৈর্নাদিতং চ মনোরমম্
বিমানমাগমত্স্বর্গান্মৃগব্যাধনিনীষয়া
49.39
তদ্ভূতং সর্বভূতানামভাবায় কিলার্জুন
তপস্তপ্ত্বা বরং প্রাপ্তং কৃতমন্ধং স্বয়ংভুবা
49.40
তদ্ধত্বা সর্বভূতানামভাবকৃতনিশ্চয়ম্
ততো বলাকঃ স্বরগাদেবং ধর্মঃ সুদুর্বিদঃ
49.41
কৌশিকোঽপ্যভবদ্বিপ্রস্তপস্বী ন বহুশ্রুতঃ
নদীনাং সংগমে গ্রামাদদূরে স কিলাবসৎ
49.42
সত্যং ময়া সদা বাচ্যমিতি তস্যাভবদ্ব্রতম্
সত্যবাদীতি বিখ্যাতঃ স তদাসীদ্ধনংজয়
49.43
অথ দস্যুভয়াত্কেচিত্তদা তদ্বনমাবিশন্
দস্যবোঽপি গতাঃ ক্রূরা ব্যমার্গন্ত প্রয়ত্নতঃ
49.44
অথ কৌশিকমভ্যেত্য প্রাহুস্তং সত্যবাদিনম্
কতমেন পথা যাতা ভগবন্বহবো জনাঃ
সত্যেন পৃষ্টঃ প্রব্রূহি যদি তান্বেত্থ শংস নঃ
49.45
স পৃষ্টঃ কৌশিকঃ সত্যং বচনং তানুবাচ হ
বহুবৃক্ষলতাগুল্মমেতদ্বনমুপাশ্রিতাঃ
ততস্তে তান্সমাসাদ্য ক্রূরা জঘ্নুরিতি শ্রুতিঃ
49.46
তেনাধর্মেণ মহতা বাগ্দুরুক্তেন কৌশিকঃ
গতঃ সুকষ্টং নরকং সূক্ষ্মধর্মেষ্বকোবিদঃ
অপ্রভূতশ্রুতো মূঢো ধর্মাণামবিভাগবিৎ
49.47
বৃদ্ধানপৃষ্ট্বা সংদেহং মহচ্ছ্বভ্রমিতোঽর্হতি
তত্র তে লক্ষণোদ্দেশঃ কশ্চিদেব ভবিষ্যতি
49.48
দুষ্করং পরমজ্ঞানং তর্কেণাত্র ব্যবস্যতি
শ্রুতির্ধর্ম ইতি হ্যেকে বদন্তি বহবো জনাঃ
49.49
ন ত্বেতত্প্রতিসূয়ামি ন হি সর্বং বিধীয়তে
প্রভবার্থায় ভূতানাং ধর্মপ্রবচনং কৃতম্
49.50
ধারণাদ্ধর্মমিত্যাহুর্ধর্মো ধারয়তি প্রজাঃ
যঃ স্যাদ্ধারণসংয়ুক্তঃ স ধর্ম ইতি নিশ্চয়ঃ
49.51
যেঽন্যায়েন জিহীর্ষন্তো জনা ইচ্ছন্তি কর্হিচিৎ
অকূজনেন চেন্মোক্ষো নাত্র কূজেত্কথংচন
49.52
অবশ্যং কূজিতব্যং বা শঙ্কেরন্বাপ্যকূজতঃ
শ্রেয়স্তত্রানৃতং বক্তুং সত্যাদিতি বিচারিতম্
49.53
প্রাণাত্যয়ে বিবাহে বা সর্বজ্ঞাতিধনক্ষয়ে
নর্মণ্যভিপ্রবৃত্তে বা প্রবক্তব্যং মৃষা ভবেৎ
অধর্মং নাত্র পশ্যন্তি ধর্মতত্ত্বার্থদর্শিনঃ
49.54
যঃ স্তেনৈঃ সহ সংবন্ধান্মুচ্যতে শপথৈরপি
শ্রেয়স্তত্রানৃতং বক্তুং তত্সত্যমবিচারিতম্
49.55
ন চ তেভ্যো ধনং দেয়ং শক্যে সতি কথংচন
পাপেভ্যো হি ধনং দত্তং দাতারমপি পীডয়েৎ
তস্মাদ্ধর্মার্থমনৃতমুক্ত্বা নানৃতবাগ্ভবেৎ
49.56
এষ তে লক্ষণোদ্দেশঃ সমুদ্দিষ্টো যথাবিধি
এতচ্ছ্রুত্বা ব্রূহি পার্থ যদি বধ্যো যুধিষ্ঠিরঃ
49.57
অর্জুন উবাচ
যথা ব্রূয়ান্মহাপ্রাজ্ঞো যথা ব্রূয়ান্মহামতিঃ
হিতং চৈব যথাস্মাকং তথৈতদ্বচনং তব
49.58
ভবান্মাতৃসমোঽস্মাকং তথা পিতৃসমোঽপি চ
গতিশ্চ পরমা কৃষ্ণ তেন তে বাক্যমদ্ভুতম্
49.59
ন হি তে ত্রিষু লোকেষু বিদ্যতেঽবিদিতং ক্বচিৎ
তস্মাদ্ভবান্পরং ধর্মং বেদ সর্বং যথাতথম্
49.60
অবধ্যং পাণ্ডবং মন্যে ধর্মরাজং যুধিষ্ঠিরম্
তস্মিন্সময়সংয়োগে ব্রূহি কিংচিদনুগ্রহম্
ইদং চাপরমত্রৈব শৃণু হৃত্স্থং বিবক্ষিতম্
49.61
জানাসি দাশার্হ মম ব্রতং ত্বং; যো মাং ব্রূয়াত্কশ্চন মানুষেষু
অন্যস্মৈ ত্বং গাণ্ডিবং দেহি পার্থ; যস্ত্বত্তোঽস্ত্রৈর্ভবিতা বা বিশিষ্টঃ
49.62
হন্যামহং কেশব তং প্রসহ্য; ভীমো হন্যাত্তূবরকেতি চোক্তঃ
তন্মে রাজা প্রোক্তবাংস্তে সমক্ষং; ধনুর্দেহীত্যসকৃদ্বৃষ্ণিসিংহ
49.63
তং হত্বা চেত্কেশব জীবলোকে; স্থাতা কালং নাহমপ্যল্পমাত্রম্
সা চ প্রতিজ্ঞা মম লোকপ্রবুদ্ধা; ভবেত্সত্যা ধর্মভৃতাং বরিষ্ঠ
যথা জীবেত্পাণ্ডবোঽহং চ কৃষ্ণ; তথা বুদ্ধিং দাতুমদ্যার্হসি ত্বম্
49.64
বাসুদেব উবাচ
রাজা শ্রান্তো জগতো বিক্ষতশ্চ; কর্ণেন সংখ্যে নিশিতৈর্বাণসংঘৈঃ
তস্মাত্পার্থ ত্বাং পরুষাণ্যবোচ;ত্কর্ণে দ্যূতং হ্যদ্য রণে নিবদ্ধম্
49.65
তস্মিন্হতে কুরবো নির্জিতাঃ স্যু;রেবংবুদ্ধিঃ পার্থিবো ধর্মপুত্রঃ
যদাবমানং লভতে মহান্তং; তদা জীবন্মৃত ইত্যুচ্যতে সঃ
49.66
তন্মানিতঃ পার্থিবোঽয়ং সদৈব; ত্বয়া সভীমেন তথা যমাভ্যাম্
বৃদ্ধৈশ্চ লোকে পুরুষপ্রবীরৈ;স্তস্যাবমানং কলয়া ত্বং প্রয়ুঙ্ক্ষ্ব
49.67
ত্বমিত্যত্রভবন্তং ত্বং ব্রূহি পার্থ যুধিষ্ঠিরম্
ত্বমিত্যুক্তো হি নিহতো গুরুর্ভবতি ভারত
49.68
এবমাচর কৌন্তেয় ধর্মরাজে যুধিষ্ঠিরে
অধর্ময়ুক্তং সংয়োগং কুরুষ্বৈবং কুরূদ্বহ
49.69
অথর্বাঙ্গিরসী হ্যেষা শ্রুতীনামুত্তমা শ্রুতিঃ
অবিচার্যৈব কার্যৈষা শ্রেয়ঃকামৈর্নরৈঃ সদা
49.70
বধো হ্যয়ং পাণ্ডব ধর্মরাজ্ঞ;স্ত্বত্তো যুক্তো বেত্স্যতে চৈবমেষঃ
ততোঽস্য পাদাবভিবাদ্য পশ্চা;চ্ছমং ব্রূয়াঃ সান্ত্বপূর্বং চ পার্থম্
49.71
ভ্রাতা প্রাজ্ঞস্তব কোপং ন জাতু; কুর্যাদ্রাজা কংচন পাণ্ডবেয়ঃ
মুক্তোঽনৃতাদ্ভ্রাতৃবধাচ্চ পার্থ; হৃষ্টঃ কর্ণং ত্বং জহি সূতপুত্রম্
49.72
সংজয় উবাচ
ইত্যেবমুক্তস্তু জনার্দনেন; পার্থঃ প্রশস্যাথ সুহৃদ্বধং তম্
ততোঽব্রবীদর্জুনো ধর্মরাজ;মনুক্তপূর্বং পরুষং প্রসহ্য
49.73
মা ত্বং রাজন্ব্যাহর ব্যাহরত্সু; ন তিষ্ঠসে ক্রোশমাত্রে রণার্ধে
ভীমস্তু মামর্হতি গর্হণায়; যো যুধ্যতে সর্বয়োধপ্রবীরঃ
49.74
কালে হি শত্রূন্প্রতিপীড্য সংখ্যে; হত্বা চ শূরান্পৃথিবীপতীংস্তান্
যঃ কুঞ্জরাণামধিকং সহস্রং; হত্বানদত্তুমুলং সিংহনাদম্
49.75
সুদুষ্করং কর্ম করোতি বীরঃ; কর্তুং যথা নার্হসি ত্বং কদাচিৎ
রথাদবপ্লুত্য গদাং পরামৃশং;স্তয়া নিহন্ত্যশ্বনরদ্বিপান্রণে
49.76
বরাসিনা বাজিরথাশ্বকুঞ্জরাং;স্তথা রথাঙ্গৈর্ধনুষা চ হন্ত্যরীন্
প্রমৃদ্য পদ্ভ্যামহিতান্নিহন্তি যঃ; পুনশ্চ দোর্ভ্যাং শতমন্যুবিক্রমঃ
49.77
মহাবলো বৈশ্রবণান্তকোপমঃ; প্রসহ্য হন্তা দ্বিষতাং যথার্হম্
স ভীমসেনোঽর্হতি গর্হণাং মে; ন ত্বং নিত্যং রক্ষ্যসে যঃ সুহৃদ্ভিঃ
49.78
মহারথান্নাগবরান্হয়াংশ্চ; পদাতিমুখ্যানপি চ প্রমথ্য
একো ভীমো ধার্তরাষ্ট্রেষু মগ্নঃ; স মামুপালব্ধুমরিংদমোঽর্হতি
49.79
কলিঙ্গবঙ্গাঙ্গনিষাদমাগধা;ন্সদামদান্নীলবলাহকোপমান্
নিহন্তি যঃ শত্রুগণাননেকশঃ; স মাভিবক্তুং প্রভবত্যনাগসম্
49.80
সুয়ুক্তমাস্থায় রথং হি কালে; ধনুর্বিকর্ষঞ্শরপূর্ণমুষ্টিঃ
সৃজত্যসৌ শরবর্ষাণি বীরো; মহাহবে মেঘ ইবাম্বুধারাঃ
49.81
বলং তু বাচি দ্বিজসত্তমানাং; ক্ষাত্রং বুধা বাহুবলং বদন্তি
ত্বং বাগ্বলো ভারত নিষ্ঠুরশ্চ; ত্বমেব মাং বেত্সি যথাবিধোঽহম্
49.82
যতামি নিত্যং তব কর্তুমিষ্টং; দারৈঃ সুতৈর্জীবিতেনাত্মনা চ
এবং চ মাং বাগ্বিশিখৈর্নিহংসি; ত্বত্তঃ সুখং ন বয়ং বিদ্ম কিংচিৎ
49.83
অবামংস্থা মাং দ্রৌপদীতল্পসংস্থো; মহারথান্প্রতিহন্মি ত্বদর্থে
তেনাতিশঙ্কী ভারত নিষ্ঠুরোঽসি; ত্বত্তঃ সুখং নাভিজানামি কিংচিৎ
49.84
প্রোক্তঃ স্বয়ং সত্যসংধেন মৃত্যু;স্তব প্রিয়ার্থং নরদেব যুদ্ধে
বীরঃ শিখণ্ডী দ্রৌপদোঽসৌ মহাত্মা; ময়াভিগুপ্তেন হতশ্চ তেন
49.85
ন চাভিনন্দামি তবাধিরাজ্যং; যতস্ত্বমক্ষেষ্বহিতায় সক্তঃ
স্বয়ং কৃত্বা পাপমনার্যজুষ্ট;মেভির্যুদ্ধে তর্তুমিচ্ছস্যরীংস্তু
49.86
অক্ষেষু দোষা বহবো বিধর্মাঃ; শ্রুতাস্ত্বয়া সহদেবোঽব্রবীদ্যান্
তান্নৈষি সংতর্তুমসাধুজুষ্টা;ন্যেন স্ম সর্বে নিরয়ং প্রপন্নাঃ
49.87
ত্বং দেবিতা ত্বত্কৃতে রাজ্যনাশ;স্ত্বত্সংভবং ব্যসনং নো নরেন্দ্র
মাস্মান্ক্রূরৈর্বাক্প্রতোদৈস্তুদ ত্বং; ভূয়ো রাজন্কোপয়ন্নল্পভাগ্যান্
49.88
এতা বাচঃ পরুষাঃ সব্যসাচী; স্থিরপ্রজ্ঞং শ্রাবয়িত্বা ততক্ষ
তদানুতেপে সুররাজপুত্রো; বিনিঃশ্বসংশ্চাপ্যসিমুদ্ববর্হ
49.89
তমাহ কৃষ্ণঃ কিমিদং পুনর্ভবা;ন্বিকোশমাকাশনিভং করোত্যসিম্
প্রব্রূহি সত্যং পুনরুত্তরং বিধে;র্বচঃ প্রবক্ষ্যাম্যহমর্থসিদ্ধয়ে
49.90
ইত্যেব পৃষ্টঃ পুরুষোত্তমেন; সুদুঃখিতঃ কেশবমাহ বাক্যম্
অহং হনিষ্যে স্বশরীরমেব; প্রসহ্য যেনাহিতমাচরং বৈ
49.91
নিশম্য তত্পার্থবচোঽব্রবীদিদং; ধনংজয়ং ধর্মভৃতাং বরিষ্ঠঃ
প্রব্রূহি পার্থ স্বগুণানিহাত্মন;স্তথা স্বহার্দং ভবতীহ সদ্যঃ
49.92
তথাস্তু কৃষ্ণেত্যভিনন্দ্য বাক্যং; ধনংজয়ঃ প্রাহ ধনুর্বিনাম্য
যুধিষ্ঠিরং ধর্মভৃতাং বরিষ্ঠং; শৃণুষ্ব রাজন্নিতি শক্রসূনুঃ
49.93
ন মাদৃশোঽন্যো নরদেব বিদ্যতে; ধনুর্ধরো দেবমৃতে পিনাকিনম্
অহং হি তেনানুমতো মহাত্মনা; ক্ষণেন হন্যাং সচরাচরং জগৎ
49.94
ময়া হি রাজন্সদিগীশ্বরা দিশো; বিজিত্য সর্বা ভবতঃ কৃতা বশে
স রাজসূয়শ্চ সমাপ্তদক্ষিণঃ; সভা চ দিব্যা ভবতো মমৌজসা
49.95
পাণৌ পৃষত্কা লিখিতা মমেমে; ধনুশ্চ সংখ্যে বিততং সবাণম্
পাদৌ চ মে সশরৌ সহধ্বজৌ; ন মাদৃশং যুদ্ধগতং জয়ন্তি
49.96
হতা উদীচ্যা নিহতাঃ প্রতীচ্যাঃ; প্রাচ্যা নিরস্তা দাক্ষিণাত্যা বিশস্তাঃ
সংশপ্তকানাং কিংচিদেবাবশিষ্টং; সর্বস্য সৈন্যস্য হতং ময়ার্ধম্
49.97
শেতে ময়া নিহতা ভারতী চ; চমূ রাজন্দেবচমূপ্রকাশা
যে নাস্ত্রজ্ঞাস্তানহং হন্মি শস্ত্রৈ;স্তস্মাল্লোকং নেহ করোমি ভস্মসাৎ
49.98
ইত্যেবমুক্ত্বা পুনরাহ পার্থো; যুধিষ্ঠিরং ধর্মভৃতাং বরিষ্ঠম্
অপ্যপুত্রা তেন রাধা ভবিত্রী; কুন্তী ময়া বা তদৃতং বিদ্ধি রাজন্
প্রসীদ রাজন্ক্ষম যন্ময়োক্তং; কালে ভবান্বেত্স্যতি তন্নমস্তে
49.99
প্রসাদ্য রাজানমমিত্রসাহং; স্থিতোঽব্রবীচ্চৈনমভিপ্রপন্নঃ
যাম্যেষ ভীমং সমরাত্প্রমোক্তুং; সর্বাত্মনা সূতপুত্রং চ হন্তুম্
49.100
তব প্রিয়ার্থং মম জীবিতং হি; ব্রবীমি সত্যং তদবেহি রাজন্
ইতি প্রায়াদুপসংগৃহ্য পাদৌ; সমুত্থিতো দীপ্ততেজাঃ কিরীটী
নেদং চিরাত্ক্ষিপ্রমিদং ভবিষ্য;ত্যাবর্ততেঽসাবভিয়ামি চৈনম্
49.101
এতচ্ছ্রুত্বা পাণ্ডবো ধর্মরাজো; ভ্রাতুর্বাক্যং পরুষং ফল্গুনস্য
উত্থায় তস্মাচ্ছয়নাদুবাচ; পার্থং ততো দুঃখপরীতচেতাঃ
49.102
কৃতং ময়া পার্থ যথা ন সাধু; যেন প্রাপ্তং ব্যসনং বঃ সুঘোরম্
তস্মাচ্ছিরশ্ছিন্দ্ধি মমেদমদ্য; কুলান্তকস্যাধমপূরুষস্য
49.103
পাপস্য পাপব্যসনান্বিতস্য; বিমূঢবুদ্ধেরলসস্য ভীরোঃ
বৃদ্ধাবমন্তুঃ পরুষস্য চৈব; কিং তে চিরং মামনুবৃত্য রূক্ষম্
49.104
গচ্ছাম্যহং বনমেবাদ্য পাপঃ; সুখং ভবান্বর্ততাং মদ্বিহীনঃ
যোগ্যো রাজা ভীমসেনো মহাত্মা; ক্লীবস্য বা মম কিং রাজ্যকৃত্যম্
49.105
ন চাস্মি শক্তঃ পরুষাণি সোঢুং; পুনস্তবেমানি রুষান্বিতস্য
ভীমোঽস্তু রাজা মম জীবিতেন; কিং কার্যমদ্যাবমতস্য বীর
49.106
ইত্যেবমুক্ত্বা সহসোত্পপাত; রাজা ততস্তচ্ছয়নং বিহায়
ইয়েষ নির্গন্তুমথো বনায়; তং বাসুদেবঃ প্রণতোঽভ্যুবাচ
49.107
রাজন্বিদিতমেতত্তে যথা গাণ্ডীবধন্বনঃ
প্রতিজ্ঞা সত্যসংধস্য গাণ্ডীবং প্রতি বিশ্রুতা
49.108
ব্রূয়াদ্য এবং গাণ্ডীবং দেহ্যন্যস্মৈ ত্বমিত্যুত
স বধ্যোঽস্য পুমাঁল্লোকে ত্বয়া চোক্তোঽয়মীদৃশম্
49.109
অতঃ সত্যাং প্রতিজ্ঞাং তাং পার্থেন পরিরক্ষতা
মচ্ছন্দাদবমানোঽয়ং কৃতস্তব মহীপতে
গুরূণামবমানো হি বধ ইত্যভিধীয়তে
49.110
তস্মাত্ত্বং বৈ মহাবাহো মম পার্থস্য চোভয়োঃ
ব্যতিক্রমমিমং রাজন্সংক্ষমস্বার্জুনং প্রতি
49.111
শরণং ত্বাং মহারাজ প্রপন্নৌ স্ব উভাবপি
ক্ষন্তুমর্হসি মে রাজন্প্রণতস্যাভিয়াচতঃ
49.112
রাধেয়স্যাদ্য পাপস্য ভূমিঃ পাস্যতি শোণিতম্
সত্যং তে প্রতিজানামি হতং বিদ্ধ্যদ্য সূতজম্
যস্যেচ্ছসি বধং তস্য গতমেবাদ্য জীবিতম্
49.113
ইতি কৃষ্ণবচঃ শ্রুত্বা ধর্মরাজো যুধিষ্ঠিরঃ
সসংভ্রমং হৃষীকেশমুত্থাপ্য প্রণতং তদা
কৃতাঞ্জলিমিদং বাক্যমুবাচানন্তরং বচঃ
49.114
এবমেতদ্যথাত্থ ত্বমস্ত্যেষোঽতিক্রমো মম
অনুনীতোঽস্মি গোবিন্দ তারিতশ্চাদ্য মাধব
মোক্ষিতা ব্যসনাদ্ঘোরাদ্বয়মদ্য ত্বয়াচ্যুত
49.115
ভবন্তং নাথমাসাদ্য আবাং ব্যসনসাগরাৎ
ঘোরাদদ্য সমুত্তীর্ণাবুভাবজ্ঞানমোহিতৌ
49.116
ত্বদ্বুদ্ধিপ্লবমাসাদ্য দুঃখশোকার্ণবাদ্বয়ম্
সমুত্তীর্ণাঃ সহামাত্যাঃ সনাথাঃ স্ম ত্বয়াচ্যুত