UtshovChapter 66
66.1
संजय उवाच
ततोऽपयाताः शरपातमात्र;मवस्थिताः कुरवो भिन्नसेनाः
विद्युत्प्रकाशं ददृशुः समन्ता;द्धनंजयास्त्रं समुदीर्यमाणम्
Sanjaya uvacha
Tatopayatah sharapatamatra;mavasthitah kuravo bhinnasenah
Vidyutprakasham dadrishuh samanta;ddhananjayastram samudiryamanam
66.2
तदर्जुनास्त्रं ग्रसते स्म वीरा;न्वियत्तथाकाशमनन्तघोषम्
क्रुद्धेन पार्थेन तदाशु सृष्टं; वधाय कर्णस्य महाविमर्दे
Tadarjunastram grasate sma vira;nviyattathakashamanantaghosham
Kruddhena parthena tadashu srishtam; vadhaya karnasya mahavimarde
66.3
रामादुपात्तेन महामहिम्ना; आथर्वणेनारिविनाशनेन
तदर्जुनास्त्रं व्यधमद्दहन्तं; पार्थं च बाणैर्निशितैर्निजघ्ने
Ramadupattena mahamahimna; atharvanenarivinashanena
Tadarjunastram vyadhamaddahantam; partham cha banairnishitairnijaghne
66.4
ततो विमर्दः सुमहान्बभूव; तस्यार्जुनस्याधिरथेश्च राजन्
अन्योन्यमासादयतोः पृषत्कै;र्विषाणघातैर्द्विपयोरिवोग्रैः
Tato vimardah sumahanbabhuva; tasyarjunasyadhiratheshcha rajan
Anyonyamasadayatoh prishatkai;rvishanaghatairdvipayorivograih
66.5
ततो रिपुघ्नं समधत्त कर्णः; सुसंशितं सर्पमुखं ज्वलन्तम्
रौद्रं शरं संयति सुप्रधौतं; पार्थार्थमत्यर्थचिराय गुप्तम्
Tato ripughnam samadhatta karnah; susanshitam sarpamukham jvalantam
Raudram sharam sanyati supradhautam; partharthamatyarthachiraya guptam
66.6
सदार्चितं चन्दनचूर्णशायिनं; सुवर्णनालीशयनं महाविषम्
प्रदीप्तमैरावतवंशसंभवं; शिरो जिहीर्षुर्युधि फल्गुनस्य
Sadarchitam chandanachurnashayinam; suvarnanalishayanam mahavisham
Pradiptamairavatavanshasambhavam; shiro jihirshuryudhi phalgunasya
66.7
तमब्रवीन्मद्रराजो महात्मा; वैकर्तनं प्रेक्ष्य हि संहितेषुम्
न कर्ण ग्रीवामिषुरेष प्राप्स्यते; संलक्ष्य संधत्स्व शरं शिरोघ्नम्
Tamabravinmadrarajo mahatma; vaikartanam prekshya hi sanhiteshum
Na karna grivamishuresha prapsyate; sanlakshya sandhatsva sharam shiroghnam
66.8
अथाब्रवीत्क्रोधसंरक्तनेत्रः; कर्णः शल्यं संधितेषुः प्रसह्य
न संधत्ते द्विः शरं शल्य कर्णो; न मादृशाः शाठ्ययुक्ता भवन्ति
Athabravitkrodhasanraktanetrah; karnah shalyam sandhiteshuh prasahya
Na sandhatte dvih sharam shalya karno; na madrishah shathyayukta bhavanti
66.9
तथैवमुक्त्वा विससर्ज तं शरं; बलाहकं वर्षघनाभिपूजितम्
हतोऽसि वै फल्गुन इत्यवोच;त्ततस्त्वरन्नूर्जितमुत्ससर्ज
Tathaivamuktva visasarja tam sharam; balahakam varshaghanabhipujitam
Hatosi vai phalguna ityavocha;ttatastvarannurjitamutsasarja
66.10
संधीयमानं भुजगं दृष्ट्वा कर्णेन माधवः
आक्रम्य स्यन्दनं पद्भ्यां बलेन बलिनां वरः
Sandhiyamanam bhujagam drishtva karnena madhavah
Akramya syandanam padbhyam balena balinam varah
66.11
अवगाढे रथे भूमौ जानुभ्यामगमन्हयाः
ततः शरः सोऽभ्यहनत्किरीटं तस्य धीमतः
Avagadhe rathe bhumau janubhyamagamanhayah
Tatah sharah sobhyahanatkiritam tasya dhimatah
66.12
अथार्जुनस्योत्तमगात्रभूषणं; धरावियद्द्योसलिलेषु विश्रुतम्
बलास्त्रसर्गोत्तमयत्नमन्युभिः; शरेण मूर्ध्नः स जहार सूतजः
Atharjunasyottamagatrabhushanam; dharaviyaddyosalileshu vishrutam
Balastrasargottamayatnamanyubhih; sharena murdhnah sa jahara sutajah
66.13
दिवाकरेन्दुज्वलनग्रहत्विषं; सुवर्णमुक्तामणिजालभूषितम्
पुरंदरार्थं तपसा प्रयत्नतः; स्वयं कृतं यद्भुवनस्य सूनुना
Divakarendujvalanagrahatvisham; suvarnamuktamanijalabhushitam
Purandarartham tapasa prayatnatah; svayam kritam yadbhuvanasya sununa
66.14
महार्हरूपं द्विषतां भयंकरं; विभाति चात्यर्थसुखं सुगन्धि तत्
निजघ्नुषे देवरिपून्सुरेश्वरः; स्वयं ददौ यत्सुमनाः किरीटिने
Maharharupam dvishatam bhayankaram; vibhati chatyarthasukham sugandhi tat
Nijaghnushe devaripunsureshvarah; svayam dadau yatsumanah kiritine
66.15
हराम्बुपाखण्डलवित्तगोप्तृभिः; पिनाकपाशाशनिसायकोत्तमैः
सुरोत्तमैरप्यविषह्यमर्दितुं; प्रसह्य नागेन जहार यद्वृषः
Harambupakhandalavittagoptribhih; pinakapashashanisayakottamaih
Surottamairapyavishahyamarditum; prasahya nagena jahara yadvrishah
66.16
तदुत्तमेषून्मथितं विषाग्निना; प्रदीप्तमर्चिष्मदभिक्षिति प्रियम्
पपात पार्थस्य किरीटमुत्तमं; दिवाकरोऽस्तादिव पर्वताज्ज्वलन्
Taduttameshunmathitam vishagnina; pradiptamarchishmadabhikshiti priyam
Papata parthasya kiritamuttamam; divakarostadiva parvatajjvalan
66.17
ततः किरीटं बहुरत्नमण्डितं; जहार नागोऽर्जुनमूर्धतो बलात्
गिरेः सुजाताङ्कुरपुष्पितद्रुमं; महेन्द्रवज्रः शिखरं यथोत्तमम्
Tatah kiritam bahuratnamanditam; jahara nagorjunamurdhato balat
Gireh sujatankurapushpitadrumam; mahendravajrah shikharam yathottamam
66.18
मही वियद्द्यौः सलिलानि वायुना; यथा विभिन्नानि विभान्ति भारत
तथैव शब्दो भुवनेष्वभूत्तदा; जना व्यवस्यन्व्यथिताश्च चस्खलुः
Mahi viyaddyauh salilani vayuna; yatha vibhinnani vibhanti bharata
Tathaiva shabdo bhuvaneshvabhuttada; jana vyavasyanvyathitashcha chaskhaluh
66.19
ततः समुद्ग्रथ्य सितेन वाससा; स्वमूर्धजानव्यथितः स्थितोऽर्जुनः
विभाति संपूर्णमरीचिभास्वता; शिरोगतेनोदयपर्वतो यथा
Tatah samudgrathya sitena vasasa; svamurdhajanavyathitah sthitorjunah
Vibhati sampurnamarichibhasvata; shirogatenodayaparvato yatha
66.20
बलाहकः कर्णभुजेरितस्ततो; हुताशनार्कप्रतिमद्युतिर्महान्
महोरगः कृतवैरोऽर्जुनेन; किरीटमासाद्य समुत्पपात
Balahakah karnabhujeritastato; hutashanarkapratimadyutirmahan
Mahoragah kritavairorjunena; kiritamasadya samutpapata
66.21
तमब्रवीद्विद्धि कृतागसं मे; कृष्णाद्य मातुर्वधजातवैरम्
ततः कृष्णः पार्थमुवाच संख्ये; महोरगं कृतवैरं जहि त्वम्
Tamabravidviddhi kritagasam me; krishnadya maturvadhajatavairam
Tatah krishnah parthamuvacha sankhye; mahoragam kritavairam jahi tvam
66.22
स एवमुक्तो मधुसूदनेन; गाण्डीवधन्वा रिपुषूग्रधन्वा
उवाच को न्वेष ममाद्य नागः; स्वयं य आगाद्गरुडस्य वक्त्रम्
Sa evamukto madhusudanena; gandivadhanva ripushugradhanva
Uvacha ko nvesha mamadya nagah; svayam ya agadgarudasya vaktram
66.23
कृष्ण उवाच
योऽसौ त्वया खाण्डवे चित्रभानुं; संतर्पयानेन धनुर्धरेण
वियद्गतो बाणनिकृत्तदेहो; ह्यनेकरूपो निहतास्य माता
Krishna uvacha
Yosau tvaya khandave chitrabhanum; santarpayanena dhanurdharena
Viyadgato bananikrittadeho; hyanekarupo nihatasya mata
66.24
ततस्तु जिष्णुः परिहृत्य शेषां;श्चिच्छेद षड्भिर्निशितैः सुधारैः
नागं वियत्तिर्यगिवोत्पतन्तं; स छिन्नगात्रो निपपात भूमौ
Tatastu jishnuh parihritya shesham;shchichchheda shadbhirnishitaih sudharaih
Nagam viyattiryagivotpatantam; sa chhinnagatro nipapata bhumau
66.25
तस्मिन्मुहूर्ते दशभिः पृषत्कैः; शिलाशितैर्बर्हिणवाजितैश्च
विव्याध कर्णः पुरुषप्रवीरं; धनंजयं तिर्यगवेक्षमाणम्
Tasminmuhurte dashabhih prishatkaih; shilashitairbarhinavajitaishcha
Vivyadha karnah purushapraviram; dhananjayam tiryagavekshamanam
66.26
ततोऽर्जुनो द्वादशभिर्विमुक्तै;राकर्णमुक्तैर्निशितैः समर्प्य
नाराचमाशीविषतुल्यवेग;माकर्णपूर्णायतमुत्ससर्ज
Tatorjuno dvadashabhirvimuktai;rakarnamuktairnishitaih samarpya
Narachamashivishatulyavega;makarnapurnayatamutsasarja
66.27
स चित्रवर्मेषुवरो विदार्य; प्राणान्निरस्यन्निव साधु मुक्तः
कर्णस्य पीत्वा रुधिरं विवेश; वसुंधरां शोणितवाजदिग्धः
Sa chitravarmeshuvaro vidarya; pranannirasyanniva sadhu muktah
Karnasya pitva rudhiram vivesha; vasundharam shonitavajadigdhah
66.28
ततो वृषो बाणनिपातकोपितो; महोरगो दण्डविघट्टितो यथा
तथाशुकारी व्यसृजच्छरोत्तमा;न्महाविषः सर्प इवोत्तमं विषम्
Tato vrisho bananipatakopito; mahorago dandavighattito yatha
Tathashukari vyasrijachchharottama;nmahavishah sarpa ivottamam visham
66.29
जनार्दनं द्वादशभिः पराभिन;न्नवैर्नवत्या च शरैस्तथार्जुनम्
शरेण घोरेण पुनश्च पाण्डवं; विभिद्य कर्णोऽभ्यनदज्जहास च
Janardanam dvadashabhih parabhina;nnavairnavatya cha sharaistatharjunam
Sharena ghorena punashcha pandavam; vibhidya karnobhyanadajjahasa cha
66.30
तमस्य हर्षं ममृषे न पाण्डवो; बिभेद मर्माणि ततोऽस्य मर्मवित्
परं शरैः पत्रिभिरिन्द्रविक्रम;स्तथा यथेन्द्रो बलमोजसाहनत्
Tamasya harsham mamrishe na pandavo; bibheda marmani tatosya marmavit
Param sharaih patribhirindravikrama;statha yathendro balamojasahanat
66.31
ततः शराणां नवतीर्नवार्जुनः; ससर्ज कर्णेऽन्तकदण्डसंनिभाः
शरैर्भृशायस्ततनुः प्रविव्यथे; तथा यथा वज्रविदारितोऽचलः
Tatah sharanam navatirnavarjunah; sasarja karnentakadandasannibhah
Sharairbhrishayastatanuh pravivyathe; tatha yatha vajravidaritochalah
66.32
मणिप्रवेकोत्तमवज्रहाटकै;रलंकृतं चास्य वराङ्गभूषणम्
प्रविद्धमुर्व्यां निपपात पत्रिभि;र्धनंजयेनोत्तमकुण्डलेऽपि च
Manipravekottamavajrahatakai;ralankritam chasya varangabhushanam
Praviddhamurvyam nipapata patribhi;rdhananjayenottamakundalepi cha
66.33
महाधनं शिल्पिवरैः प्रयत्नतः; कृतं यदस्योत्तमवर्म भास्वरम्
सुदीर्घकालेन तदस्य पाण्डवः; क्षणेन बाणैर्बहुधा व्यशातयत्
Mahadhanam shilpivaraih prayatnatah; kritam yadasyottamavarma bhasvaram
Sudirghakalena tadasya pandavah; kshanena banairbahudha vyashatayat
66.34
स तं विवर्माणमथोत्तमेषुभिः; शरैश्चतुर्भिः कुपितः पराभिनत्
स विव्यथेऽत्यर्थमरिप्रहारितो; यथातुरः पित्तकफानिलव्रणैः
Sa tam vivarmanamathottameshubhih; sharaishchaturbhih kupitah parabhinat
Sa vivyathetyarthamaripraharito; yathaturah pittakaphanilavranaih
66.35
महाधनुर्मण्डलनिःसृतैः शितैः; क्रियाप्रयत्नप्रहितैर्बलेन च
ततक्ष कर्णं बहुभिः शरोत्तमै;र्बिभेद मर्मस्वपि चार्जुनस्त्वरन्
Mahadhanurmandalanihsritaih shitaih; kriyaprayatnaprahitairbalena cha
Tataksha karnam bahubhih sharottamai;rbibheda marmasvapi charjunastvaran
66.36
दृढाहतः पत्रिभिरुग्रवेगैः; पार्थेन कर्णो विविधैः शिताग्रैः
बभौ गिरिर्गैरिकधातुरक्तः; क्षरन्प्रपातैरिव रक्तमम्भः
Dridhahatah patribhirugravegaih; parthena karno vividhaih shitagraih
Babhau girirgairikadhaturaktah; ksharanprapatairiva raktamambhah
66.37
साश्वं तु कर्णं सरथं किरीटी; समाचिनोद्भारत वत्सदन्तैः
प्रच्छादयामास दिशश्च बाणैः; सर्वप्रयत्नात्तपनीयपुङ्खैः
Sashvam tu karnam saratham kiriti; samachinodbharata vatsadantaih
Prachchhadayamasa dishashcha banaih; sarvaprayatnattapaniyapunkhaih
66.38
स वत्सदन्तैः पृथुपीनवक्षाः; समाचितः स्माधिरथिर्विभाति
सुपुष्पिताशोकपलाशशाल्मलि;र्यथाचलः स्पन्दनचन्दनायुतः
Sa vatsadantaih prithupinavakshah; samachitah smadhirathirvibhati
Supushpitashokapalashashalmali;ryathachalah spandanachandanayutah
66.39
शरैः शरीरे बहुधा समर्पितै;र्विभाति कर्णः समरे विशां पते
महीरुहैराचितसानुकन्दरो; यथा महेन्द्रः शुभकर्णिकारवान्
Sharaih sharire bahudha samarpitai;rvibhati karnah samare visham pate
Mahiruhairachitasanukandaro; yatha mahendrah shubhakarnikaravan
66.40
स बाणसंघान्धनुषा व्यवासृज;न्विभाति कर्णः शरजालरश्मिवान्
सलोहितो रक्तगभस्तिमण्डलो; दिवाकरोऽस्ताभिमुखो यथा तथा
Sa banasanghandhanusha vyavasrija;nvibhati karnah sharajalarashmivan
Salohito raktagabhastimandalo; divakarostabhimukho yatha tatha
66.41
बाह्वन्तरादाधिरथेर्विमुक्ता;न्बाणान्महाहीनिव दीप्यमानान्
व्यध्वंसयन्नर्जुनबाहुमुक्ताः; शराः समासाद्य दिशः शिताग्राः
Bahvantaradadhirathervimukta;nbananmahahiniva dipyamanan
Vyadhvansayannarjunabahumuktah; sharah samasadya dishah shitagrah
66.42
ततश्चक्रमपतत्तस्य भूमौ; स विह्वलः समरे सूतपुत्रः
घूर्णे रथे ब्राह्मणस्याभिशापा;द्रामादुपात्तेऽप्रतिभाति चास्त्रे
Tatashchakramapatattasya bhumau; sa vihvalah samare sutaputrah
Ghurne rathe brahmanasyabhishapa;dramadupattepratibhati chastre
66.43
अमृष्यमाणो व्यसनानि तानि; हस्तौ विधुन्वन्स विगर्हमाणः
धर्मप्रधानानभिपाति धर्म; इत्यब्रुवन्धर्मविदः सदैव
ममापि निम्नोऽद्य न पाति भक्ता;न्मन्ये न नित्यं परिपाति धर्मः
Amrishyamano vyasanani tani; hastau vidhunvansa vigarhamanah
Dharmapradhananabhipati dharma; ityabruvandharmavidah sadaiva
Mamapi nimnodya na pati bhakta;nmanye na nityam paripati dharmah
66.44
एवं ब्रुवन्प्रस्खलिताश्वसूतो; विचाल्यमानोऽर्जुनशस्त्रपातैः
मर्माभिघाताच्छलितः क्रियासु; पुनः पुनर्धर्ममगर्हदाजौ
Evam bruvanpraskhalitashvasuto; vichalyamanorjunashastrapataih
Marmabhighatachchhalitah kriyasu; punah punardharmamagarhadajau
66.45
ततः शरैर्भीमतरैरविध्यत्त्रिभिराहवे
हस्ते कर्णस्तदा पार्थमभ्यविध्यच्च सप्तभिः
Tatah sharairbhimatarairavidhyattribhirahave
Haste karnastada parthamabhyavidhyachcha saptabhih
66.46
ततोऽर्जुनः सप्तदश तिग्मतेजानजिह्मगान्
इन्द्राशनिसमान्घोरानसृजत्पावकोपमान्
Tatorjunah saptadasha tigmatejanajihmagan
Indrashanisamanghoranasrijatpavakopaman
66.47
निर्भिद्य ते भीमवेगा न्यपतन्पृथिवीतले
कम्पितात्मा तथा कर्णः शक्त्या चेष्टामदर्शयत्
Nirbhidya te bhimavega nyapatanprithivitale
Kampitatma tatha karnah shaktya cheshtamadarshayat
66.48
बलेनाथ स संस्तभ्य ब्रह्मास्त्रं समुदैरयत्
ऐन्द्रास्त्रमर्जुनश्चापि तद्दृष्ट्वाभिन्यमन्त्रयत्
Balenatha sa sanstabhya brahmastram samudairayat
Aindrastramarjunashchapi taddrishtvabhinyamantrayat
66.49
गाण्डीवं ज्यां च बाणांश्च अनुमन्त्र्य धनंजयः
असृजच्छरवर्षाणि वर्षाणीव पुरंदरः
Gandivam jyam cha bananshcha anumantrya dhananjayah
Asrijachchharavarshani varshaniva purandarah
66.50
ततस्तेजोमया बाणा रथात्पार्थस्य निःसृताः
प्रादुरासन्महावीर्याः कर्णस्य रथमन्तिकात्
Tatastejomaya bana rathatparthasya nihsritah
Pradurasanmahaviryah karnasya rathamantikat
66.51
तान्कर्णस्त्वग्रतोऽभ्यस्तान्मोघांश्चक्रे महारथः
ततोऽब्रवीद्वृष्णिवीरस्तस्मिन्नस्त्रे विनाशिते
Tankarnastvagratobhyastanmoghanshchakre maharathah
Tatobravidvrishnivirastasminnastre vinashite
66.52
विसृजास्त्रं परं पार्थ राधेयो ग्रसते शरान्
ब्रह्मास्त्रमर्जुनश्चापि संमन्त्र्याथ प्रयोजयत्
Visrijastram param partha radheyo grasate sharan
Brahmastramarjunashchapi sammantryatha prayojayat
66.53
छादयित्वा ततो बाणैः कर्णं प्रभ्राम्य चार्जुनः
तस्य कर्णः शरैः क्रुद्धश्चिच्छेद ज्यां सुतेजनैः
Chhadayitva tato banaih karnam prabhramya charjunah
Tasya karnah sharaih kruddhashchichchheda jyam sutejanaih
66.54
ततो ज्यामवधायान्यामनुमृज्य च पाण्डवः
शरैरवाकिरत्कर्णं दीप्यमानैः सहस्रशः
Tato jyamavadhayanyamanumrijya cha pandavah
Sharairavakiratkarnam dipyamanaih sahasrashah
66.55
तस्य ज्याच्छेदनं कर्णो ज्यावधानं च संयुगे
नान्वबुध्यत शीघ्रत्वात्तदद्भुतमिवाभवत्
Tasya jyachchhedanam karno jyavadhanam cha sanyuge
Nanvabudhyata shighratvattadadbhutamivabhavat
66.56
अस्त्रैरस्त्राणि राधेयः प्रत्यहन्सव्यसाचिनः
चक्रे चाभ्यधिकं पार्थात्स्ववीर्यं प्रतिदर्शयन्
Astrairastrani radheyah pratyahansavyasachinah
Chakre chabhyadhikam parthatsvaviryam pratidarshayan
66.57
ततः कृष्णोऽर्जुनं दृष्ट्वा कर्णास्त्रेणाभिपीडितम्
अभ्यस्येत्यब्रवीत्पार्थमातिष्ठास्त्रमनुत्तमम्
Tatah krishnorjunam drishtva karnastrenabhipiditam
Abhyasyetyabravitparthamatishthastramanuttamam
66.58
ततोऽन्यमग्निसदृशं शरं सर्पविषोपमम्
अश्मसारमयं दिव्यमनुमन्त्र्य धनंजयः
Tatonyamagnisadrisham sharam sarpavishopamam
Ashmasaramayam divyamanumantrya dhananjayah
66.59
रौद्रमस्त्रं समादाय क्षेप्तुकामः किरीटवान्
ततोऽग्रसन्मही चक्रं राधेयस्य महामृधे
Raudramastram samadaya ksheptukamah kiritavan
Tatograsanmahi chakram radheyasya mahamridhe
66.60
ग्रस्तचक्रस्तु राधेयः कोपादश्रूण्यवर्तयत्
सोऽब्रवीदर्जुनं चापि मुहूर्तं क्षम पाण्डव
Grastachakrastu radheyah kopadashrunyavartayat
Sobravidarjunam chapi muhurtam kshama pandava
66.61
मध्ये चक्रमवग्रस्तं दृष्ट्वा दैवादिदं मम
पार्थ कापुरुषाचीर्णमभिसंधिं विवर्जय
Madhye chakramavagrastam drishtva daivadidam mama
Partha kapurushachirnamabhisandhim vivarjaya
66.62
प्रकीर्णकेशे विमुखे ब्राह्मणे च कृताञ्जलौ
शरणागते न्यस्तशस्त्रे तथा व्यसनगेऽर्जुन
Prakirnakeshe vimukhe brahmane cha kritanjalau
Sharanagate nyastashastre tatha vyasanagerjuna
66.63
अबाणे भ्रष्टकवचे भ्रष्टभग्नायुधे तथा
न शूराः प्रहरन्त्याजौ न राज्ञे पार्थिवास्तथा
त्वं च शूरोऽसि कौन्तेय तस्मात्क्षम मुहूर्तकम्
Abane bhrashtakavache bhrashtabhagnayudhe tatha
Na shurah praharantyajau na ragye parthivastatha
Tvam cha shurosi kaunteya tasmatkshama muhurtakam
66.64
यावच्चक्रमिदं भूमेरुद्धरामि धनंजय
न मां रथस्थो भूमिष्ठमसज्जं हन्तुमर्हसि
न वासुदेवात्त्वत्तो वा पाण्डवेय बिभेम्यहम्
Yavachchakramidam bhumeruddharami dhananjaya
Na mam rathastho bhumishthamasajjam hantumarhasi
Na vasudevattvatto va pandaveya bibhemyaham
66.65
त्वं हि क्षत्रियदायादो महाकुलविवर्धनः
स्मृत्वा धर्मोपदेशं त्वं मुहूर्तं क्षम पाण्डव
Tvam hi kshatriyadayado mahakulavivardhanah
Smritva dharmopadesham tvam muhurtam kshama pandava