Utshovঅধ্যায় 69
69.1
সংজয় উবাচ
তথা নিপাতিতে কর্ণে তব সৈন্যে চ বিদ্রুতে
আশ্লিষ্য পার্থং দাশার্হো হর্ষাদ্বচনমব্রবীৎ
69.2
হতো বলভিদা বৃত্রস্ত্বয়া কর্ণো ধনংজয়
বধং বৈ কর্ণবৃত্রাভ্যাং কথয়িষ্যন্তি মানবাঃ
69.3
বজ্রিণা নিহতো বৃত্রঃ সংয়ুগে ভূরিতেজসা
ত্বয়া তু নিহতঃ কর্ণো ধনুষা নিশিতৈঃ শরৈঃ
69.4
তমিমং বিক্রমং লোকে প্রথিতং তে যশোবহম্
নিবেদয়াবঃ কৌন্তেয় ধর্মরাজায় ধীমতে
69.5
বধং কর্ণস্য সংগ্রামে দীর্ঘকালচিকীর্ষিতম্
নিবেদ্য ধর্মরাজস্য ত্বমানৃণ্যং গমিষ্যসি
69.6
তথেত্যুক্তে কেশবস্তু পার্থেন যদুপুঙ্গবঃ
পর্যবর্তয়দব্যগ্রো রথং রথবরস্য তম্
69.7
ধৃষ্টদ্যুম্নং যুধামন্যুং মাদ্রীপুত্রৌ বৃকোদরম্
যুয়ুধানং চ গোবিন্দ ইদং বচনমব্রবীৎ
69.8
পরানভিমুখা যত্তাস্তিষ্ঠধ্বং ভদ্রমস্তু বঃ
যাবদাবেদ্যতে রাজ্ঞে হতঃ কর্ণোঽর্জুনেন বৈ
69.9
স তৈঃ শূরৈরনুজ্ঞাতো যয়ৌ রাজনিবেশনম্
পার্থমাদায় গোবিন্দো দদর্শ চ যুধিষ্ঠিরম্
69.10
শয়ানং রাজশার্দূলং কাঞ্চনে শয়নোত্তমে
অগৃহ্ণীতাং চ চরণৌ মুদিতৌ পার্থিবস্য তৌ
69.11
তয়োঃ প্রহর্ষমালক্ষ্য প্রহারাংশ্চাতিমানুষান্
রাধেয়ং নিহতং মত্বা সমুত্তস্থৌ যুধিষ্ঠিরঃ
69.12
ততোঽস্মৈ তদ্যথাবৃত্তং বাসুদেবঃ প্রিয়ংবদঃ
কথয়ামাস কর্ণস্য নিধনং যদুনন্দনঃ
69.13
ঈষদুত্স্ময়মানস্তু কৃষ্ণো রাজানমব্রবীৎ
যুধিষ্ঠিরং হতামিত্রং কৃতাঞ্জলিরথাচ্যুতঃ
69.14
দিষ্ট্যা গাণ্ডীবধন্বা চ পাণ্ডবশ্চ বৃকোদরঃ
ত্বং চাপি কুশলী রাজন্মাদ্রীপুত্রৌ চ পাণ্ডবৌ
69.15
মুক্তা বীরক্ষয়াদস্মাত্সংগ্রামাল্লোমহর্ষণাৎ
ক্ষিপ্রমুত্তরকালানি কুরু কার্যাণি পার্থিব
69.16
হতো বৈকর্তনঃ ক্রূরঃ সূতপুত্রো মহাবলঃ
দিষ্ট্যা জয়সি রাজেন্দ্র দিষ্ট্যা বর্ধসি পাণ্ডব
69.17
যঃ স দ্যূতজিতাং কৃষ্ণাং প্রাহসত্পুরুষাধমঃ
তস্যাদ্য সূতপুত্রস্য ভূমিঃ পিবতি শোণিতম্
69.18
শেতেঽসৌ শরদীর্ণাঙ্গঃ শত্রুস্তে কুরুপুংগব
তং পশ্য পুরুষব্যাঘ্র বিভিন্নং বহুধা শরৈঃ
69.19
যুধিষ্ঠিরস্তু দাশার্হং প্রহৃষ্টঃ প্রত্যপূজয়ৎ
দিষ্ট্যা দিষ্ট্যেতি রাজেন্দ্র প্রীত্যা চেদমুবাচ হ
69.20
নৈতচ্চিত্রং মহাবাহো ত্বয়ি দেবকিনন্দন
ত্বয়া সারথিনা পার্থো যত্কুর্যাদদ্য পৌরুষম্
69.21
প্রগৃহ্য চ কুরুশ্রেষ্ঠঃ সাঙ্গদং দক্ষিণং ভুজম্
উবাচ ধর্মভৃত্পার্থ উভৌ তৌ কেশবার্জুনৌ
69.22
নরনারায়ণৌ দেবৌ কথিতৌ নারদেন হ
ধর্মসংস্থাপনে যুক্তৌ পুরাণৌ পুরুষোত্তমৌ
69.23
অসকৃচ্চাপি মেধাবী কৃষ্ণদ্বৈপায়নো মম
কথামেতাং মহাবাহো দিব্যামকথয়ত্প্রভুঃ
69.24
তব কৃষ্ণ প্রভাবেণ গাণ্ডীবেন ধনংজয়ঃ
জয়ত্যভিমুখাঞ্শত্রূন্ন চাসীদ্বিমুখঃ ক্বচিৎ
69.25
জয়শ্চৈব ধ্রুবোঽস্মাকং ন ত্বস্মাকং পরাজয়ঃ
যদা ত্বং যুধি পার্থস্য সারথ্যমুপজগ্মিবান্
69.26
এবমুক্ত্বা মহারাজ তং রথং হেমভূষিতম্
দন্তবর্ণৈর্হয়ৈর্যুক্তং কালবালৈর্মহারথঃ
69.27
আস্থায় পুরুষব্যাঘ্রঃ স্ববলেনাভিসংবৃতঃ
কৃষ্ণার্জুনাভ্যাং বীরাভ্যামনুমন্য ততঃ প্রিয়ম্
69.28
আগতো বহুবৃত্তান্তং দ্রষ্টুমায়োধনং তদা
আভাষমাণস্তৌ বীরাবুভৌ মাধবফল্গুনৌ
69.29
স দদর্শ রণে কর্ণং শয়ানং পুরুষর্ষভম্
গাণ্ডীবমুক্তৈর্বিশিখৈঃ সর্বতঃ শকলীকৃতম্
69.30
সপুত্রং নিহতং দৃষ্ট্বা কর্ণং রাজা যুধিষ্ঠিরঃ
প্রশশংস নরব্যাঘ্রাবুভৌ মাধবপাণ্ডবৌ
69.31
অদ্য রাজাস্মি গোবিন্দ পৃথিব্যাং ভ্রাতৃভিঃ সহ
ত্বয়া নাথেন বীরেণ বিদুষা পরিপালিতঃ
69.32
হতং দৃষ্ট্বা নরব্যাঘ্রং রাধেয়মভিমানিনম্
নিরাশোঽদ্য দুরাত্মাসৌ ধার্তরাষ্ট্রো ভবিষ্যতি
জীবিতাচ্চাপি রাজ্যাচ্চ হতে কর্ণে মহারথে
69.33
ত্বত্প্রসাদাদ্বয়ং চৈব কৃতার্থাঃ পুরুষর্ষভ
ত্বং চ গাণ্ডীবধন্বা চ বিজয়ী যদুনন্দন
দিষ্ট্যা জয়সি গোবিন্দ দিষ্ট্যা কর্ণো নিপাতিতঃ
69.34
এবং স বহুশো হৃষ্টঃ প্রশশংস জনার্দনম্
অর্জুনং চাপি রাজেন্দ্র ধর্মরাজো যুধিষ্ঠিরঃ
69.35
ততো ভীমপ্রভৃতিভিঃ সর্বৈশ্চ ভ্রাতৃভির্বৃতম্
বর্ধয়ন্তি স্ম রাজানং হর্ষয়ুক্তা মহারথাঃ
69.36
নকুলঃ সহদেবশ্চ পাণ্ডবশ্চ বৃকোদরঃ
সাত্যকিশ্চ মহারাজ বৃষ্ণীনাং প্রবরো রথঃ
69.37
ধৃষ্টদ্যুম্নঃ শিখণ্ডী চ পাণ্ডুপাঞ্চালসৃঞ্জয়াঃ
পূজয়ন্তি স্ম কৌন্তেয়ং নিহতে সূতনন্দনে
69.38
তে বর্ধয়িত্বা নৃপতিং পাণ্ডুপুত্রং যুধিষ্ঠিরম্
জিতকাশিনো লব্ধলক্ষা যুদ্ধশৌণ্ডাঃ প্রহারিণঃ
69.39
স্তুবন্তঃ স্তবয়ুক্তাভির্বাগ্ভিঃ কৃষ্ণৌ পরংতপৌ
জগ্মুঃ স্বশিবিরায়ৈব মুদা যুক্তা মহারথাঃ
69.40
এবমেষ ক্ষয়ো বৃত্তঃ সুমহাঁল্লোমহর্ষণঃ
তব দুর্মন্ত্রিতে রাজন্নতীতং কিং নু শোচসি
69.41
বৈশংপায়ন উবাচ
শ্রুত্বা তদপ্রিয়ং রাজন্ধৃতরাষ্ট্রো মহীপতিঃ
পপাত ভূমৌ নিশ্চেষ্টঃ কৌরব্যঃ পরমার্তিবান্
তথা সত্যব্রতা দেবী গান্ধারী ধর্মদর্শিনী
69.42
তং প্রত্যগৃহ্ণাদ্বিদুরো নৃপতিং সংজয়স্তথা
পর্যাশ্বাসয়তশ্চৈবং তাবুভাবেব ভূমিপম্
69.43
তথৈবোত্থাপয়ামাসুর্গান্ধারীং রাজয়োষিতঃ
তাভ্যামাশ্বাসিতো রাজা তূষ্ণীমাসীদ্বিচেতনঃ