Utshovঅধ্যায় 45
45.1
সংজয় উবাচ
দ্রৌণিস্তু রথবংশেন মহতা পরিবারিতঃ
আপতত্সহসা রাজন্যত্র রাজা ব্যবস্থিতঃ
45.2
তমাপতন্তং সহসা শূরঃ শৌরিসহায়বান্
দধার সহসা পার্থো বেলেব মকরালয়ম্
45.3
ততঃ ক্রুদ্ধো মহারাজ দ্রোণপুত্রঃ প্রতাপবান্
অর্জুনং বাসুদেবং চ ছাদয়ামাস পত্রিভিঃ
45.4
অবচ্ছন্নৌ ততঃ কৃষ্ণৌ দৃষ্ট্বা তত্র মহারথাঃ
বিস্ময়ং পরমং গত্বা প্রৈক্ষন্ত কুরবস্তদা
45.5
অর্জুনস্তু ততো দিব্যমস্ত্রং চক্রে হসন্নিব
তদস্ত্রং ব্রাহ্মণো যুদ্ধে বারয়ামাস ভারত
45.6
যদ্যদ্ধি ব্যাক্ষিপদ্যুদ্ধে পাণ্ডবোঽস্ত্রং জিঘাংসয়া
তত্তদস্ত্রং মহেষ্বাসো দ্রোণপুত্রো ব্যশাতয়ৎ
45.7
অস্ত্রয়ুদ্ধে ততো রাজন্বর্তমানে ভয়াবহে
অপশ্যাম রণে দ্রৌণিং ব্যাত্তাননমিবান্তকম্
45.8
স দিশো বিদিশশ্চৈব ছাদয়িত্বা বিজিহ্মগৈঃ
বাসুদেবং ত্রিভির্বাণৈরবিধ্যদ্দক্ষিণে ভুজে
45.9
ততোঽর্জুনো হয়ান্হত্বা সর্বাংস্তস্য মহাত্মনঃ
চকার সমরে ভূমিং শোণিতৌঘতরঙ্গিণীম্
45.10
নিহতা রথিনঃ পেতুঃ পার্থচাপচ্যুতৈঃ শরৈঃ
হয়াশ্চ পর্যধাবন্ত মুক্তয়োক্ত্রাস্ততস্ততঃ
45.11
তদ্দৃষ্ট্বা কর্ম পার্থস্য দ্রৌণিরাহবশোভিনঃ
অবাকিরদ্রণে কৃষ্ণং সমন্তান্নিশিতৈঃ শরৈঃ
45.12
ততোঽর্জুনং মহারাজ দ্রৌণিরায়ম্য পত্রিণা
বক্ষোদেশে সমাসাদ্য তাডয়ামাস সংয়ুগে
45.13
সোঽতিবিদ্ধো রণে তেন দ্রোণপুত্রেণ ভারত
আদত্ত পরিঘং ঘোরং দ্রৌণেশ্চৈনমবাক্ষিপৎ
45.14
তমাপতন্তং পরিঘং কার্তস্বরবিভূষিতম্
দ্রৌণিশ্চিচ্ছেদ সহসা তত উচ্চুক্রুশুর্জনাঃ
45.15
সোঽনেকধাপতদ্ভূমৌ ভারদ্বাজস্য সায়কৈঃ
বিশীর্ণঃ পর্বতো রাজন্যথা স্যান্মাতরিশ্বনা
45.16
ততোঽর্জুনো রণে দ্রৌণিং বিব্যাধ দশভিঃ শরৈঃ
সারথিং চাস্য ভল্লেন রথনীডাদপাহরৎ
45.17
স সংগৃহ্য স্বয়ং বাহান্কৃষ্ণৌ প্রাচ্ছাদয়চ্ছরৈঃ
তত্রাদ্ভুতমপশ্যাম দ্রৌণেরাশু পরাক্রমম্
45.18
অয়চ্ছত্তুরগান্যচ্চ ফল্গুনং চাপ্যয়োধয়ৎ
তদস্য সমরে রাজন্সর্বে যোধা অপূজয়ন্
45.19
যদা ত্বগ্রস্যত রণে দ্রোণপুত্রেণ ফল্গুনঃ
ততো রশ্মীন্রথাশ্বানাং ক্ষুরপ্রৈশ্চিচ্ছিদে জয়ঃ
45.20
প্রাদ্রবংস্তুরগাস্তে তু শরবেগপ্রবাধিতাঃ
ততোঽভূন্নিনদো ভূয়স্তব সৈন্যস্য ভারত
45.21
পাণ্ডবাস্তু জয়ং লব্ধ্বা তব সৈন্যমুপাদ্রবন্
সমন্তান্নিশিতান্বাণান্বিমুঞ্চন্তো জয়ৈষিণঃ
45.22
পাণ্ডবৈস্তু মহারাজ ধার্তরাষ্ট্রী মহাচমূঃ
পুনঃ পুনরথো বীরৈরভজ্যত জয়োদ্ধতৈঃ
45.23
পশ্যতাং তে মহারাজ পুত্রাণাং চিত্রয়োধিনাম্
শকুনেঃ সৌবলেয়স্য কর্ণস্য চ মহাত্মনঃ
45.24
বার্যমাণা মহাসেনা পুত্রৈস্তব জনেশ্বর
নাবতিষ্ঠত সংগ্রামে তাড্যমানা সমন্ততঃ
45.25
ততো যোধৈর্মহারাজ পলায়দ্ভিস্ততস্ততঃ
অভবদ্ব্যাকুলং ভীতৈঃ পুত্রাণাং তে মহদ্বলম্
45.26
তিষ্ঠ তিষ্ঠেতি সততং সূতপুত্রস্য জল্পতঃ
নাবতিষ্ঠত সা সেনা বধ্যমানা মহাত্মভিঃ
45.27
অথোত্ক্রুষ্টং মহারাজ পাণ্ডবৈর্জিতকাশিভিঃ
ধার্তরাষ্ট্রবলং দৃষ্ট্বা দ্রবমাণং সমন্ততঃ
45.28
ততো দুর্যোধনঃ কর্ণমব্রবীত্প্রণয়াদিব
পশ্য কর্ণ যথা সেনা পাণ্ডবৈরর্দিতা ভৃশম্
45.29
ত্বয়ি তিষ্ঠতি সংত্রাসাত্পলায়তি সমন্ততঃ
এতজ্জ্ঞাত্বা মহাবাহো কুরু প্রাপ্তমরিংদম
45.30
সহস্রাণি চ যোধানাং ত্বামেব পুরুষর্ষভ
ক্রোশন্তি সমরে বীর দ্রাব্যমাণানি পাণ্ডবৈঃ
45.31
এতচ্ছ্রুত্বা তু রাধেয়ো দুর্যোধনবচো মহৎ
মদ্ররাজমিদং বাক্যমব্রবীত্সূতনন্দনঃ
45.32
পশ্য মে ভুজয়োর্বীর্যমস্ত্রাণাং চ জনেশ্বর
অদ্য হন্মি রণে সর্বান্পাঞ্চালান্পাণ্ডুভিঃ সহ
বাহয়াশ্বান্নরব্যাঘ্র ভদ্রেণৈব জনেশ্বর
45.33
এবমুক্ত্বা মহারাজ সূতপুত্রঃ প্রতাপবান্
প্রগৃহ্য বিজয়ং বীরো ধনুঃশ্রেষ্ঠং পুরাতনম্
সজ্যং কৃত্বা মহারাজ সংমৃজ্য চ পুনঃ পুনঃ
45.34
সংনিবার্য চ যোধান্স্বান্সত্যেন শপথেন চ
প্রায়োজয়দমেয়াত্মা ভার্গবাস্ত্রং মহাবলঃ
45.35
ততো রাজন্সহস্রাণি প্রয়ুতান্যর্বুদানি চ
কোটিশশ্চ শরাস্তীক্ষ্ণা নিরগচ্ছন্মহামৃধে
45.36
জ্বলিতৈস্তৈর্মহাঘোরৈঃ কঙ্কবর্হিণবাজিতৈঃ
সংছন্না পাণ্ডবী সেনা ন প্রাজ্ঞায়ত কিংচন
45.37
হাহাকারো মহানাসীত্পাঞ্চালানাং বিশাং পতে
পীডিতানাং বলবতা ভার্গবাস্ত্রেণ সংয়ুগে
45.38
নিপতদ্ভির্গজৈ রাজন্নরৈশ্চাপি সহস্রশঃ
রথৈশ্চাপি নরব্যাঘ্র হয়ৈশ্চাপি সমন্ততঃ
45.39
প্রাকম্পত মহী রাজন্নিহতৈস্তৈস্ততস্ততঃ
ব্যাকুলং সর্বমভবত্পাণ্ডবানাং মহদ্বলম্
45.40
কর্ণস্ত্বেকো যুধাং শ্রেষ্ঠো বিধূম ইব পাবকঃ
দহঞ্শত্রূন্নরব্যাঘ্র শুশুভে স পরংতপঃ
45.41
তে বধ্যমানাঃ কর্ণেন পাঞ্চালাশ্চেদিভিঃ সহ
তত্র তত্র ব্যমুহ্যন্ত বনদাহে যথা দ্বিপাঃ
চুক্রুশুস্তে নরব্যাঘ্র যথাপ্রাগ্বা নরোত্তমাঃ
45.42
তেষাং তু ক্রোশতাং শ্রুত্বা ভীতানাং রণমূর্ধনি
ধাবতাং চ দিশো রাজন্বিত্রস্তানাং সমন্ততঃ
আর্তনাদো মহাংস্তত্র প্রেতানামিব সংপ্লবে
45.43
বধ্যমানাংস্তু তান্দৃষ্ট্বা সূতপুত্রেণ মারিষ
বিত্রেসুঃ সর্বভূতানি তির্যগ্যোনিগতান্যপি
45.44
তে বধ্যমানাঃ সমরে সূতপুত্রেণ সৃঞ্জয়াঃ
অর্জুনং বাসুদেবং চ ব্যাক্রোশন্ত মুহুর্মুহুঃ
প্রেতরাজপুরে যদ্বত্প্রেতরাজং বিচেতসঃ
45.45
অথাব্রবীদ্বাসুদেবং কুন্তীপুত্রো ধনংজয়ঃ
ভার্গবাস্ত্রং মহাঘোরং দৃষ্ট্বা তত্র সভীরিতম্
45.46
পশ্য কৃষ্ণ মহাবাহো ভার্গবাস্ত্রস্য বিক্রমম্
নৈতদস্ত্রং হি সমরে শক্যং হন্তুং কথংচন
45.47
সূতপুত্রং চ সংরব্ধং পশ্য কৃষ্ণ মহারণে
অন্তকপ্রতিমং বীরং কুর্বাণং কর্ম দারুণম্
45.48
সুতীক্ষ্ণং চোদয়ন্নশ্বান্প্রেক্ষতে মাং মুহুর্মুহুঃ
ন চ পশ্যামি সমরে কর্ণস্য প্রপলায়িতম্
45.49
জীবন্প্রাপ্নোতি পুরুষঃ সংখ্যে জয়পরাজয়ৌ
জিতস্য তু হৃষীকেশ বধ এব কুতো জয়ঃ
45.50
ততো জনার্দনঃ প্রায়াদ্দ্রষ্টুমিচ্ছন্যুধিষ্ঠিরম্
শ্রমেণ গ্রাহয়িষ্যংশ্চ কর্ণং যুদ্ধেন মারিষ
45.51
অর্জুনং চাব্রবীত্কৃষ্ণো ভৃশং রাজা পরিক্ষতঃ
তমাশ্বাস্য কুরুশ্রেষ্ঠ ততঃ কর্ণং হনিষ্যসি
45.52
ততো ধনংজয়ো দ্রষ্টুং রাজানং বাণপীডিতম্
রথেন প্রয়য়ৌ ক্ষিপ্রং সংগ্রামে কেশবাজ্ঞয়া
45.53
গচ্ছন্নেব তু কৌন্তেয়ো ধর্মরাজদিদৃক্ষয়া
সৈন্যমালোকয়ামাস নাপশ্যত্তত্র চাগ্রজম্
45.54
যুদ্ধং কৃত্বা তু কৌন্তেয়ো দ্রোণপুত্রেণ ভারত
দুঃসহং বজ্রিণা সংখ্যে পরাজিগ্যে ভৃগোঃ সুতম্
45.55
দ্রৌণিং পরাজিত্য ততোগ্রধন্বা; কৃত্বা মহদ্দুষ্করমার্যকর্ম
আলোকয়ামাস ততঃ স্বসৈন্যং; ধনংজয়ঃ শত্রুভিরপ্রধৃষ্যঃ
45.56
স যুধ্যমানঃ পৃতনামুখস্থা;ঞ্শূরাঞ্শূরো হর্ষয়ন্সব্যসাচী
পূর্বাপদানৈঃ প্রথিতৈঃ প্রশংস;ন্স্থিরাংশ্চকারাত্মরথাননীকে
45.57
অপশ্যমানস্তু কিরীটমালী; যুধি জ্যেষ্ঠং ভ্রাতরমাজমীঢম্
উবাচ ভীমং তরসাভ্যুপেত্য; রাজ্ঞঃ প্রবৃত্তিস্ত্বিহ কেতি রাজন্
45.58
ভীম উবাচ
অপয়াত ইতো রাজা ধর্মপুত্রো যুধিষ্ঠিরঃ
কর্ণবাণবিভুগ্নাঙ্গো যদি জীবেত্কথংচন
45.59
অর্জুন উবাচ
তস্মাদ্ভবাঞ্শীঘ্রমিতঃ প্রয়াতু; রাজ্ঞঃ প্রবৃত্ত্যৈ কুরুসত্তমস্য
নূনং হি বিদ্ধোঽতিভৃশং পৃষত্কৈঃ; কর্ণেন রাজা শিবিরং গতোঽসৌ
45.60
যঃ সংপ্রহারে নিশি সংপ্রবৃত্তে; দ্রোণেন বিদ্ধোঽতিভৃশং তরস্বী
তস্থৌ চ তত্রাপি জয়প্রতীক্ষো; দ্রোণেন যাবন্ন হতঃ কিলাসীৎ
45.61
স সংশয়ং গমিতঃ পাণ্ডবাগ্র্যঃ; সংখ্যেঽদ্য কর্ণেন মহানুভাবঃ
জ্ঞাতুং প্রয়াহ্যাশু তমদ্য ভীম; স্থাস্যাম্যহং শত্রুগণান্নিরুধ্য
45.62
ভীম উবাচ
ত্বমেব জানীহি মহানুভাব; রাজ্ঞঃ প্রবৃত্তিং ভরতর্ষভস্য
অহং হি যদ্যর্জুন যামি তত্র; বক্ষ্যন্তি মাং ভীত ইতি প্রবীরাঃ
45.63
ততোঽব্রবীদর্জুনো ভীমসেনং; সংশপ্তকাঃ প্রত্যনীকং স্থিতা মে
এতানহত্বা ন ময়া তু শক্য;মিতোঽপয়াতুং রিপুসংঘগোষ্ঠাৎ
45.64
অথাব্রবীদর্জুনং ভীমসেনঃ; স্ববীর্যমাশ্রিত্য কুরুপ্রবীর
সংশপ্তকান্প্রতিয়োত্স্যামি সংখ্যে; সর্বানহং যাহি ধনংজয়েতি
45.65
তদ্ভীমসেনস্য বচো নিশম্য; সুদুর্বচং ভ্রাতুরমিত্রমধ্যে
দ্রষ্টুং কুরুশ্রেষ্ঠমভিপ্রয়াতুং; প্রোবাচ বৃষ্ণিপ্রবরং তদানীম্
45.66
চোদয়াশ্বান্হৃষীকেশ বিগাহ্যৈতং রথার্ণবম্
অজাতশত্রুং রাজানং দ্রষ্টুমিচ্ছামি কেশব
45.67
ততো হয়ান্সর্বদাশার্হমুখ্যঃ; প্রাচোদয়দ্ভীমমুবাচ চেদম্
নৈতচ্চিত্রং তব কর্মাদ্য বীর; যাস্যামহে জহি ভীমারিসংঘান্
45.68
ততো যয়ৌ হৃষীকেশো যত্র রাজা যুধিষ্ঠিরঃ
শীঘ্রাচ্ছীঘ্রতরং রাজন্বাজিভির্গরুডোপমৈঃ
45.69
প্রত্যনীকে ব্যবস্থাপ্য ভীমসেনমরিংদমম্
সংদিশ্য চৈব রাজেন্দ্র যুদ্ধং প্রতি বৃকোদরম্
45.70
ততস্তু গত্বা পুরুষপ্রবীরৌ; রাজানমাসাদ্য শয়ানমেকম্
রথাদুভৌ প্রত্যবরুহ্য তস্মা;দ্ববন্দতুর্ধর্মরাজস্য পাদৌ
45.71
তৌ দৃষ্ট্বা পুরুষব্যাঘ্রৌ ক্ষেমিণৌ পুরুষর্ষভ
মুদাভ্যুপগতৌ কৃষ্ণাবশ্বিনাবিব বাসবম্
45.72
তাবভ্যনন্দদ্রাজা হি বিবস্বানশ্বিনাবিব
হতে মহাসুরে জম্ভে শক্রবিষ্ণূ যথা গুরুঃ
45.73
মন্যমানো হতং কর্ণং ধর্মরাজো যুধিষ্ঠিরঃ
হর্ষগদ্গদয়া বাচা প্রীতঃ প্রাহ পরংতপৌ