Utshovঅধ্যায় 46
46.1
সংজয় উবাচ
মহাসত্ত্বৌ তু তৌ দৃষ্ট্বা সহিতৌ কেশবার্জুনৌ
হতমাধিরথিং মেনে সংখ্যে গাণ্ডীবধন্বনা
46.2
তাবভ্যনন্দত্কৌন্তেয়ঃ সাম্না পরমবল্গুনা
স্মিতপূর্বমমিত্রঘ্নঃ পূজয়ন্ভরতর্ষভ
46.3
যুধিষ্ঠির উবাচ
স্বাগতং দেবকীপুত্র স্বাগতং তে ধনংজয়
প্রিয়ং মে দর্শনং বাঢং যুবয়োরচ্যুতার্জুনৌ
46.4
অক্ষতাভ্যামরিষ্টাভ্যাং কথং যুধ্য মহারথম্
আশীবিষসমং যুদ্ধে সর্বশস্ত্রবিশারদম্
46.5
অগ্রগং ধার্তরাষ্ট্রাণাং সর্বেষাং শর্ম বর্ম চ
রক্ষিতং বৃষসেনেন সুষেণেন চ ধন্বিনা
46.6
অনুজ্ঞাতং মহাবীর্যং রামেণাস্ত্রেষু দুর্জয়ম্
ত্রাতারং ধার্তরাষ্ট্রাণাং গন্তারং বাহিনীমুখে
46.7
হন্তারমরিসৈন্যানামমিত্রগণমর্দনম্
দুর্যোধনহিতে যুক্তমস্মদ্যুদ্ধায় চোদ্যতম্
46.8
অপ্রধৃষ্যং মহায়ুদ্ধে দেবৈরপি সবাসবৈঃ
অনলানিলয়োস্তুল্যং তেজসা চ বলেন চ
46.9
পাতালমিব গম্ভীরং সুহৃদানন্দবর্ধনম্
অন্তকাভমমিত্রাণাং কর্ণং হত্বা মহাহবে
দিষ্ট্যা যুবামনুপ্রাপ্তৌ জিত্বাসুরমিবামরৌ
46.10
তেন যুদ্ধমদীনেন ময়া হ্যদ্যাচ্যুতার্জুনৌ
কুপিতেনান্তকেনেব প্রজাঃ সর্বা জিঘাংসতা
46.11
তেন কেতুশ্চ মে ছিন্নো হতৌ চ পার্ষ্ণিসারথী
হতবাহঃ কৃতশ্চাস্মি যুয়ুধানস্য পশ্যতঃ
46.12
ধৃষ্টদ্যুম্নস্য যময়োর্বীরস্য চ শিখণ্ডিনঃ
পশ্যতাং দ্রৌপদেয়ানাং পাঞ্চালানাং চ সর্বশঃ
46.13
এতাঞ্জিত্বা মহাবীর্যান্কর্ণঃ শত্রুগণান্বহূন্
জিতবান্মাং মহাবাহো যতমানং মহারণে
46.14
অনুসৃত্য চ মাং যুদ্ধে পরুষাণ্যুক্তবান্বহু
তত্র তত্র যুধাং শ্রেষ্ঠঃ পরিভূয় ন সংশয়ঃ
46.15
ভীমসেনপ্রভাবাত্তু যজ্জীবামি ধনংজয়
বহুনাত্র কিমুক্তেন নাহং তত্সোঢুমুত্সহে
46.16
ত্রয়োদশাহং বর্ষাণি যস্মাদ্ভীতো ধনংজয়
ন স্ম নিদ্রাং লভে রাত্রৌ ন চাহনি সুখং ক্বচিৎ
46.17
তস্য দ্বেষেণ সংয়ুক্তঃ পরিদহ্যে ধনংজয়
আত্মনো মরণং জানন্বাধ্রীণস ইব দ্বিপঃ
46.18
যস্যায়মগমত্কালশ্চিন্তয়ানস্য মে বিভো
কথং শক্যো ময়া কর্ণো যুদ্ধে ক্ষপয়িতুং ভবেৎ
46.19
জাগ্রত্স্বপংশ্চ কৌন্তেয় কর্ণমেব সদা হ্যহম্
পশ্যামি তত্র তত্রৈব কর্ণভূতমিদং জগৎ
46.20
যত্র যত্র হি গচ্ছামি কর্ণাদ্ভীতো ধনংজয়
তত্র তত্র হি পশ্যামি কর্ণমেবাগ্রতঃ স্থিতম্
46.21
সোঽহং তেনৈব বীরেণ সমরেষ্বপলায়িনা
সহয়ঃ সরথঃ পার্থ জিত্বা জীবন্বিসর্জিতঃ
46.22
কো নু মে জীবিতেনার্থো রাজ্যেনার্থোঽথ বা পুনঃ
মমৈবং ধিক্কৃতস্যেহ কর্ণেনাহবশোভিনা
46.23
ন প্রাপ্তপূর্বং যদ্ভীষ্মাত্কৃপাদ্দ্রোণাচ্চ সংয়ুগে
তত্প্রাপ্তমদ্য মে যুদ্ধে সূতপুত্রান্মহারথাৎ
46.24
তত্ত্বা পৃচ্ছামি কৌন্তেয় যথা হ্যকুশলস্তথা
তন্মমাচক্ষ্ব কার্ত্স্ন্যেন যথা কর্ণস্ত্বয়া হতঃ
46.25
শক্রবীর্যসমো যুদ্ধে যমতুল্যপরাক্রমঃ
রামতুল্যস্তথাস্ত্রে যঃ স কথং বৈ নিষূদিতঃ
46.26
মহারথঃ সমাখ্যাতঃ সর্বয়ুদ্ধবিশারদঃ
ধনুর্ধরাণাং প্রবরঃ সর্বেষামেকপূরুষঃ
46.27
পূজিতো ধৃতরাষ্ট্রেণ সপুত্রেণ বিশাং পতে
সদা ত্বদর্থং রাধেয়ঃ স কথং নিহতস্ত্বয়া
46.28
ধৃতরাষ্ট্রো হি যোধেষু সর্বেষ্বেব সদার্জুন
তব মৃত্যুং রণে কর্ণং মন্যতে পুরুষর্ষভঃ
46.29
স ত্বয়া পুরুষব্যাঘ্র কথং যুদ্ধে নিষূদিতঃ
তং মমাচক্ষ্ব বীভত্সো যথা কর্ণো হতস্ত্বয়া
46.30
সোত্সেধমস্য চ শিরঃ পশ্যতাং সুহৃদাং হৃতম্
ত্বয়া পুরুষশার্দূল শার্দূলেন যথা রুরোঃ
46.31
যঃ পর্যুপাসীত্প্রদিশো দিশশ্চ; ত্বাং সূতপুত্রঃ সমরে পরীপ্সন্
দিত্সুঃ কর্ণঃ সমরে হস্তিপূগং; স হীদানীং কঙ্কপত্রৈঃ সুতীক্ষ্ণৈঃ
46.32
ত্বয়া রণে নিহতঃ সূতপুত্রঃ; কচ্চিচ্ছেতে ভূমিতলে দুরাত্মা
কচ্চিত্প্রিয়ং মে পরমং ত্বয়াদ্য; কৃতং রণে সূতপুত্রং নিহত্য
46.33
যঃ সর্বতঃ পর্যপতত্ত্বদর্থে; মদান্বিতো গর্বিতঃ সূতপুত্রঃ
স শূরমানী সমরে সমেত্য; কচ্চিত্ত্বয়া নিহতঃ সংয়ুগেঽদ্য
46.34
রৌক্মং রথং হস্তিবরৈশ্চ যুক্তং; রথং দিত্সুর্যঃ পরেভ্যস্ত্বদর্থে
সদা রণে স্পর্ধতে যঃ স পাপঃ; কচ্চিত্ত্বয়া নিহতস্তাত যুদ্ধে
46.35
যোঽসৌ নিত্যং শূরমদেন মত্তো; বিকত্থতে সংসদি কৌরবাণাম্
প্রিয়োঽত্যর্থং তস্য সুয়োধনস্য; কচ্চিত্স পাপো নিহতস্ত্বয়াদ্য
46.36
কচ্চিত্সমাগম্য ধনুঃপ্রমুক্তৈ;স্ত্বত্প্রেষিতৈর্লোহিতার্থৈর্বিহংগৈঃ
শেতেঽদ্য পাপঃ স বিভিন্নগাত্রঃ; কচ্চিদ্ভগ্নো ধার্তরাষ্ট্রস্য বাহুঃ
46.37
যোঽসৌ সদা শ্লাঘতে রাজমধ্যে; দুর্যোধনং হর্ষয়ন্দর্পপূর্ণঃ
অহং হন্তা ফল্গুনস্যেতি মোহা;ত্কচ্চিদ্ধতস্তস্য ন বৈ তথা রথঃ
46.38
নাহং পাদৌ ধাবয়িষ্যে কদাচি;দ্যাবত্স্থিতঃ পার্থ ইত্যল্পবুদ্ধিঃ
ব্রতং তস্যৈতত্সর্বদা শক্রসূনো; কচ্চিত্ত্বয়া নিহতঃ সোঽদ্য কর্ণঃ
46.39
যোঽসৌ কৃষ্ণামব্রবীদ্দুষ্টবুদ্ধিঃ; কর্ণঃ সভায়াং কুরুবীরমধ্যে
কিং পাণ্ডবাংস্ত্বং ন জহাসি কৃষ্ণে; সুদুর্বলান্পতিতান্হীনসত্ত্বান্
46.40
যত্তত্কর্ণঃ প্রত্যজানাত্ত্বদর্থে; নাহত্বাহং সহ কৃষ্ণেন পার্থম্
ইহোপয়াতেতি স পাপবুদ্ধিঃ; কচ্চিচ্ছেতে শরসংভিন্নগাত্রঃ
46.41
কচ্চিত্সংগ্রামে বিদিতো বা তদায়ং; সমাগমঃ সৃঞ্জয়কৌরবাণাম্
যত্রাবস্থামীদৃশীং প্রাপিতোঽহং; কচ্চিত্ত্বয়া সোঽদ্য হতঃ সমেত্য
46.42
কচ্চিত্ত্বয়া তস্য সুমন্দবুদ্ধে;র্গাণ্ডীবমুক্তৈর্বিশিখৈর্জ্বলদ্ভিঃ
সকুণ্ডলং ভানুমদুত্তমাঙ্গং; কায়াত্প্রকৃত্তং যুধি সব্যসাচিন্
46.43
যত্তন্ময়া বাণসমর্পিতেন; ধ্যাতোঽসি কর্ণস্য বধায় বীর
তন্মে ত্বয়া কচ্চিদমোঘমদ্য; ধ্যাতং কৃতং কর্ণনিপাতনেন
46.44
যদ্দর্পপূর্ণঃ স সুয়োধনোঽস্মা;নবেক্ষতে কর্ণসমাশ্রয়েণ
কচ্চিত্ত্বয়া সোঽদ্য সমাশ্রয়োঽস্য; ভগ্নঃ পরাক্রম্য সুয়োধনস্য
46.45
যো নঃ পুরা ষণ্ঢতিলানবোচ;ত্সভামধ্যে পার্থিবানাং সমক্ষম্
স দুর্মতিঃ কচ্চিদুপেত্য সংখ্যে; ত্বয়া হতঃ সূতপুত্রোঽত্যমর্ষী
46.46
যঃ সূতপুত্রঃ প্রহসন্দুরাত্মা; পুরাব্রবীন্নির্জিতাং সৌবলেন
স্বয়ং প্রসহ্যানয় যাজ্ঞসেনী;মপীহ কচ্চিত্স হতস্ত্বয়াদ্য
46.47
যঃ শস্ত্রভৃচ্ছ্রেষ্ঠতমং পৃথিব্যাং; পিতামহং ব্যাক্ষিপদল্পচেতাঃ
সংখ্যায়মানোঽর্ধরথঃ স কচ্চি;ত্ত্বয়া হতোঽদ্যাধিরথির্দুরাত্মা
46.48
অমর্ষণং নিকৃতিসমীরণেরিতং; হৃদি শ্রিতং জ্বলনমিমং সদা মম
হতো ময়া সোঽদ্য সমেত্য পাপধী;রিতি ব্রুবন্প্রশময় মেঽদ্য ফল্গুন