অধ্যায় 47

47.1

সংজয় উবাচ
তদ্ধর্মশীলস্য বচো নিশম্য; রাজ্ঞঃ ক্রুদ্ধস্যাধিরথৌ মহাত্মা
উবাচ দুর্ধর্ষমদীনসত্ত্বং; যুধিষ্ঠিরং জিষ্ণুরনন্তবীর্যঃ

সংশপ্তকৈর্যুধ্যমানস্য মেঽদ্য; সেনাগ্রয়ায়ী কুরুসৈন্যস্য রাজন্
আশীবিষাভান্খগমান্প্রমুঞ্চ;ন্দ্রৌণিঃ পুরস্তাত্সহসা ব্যতিষ্ঠৎ

দৃষ্ট্বা রথং মেঘনিভং মমেম;মম্বষ্ঠসেনা মরণে ব্যতিষ্ঠৎ
তেষামহং পঞ্চ শতানি হত্বা; ততো দ্রৌণিমগমং পার্থিবাগ্র্য

ততোঽপরান্বাণসংঘাননেকা;নাকর্ণপূর্ণায়তবিপ্রমুক্তান্
সসর্জ শিক্ষাস্ত্রবলপ্রয়ত্নৈ;স্তথা যথা প্রাবৃষি কালমেঘঃ

নৈবাদদানং ন চ সংদধানং; জানীমহে কতরেণাস্যতীতি
বামেন বা যদি বা দক্ষিণেন; স দ্রোণপুত্রঃ সমরে পর্যবর্তৎ

অবিধ্যন্মাং পঞ্চভির্দ্রোণপুত্রঃ; শিতৈঃ শরৈঃ পঞ্চভির্বাসুদেবম্
অহং তু তং ত্রিংশতা বজ্রকল্পৈঃ; সমার্দয়ং নিমিষস্যান্তরেণ

স বিক্ষরন্রুধিরং সর্বগাত্রৈ; রথানীকং সূতসূনোর্বিবেশ
ময়াভিভূতঃ সৈনিকানাং প্রবর্হা;নসাবপশ্যন্রুধিরেণ প্রদিগ্ধান্

ততোঽভিভূতং যুধি বীক্ষ্য সৈন্যং; বিধ্বস্তয়োধং দ্রুতবাজিনাগম্
পঞ্চাশতা রথমুখ্যৈঃ সমেতঃ; কর্ণস্ত্বরন্মামুপায়াত্প্রমাথী

তান্সূদয়িত্বাহমপাস্য কর্ণং; দ্রষ্টুং ভবন্তং ত্বরয়াভিয়াতঃ
সর্বে পাঞ্চালা হ্যুদ্বিজন্তে স্ম কর্ণা;দ্গন্ধাদ্গাবঃ কেসরিণো যথৈব

মহাঝষস্যেব মুখং প্রপন্নাঃ; প্রভদ্রকাঃ কর্ণমভি দ্রবন্তি
মৃত্যোরাস্যং ব্যাত্তমিবান্বপদ্য;ন্প্রভদ্রকাঃ কর্ণমাসাদ্য রাজন্

আয়াহি পশ্যাদ্য যুয়ুত্সমানং; মাং সূতপুত্রং চ বৃতৌ জয়ায়
ষট্সাহস্রা ভারত রাজপুত্রাঃ; স্বর্গায় লোকায় রথা নিমগ্নাঃ

সমেত্যাহং সূতপুত্রেণ সংখ্যে; বৃত্রেণ বজ্রীব নরেন্দ্রমুখ্য
যোত্স্যে ভৃশং ভারত সূতপুত্র;মস্মিন্সংগ্রামে যদি বৈ দৃশ্যতেঽদ্য

কর্ণং ন চেদদ্য নিহন্মি রাজ;ন্সবান্ধবং যুধ্যমানং প্রসহ্য
প্রতিশ্রুত্যাকুর্বতাং বৈ গতির্যা; কষ্টাং গচ্ছেয়ং তামহং রাজসিংহ

আমন্ত্রয়ে ত্বাং ব্রূহি জয়ং রণে মে; পুরা ভীমং ধার্তরাষ্ট্রা গ্রসন্তে
সৌতিং হনিষ্যামি নরেন্দ্রসিংহ; সৈন্যং তথা শত্রুগণাংশ্চ সর্বান্