Utshovঅধ্যায় 44
44.1
ধৃতরাষ্ট্র উবাচ
নিবৃত্তে ভীমসেনে চ পাণ্ডবে চ যুধিষ্ঠিরে
বধ্যমানে বলে চাপি মামকে পাণ্ডুসৃঞ্জয়ৈঃ
44.2
দ্রবমাণে বলৌঘে চ নিরাক্রন্দে মুহুর্মুহুঃ
কিমকুর্বন্ত কুরবস্তন্মমাচক্ষ্ব সংজয়
44.3
সংজয় উবাচ
দৃষ্ট্বা ভীমং মহাবাহুং সূতপুত্রঃ প্রতাপবান্
ক্রোধরক্তেক্ষণো রাজন্ভীমসেনমুপাদ্রবৎ
44.4
তাবকং চ বলং দৃষ্ট্বা ভীমসেনাত্পরাঙ্মুখম্
যত্নেন মহতা রাজন্পর্যবস্থাপয়দ্বলী
44.5
ব্যবস্থাপ্য মহাবাহুস্তব পুত্রস্য বাহিনীম্
প্রত্যুদ্যয়ৌ তদা কর্ণঃ পাণ্ডবান্যুদ্ধদুর্মদান্
44.6
প্রত্যুদ্যয়ুস্তু রাধেয়ং পাণ্ডবানাং মহারথাঃ
ধুন্বানাঃ কার্মুকাণ্যাজৌ বিক্ষিপন্তশ্চ সায়কান্
44.7
ভীমসেনঃ শিনের্নপ্তা শিখণ্ডী জনমেজয়ঃ
ধৃষ্টদ্যুম্নশ্চ বলবান্সর্বে চাপি প্রভদ্রকাঃ
44.8
পাঞ্চালাশ্চ নরব্যাঘ্রাঃ সমন্তাত্তব বাহিনীম্
অভ্যদ্রবন্ত সংক্রুদ্ধাঃ সমরে জিতকাশিনঃ
44.9
তথৈব তাবকা রাজন্পাণ্ডবানামনীকিনীম্
অভ্যদ্রবন্ত ত্বরিতা জিঘাংসন্তো মহারথাঃ
44.10
রথনাগাশ্বকলিলং পত্তিধ্বজসমাকুলম্
বভূব পুরুষব্যাঘ্র সৈন্যমদ্ভুতদর্শনম্
44.11
শিখণ্ডী চ যয়ৌ কর্ণং ধৃষ্টদ্যুম্নঃ সুতং তব
দুঃশাসনং মহারাজ মহত্যা সেনয়া বৃতম্
44.12
নকুলো বৃষসেনং চ চিত্রসেনং যুধিষ্ঠিরঃ
উলূকং সমরে রাজন্সহদেবঃ সমভ্যয়াৎ
44.13
সাত্যকিঃ শকুনিং চাপি ভীমসেনশ্চ কৌরবান্
অর্জুনং চ রণে যত্তং দ্রোণপুত্রো মহারথঃ
44.14
যুধামন্যুং মহেষ্বাসং গৌতমোঽভ্যপতদ্রণে
কৃতবর্মা চ বলবানুত্তমৌজসমাদ্রবৎ
44.15
ভীমসেনঃ কুরূন্সর্বান্পুত্রাংশ্চ তব মারিষ
সহানীকান্মহাবাহুরেক এবাভ্যবারয়ৎ
44.16
শিখণ্ডী চ ততঃ কর্ণং বিচরন্তমভীতবৎ
ভীষ্মহন্তা মহারাজ বারয়ামাস পত্রিভিঃ
44.17
প্রতিরব্ধস্ততঃ কর্ণো রোষাত্প্রস্ফুরিতাধরঃ
শিখণ্ডিনং ত্রিভির্বাণৈর্ভ্রুবোর্মধ্যে ব্যতাডয়ৎ
44.18
ধারয়ংস্তু স তান্বাণাঞ্শিখণ্ডী বহ্বশোভত
রাজতঃ পর্বতো যদ্বত্ত্রিভিঃ শৃঙ্গৈঃ সমন্বিতঃ
44.19
সোঽতিবিদ্ধো মহেষ্বাসঃ সূতপুত্রেণ সংয়ুগে
কর্ণং বিব্যাধ সমরে নবত্যা নিশিতৈঃ শরৈঃ
44.20
তস্য কর্ণো হয়ান্হত্বা সারথিং চ ত্রিভিঃ শরৈঃ
উন্মমাথ ধ্বজং চাস্য ক্ষুরপ্রেণ মহারথঃ
44.21
হতাশ্বাত্তু ততো যানাদবপ্লুত্য মহারথঃ
শক্তিং চিক্ষেপ কর্ণায় সংক্রুদ্ধঃ শত্রুতাপনঃ
44.22
তাং ছিত্ত্বা সমরে কর্ণস্ত্রিভির্ভারত সায়কৈঃ
শিখণ্ডিনমথাবিধ্যন্নবভির্নিশিতৈঃ শরৈঃ
44.23
কর্ণচাপচ্যুতান্বাণান্বর্জয়ংস্তু নরোত্তমঃ
অপয়াতস্ততস্তূর্ণং শিখণ্ডী জয়তাং বরঃ
44.24
ততঃ কর্ণো মহারাজ পাণ্ডুসৈন্যান্যশাতয়ৎ
তূলরাশিং সমাসাদ্য যথা বায়ুর্মহাজবঃ
44.25
ধৃষ্টদ্যুম্নো মহারাজ তব পুত্রেণ পীডিতঃ
দুঃশাসনং ত্রিভির্বাণৈরভ্যবিধ্যত্স্তনান্তরে
44.26
তস্য দুঃশাসনো বাহুং সব্যং বিব্যাধ মারিষ
শিতেন রুক্মপুঙ্খেন ভল্লেন নতপর্বণা
44.27
ধৃষ্টদ্যুম্নস্তু নির্বিদ্ধঃ শরং ঘোরমমর্ষণঃ
দুঃশাসনায় সংক্রুদ্ধঃ প্রেষয়ামাস ভারত
44.28
আপতন্তং মহাবেগং ধৃষ্টদ্যুম্নসমীরিতম্
শরৈশ্চিচ্ছেদ পুত্রস্তে ত্রিভিরেব বিশাং পতে
44.29
অথাপরৈঃ সপ্তদশৈর্ভল্লৈঃ কনকভূষণৈঃ
ধৃষ্টদ্যুম্নং সমাসাদ্য বাহ্বোরুরসি চার্দয়ৎ
44.30
ততঃ স পার্ষতঃ ক্রুদ্ধো ধনুশ্চিচ্ছেদ মারিষ
ক্ষুরপ্রেণ সুতীক্ষ্ণেন তত উচ্চুক্রুশুর্জনাঃ
44.31
অথান্যদ্ধনুরাদায় পুত্রস্তে ভরতর্ষভ
ধৃষ্টদ্যুম্নং শরব্রাতৈঃ সমন্তাত্পর্যবারয়ৎ
44.32
তব পুত্রস্য তে দৃষ্ট্বা বিক্রমং তং মহাত্মনঃ
ব্যহসন্ত রণে যোধাঃ সিদ্ধাশ্চাপ্সরসাং গণাঃ
44.33
ততঃ প্রববৃতে যুদ্ধং তাবকানাং পরৈঃ সহ
ঘোরং প্রাণভৃতাং কালে ঘোররূপং পরংতপ
44.34
নকুলং বৃষসেনস্তু বিদ্ধ্বা পঞ্চভিরায়সৈঃ
পিতুঃ সমীপে তিষ্ঠন্তং ত্রিভিরন্যৈরবিধ্যত
44.35
নকুলস্তু ততঃ ক্রুদ্ধো বৃষসেনং স্ময়ন্নিব
নারাচেন সুতীক্ষ্ণেন বিব্যাধ হৃদয়ে দৃঢম্
44.36
সোঽতিবিদ্ধো বলবতা শত্রুণা শত্রুকর্শনঃ
শত্রুং বিব্যাধ বিংশত্যা স চ তং পঞ্চভিঃ শরৈঃ
44.37
ততঃ শরসহস্রেণ তাবুভৌ পুরুষর্ষভৌ
অন্যোন্যমাচ্ছাদয়তামথাভজ্যত বাহিনী
44.38
দৃষ্ট্বা তু প্রদ্রুতাং সেনাং ধার্তরাষ্ট্রস্য সূতজঃ
নিবারয়ামাস বলাদনুপত্য বিশাং পতে
নিবৃত্তে তু ততঃ কর্ণে নকুলঃ কৌরবান্যয়ৌ
44.39
কর্ণপুত্রস্তু সমরে হিত্বা নকুলমেব তু
জুগোপ চক্রং ত্বরিতং রাধেয়স্যৈব মারিষ
44.40
উলূকস্তু রণে ক্রুদ্ধঃ সহদেবেন বারিতঃ
তস্যাশ্বাংশ্চতুরো হত্বা সহদেবঃ প্রতাপবান্
সারথিং প্রেষয়ামাস যমস্য সদনং প্রতি
44.41
উলূকস্তু ততো যানাদবপ্লুত্য বিশাং পতে
ত্রিগর্তানাং বলং পূর্ণং জগাম পিতৃনন্দনঃ
44.42
সাত্যকিঃ শকুনিং বিদ্ধ্বা বিংশত্যা নিশিতৈঃ শরৈঃ
ধ্বজং চিচ্ছেদ ভল্লেন সৌবলস্য হসন্নিব
44.43
সৌবলস্তস্য সমরে ক্রুদ্ধো রাজন্প্রতাপবান্
বিদার্য কবচং ভূয়ো ধ্বজং চিচ্ছেদ কাঞ্চনম্
44.44
অথৈনং নিশিতৈর্বাণৈঃ সাত্যকিঃ প্রত্যবিধ্যত
সারথিং চ মহারাজ ত্রিভিরেব সমার্দয়ৎ
অথাস্য বাহাংস্ত্বরিতঃ শরৈর্নিন্যে যমক্ষয়ম্
44.45
ততোঽবপ্লুত্য সহসা শকুনির্ভরতর্ষভ
আরুরোহ রথং তূর্ণমুলূকস্য মহারথঃ
অপোবাহাথ শীঘ্রং স শৈনেয়াদ্যুদ্ধশালিনঃ
44.46
সাত্যকিস্তু রণে রাজংস্তাবকানামনীকিনীম্
অভিদুদ্রাব বেগেন ততোঽনীকমভিদ্যত
44.47
শৈনেয়শরনুন্নং তু ততঃ সৈন্যং বিশাং পতে
ভেজে দশ দিশস্তূর্ণং ন্যপতচ্চ গতাসুবৎ
44.48
ভীমসেনং তব সুতো বারয়ামাস সংয়ুগে
তং তু ভীমো মুহূর্তেন ব্যশ্বসূতরথধ্বজম্
চক্রে লোকেশ্বরং তত্র তেনাতুষ্যন্ত চারণাঃ
44.49
ততোঽপায়ান্নৃপস্তত্র ভীমসেনস্য গোচরাৎ
কুরুসৈন্যং ততঃ সর্বং ভীমসেনমুপাদ্রবৎ
তত্র রাবো মহানাসীদ্ভীমমেকং জিঘাংসতাম্
44.50
যুধামন্যুঃ কৃপং বিদ্ধ্বা ধনুরস্যাশু চিচ্ছিদে
অথান্যদ্ধনুরাদায় কৃপঃ শস্ত্রভৃতাং বরঃ
44.51
যুধামন্যোর্ধ্বজং সূতং ছত্রং চাপাতয়ত্ক্ষিতৌ
ততোঽপায়াদ্রথেনৈব যুধামন্যুর্মহারথঃ
44.52
উত্তমৌজাস্তু হার্দিক্যং শরৈর্ভীমপরাক্রমম্
ছাদয়ামাস সহসা মেঘো বৃষ্ট্যা যথাচলম্
44.53
তদ্যুদ্ধং সুমহচ্চাসীদ্ঘোররূপং পরংতপ
যাদৃশং ন ময়া যুদ্ধং দৃষ্টপূর্বং বিশাং পতে
44.54
কৃতবর্মা ততো রাজন্নুত্তমৌজসমাহবে
হৃদি বিব্যাধ স তদা রথোপস্থ উপাবিশৎ
44.55
সারথিস্তমপোবাহ রথেন রথিনাং বরম্
ততস্তু সত্বরং রাজন্পাণ্ডুসৈন্যমুপাদ্রবৎ