Utshovঅধ্যায় 43
43.1
সংজয় উবাচ
এতস্মিন্নন্তরে কৃষ্ণঃ পার্থং বচনমব্রবীৎ
দর্শয়ন্নিব কৌন্তেয়ং ধর্মরাজং যুধিষ্ঠিরম্
43.2
এষ পাণ্ডব তে ভ্রাতা ধার্তরাষ্ট্রৈর্মহাবলৈঃ
জিঘাংসুভির্মহেষ্বাসৈর্দ্রুতং পার্থানুসর্যতে
43.3
তথানুয়ান্তি সংরব্ধাঃ পাঞ্চালা যুদ্ধদুর্মদাঃ
যুধিষ্ঠিরং মহাত্মানং পরীপ্সন্তো মহাজবাঃ
43.4
এষ দুর্যোধনঃ পার্থ রথানীকেন দংশিতঃ
রাজা সর্বস্য লোকস্য রাজানমনুধাবতি
43.5
জিঘাংসুঃ পুরুষব্যাঘ্রং ভ্রাতৃভিঃ সহিতো বলী
আশীবিষসমস্পর্শৈঃ সর্বয়ুদ্ধবিশারদৈঃ
43.6
এতে জিঘৃক্ষবো যান্তি দ্বিপাশ্বরথপত্তয়ঃ
যুধিষ্ঠিরং ধার্তরাষ্ট্রা রত্নোত্তমমিবার্থিনঃ
43.7
পশ্য সাত্বতভীমাভ্যাং নিরুদ্ধাধিষ্ঠিতঃ প্রভুঃ
জিহীর্ষবোঽমৃতং দৈত্যাঃ শক্রাগ্নিভ্যামিবাবশাঃ
43.8
এতে বহুত্বাত্ত্বরিতাঃ পুনর্গচ্ছন্তি পাণ্ডবম্
সমুদ্রমিব বার্যোঘাঃ প্রাবৃট্কালে মহারথাঃ
43.9
নদন্তঃ সিংহনাদাংশ্চ ধমন্তশ্চাপি বারিজান্
বলবন্তো মহেষ্বাসা বিধুন্বন্তো ধনূংষি চ
43.10
মৃত্যোর্মুখগতং মন্যে কুন্তীপুত্রং যুধিষ্ঠিরম্
হুতমগ্নৌ চ ভদ্রং তে দুর্যোধনবশং গতম্
43.11
যথায়ুক্তমনীকং হি ধার্তরাষ্ট্রস্য পাণ্ডব
নাস্য শক্রোঽপি মুচ্যেত সংপ্রাপ্তো বাণগোচরম্
43.12
দুর্যোধনস্য শূরস্য দ্রৌণেঃ শারদ্বতস্য চ
কর্ণস্য চেষুবেগো বৈ পর্বতানপি দারয়েৎ
43.13
দুর্যোধনস্য শূরস্য শরৌঘাঞ্শীঘ্রমস্যতঃ
সংক্রুদ্ধস্যান্তকস্যেব কো বেগং সংসহেদ্রণে
43.14
কর্ণেন চ কৃতো রাজা বিমুখঃ শত্রুতাপনঃ
বলবাঁল্লঘুহস্তশ্চ কৃতী যুদ্ধবিশারদঃ
43.15
রাধেয়ঃ পাণ্ডবশ্রেষ্ঠং শক্তঃ পীডয়িতুং রণে
সহিতো ধৃতরাষ্ট্রস্য পুত্রৈঃ শূরো মহাত্মভিঃ
43.16
তস্যৈবং যুধ্যমানস্য সংগ্রামে সংয়তাত্মনঃ
অন্যৈরপি চ পার্থস্য হৃতং বর্ম মহারথৈঃ
43.17
উপবাসকৃশো রাজা ভৃশং ভরতসত্তম
ব্রাহ্মে বলে স্থিতো হ্যেষ ন ক্ষত্রেঽতিবলে বিভো
43.18
ন জীবতি মহারাজো মন্যে পার্থ যুধিষ্ঠিরঃ
যদ্ভীমসেনঃ সহতে সিংহনাদমমর্ষণঃ
43.19
নর্দতাং ধার্তরাষ্ট্রাণাং পুনঃ পুনররিংদম
ধমতাং চ মহাশঙ্খান্সংগ্রামে জিতকাশিনাম্
43.20
যুধিষ্ঠিরং পাণ্ডবেয়ং হতেতি ভরতর্ষভ
সংচোদয়ত্যসৌ কর্ণো ধার্তরাষ্ট্রান্মহাবলান্
43.21
স্থূণাকর্ণেন্দ্রজালেন পার্থ পাশুপতেন চ
প্রচ্ছাদয়ন্তো রাজানমনুয়ান্তি মহারথাঃ
আতুরো মে মতো রাজা সংনিষেব্যশ্চ ভারত
43.22
যথৈনমনুবর্তন্তে পাঞ্চালাঃ সহ পাণ্ডবৈঃ
ত্বরমাণাস্ত্বরাকালে সর্বশস্ত্রভৃতাং বরাঃ
মজ্জন্তমিব পাতালে বলিনোঽপ্যুজ্জিহীর্ষবঃ
43.23
ন কেতুর্দৃশ্যতে রাজ্ঞঃ কর্ণেন নিহতঃ শরৈঃ
পশ্যতোর্যময়োঃ পার্থ সাত্যকেশ্চ শিখণ্ডিনঃ
43.24
ধৃষ্টদ্যুম্নস্য ভীমস্য শতানীকস্য বা বিভো
পাঞ্চালানাং চ সর্বেষাং চেদীনাং চৈব ভারত
43.25
এষ কর্ণো রণে পার্থ পাণ্ডবানামনীকিনীম্
শরৈর্বিধ্বংসয়তি বৈ নলিনীমিব কুঞ্জরঃ
43.26
এতে দ্রবন্তি রথিনস্ত্বদীয়াঃ পাণ্ডুনন্দন
পশ্য পশ্য যথা পার্থ গচ্ছন্ত্যেতে মহারথাঃ
43.27
এতে ভারত মাতঙ্গাঃ কর্ণেনাভিহতা রণে
আর্তনাদান্বিকুর্বাণা বিদ্রবন্তি দিশো দশ
43.28
রথানাং দ্রবতাং বৃন্দং পশ্য পার্থ সমন্ততঃ
দ্রাব্যমাণং রণে চৈব কর্ণেনামিত্রকর্শিনা
43.29
হস্তিকক্ষ্যাং রণে পশ্য চরন্তীং তত্র তত্র হ
রথস্থং সূতপুত্রস্য কেতুং কেতুমতাং বর
43.30
অসৌ ধাবতি রাধেয়ো ভীমসেনরথং প্রতি
কিরঞ্শরশতানীব বিনিঘ্নংস্তব বাহিনীম্
43.31
এতান্পশ্য চ পাঞ্চালান্দ্রাব্যমাণান্মহাত্মনা
শক্রেণেব যথা দৈত্যান্হন্যমানান্মহাহবে
43.32
এষ কর্ণো রণে জিত্বা পাঞ্চালান্পাণ্ডুসৃঞ্জয়ান্
দিশো বিপ্রেক্ষতে সর্বাস্ত্বদর্থমিতি মে মতিঃ
43.33
পশ্য পার্থ ধনুঃ শ্রেষ্ঠং বিকর্ষন্সাধু শোভতে
শত্রূঞ্জিত্বা যথা শক্রো দেবসংঘৈঃ সমাবৃতঃ
43.34
এতে নদন্তি কৌরব্যা দৃষ্ট্বা কর্ণস্য বিক্রমম্
ত্রাসয়ন্তো রণে পার্থান্সৃঞ্জয়াংশ্চ সহস্রশঃ
43.35
এষ সর্বাত্মনা পাণ্ডূংস্ত্রাসয়িত্বা মহারণে
অভিভাষতি রাধেয়ঃ সর্বসৈন্যানি মানদঃ
43.36
অভিদ্রবত গচ্ছধ্বং দ্রুতং দ্রবত কৌরবাঃ
যথা জীবন্ন বঃ কশ্চিন্মুচ্যতে যুধি সৃঞ্জয়ঃ
43.37
তথা কুরুত সংয়ত্তা বয়ং যাস্যাম পৃষ্ঠতঃ
এবমুক্ত্বা যয়াবেষ পৃষ্ঠতো বিকিরঞ্শরৈঃ
43.38
পশ্য কর্ণং রণে পার্থ শ্বেতচ্ছবিবিরাজিতম্
উদয়ং পর্বতং যদ্বচ্ছোভয়ন্বৈ দিবাকরঃ
43.39
পূর্ণচন্দ্রনিকাশেন মূর্ধ্নি ছত্রেণ ভারত
ধ্রিয়মাণেন সমরে তথা শতশলাকিনা
43.40
এষ ত্বাং প্রেক্ষতে কর্ণঃ সকটাক্ষো বিশাং পতে
উত্তমং যত্নমাস্থায় ধ্রুবমেষ্যতি সংয়ুগে
43.41
পশ্য হ্যেনং মহাবাহো বিধুন্বানং মহদ্ধনুঃ
শরাংশ্চাশীবিষাকারান্বিসৃজন্তং মহাবলম্
43.42
অসৌ নিবৃত্তো রাধেয়ো দৃশ্যতে বানরধ্বজ
বধায় চাত্মনোঽভ্যেতি দীপস্য শলভো যথা
43.43
কর্ণমেকাকিনং দৃষ্ট্বা রথানীকেন ভারত
রিরক্ষিষুঃ সুসংয়ত্তো ধার্তরাষ্ট্রোঽভিবর্ততে
43.44
সার্বৈঃ সহৈভির্দুষ্টাত্মা বধ্য এষ প্রয়ত্নতঃ
ত্বয়া যশশ্চ রাজ্যং চ সুখং চোত্তমমিচ্ছতা
43.45
আত্মানং চ কৃতাত্মানং সমীক্ষ্য ভরতর্ষভ
কৃতাগসং চ রাধেয়ং ধর্মাত্মনি যুধিষ্ঠিরে
43.46
প্রতিপদ্যস্ব রাধেয়ং প্রাপ্তকালমনন্তরম্
আর্যাং যুদ্ধে মতিং কৃত্বা প্রত্যেহি রথয়ূথপম্
43.47
পঞ্চ হ্যেতানি মুখ্যানাং রথানাং রথসত্তম
শতান্যায়ান্তি বেগেন বলিনাং ভীমতেজসাম্
43.48
পঞ্চ নাগসহস্রাণি দ্বিগুণা বাজিনস্তথা
অভিসংহত্য কৌন্তেয় পদাতিপ্রয়ুতানি চ
অন্যোন্যরক্ষিতং বীর বলং ত্বামভিবর্ততে
43.49
সূতপুত্রে মহেষ্বাসে দর্শয়াত্মানমাত্মনা
উত্তমং যত্নমাস্থায় প্রত্যেহি ভরতর্ষভ
43.50
অসৌ কর্ণঃ সুসংরব্ধঃ পাঞ্চালানভিধাবতি
কেতুমস্য হি পশ্যামি ধৃষ্টদ্যুম্নরথং প্রতি
সমুচ্ছেত্স্যতি পাঞ্চালানিতি মন্যে পরংতপ
43.51
আচক্ষে তে প্রিয়ং পার্থ তদেবং ভরতর্ষভ
রাজা জীবতি কৌরব্যো ধর্মপুত্রো যুধিষ্ঠিরঃ
43.52
অসৌ ভীমো মহাবাহুঃ সংনিবৃত্তশ্চমূমুখে
বৃতঃ সৃঞ্জয়সৈন্যেন সাত্যকেন চ ভারত
43.53
বধ্যন্ত এতে সমরে কৌরবা নিশিতৈঃ শরৈঃ
ভীমসেনেন কৌন্তেয় পাঞ্চালৈশ্চ মহাত্মভিঃ
43.54
সেনা হি ধার্তরাষ্ট্রস্য বিমুখা চাভবদ্রণাৎ
বিপ্রধাবতি বেগেন ভীমস্য নিহতা শরৈঃ
43.55
বিপন্নসস্যেব মহী রুধিরেণ সমুক্ষিতা
ভারতী ভরতশ্রেষ্ঠ সেনা কৃপণদর্শনা
43.56
নিবৃত্তং পশ্য কৌন্তেয় ভীমসেনং যুধাং পতিম্
আশীবিষমিব ক্রুদ্ধং তস্মাদ্দ্রবতি বাহিনী
43.57
পীতরক্তাসিতসিতাস্তারাচন্দ্রার্কমণ্ডিতাঃ
পতাকা বিপ্রকীর্যন্তে ছত্রাণ্যেতানি চার্জুন
43.58
সৌবর্ণা রাজতাশ্চৈব তৈজসাশ্চ পৃথগ্বিধাঃ
কেতবো বিনিপাত্যন্তে হস্ত্যশ্বং বিপ্রকীর্যতে
43.59
রথেভ্যঃ প্রপতন্ত্যেতে রথিনো বিগতাসবঃ
নানাবর্ণৈর্হতা বাণৈঃ পাঞ্চালৈরপলায়িভিঃ
43.60
নির্মনুষ্যান্গজানশ্বান্রথাংশ্চৈব ধনংজয়
সমাদ্রবন্তি পাঞ্চালা ধার্তরাষ্ট্রাংস্তরস্বিনঃ
43.61
মৃদ্নন্তি চ নরব্যাঘ্রা ভীমসেনব্যপাশ্রয়াৎ
বলং পরেষাং দুর্ধর্ষং ত্যক্ত্বা প্রাণানরিংদম
43.62
এতে নদন্তি পাঞ্চালা ধমন্ত্যপি চ বারিজান্
অভিদ্রবন্তি চ রণে নিঘ্নন্তঃ সায়কৈঃ পরান্
43.63
পশ্য স্বর্গস্য মাহাত্ম্যং পাঞ্চালা হি পরংতপ
ধার্তরাষ্ট্রান্বিনিঘ্নন্তি ক্রুদ্ধাঃ সিংহা ইব দ্বিপান্
43.64
সর্বতশ্চাভিপন্নৈষা ধার্তরাষ্ট্রী মহাচমূঃ
পাঞ্চালৈর্মানসাদেত্য হংসৈর্গঙ্গেব বেগিতৈঃ
43.65
সুভৃশং চ পরাক্রান্তাঃ পাঞ্চালানাং নিবারণে
কৃপকর্ণাদয়ো বীরা ঋষভাণামিবর্ষভাঃ
43.66
সুনিমগ্নাংশ্চ ভীমাস্ত্রৈর্ধার্তরাষ্ট্রান্মহারথান্
ধৃষ্টদ্যুম্নমুখা বীরা ঘ্নন্তি শত্রূন্সহস্রশঃ
বিষণ্ণভূয়িষ্ঠরথা ধার্তরাষ্ট্রী মহাচমূঃ
43.67
পশ্য ভীমেন নারাচৈশ্ছিন্না নাগাঃ পতন্ত্যমী
বজ্রিবজ্রাহতানীব শিখরাণি মহীভৃতাম্
43.68
ভীমসেনস্য নির্বিদ্ধা বাণৈঃ সংনতপর্বভিঃ
স্বান্যনীকানি মৃদ্নন্তো দ্রবন্ত্যেতে মহাগজাঃ
43.69
নাভিজানাসি ভীমস্য সিংহনাদং দুরুত্সহম্
নদতোঽর্জুন সংগ্রামে বীরস্য জিতকাশিনঃ
43.70
এষ নৈষাদিরভ্যেতি দ্বিপমুখ্যেন পাণ্ডবম্
জিঘাংসুস্তোমরৈঃ ক্রুদ্ধো দণ্ডপাণিরিবান্তকঃ
43.71
সতোমরাবস্য ভুজৌ ছিন্নৌ ভীমেন গর্জতঃ
তীক্ষ্ণৈরগ্নিশিখাপ্রখ্যৈর্নারাচৈর্দশভির্হতঃ
43.72
হত্বৈনং পুনরায়াতি নাগানন্যান্প্রহারিণঃ
পশ্য নীলাম্বুদনিভান্মহামাত্রৈরধিষ্ঠিতান্
শক্তিতোমরসংকাশৈর্বিনিঘ্নন্তং বৃকোদরম্
43.73
সপ্ত সপ্ত চ নাগাংস্তান্বৈজয়ন্তীশ্চ সধ্বজাঃ
নিহত্য নিশিতৈর্বাণৈশ্ছিন্নাঃ পার্থাগ্রজেন তে
দশভির্দশভিশ্চৈকো নারাচৈর্নিহতো গজঃ
43.74
ন চাসৌ ধার্তরাষ্ট্রাণাং শ্রূয়তে নিনদস্তথা
পুরংদরসমে ক্রুদ্ধে নিবৃত্তে ভরতর্ষভে
43.75
অক্ষৌহিণ্যস্তথা তিস্রো ধার্তরাষ্ট্রস্য সংহতাঃ
ক্রুদ্ধেন নরসিংহেন ভীমসেনেন বারিতাঃ
43.76
সংজয় উবাচ
ভীমসেনেন তত্কর্ম কৃতং দৃষ্ট্বা সুদুষ্করম্
অর্জুনো ব্যধমচ্ছিষ্টানহিতান্নিশিতৈঃ শরৈঃ
43.77
তে বধ্যমানাঃ সমরে সংশপ্তকগণাঃ প্রভো
শক্রস্যাতিথিতাং গত্বা বিশোকা হ্যভবন্মুদা
43.78
পার্থশ্চ পুরুষব্যাঘ্রঃ শরৈঃ সংনতপর্বভিঃ
জঘান ধার্তরাষ্ট্রস্য চতুর্বিধবলাং চমূম্