Utshovঅধ্যায় 42
42.1
সংজয় উবাচ
ততঃ পুনঃ সমাজগ্মুরভীতাঃ কুরুসৃঞ্জয়াঃ
যুধিষ্ঠিরমুখাঃ পার্থা বৈকর্তনমুখা বয়ম্
42.2
ততঃ প্রববৃতে ভীমঃ সংগ্রামো লোমহর্ষণঃ
কর্ণস্য পাণ্ডবানাং চ যমরাষ্ট্রবিবর্ধনঃ
42.3
তস্মিন্প্রবৃত্তে সংগ্রামে তুমুলে শোণিতোদকে
সংশপ্তকেষু শূরেষু কিংচিচ্ছিষ্টেষু ভারত
42.4
ধৃষ্টদ্যুম্নো মহারাজ সহিতঃ সর্বরাজভিঃ
কর্ণমেবাভিদুদ্রাব পাণ্ডবাশ্চ মহারথাঃ
42.5
আগচ্ছমানাংস্তান্সংখ্যে প্রহৃষ্টান্বিজয়ৈষিণঃ
দধারৈকো রণে কর্ণো জলৌঘানিব পর্বতঃ
42.6
তমাসাদ্য তু তে কর্ণং ব্যশীর্যন্ত মহারথাঃ
যথাচলং সমাসাদ্য জলৌঘাঃ সর্বতোদিশম্
তয়োরাসীন্মহারাজ সংগ্রামো লোমহর্ষণঃ
42.7
ধৃষ্টদ্যুম্নস্তু রাধেয়ং শরেণ নতপর্বণা
তাডয়ামাস সংক্রুদ্ধস্তিষ্ঠ তিষ্ঠেতি চাব্রবীৎ
42.8
বিজয়ং তু ধনুঃশ্রেষ্ঠং বিধুন্বানো মহারথঃ
পার্ষতস্য ধনুশ্ছিত্ত্বা শরানাশীবিষোপমান্
তাডয়ামাস সংক্রুদ্ধঃ পার্ষতং নবভিঃ শরৈঃ
42.9
তে বর্ম হেমবিকৃতং ভিত্ত্বা তস্য মহাত্মনঃ
শোণিতাক্তা ব্যরাজন্ত শক্রগোপা ইবানঘ
42.10
তদপাস্য ধনুশ্ছিন্নং ধৃষ্টদ্যুম্নো মহারথঃ
অন্যদ্ধনুরুপাদায় শরাংশ্চাশীবিষোপমান্
কর্ণং বিব্যাধ সপ্তত্যা শরৈঃ সংনতপর্বভিঃ
42.11
তথৈব রাজন্কর্ণোঽপি পার্ষতং শত্রুতাপনম্
দ্রোণশত্রুং মহেষ্বাসো বিব্যাধ নিশিতৈঃ শরৈঃ
42.12
তস্য কর্ণো মহারাজ শরং কনকভূষণম্
প্রেষয়ামাস সংক্রুদ্ধো মৃত্যুদণ্ডমিবাপরম্
42.13
তমাপতন্তং সহসা ঘোররূপং বিশাং পতে
চিচ্ছেদ সপ্তধা রাজঞ্শৈনেয়ঃ কৃতহস্তবৎ
42.14
দৃষ্ট্বা বিনিহিতং বাণং শরৈঃ কর্ণো বিশাং পতে
সাত্যকিং শরবর্ষেণ সমন্তাত্পর্যবারয়ৎ
42.15
বিব্যাধ চৈনং সমরে নারাচৈস্তত্র সপ্তভিঃ
তং প্রত্যবিধ্যচ্ছৈনেয়ঃ শরৈর্হেমবিভূষিতৈঃ
42.16
ততো যুদ্ধমতীবাসীচ্চক্ষুঃশ্রোত্রভয়াবহম্
রাজন্ঘোরং চ চিত্রং চ প্রেক্ষণীয়ং সমন্ততঃ
42.17
সর্বেষাং তত্র ভূতানাং লোমহর্ষো ব্যজায়ত
তদ্দৃষ্ট্বা সমরে কর্ম কর্ণশৈনেয়য়োর্নৃপ
42.18
এতস্মিন্নন্তরে দ্রৌণিরভ্যয়াত্সুমহাবলম্
পার্ষতং শত্রুদমনং শত্রুবীর্যাসুনাশনম্
42.19
অভ্যভাষত সংক্রুদ্ধো দ্রৌণির্দূরে ধনংজয়ে
তিষ্ঠ তিষ্ঠাদ্য ব্রহ্মঘ্ন ন মে জীবন্বিমোক্ষ্যসে
42.20
ইত্যুক্ত্বা সুভৃশং বীরঃ শীঘ্রকৃন্নিশিতৈঃ শরৈঃ
পার্ষতং ছাদয়ামাস ঘোররূপৈঃ সুতেজনৈঃ
যতমানং পরং শক্ত্যা যতমানো মহারথঃ
42.21
যথা হি সমরে দ্রৌণিঃ পার্ষতং বীক্ষ্য মারিষ
তথা দ্রৌণিং রণে দৃষ্ট্বা পার্ষতঃ পরবীরহা
নাতিহৃষ্টমনা ভূত্বা মন্যতে মৃত্যুমাত্মনঃ
42.22
দ্রৌণিস্তু দৃষ্ট্বা রাজেন্দ্র ধৃষ্টদ্যুম্নং রণে স্থিতম্
ক্রোধেন নিঃশ্বসন্বীরঃ পার্ষতং সমুপাদ্রবৎ
তাবন্যোন্যং তু দৃষ্ট্বৈব সংরম্ভং জগ্মতুঃ পরম্
42.23
অথাব্রবীন্মহারাজ দ্রোণপুত্রঃ প্রতাপবান্
ধৃষ্টদ্যুম্নং সমীপস্থং ত্বরমাণো বিশাং পতে
পাঞ্চালাপসদাদ্য ত্বাং প্রেষয়িষ্যামি মৃত্যবে
42.24
পাপং হি যত্ত্বয়া কর্ম ঘ্নতা দ্রোণং পুরা কৃতম্
অদ্য ত্বা পত্স্যতে তদ্বৈ যথা হ্যকুশলং তথা
42.25
অরক্ষ্যমাণঃ পার্থেন যদি তিষ্ঠসি সংয়ুগে
নাপক্রমসি বা মূঢ সত্যমেতদ্ব্রবীমি তে
42.26
এবমুক্তঃ প্রত্যুবাচ ধৃষ্টদ্যুম্নঃ প্রতাপবান্
প্রতিবাক্যং স এবাসির্মামকো দাস্যতে তব
যেনৈব তে পিতুর্দত্তং যতমানস্য সংয়ুগে
42.27
যদি তাবন্ময়া দ্রোণো নিহতো ব্রাহ্মণব্রুবঃ
ত্বামিদানীং কথং যুদ্ধে ন হনিষ্যামি বিক্রমাৎ
42.28
এবমুক্ত্বা মহারাজ সেনাপতিরমর্ষণঃ
নিশিতেনাথ বাণেন দ্রৌণিং বিব্যাধ পার্ষতঃ
42.29
ততো দ্রৌণিঃ সুসংক্রুদ্ধঃ শরৈঃ সংনতপর্বভিঃ
প্রাচ্ছাদয়দ্দিশো রাজন্ধৃষ্টদ্যুম্নস্য সংয়ুগে
42.30
নৈবান্তরিক্ষং ন দিশো নৈব যোধাঃ সমন্ততঃ
দৃশ্যন্তে বৈ মহারাজ শরৈশ্ছন্নাঃ সহস্রশঃ
42.31
তথৈব পার্ষতো রাজন্দ্রৌণিমাহবশোভিনম্
শরৈঃ সংছাদয়ামাস সূতপুত্রস্য পশ্যতঃ
42.32
রাধেয়োঽপি মহারাজ পাঞ্চালান্সহ পাণ্ডবৈঃ
দ্রৌপদেয়ান্যুধামন্যুং সাত্যকিং চ মহারথম্
একঃ স বারয়ামাস প্রেক্ষণীয়ঃ সমন্ততঃ
42.33
ধৃষ্টদ্যুম্নোঽপি সমরে দ্রৌণেশ্চিচ্ছেদ কার্মুকম্
তদপাস্য ধনুশ্ছিন্নমন্যদাদত্ত কার্মুকম্
বেগবত্সমরে ঘোরং শরাংশ্চাশীবিষোপমান্
42.34
স পার্ষতস্য রাজেন্দ্র ধনুঃ শক্তিং গদাং ধ্বজম্
হয়ান্সূতং রথং চৈব নিমেষাদ্ব্যধমচ্ছরৈঃ
42.35
স ছিন্নধন্বা বিরথো হতাশ্বো হতসারথিঃ
খড্গমাদত্ত বিপুলং শতচন্দ্রং চ ভানুমৎ
42.36
দ্রৌণিস্তদপি রাজেন্দ্র ভল্লৈঃ ক্ষিপ্রং মহারথঃ
চিচ্ছেদ সমরে বীরঃ ক্ষিপ্রহস্তো দৃঢায়ুধঃ
রথাদনবরূঢস্য তদদ্ভুতমিবাভবৎ
42.37
ধৃষ্টদ্যুম্নং তু বিরথং হতাশ্বং ছিন্নকার্মুকম্
শরৈশ্চ বহুধা বিদ্ধমস্ত্রৈশ্চ শকলীকৃতম্
নাতরদ্ভরতশ্রেষ্ঠ যতমানো মহারথঃ
42.38
তস্যান্তমিষুভী রাজন্যদা দ্রৌণির্ন জগ্মিবান্
অথ ত্যক্ত্বা ধনুর্বীরঃ পার্ষতং ত্বরিতোঽন্বগাৎ
42.39
আসীদাদ্রবতো রাজন্বেগস্তস্য মহাত্মনঃ
গরুডস্যেব পততো জিঘৃক্ষোঃ পন্নগোত্তমম্
42.40
এতস্মিন্নেব কালে তু মাধবোঽর্জুনমব্রবীৎ
পশ্য পার্থ যথা দ্রৌণিঃ পার্ষতস্য বধং প্রতি
যত্নং করোতি বিপুলং হন্যাচ্চৈনমসংশয়ম্
42.41
তং মোচয় মহাবাহো পার্ষতং শত্রুতাপনম্
দ্রৌণেরাস্যমনুপ্রাপ্তং মৃত্যোরাস্যগতং যথা
42.42
এবমুক্ত্বা মহারাজ বাসুদেবঃ প্রতাপবান্
প্রৈষয়ত্তত্র তুরগান্যত্র দ্রৌণির্ব্যবস্থিতঃ
42.43
তে হয়াশ্চন্দ্রসংকাশাঃ কেশবেন প্রচোদিতাঃ
পিবন্ত ইব তদ্ব্যোম জগ্মুর্দ্রৌণিরথং প্রতি
42.44
দৃষ্ট্বায়ান্তৌ মহাবীর্যাবুভৌ কৃষ্ণধনংজয়ৌ
ধৃষ্টদ্যুম্নবধে রাজংশ্চক্রে যত্নং মহাবলঃ
42.45
বিকৃষ্যমাণং দৃষ্ট্বৈব ধৃষ্টদ্যুম্নং জনেশ্বর
শরাংশ্চিক্ষেপ বৈ পার্থো দ্রৌণিং প্রতি মহাবলঃ
42.46
তে শরা হেমবিকৃতা গাণ্ডীবপ্রেষিতা ভৃশম্
দ্রৌণিমাসাদ্য বিবিশুর্বল্মীকমিব পন্নগাঃ
42.47
স বিধ্বস্তৈঃ শরৈর্ঘোরৈর্দ্রোণপুত্রঃ প্রতাপবান্
রথমারুরুহে বীরো ধনংজয়শরার্দিতঃ
প্রগৃহ্য চ ধনুঃ শ্রেষ্ঠং পার্থং বিব্যাধ সায়কৈঃ
42.48
এতস্মিন্নন্তরে বীরঃ সহদেবো জনাধিপ
অপোবাহ রথেনাজৌ পার্ষতং শত্রুতাপনম্
42.49
অর্জুনোঽপি মহারাজ দ্রৌণিং বিব্যাধ পত্রিভিঃ
তং দ্রোণপুত্রঃ সংক্রুদ্ধো বাহ্বোরুরসি চার্দয়ৎ
42.50
ক্রোধিতস্তু রণে পার্থো নারাচং কালসংমিতম্
দ্রোণপুত্রায় চিক্ষেপ কালদণ্ডমিবাপরম্
স ব্রাহ্মণস্যাংসদেশে নিপপাত মহাদ্যুতিঃ
42.51
স বিহ্বলো মহারাজ শরবেগেন সংয়ুগে
নিষসাদ রথোপস্থে বৈক্লব্যং চ পরং যয়ৌ
42.52
ততঃ কর্ণো মহারাজ ব্যাক্ষিপদ্বিজয়ং ধনুঃ
অর্জুনং সমরে ক্রুদ্ধঃ প্রেক্ষমাণো মুহুর্মুহুঃ
দ্বৈরথং চাপি পার্থেন কাময়ানো মহারণে
42.53
তং তু হিত্বা হতং বীরং সারথিঃ শত্রুকর্শনম্
অপোবাহ রথেনাজৌ ত্বরমাণো রণাজিরাৎ
42.54
অথোত্ক্রুষ্টং মহারাজ পাঞ্চালৈর্জিতকাশিভিঃ
মোক্ষিতং পার্ষতং দৃষ্ট্বা দ্রোণপুত্রং চ পীডিতম্
42.55
বাদিত্রাণি চ দিব্যানি প্রাবাদ্যন্ত সহস্রশঃ
সিংহনাদশ্চ সংজজ্ঞে দৃষ্ট্বা ঘোরং মহাদ্ভুতম্
42.56
এবং কৃত্বাব্রবীত্পার্থো বাসুদেবং ধনংজয়ঃ
যাহি সংশপ্তকান্কৃষ্ণ কার্যমেতত্পরং মম
42.57
ততঃ প্রয়াতো দাশার্হঃ শ্রুত্বা পাণ্ডবভাষিতম্
রথেনাতিপতাকেন মনোমারুতরংহসা