অধ্যায় 41

41.1

সংজয় উবাচ
ত্বরমাণঃ পুনঃ কৃষ্ণঃ পার্থমভ্যবদচ্ছনৈঃ
পশ্য কৌরব্য রাজানমপয়াতাংশ্চ পাণ্ডবান্

কর্ণং পশ্য মহারঙ্গে জ্বলন্তমিব পাবকম্
অসৌ ভীমো মহেষ্বাসঃ সংনিবৃত্তো রণং প্রতি

তমেতেঽনু নিবর্তন্তে ধৃষ্টদ্যুম্নপুরোগমাঃ
পাঞ্চালানাং সৃঞ্জয়ানাং পাণ্ডবানাং চ যন্মুখম্
নিবৃত্তৈশ্চ তথা পার্থৈর্ভগ্নং শত্রুবলং মহৎ

কৌরবান্দ্রবতো হ্যেষ কর্ণো ধারয়তেঽর্জুন
অন্তকপ্রতিমো বেগে শক্রতুল্যপরাক্রমঃ

অসৌ গচ্ছতি কৌরব্য দ্রৌণিরস্ত্রভৃতাং বরঃ
তমেষ প্রদ্রুতঃ সংখ্যে ধৃষ্টদ্যুম্নো মহারথঃ

সর্বং ব্যাচষ্ট দুর্ধর্ষো বাসুদেবঃ কিরীটিনে
ততো রাজন্প্রাদুরাসীন্মহাঘোরো মহারণঃ

সিংহনাদরবাশ্চাত্র প্রাদুরাসন্সমাগমে
উভয়োঃ সেনয়ো রাজন্মৃত্যুং কৃত্বা নিবর্তনম্