Utshovঅধ্যায় 40
40.1
সংজয় উবাচ
ভীমসেনং সপাঞ্চাল্যং চেদিকেকয়সংবৃতম্
বৈকর্তনঃ স্বয়ং রুদ্ধ্বা বারয়ামাস সায়কৈঃ
40.2
ততস্তু চেদিকারূষান্সৃঞ্জয়াংশ্চ মহারথান্
কর্ণো জঘান সংক্রুদ্ধো ভীমসেনস্য পশ্যতঃ
40.3
ভীমসেনস্ততঃ কর্ণং বিহায় রথসত্তমম্
প্রয়য়ৌ কৌরবং সৈন্যং কক্ষমগ্নিরিব জ্বলন্
40.4
সূতপুত্রোঽপি সমরে পাঞ্চালান্কেকয়াংস্তথা
সৃঞ্জয়াংশ্চ মহেষ্বাসান্নিজঘান সহস্রশঃ
40.5
সংশপ্তকেষু পার্থশ্চ কৌরবেষু বৃকোদরঃ
পাঞ্চালেষু তথা কর্ণঃ ক্ষয়ং চক্রূর্মহারথাঃ
40.6
তে ক্ষত্রিয়া দহ্যমানাস্ত্রিভিস্তৈঃ পাবকোপমৈঃ
জগ্মুর্বিনাশং সমরে রাজন্দুর্মন্ত্রিতে তব
40.7
ততো দুর্যোধনঃ ক্রুদ্ধো নকুলং নবভিঃ শরৈঃ
বিব্যাধ ভরতশ্রেষ্ঠ চতুরশ্চাস্য বাজিনঃ
40.8
ততঃ পুনরমেয়াত্মা তব পুত্রো জনাধিপঃ
ক্ষুরেণ সহদেবস্য ধ্বজং চিচ্ছেদ কাঞ্চনম্
40.9
নকুলস্তু ততঃ ক্রুদ্ধস্তব পুত্রং ত্রিসপ্তভিঃ
জঘান সমরে রাজন্সহদেবশ্চ পঞ্চভিঃ
40.10
তাবুভৌ ভরতশ্রেষ্ঠৌ শ্রেষ্ঠৌ সর্বধনুষ্মতাম্
বিব্যাধোরসি সংক্রুদ্ধঃ পঞ্চভিঃ পঞ্চভিঃ শরৈঃ
40.11
ততোঽপরাভ্যাং ভল্লাভ্যাং ধনুষী সমকৃন্তত
যময়োঃ প্রহসন্রাজন্বিব্যাধৈব চ সপ্তভিঃ
40.12
তাবন্যে ধনুষী শ্রেষ্ঠে শক্রচাপনিভে শুভে
প্রগৃহ্য রেজতুঃ শূরৌ দেবপুত্রসমৌ যুধি
40.13
ততস্তৌ রভসৌ যুদ্ধে ভ্রাতরৌ ভ্রাতরং নৃপ
শরৈর্ববর্ষতুর্ঘোরৈর্মহামেঘৌ যথাচলম্
40.14
ততঃ ক্রুদ্ধো মহারাজ তব পুত্রো মহারথঃ
পাণ্ডুপুত্রৌ মহেষ্বাসৌ বারয়ামাস পত্রিভিঃ
40.15
ধনুর্মণ্ডলমেবাস্য দৃশ্যতে যুধি ভারত
সায়কাশ্চৈব দৃশ্যন্তে নিশ্চরন্তঃ সমন্ততঃ
40.16
তস্য সায়কসংছন্নৌ চকাশেতাং চ পাণ্ডবৌ
মেঘচ্ছন্নৌ যথা ব্যোম্নি চন্দ্রসূর্যৌ হতপ্রভৌ
40.17
তে তু বাণা মহারাজ হেমপুঙ্খাঃ শিলাশিতাঃ
আচ্ছাদয়ন্দিশঃ সর্বাঃ সূর্যস্যেবাংশবস্তদা
40.18
বাণভূতে ততস্তস্মিন্সংছন্নে চ নভস্তলে
যমাভ্যাং দদৃশে রূপং কালান্তকয়মোপমম্
40.19
পরাক্রমং তু তং দৃষ্ট্বা তব সূনোর্মহারথাঃ
মৃত্যোরুপান্তিকং প্রাপ্তৌ মাদ্রীপুত্রৌ স্ম মেনিরে
40.20
ততঃ সেনাপতী রাজন্পাণ্ডবস্য মহাত্মনঃ
পার্ষতঃ প্রয়য়ৌ তত্র যত্র রাজা সুয়োধনঃ
40.21
মাদ্রীপুত্রৌ ততঃ শূরৌ ব্যতিক্রম্য মহারথৌ
ধৃষ্টদ্যুম্নস্তব সুতং তাডয়ামাস সায়কৈঃ
40.22
তমবিধ্যদমেয়াত্মা তব পুত্রোঽত্যমর্ষণঃ
পাঞ্চাল্যং পঞ্চবিংশত্যা প্রহস্য পুরুষর্ষভ
40.23
ততঃ পুনরমেয়াত্মা পুত্রস্তে পৃথিবীপতে
বিদ্ধ্বা ননাদ পাঞ্চাল্যং ষষ্ট্যা পঞ্চভিরেব চ
40.24
অথাস্য সশরং চাপং হস্তাবাপং চ মারিষ
ক্ষুরপ্রেণ সুতীক্ষ্ণেন রাজা চিচ্ছেদ সংয়ুগে
40.25
তদপাস্য ধনুশ্ছিন্নং পাঞ্চাল্যঃ শত্রুকর্শনঃ
অন্যদাদত্ত বেগেন ধনুর্ভারসহং নবম্
40.26
প্রজ্বলন্নিব বেগেন সংরম্ভাদ্রুধিরেক্ষণঃ
অশোভত মহেষ্বাসো ধৃষ্টদ্যুম্নঃ কৃতব্রণঃ
40.27
স পঞ্চদশ নারাচাঞ্শ্বসতঃ পন্নগানিব
জিঘাংসুর্ভরতশ্রেষ্ঠং ধৃষ্টদ্যুম্নো ব্যবাসৃজৎ
40.28
তে বর্ম হেমবিকৃতং ভিত্ত্বা রাজ্ঞঃ শিলাশিতাঃ
বিবিশুর্বসুধাং বেগাত্কঙ্কবর্হিণবাসসঃ
40.29
সোঽতিবিদ্ধো মহারাজ পুত্রস্তেঽতিব্যরাজত
বসন্তে পুষ্পশবলঃ সপুষ্প ইব কিংশুকঃ
40.30
স ছিন্নবর্মা নারাচৈঃ প্রহারৈর্জর্জরচ্ছবিঃ
ধৃষ্টদ্যুম্নস্য ভল্লেন ক্রুদ্ধশ্চিচ্ছেদ কার্মুকম্
40.31
অথৈনং ছিন্নধন্বানং ত্বরমাণো মহীপতিঃ
সায়কৈর্দশভী রাজন্ভ্রুবোর্মধ্যে সমার্দয়ৎ
40.32
তস্য তেঽশোভয়ন্বক্ত্রং কর্মারপরিমার্জিতাঃ
প্রফুল্লং চম্পকং যদ্বদ্ভ্রমরা মধুলিপ্সবঃ
40.33
তদপাস্য ধনুশ্ছিন্নং ধৃষ্টদ্যুম্নো মহামনাঃ
অন্যদাদত্ত বেগেন ধনুর্ভল্লাংশ্চ ষোডশ
40.34
ততো দুর্যোধনস্যাশ্বান্হত্বা সূতং চ পঞ্চভিঃ
ধনুশ্চিচ্ছেদ ভল্লেন জাতরূপপরিষ্কৃতম্
40.35
রথং সোপস্করং ছত্রং শক্তিং খড্গং গদাং ধ্বজম্
ভল্লৈশ্চিচ্ছেদ নবভিঃ পুত্রস্য তব পার্ষতঃ
40.36
তপনীয়াঙ্গদং চিত্রং নাগং মণিময়ং শুভম্
ধ্বজং কুরুপতেশ্ছিন্নং দদৃশুঃ সর্বপার্থিবাঃ
40.37
দুর্যোধনং তু বিরথং ছিন্নসর্বায়ুধং রণে
ভ্রাতরঃ পর্যরক্ষন্ত সোদর্যা ভরতর্ষভ
40.38
তমারোপ্য রথে রাজন্দণ্ডধারো জনাধিপম্
অপোবাহ চ সংভ্রান্তো ধৃষ্টদ্যুম্নস্য পশ্যতঃ
40.39
কর্ণস্তু সাত্যকিং জিত্বা রাজগৃদ্ধী মহাবলঃ
দ্রোণহন্তারমুগ্রেষুং সসারাভিমুখং রণে
40.40
তং পৃষ্ঠতোঽভ্যয়াত্তূর্ণং শৈনেয়ো বিতুদঞ্শরৈঃ
বারণং জঘনোপান্তে বিষাণাভ্যামিব দ্বিপঃ
40.41
স ভারত মহানাসীদ্যোধানাং সুমহাত্মনাম্
কর্ণপার্ষতয়োর্মধ্যে ত্বদীয়ানাং মহারণঃ
40.42
ন পাণ্ডবানাং নাস্মাকং যোধঃ কশ্চিত্পরাঙ্মুখঃ
প্রত্যদৃশ্যত যত্কর্ণঃ পাঞ্চালাংস্ত্বরিতো যয়ৌ
40.43
তস্মিন্ক্ষণে নরশ্রেষ্ঠ গজবাজিনরক্ষয়ঃ
প্রাদুরাসীদুভয়তো রাজন্মধ্যংগতেঽহনি
40.44
পাঞ্চালাস্তু মহারাজ ত্বরিতা বিজিগীষবঃ
সর্বতোঽভ্যদ্রবন্কর্ণং পতত্রিণ ইব দ্রুমম্
40.45
তেষামাধিরথিঃ ক্রুদ্ধো যতমানান্মনস্বিনঃ
বিচিন্বন্নেব বাণাগ্রৈঃ সমাসাদয়দগ্রতঃ
40.46
ব্যাঘ্রকেতুং সুশর্মাণং শঙ্কুং চোগ্রং ধনংজয়ম্
শুক্লং চ রোচমানং চ সিংহসেনং চ দুর্জয়ম্
40.47
তে বীরা রথবেগেন পরিবব্রুর্নরোত্তমম্
সৃজন্তং সায়কান্ক্রুদ্ধং কর্ণমাহবশোভিনম্
40.48
যুধ্যমানাংস্তু তাঞ্শূরান্মনুজেন্দ্রঃ প্রতাপবান্
অষ্টাভিরষ্টৌ রাধেয়ো ন্যহনন্নিশিতৈঃ শরৈঃ
40.49
অথাপরান্মহারাজ সূতপুত্রঃ প্রতাপবান্
জঘান বহুসাহস্রান্যোধান্যুদ্ধবিশারদঃ
40.50
বিষ্ণুং চ বিষ্ণুকর্মাণং দেবাপিং ভদ্রমেব চ
দণ্ডং চ সমরে রাজংশ্চিত্রং চিত্রায়ুধং হরিম্
40.51
সিংহকেতুং রোচমানং শলভং চ মহারথম্
নিজঘান সুসংক্রুদ্ধশ্চেদীনাং চ মহারথান্
40.52
তেষামাদদতঃ প্রাণানাসীদাধিরথের্বপুঃ
শোণিতাভ্যুক্ষিতাঙ্গস্য রুদ্রস্যেবোর্জিতং মহৎ
40.53
তত্র ভারত কর্ণেন মাতঙ্গাস্তাডিতাঃ শরৈঃ
সর্বতোঽভ্যদ্রবন্ভীতাঃ কুর্বন্তো মহদাকুলম্
40.54
নিপেতুরুর্ব্যাং সমরে কর্ণসায়কপীডিতাঃ
কুর্বন্তো বিবিধান্নাদান্বজ্রনুন্না ইবাচলাঃ
40.55
গজবাজিমনুষ্যৈশ্চ নিপতদ্ভিঃ সমন্ততঃ
রথৈশ্চাবগতৈর্মার্গে পর্যস্তীর্যত মেদিনী
40.56
নৈব ভীষ্মো ন চ দ্রোণো নাপ্যন্যে যুধি তাবকাঃ
চক্রুঃ স্ম তাদৃশং কর্ম যাদৃশং বৈ কৃতং রণে
40.57
সূতপুত্রেণ নাগেষু রথেষু চ হয়েষু চ
নরেষু চ নরব্যাঘ্র কৃতং স্ম কদনং মহৎ
40.58
মৃগমধ্যে যথা সিংহো দৃশ্যতে নির্ভয়শ্চরন্
পাঞ্চালানাং তথা মধ্যে কর্ণোঽচরদভীতবৎ
40.59
যথা মৃগগণাংস্ত্রস্তান্সিংহো দ্রাবয়তে দিশঃ
পাঞ্চালানাং রথব্রাতান্কর্ণো দ্রাবয়তে তথা
40.60
সিংহাস্যং চ যথা প্রাপ্য ন জীবন্তি মৃগাঃ ক্বচিৎ
তথা কর্ণমনুপ্রাপ্য ন জীবন্তি মহারথাঃ
40.61
বৈশ্বানরং যথা দীপ্তং দহ্যন্তে প্রাপ্য বৈ জনাঃ
কর্ণাগ্নিনা রণে তদ্বদ্দগ্ধা ভারত সৃঞ্জয়াঃ
40.62
কর্ণেন চেদিষ্বেকেন পাঞ্চালেষু চ ভারত
বিশ্রাব্য নাম নিহতা বহবঃ শূরসংমতাঃ
40.63
মম চাসীন্মনুষ্যেন্দ্র দৃষ্ট্বা কর্ণস্য বিক্রমম্
নৈকোঽপ্যাধিরথের্জীবন্পাঞ্চাল্যো মোক্ষ্যতে যুধি
40.64
পাঞ্চালান্বিধমন্সংখ্যে সূতপুত্রঃ প্রতাপবান্
অভ্যধাবত সংক্রুদ্ধো ধর্মপুত্রং যুধিষ্ঠিরম্
40.65
ধৃষ্টদ্যুম্নশ্চ রাজানং দ্রৌপদেয়াশ্চ মারিষ
পরিবব্রুরমিত্রঘ্নং শতশশ্চাপরে জনাঃ
40.66
শিখণ্ডী সহদেবশ্চ নকুলো নাকুলিস্তথা
জনমেজয়ঃ শিনের্নপ্তা বহবশ্চ প্রভদ্রকাঃ
40.67
এতে পুরোগমা ভূত্বা ধৃষ্টদ্যুম্নস্য সংয়ুগে
কর্ণমস্যন্তমিষ্বস্ত্রৈর্বিচেরুরমিতৌজসঃ
40.68
তাংস্তত্রাধিরথিঃ সংখ্যে চেদিপাঞ্চালপাণ্ডবান্
একো বহূনভ্যপতদ্গরুত্মন্পন্নগানিব
40.69
ভীমসেনস্তু সংক্রুদ্ধঃ কুরূন্মদ্রান্সকেকয়ান্
একঃ সংখ্যে মহেষ্বাসো যোধয়ন্বহ্বশোভত
40.70
তত্র মর্মসু ভীমেন নারাচৈস্তাডিতা গজাঃ
প্রপতন্তো হতারোহাঃ কম্পয়ন্তি স্ম মেদিনীম্
40.71
বাজিনশ্চ হতারোহাঃ পত্তয়শ্চ গতাসবঃ
শেরতে যুধি নির্ভিন্না বমন্তো রুধিরং বহু
40.72
সহস্রশশ্চ রথিনঃ পতিতাঃ পতিতায়ুধাঃ
অক্ষতাঃ সমদৃশ্যন্ত ভীমাদ্ভীতা গতাসবঃ
40.73
রথিভির্বাজিভিঃ সূতৈঃ পত্তিভিশ্চ তথা গজৈঃ
ভীমসেনশরচ্ছিন্নৈরাস্তীর্ণা বসুধাভবৎ
40.74
তত্স্তম্ভিতমিবাতিষ্ঠদ্ভীমসেনবলার্দিতম্
দুর্যোধনবলং রাজন্নিরুত্সাহং কৃতব্রণম্
40.75
নিশ্চেষ্টং তুমুলে দীনং বভৌ তস্মিন্মহারণে
প্রসন্নসলিলঃ কালে যথা স্যাত্সাগরো নৃপ
40.76
মন্যুবীর্যবলোপেতং বলাত্পর্যবরোপিতম্
অভবত্তব পুত্রস্য তত্সৈন্যমিষুভিস্তদা
রুধিরৌঘপরিক্লিন্নং রুধিরার্দ্রং বভূব হ
40.77
সূতপুত্রো রণে ক্রুদ্ধঃ পাণ্ডবানামনীকিনীম্
ভীমসেনঃ কুরূংশ্চাপি দ্রাবয়ন্বহ্বশোভত
40.78
বর্তমানে তথা রৌদ্রে সংগ্রামেঽদ্ভুতদর্শনে
নিহত্য পৃতনামধ্যে সংশপ্তকগণান্বহূন্
40.79
অর্জুনো জয়তাং শ্রেষ্ঠো বাসুদেবমথাব্রবীৎ
প্রভগ্নং বলমেতদ্ধি যোত্স্যমানং জনার্দন
40.80
এতে ধাবন্তি সগণাঃ সংশপ্তকমহারথাঃ
অপারয়ন্তো মদ্বাণান্সিংহশব্দান্মৃগা ইব
40.81
দীর্যতে চ মহত্সৈন্যং সৃঞ্জয়ানাং মহারণে
হস্তিকক্ষ্যো হ্যসৌ কৃষ্ণ কেতুঃ কর্ণস্য ধীমতঃ
দৃশ্যতে রাজসৈন্যস্য মধ্যে বিচরতো মুহুঃ
40.82
ন চ কর্ণং রণে শক্তা জেতুমন্যে মহারথাঃ
জানীতে হি ভবান্কর্ণং বীর্যবন্তং পরাক্রমে
40.83
তত্র যাহি যতঃ কর্ণো দ্রাবয়ত্যেষ নো বলম্
40.84
বর্জয়িত্বা রণে যাহি সূতপুত্রং মহারথম্
শ্রমো মা বাধতে কৃষ্ণ যথা বা তব রোচতে
40.85
এতচ্ছ্রুত্বা মহারাজ গোবিন্দঃ প্রহসন্নিব
অব্রবীদর্জুনং তূর্ণং কৌরবাঞ্জহি পাণ্ডব
40.86
ততস্তব মহত্সৈন্যং গোবিন্দপ্রেরিতা হয়াঃ
হংসবর্ণাঃ প্রবিবিশুর্বহন্তঃ কৃষ্ণপাণ্ডবৌ
40.87
কেশবপ্রহিতৈরশ্বৈঃ শ্বেতৈঃ কাঞ্চনভূষণৈঃ
প্রবিশদ্ভিস্তব বলং চতুর্দিশমভিদ্যত
40.88
তৌ বিদার্য মহাসেনাং প্রবিষ্টৌ কেশবার্জুনৌ
ক্রুদ্ধৌ সংরম্ভরক্তাক্ষৌ ব্যভ্রাজেতাং মহাদ্যুতী
40.89
যুদ্ধশৌণ্ডৌ সমাহূতাবরিভিস্তৌ রণাধ্বরম্
যজ্বভির্বিধিনাহূতৌ মখে দেবাবিবাশ্বিনৌ
40.90
ক্রুদ্ধৌ তৌ তু নরব্যাঘ্রৌ বেগবন্তৌ বভূবতুঃ
তলশব্দেন রুষিতৌ যথা নাগৌ মহাহবে
40.91
বিগাহন্স রথানীকমশ্বসংঘাংশ্চ ফল্গুনঃ
ব্যচরত্পৃতনামধ্যে পাশহস্ত ইবান্তকঃ
40.92
তং দৃষ্ট্বা যুধি বিক্রান্তং সেনায়াং তব ভারত
সংশপ্তকগণান্ভূয়ঃ পুত্রস্তে সমচোদয়ৎ
40.93
ততো রথসহস্রেণ দ্বিরদানাং ত্রিভিঃ শতৈঃ
চতুর্দশসহস্রৈশ্চ তুরগাণাং মহাহবে
40.94
দ্বাভ্যাং শতসহস্রাভ্যাং পদাতীনাং চ ধন্বিনাম্
শূরাণাং নামলব্ধানাং বিদিতানাং সমন্ততঃ
অভ্যবর্তন্ত তৌ বীরৌ ছাদয়ন্তো মহারথাঃ
40.95
স ছাদ্যমানঃ সমরে শরৈঃ পরবলার্দনঃ
দর্শয়ন্রৌদ্রমাত্মানং পাশহস্ত ইবান্তকঃ
নিঘ্নন্সংশপ্তকান্পার্থঃ প্রেক্ষণীয়তরোঽভবৎ
40.96
ততো বিদ্যুত্প্রভৈর্বাণৈঃ কার্তস্বরবিভূষিতৈঃ
নিরন্তরমিবাকাশমাসীন্নুন্নৈঃ কিরীটিনা
40.97
কিরীটিভুজনির্মুক্তৈঃ সংপতদ্ভির্মহাশরৈঃ
সমাচ্ছন্নং বভৌ সর্বং কাদ্রবেয়ৈরিব প্রভো
40.98
রুক্মপুঙ্খান্প্রসন্নাগ্রাঞ্শরান্সংনতপর্বণঃ
অদর্শয়দমেয়াত্মা দিক্ষু সর্বাসু পাণ্ডবঃ
40.99
হত্বা দশ সহস্রাণি পার্থিবানাং মহারথঃ
সংশপ্তকানাং কৌন্তেয়ঃ প্রপক্ষং ত্বরিতোঽভ্যয়াৎ
40.100
প্রপক্ষং স সমাসাদ্য পার্থঃ কাম্বোজরক্ষিতম্
প্রমমাথ বলাদ্বাণৈর্দানবানিব বাসবঃ
40.101
প্রচিচ্ছেদাশু ভল্লৈশ্চ দ্বিষতামাততায়িনাম্
শস্ত্রপাণীংস্তথা বাহূংস্তথাপি চ শিরাংস্যুত
40.102
অঙ্গাঙ্গাবয়বৈশ্ছিন্নৈর্ব্যায়ুধাস্তেঽপতন্ক্ষিতৌ
বিষ্বগ্বাতাভিসংভগ্না বহুশাখা ইব দ্রুমাঃ
40.103
হস্ত্যশ্বরথপত্তীনাং ব্রাতান্নিঘ্নন্তমর্জুনম্
সুদক্ষিণাদবরজঃ শরবৃষ্ট্যাভ্যবীবৃষৎ
40.104
অস্যাস্যতোঽর্ধচন্দ্রাভ্যাং স বাহূ পরিঘোপমৌ
পূর্ণচন্দ্রাভবক্ত্রং চ ক্ষুরেণাভ্যহনচ্ছিরঃ
40.105
স পপাত ততো বাহাত্স্বলোহিতপরিস্রবঃ
মনঃশিলাগিরেঃ শৃঙ্গং বজ্রেণেবাবদারিতম্
40.106
সুদক্ষিণাদবরজং কাম্বোজং দদৃশুর্হতম্
প্রাংশুং কমলপত্রাক্ষমত্যর্থং প্রিয়দর্শনম্
কাঞ্চনস্তম্ভসংকাশং ভিন্নং হেমগিরিং যথা
40.107
ততোঽভবত্পুনর্যুদ্ধং ঘোরমদ্ভুতদর্শনম্
নানাবস্থাশ্চ যোধানাং বভূবুস্তত্র যুধ্যতাম্
40.108
এতেষ্বাবর্জিতৈরশ্বৈঃ কাম্বোজৈর্যবনৈঃ শকৈঃ
শোণিতাক্তৈস্তদা রক্তং সর্বমাসীদ্বিশাং পতে
40.109
রথৈ রথাশ্বসূতৈশ্চ হতারোহৈশ্চ বাজিভিঃ
দ্বিরদৈশ্চ হতারোহৈর্মহামাত্রৈর্হতদ্বিপৈঃ
অন্যোন্যেন মহারাজ কৃতো ঘোরো জনক্ষয়ঃ
40.110
তস্মিন্প্রপক্ষে পক্ষে চ বধ্যমানে মহাত্মনা
অর্জুনং জয়তাং শ্রেষ্ঠং ত্বরিতো দ্রৌণিরায়য়ৌ
40.111
বিধুন্বানো মহচ্চাপং কার্তস্বরবিভূষিতম্
আদদানঃ শরান্ঘোরান্স্বরশ্মীনিব ভাস্করঃ
40.112
তৈঃ পতদ্ভির্মহারাজ দ্রৌণিমুক্তৈঃ সমন্ততঃ
সংছাদিতৌ রথস্থৌ তাবুভৌ কৃষ্ণধনংজয়ৌ
40.113
ততঃ শরশতৈস্তীক্ষ্ণৈর্ভারদ্বাজঃ প্রতাপবান্
নিশ্চেষ্টৌ তাবুভৌ চক্রে যুদ্ধে মাধবপাণ্ডবৌ
40.114
হাহাকৃতমভূত্সর্বং জঙ্গমং স্থাবরং তথা
চরাচরস্য গোপ্তারৌ দৃষ্ট্বা সংছাদিতৌ শরৈঃ
40.115
সিদ্ধচারণসংঘাশ্চ সংপেতুর্বৈ সমন্ততঃ
চিন্তয়ন্তো ভবেদদ্য লোকানাং স্বস্ত্যপীত্যহ
40.116
ন ময়া তাদৃশো রাজন্দৃষ্টপূর্বঃ পরাক্রমঃ
সংজজ্ঞে যাদৃশো দ্রৌণেঃ কৃষ্ণৌ সংছাদয়িষ্যতঃ
40.117
দ্রৌণেস্তু ধনুষঃ শব্দমহিতত্রাসনং রণে
অশ্রৌষং বহুশো রাজন্সিংহস্য নদতো যথা
40.118
জ্যা চাস্য চরতো যুদ্ধে সব্যদক্ষিণমস্যতঃ
বিদ্যুদম্বুদমধ্যস্থা ভ্রাজমানেব সাভবৎ
40.119
স তথা ক্ষিপ্রকারী চ দৃঢহস্তশ্চ পাণ্ডবঃ
সংমোহং পরমং গত্বা প্রৈক্ষত দ্রোণজং ততঃ
40.120
স বিক্রমং হৃতং মেনে আত্মনঃ সুমহাত্মনা
তথাস্য সমরে রাজন্বপুরাসীত্সুদুর্দৃশম্
40.121
দ্রৌণিপাণ্ডবয়োরেবং বর্তমানে মহারণে
বর্ধমানে চ রাজেন্দ্র দ্রোণপুত্রে মহাবলে
হীয়মানে চ কৌন্তেয়ে কৃষ্ণং রোষঃ সমভ্যয়াৎ
40.122
স রোষান্নিঃশ্বসন্রাজন্নির্দহন্নিব চক্ষুষা
দ্রৌণিং হ্যপশ্যত্সংগ্রামে ফল্গুনং চ মুহুর্মুহুঃ
40.123
ততঃ ক্রুদ্ধোঽব্রবীত্কৃষ্ণঃ পার্থং সপ্রণয়ং তদা
অত্যদ্ভুতমিদং পার্থ তব পশ্যামি সংয়ুগে
অতিশেতে হি যত্র ত্বা দ্রোণপুত্রোঽদ্য ভারত
40.124
কচ্চিত্তে গাণ্ডিবং হস্তে রথে তিষ্ঠসি চার্জুন
কচ্চিত্কুশলিনৌ বাহূ কচ্চিদ্বীর্যং তদেব তে
40.125
এবমুক্তস্তু কৃষ্ণেন ক্ষিপ্ত্বা ভল্লাংশ্চতুর্দশ
ত্বরমাণস্ত্বরাকালে দ্রৌণের্ধনুরথাচ্ছিনৎ
ধ্বজং ছত্রং পতাকাং চ রথং শক্তিং গদাং তথা
40.126
জত্রুদেশে চ সুভৃশং বত্সদন্তৈরতাডয়ৎ
স মূর্চ্ছাং পরমাং গত্বা ধ্বজয়ষ্টিং সমাশ্রিতঃ
40.127
তং বিসংজ্ঞং মহারাজ কিরীটিভয়পীডিতম্
অপোবাহ রণাত্সূতো রক্ষমাণো ধনংজয়াৎ
40.128
এতস্মিন্নেব কালে তু বিজয়ঃ শত্রুতাপনঃ
ন্যবধীত্তাবকং সৈন্যং শতশোঽথ সহস্রশঃ
পশ্যতস্তব পুত্রস্য তস্য বীরস্য ভারত
40.129
এবমেষ ক্ষয়ো বৃত্তস্তাবকানাং পরৈঃ সহ
ক্রূরো বিশসনো ঘোরো রাজন্দুর্মন্ত্রিতে তব
40.130
সংশপ্তকাংশ্চ কৌন্তেয়ঃ কুরূংশ্চাপি বৃকোদরঃ
বসুষেণং চ পাঞ্চালঃ কৃত্স্নেন ব্যধমদ্রণে