Utshovঅধ্যায় 39
39.1
সংজয় উবাচ
দ্রৌণির্যুধিষ্ঠিরং দৃষ্ট্বা শৈনেয়েনাভিরক্ষিতম্
দ্রৌপদেয়ৈস্তথা শূরৈরভ্যবর্তত হৃষ্টবৎ
39.2
কিরন্নিষুগণান্ঘোরান্স্বর্ণপুঙ্খাঞ্শিলাশিতান্
দর্শয়ন্বিবিধান্মার্গাঞ্শিক্ষার্থং লঘুহস্তবৎ
39.3
ততঃ খং পূরয়ামাস শরৈর্দিব্যাস্ত্রমন্ত্রিতৈঃ
যুধিষ্ঠিরং চ সমরে পর্যবারয়দস্ত্রবিৎ
39.4
দ্রৌণায়নিশরচ্ছন্নং ন প্রাজ্ঞায়ত কিংচন
বাণভূতমভূত্সর্বমায়োধনশিরো হি তৎ
39.5
বাণজালং দিবিষ্ঠং তত্স্বর্ণজালবিভূষিতম্
শুশুভে ভরতশ্রেষ্ঠ বিতানমিব বিষ্ঠিতম্
39.6
তেন ছন্নে রণে রাজন্বাণজালেন ভাস্বতা
অভ্রচ্ছায়েব সংজজ্ঞে বাণরুদ্ধে নভস্তলে
39.7
তত্রাশ্চর্যমপশ্যাম বাণভূতে তথাবিধে
ন স্ম সংপততে ভূমৌ দৃষ্ট্বা দ্রৌণেঃ পরাক্রমম্
39.8
লাঘবং দ্রোণপুত্রস্য দৃষ্ট্বা তত্র মহারথাঃ
ব্যস্ময়ন্ত মহারাজ ন চৈনং প্রতিবীক্ষিতুম্
শেকুস্তে সর্বরাজানস্তপন্তমিব ভাস্করম্
39.9
সাত্যকির্যতমানস্তু ধর্মরাজশ্চ পাণ্ডবঃ
তথেতরাণি সৈন্যানি ন স্ম চক্রুঃ পরাক্রমম্
39.10
বধ্যমানে ততঃ সৈন্যে দ্রৌপদেয়া মহারথাঃ
সাত্যকির্ধর্মরাজশ্চ পাঞ্চালাশ্চাপি সংগতাঃ
ত্যক্ত্বা মৃত্যুভয়ং ঘোরং দ্রৌণায়নিমুপাদ্রবন্
39.11
সাত্যকিঃ পঞ্চবিংশত্যা দ্রৌণিং বিদ্ধ্বা শিলামুখৈঃ
পুনর্বিব্যাধ নারাচৈঃ সপ্তভিঃ স্বর্ণভূষিতৈঃ
39.12
যুধিষ্ঠিরস্ত্রিসপ্তত্যা প্রতিবিন্ধ্যশ্চ সপ্তভিঃ
শ্রুতকর্মা ত্রিভির্বাণৈঃ শ্রুতকীর্তিস্তু সপ্তভিঃ
39.13
সুতসোমশ্চ নবভিঃ শতানীকশ্চ সপ্তভিঃ
অন্যে চ বহবঃ শূরা বিব্যধুস্তং সমন্ততঃ
39.14
সোঽতিক্রুদ্ধস্ততো রাজন্নাশীবিষ ইব শ্বসন্
সাত্যকিং পঞ্চবিংশত্যা প্রাবিধ্যত শিলাশিতৈঃ
39.15
শ্রুতকীর্তিং চ নবভিঃ সুতসোমং চ পঞ্চভিঃ
অষ্টভিঃ শ্রুতকর্মাণং প্রতিবিন্ধ্যং ত্রিভিঃ শরৈঃ
শতানীকং চ নবভির্ধর্মপুত্রং চ সপ্তভিঃ
39.16
অথেতরাংস্ততঃ শূরান্দ্বাভ্যাং দ্বাভ্যামতাডয়ৎ
শ্রুতকীর্তেস্তথা চাপং চিচ্ছেদ নিশিতৈঃ শরৈঃ
39.17
অথান্যদ্ধনুরাদায় শ্রুতকীর্তির্মহারথঃ
দ্রৌণায়নিং ত্রিভির্বিদ্ধ্বা বিব্যাধান্যৈঃ শিতৈঃ শরৈঃ
39.18
ততো দ্রৌণির্মহারাজ শরবর্ষেণ ভারত
ছাদয়ামাস তত্সৈন্যং সমন্তাচ্চ শরৈর্নৃপান্
39.19
ততঃ পুনরমেয়াত্মা ধর্মরাজস্য কার্মুকম্
দ্রৌণিশ্চিচ্ছেদ বিহসন্বিব্যাধ চ শরৈস্ত্রিভিঃ
39.20
ততো ধর্মসুতো রাজন্প্রগৃহ্যান্যন্মহদ্ধনুঃ
দ্রৌণিং বিব্যাধ সপ্তত্যা বাহ্বোরুরসি চার্দয়ৎ
39.21
সাত্যকিস্তু ততঃ ক্রুদ্ধো দ্রৌণেঃ প্রহরতো রণে
অর্ধচন্দ্রেণ তীক্ষ্ণেন ধনুশ্ছিত্ত্বানদদ্ভৃশম্
39.22
ছিন্নধন্বা ততো দ্রৌণিঃ শক্ত্যা শক্তিমতাং বরঃ
সারথিং পাতয়ামাস শৈনেয়স্য রথাদ্দ্রুতম্
39.23
অথান্যদ্ধনুরাদায় দ্রোণপুত্রঃ প্রতাপবান্
শৈনেয়ং শরবর্ষেণ ছাদয়ামাস ভারত
39.24
তস্যাশ্বাঃ প্রদ্রুতাঃ সংখ্যে পতিতে রথসারথৌ
তত্র তত্রৈব ধাবন্তঃ সমদৃশ্যন্ত ভারত
39.25
যুধিষ্ঠিরপুরোগাস্তে দ্রৌণিং শস্ত্রভৃতাং বরম্
অভ্যবর্ষন্ত বেগেন বিসৃজন্তঃ শিতাঞ্শরান্
39.26
আগচ্ছমানাংস্তান্দৃষ্ট্বা রৌদ্ররূপান্পরংতপঃ
প্রহসন্প্রতিজগ্রাহ দ্রোণপুত্রো মহারণে
39.27
ততঃ শরশতজ্বালঃ সেনাকক্ষং মহারথঃ
দ্রৌণির্দদাহ সমরে কক্ষমগ্নির্যথা বনে
39.28
তদ্বলং পাণ্ডুপুত্রস্য দ্রোণপুত্রপ্রতাপিতম্
চুক্ষুভে ভরতশ্রেষ্ঠ তিমিনেব নদীমুখম্
39.29
দৃষ্ট্বা তে চ মহারাজ দ্রোণপুত্রপরাক্রমম্
নিহতান্মেনিরে সর্বান্পাণ্ডূন্দ্রোণসুতেন বৈ
39.30
যুধিষ্ঠিরস্তু ত্বরিতো দ্রৌণিং শ্লিষ্য মহারথম্
অব্রবীদ্দ্রোণপুত্রং তু রোষামর্ষসমন্বিতঃ
39.31
নৈব নাম তব প্রীতির্নৈব নাম কৃতজ্ঞতা
যতস্ত্বং পুরুষব্যাঘ্র মামেবাদ্য জিঘাংসসি
39.32
ব্রাহ্মণেন তপঃ কার্যং দানমধ্যয়নং তথা
ক্ষত্রিয়েণ ধনুর্নাম্যং স ভবান্ব্রাহ্মণব্রুবঃ
39.33
মিষতস্তে মহাবাহো জেষ্যামি যুধি কৌরবান্
কুরুষ্ব সমরে কর্ম ব্রহ্মবন্ধুরসি ধ্রুবম্
39.34
এবমুক্তো মহারাজ দ্রোণপুত্রঃ স্ময়ন্নিব
যুক্তত্বং তচ্চ সংচিন্ত্য নোত্তরং কিংচিদব্রবীৎ
39.35
অনুক্ত্বা চ ততঃ কিংচিচ্ছরবর্ষেণ পাণ্ডবম্
ছাদয়ামাস সমরে ক্রুদ্ধোঽন্তক ইব প্রজাঃ
39.36
সংছাদ্যমানস্তু তদা দ্রোণপুত্রেণ মারিষ
পার্থোঽপয়াতঃ শীঘ্রং বৈ বিহায় মহতীং চমূম্
39.37
অপয়াতে ততস্তস্মিন্ধর্মপুত্রে যুধিষ্ঠিরে
দ্রোণপুত্রঃ স্থিতো রাজন্প্রত্যাদেশান্মহাত্মনঃ
39.38
ততো যুধিষ্ঠিরো রাজা ত্যক্ত্বা দ্রৌণিং মহাহবে
প্রয়য়ৌ তাবকং সৈন্যং যুক্তঃ ক্রূরায় কর্মণে