Utshovঅধ্যায় 38
38.1
সংজয় উবাচ
কৃতবর্মা কৃপো দ্রৌণিঃ সূতপুত্রশ্চ মারিষ
উলূকঃ সৌবলশ্চৈব রাজা চ সহ সোদরৈঃ
38.2
সীদমানাং চমূং দৃষ্ট্বা পাণ্ডুপুত্রভয়ার্দিতাম্
সমুজ্জিহীর্ষুর্বেগেন ভিন্নাং নাবমিবার্ণবে
38.3
ততো যুদ্ধমতীবাসীন্মুহূর্তমিব ভারত
ভীরূণাং ত্রাসজননং শূরাণাং হর্ষবর্ধনম্
38.4
কৃপেণ শরবর্ষাণি বিপ্রমুক্তানি সংয়ুগে
সৃঞ্জয়াঃ শাতয়ামাসুঃ শলভানাং ব্রজা ইব
38.5
শিখণ্ডী তু ততঃ ক্রুদ্ধো গৌতমং ত্বরিতো যয়ৌ
ববর্ষ শরবর্ষাণি সমন্তাদেব ব্রাহ্মণে
38.6
কৃপস্তু শরবর্ষং তদ্বিনিহত্য মহাস্ত্রবিৎ
শিখণ্ডিনং রণে ক্রুদ্ধো বিব্যাধ দশভিঃ শরৈঃ
38.7
ততঃ শিখণ্ডী কুপীতঃ শরৈঃ সপ্তভিরাহবে
কৃপং বিব্যাধ সুভৃশং কঙ্কপত্রৈরজিহ্মগৈঃ
38.8
ততঃ কৃপঃ শরৈস্তীক্ষ্ণৈঃ সোঽতিবিদ্ধো মহারথঃ
ব্যশ্বসূতরথং চক্রে পার্ষতং তু দ্বিজোত্তমঃ
38.9
হতাশ্বাত্তু ততো যানাদবপ্লুত্য মহারথঃ
চর্মখড্গে চ সংগৃহ্য সত্বরং ব্রাহ্মণং যয়ৌ
38.10
তমাপতন্তং সহসা শরৈঃ সংনতপর্বভিঃ
ছাদয়ামাস সমরে তদদ্ভুতমিবাভবৎ
38.11
তত্রাদ্ভুতমপশ্যাম শিলানাং প্লবনং যথা
নিশ্চেষ্টো যদ্রণে রাজঞ্শিখণ্ডী সমতিষ্ঠত
38.12
কৃপেণ ছাদিতং দৃষ্ট্বা নৃপোত্তম শিখণ্ডিনম্
প্রত্যুদ্যয়ৌ কৃপং তূর্ণং ধৃষ্টদ্যুম্নো মহারথঃ
38.13
ধৃষ্টদ্যুম্নং ততো যান্তং শারদ্বতরথং প্রতি
প্রতিজগ্রাহ বেগেন কৃতবর্মা মহারথঃ
38.14
যুধিষ্ঠিরমথায়ান্তং শারদ্বতরথং প্রতি
সপুত্রং সহসেনং চ দ্রোণপুত্রো ন্যবারয়ৎ
38.15
নকুলং সহদেবং চ ত্বরমাণৌ মহারথৌ
প্রতিজগ্রাহ তে পুত্রঃ শরবর্ষেণ বারয়ন্
38.16
ভীমসেনং করূষাংশ্চ কেকয়ান্সহসৃঞ্জয়ান্
কর্ণো বৈকর্তনো যুদ্ধে বারয়ামাস ভারত
38.17
শিখণ্ডিনস্ততো বাণান্কৃপঃ শারদ্বতো যুধি
প্রাহিণোত্ত্বরয়া যুক্তো দিধক্ষুরিব মারিষ
38.18
তাঞ্শরান্প্রেষিতাংস্তেন সমন্তাদ্ধেমভূষণান্
চিচ্ছেদ খড্গমাবিধ্য ভ্রাময়ংশ্চ পুনঃ পুনঃ
38.19
শতচন্দ্রং ততশ্চর্ম গৌতমঃ পার্ষতস্য হ
ব্যধমত্সায়কৈস্তূর্ণং তত উচ্চুক্রুশুর্জনাঃ
38.20
স বিচর্মা মহারাজ খড্গপাণিরুপাদ্রবৎ
কৃপস্য বশমাপন্নো মৃত্যোরাস্যমিবাতুরঃ
38.21
শারদ্বতশরৈর্গ্রস্তং ক্লিশ্যমানং মহাবলম্
চিত্রকেতুসুতো রাজন্সুকেতুস্ত্বরিতো যয়ৌ
38.22
বিকিরন্ব্রাহ্মণং যুদ্ধে বহুভির্নিশিতৈঃ শরৈঃ
অভ্যাপতদমেয়াত্মা গৌতমস্য রথং প্রতি
38.23
দৃষ্ট্বাবিষহ্যং তং যুদ্ধে ব্রাহ্মণং চরিতব্রতম্
অপয়াতস্ততস্তূর্ণং শিখণ্ডী রাজসত্তম
38.24
সুকেতুস্তু ততো রাজন্গৌতমং নবভিঃ শরৈঃ
বিদ্ধ্বা বিব্যাধ সপ্তত্যা পুনশ্চৈনং ত্রিভিঃ শরৈঃ
38.25
অথাস্য সশরং চাপং পুনশ্চিচ্ছেদ মারিষ
সারথিং চ শরেণাস্য ভৃশং মর্মণ্যতাডয়ৎ
38.26
গৌতমস্তু ততঃ ক্রুদ্ধো ধনুর্গৃহ্য নবং দৃঢম্
সুকেতুং ত্রিংশতা বাণৈঃ সর্বমর্মস্বতাডয়ৎ
38.27
স বিহ্বলিতসর্বাঙ্গঃ প্রচচাল রথোত্তমে
ভূমিচালে যথা বৃক্ষশ্চলত্যাকম্পিতো ভৃশম্
38.28
চলতস্তস্য কায়াত্তু শিরো জ্বলিতকুণ্ডলম্
সোষ্ণীষং সশিরস্ত্রাণং ক্ষুরপ্রেণান্বপাতয়ৎ
38.29
তচ্ছিরঃ প্রাপতদ্ভূমৌ শ্যেনাহৃতমিবামিষম্
ততোঽস্য কায়ো বসুধাং পশ্চাত্প্রাপ তদা চ্যুতঃ
38.30
তস্মিন্হতে মহারাজ ত্রস্তাস্তস্য পদানুগাঃ
গৌতমং সমরে ত্যক্ত্বা দুদ্রুবুস্তে দিশো দশ
38.31
ধৃষ্টদ্যুম্নং তু সমরে সংনিবার্য মহাবলঃ
কৃতবর্মাব্রবীদ্ধৃষ্টস্তিষ্ঠ তিষ্ঠেতি পার্ষতম্
38.32
তদভূত্তুমুলং যুদ্ধং বৃষ্ণিপার্ষতয়ো রণে
আমিষার্থে যথা যুদ্ধং শ্যেনয়োর্গৃদ্ধয়োর্নৃপ
38.33
ধৃষ্টদ্যুম্নস্তু সমরে হার্দিক্যং নবভিঃ শরৈঃ
আজঘানোরসি ক্রুদ্ধঃ পীডয়ন্হৃদিকাত্মজম্
38.34
কৃতবর্মা তু সমরে পার্ষতেন দৃঢাহতঃ
পার্ষতং সরথং সাশ্বং ছাদয়ামাস সায়কৈঃ
38.35
সরথশ্ছাদিতো রাজন্ধৃষ্টদ্যুম্নো ন দৃশ্যতে
মেঘৈরিব পরিচ্ছন্নো ভাস্করো জলদাগমে
38.36
বিধূয় তং বাণগণং শরৈঃ কনকভূষণৈঃ
ব্যরোচত রণে রাজন্ধৃষ্টদ্যুম্নঃ কৃতব্রণঃ
38.37
ততস্তু পার্ষতঃ ক্রুদ্ধঃ শস্ত্রবৃষ্টিং সুদারুণাম্
কৃতবর্মাণমাসাদ্য ব্যসৃজত্পৃতনাপতিঃ
38.38
তামাপতন্তীং সহসা শস্ত্রবৃষ্টিং নিরন্তরাম্
শরৈরনেকসাহস্রৈর্হার্দিক্যো ব্যধমদ্যুধি
38.39
দৃষ্ট্বা তু দারিতাং যুদ্ধে শস্ত্রবৃষ্টিং দুরুত্তরাম্
কৃতবর্মাণমভ্যেত্য বারয়ামাস পার্ষতঃ
38.40
সারথিং চাস্য তরসা প্রাহিণোদ্যমসাদনম্
ভল্লেন শিতধারেণ স হতঃ প্রাপতদ্রথাৎ
38.41
ধৃষ্টদ্যুম্নস্তু বলবাঞ্জিত্বা শত্রুং মহারথম্
কৌরবান্সমরে তূর্ণং বারয়ামাস সায়কৈঃ
38.42
ততস্তে তাবকা যোধা ধৃষ্টদ্যুম্নমুপাদ্রবন্
সিংহনাদরবং কৃত্বা ততো যুদ্ধমবর্তত