Utshovঅধ্যায় 37
37.1
সংজয় উবাচ
বর্তমানে তদা যুদ্ধে ক্ষত্রিয়াণাং নিমজ্জনে
গাণ্ডীবস্য মহান্ঘোষঃ শুশ্রুবে যুধি মারিষ
37.2
সংশপ্তকানাং কদনমকরোদ্যত্র পাণ্ডবঃ
কোসলানাং তথা রাজন্নারায়ণবলস্য চ
37.3
সংশপ্তকাস্তু সমরে শরবৃষ্টিং সমন্ততঃ
অপাতয়ন্পার্থমূর্ধ্নি জয়গৃদ্ধাঃ প্রমন্যবঃ
37.4
তাং বৃষ্টিং সহসা রাজংস্তরসা ধারয়ন্প্রভুঃ
ব্যগাহত রণে পার্থো বিনিঘ্নন্রথিনাং বরঃ
37.5
নিগৃহ্য তু রথানীকং কঙ্কপত্রৈঃ শিলাশিতৈঃ
আসসাদ রণে পার্থঃ সুশর্মাণং মহারথম্
37.6
স তস্য শরবর্ষাণি ববর্ষ রথিনাং বরঃ
তথা সংশপ্তকাশ্চৈব পার্থস্য সমরে স্থিতাঃ
37.7
সুশর্মা তু ততঃ পার্থং বিদ্ধ্বা নবভিরাশুগৈঃ
জনার্দনং ত্রিভির্বাণৈরভ্যহন্দক্ষিণে ভুজে
ততোঽপরেণ ভল্লেন কেতুং বিব্যাধ মারিষ
37.8
স বানরবরো রাজন্বিশ্বকর্মকৃতো মহান্
ননাদ সুমহন্নাদং ভীষয়ন্বৈ ননর্দ চ
37.9
কপেস্তু নিনদং শ্রুত্বা সংত্রস্তা তব বাহিনী
ভয়ং বিপুলমাদায় নিশ্চেষ্টা সমপদ্যত
37.10
ততঃ সা শুশুভে সেনা নিশ্চেষ্টাবস্থিতা নৃপ
নানাপুষ্পসমাকীর্ণং যথা চৈত্ররথং বনম্
37.11
প্রতিলভ্য ততঃ সংজ্ঞাং যোধাস্তে কুরুসত্তম
অর্জুনং সিষিচুর্বাণৈঃ পর্বতং জলদা ইব
পরিবব্রুস্তদা সর্বে পাণ্ডবস্য মহারথম্
37.12
তে হয়ান্রথচক্রে চ রথেষাশ্চাপি ভারত
নিগৃহ্য বলবত্তূর্ণং সিংহনাদমথানদন্
37.13
অপরে জগৃহুশ্চৈব কেশবস্য মহাভুজৌ
পার্থমন্যে মহারাজ রথস্থং জগৃহুর্মুদা
37.14
কেশবস্তু তদা বাহূ বিধুন্বন্রণমূর্ধনি
পাতয়ামাস তান্সর্বান্দুষ্টহস্তীব হস্তিনঃ
37.15
ততঃ ক্রুদ্ধো রণে পার্থঃ সংবৃতস্তৈর্মহারথৈঃ
নিগৃহীতং রথং দৃষ্ট্বা কেশবং চাপ্যভিদ্রুতম্
রথারূঢাংশ্চ সুবহূন্পদাতীংশ্চাপ্যপাতয়ৎ
37.16
আসন্নাংশ্চ ততো যোধাঞ্শরৈরাসন্নয়োধিভিঃ
চ্যাবয়ামাস সমরে কেশবং চেদমব্রবীৎ
37.17
পশ্য কৃষ্ণ মহাবাহো সংশপ্তকগণান্ময়া
কুর্বাণান্দারুণং কর্ম বধ্যমানান্সহস্রশঃ
37.18
রথবন্ধমিমং ঘোরং পৃথিব্যাং নাস্তি কশ্চন
যঃ সহেত পুমাঁল্লোকে মদন্যো যদুপুংগব
37.19
ইত্যেবমুক্ত্বা বীভত্সুর্দেবদত্তমথাধমৎ
পাঞ্চজন্যং চ কৃষ্ণোঽপি পূরয়ন্নিব রোদসী
37.20
তং তু শঙ্খস্বনং শ্রুত্বা সংশপ্তকবরূথিনী
সংচচাল মহারাজ বিত্রস্তা চাভবদ্ভৃশম্
37.21
পদবন্ধং ততশ্চক্রে পাণ্ডবঃ পরবীরহা
নাগমস্ত্রং মহারাজ সংপ্রোদীর্য মুহুর্মুহুঃ
37.22
যানুদ্দিশ্য রণে পার্থঃ পদবন্ধং চকার হ
তে বদ্ধাঃ পদবন্ধেন পাণ্ডবেন মহাত্মনা
নিশ্চেষ্টা অভবন্রাজন্নশ্মসারময়া ইব
37.23
নিশ্চেষ্টাংস্তু ততো যোধানবধীত্পাণ্ডুনন্দনঃ
যথেন্দ্রঃ সমরে দৈত্যাংস্তারকস্য বধে পুরা
37.24
তে বধ্যমানাঃ সমরে মুমুচুস্তং রথোত্তমম্
আয়ুধানি চ সর্বাণি বিস্রষ্টুমুপচক্রমুঃ
37.25
ততঃ সুশর্মা রাজেন্দ্র গৃহীতাং বীক্ষ্য বাহিনীম্
সৌপর্ণমস্ত্রং ত্বরিতঃ প্রাদুশ্চক্রে মহারথঃ
37.26
ততঃ সুপর্ণাঃ সংপেতুর্ভক্ষয়ন্তো ভুজংগমান্
তে বৈ বিদুদ্রুবুর্নাগা দৃষ্ট্বা তান্খচরান্নৃপ
37.27
বভৌ বলং তদ্বিমুক্তং পদবন্ধাদ্বিশাং পতে
মেঘবৃন্দাদ্যথা মুক্তো ভাস্করস্তাপয়ন্প্রজাঃ
37.28
বিপ্রমুক্তাস্তু তে যোধাঃ ফল্গুনস্য রথং প্রতি
সসৃজুর্বাণসংঘাংশ্চ শস্ত্রসংঘাংশ্চ মারিষ
37.29
তাং মহাস্ত্রময়ীং বৃষ্টিং সংছিদ্য শরবৃষ্টিভিঃ
ব্যবাতিষ্ঠত্ততো যোধান্বাসবিঃ পরবীরহা
37.30
সুশর্মা তু ততো রাজন্বাণেনানতপর্বণা
অর্জুনং হৃদয়ে বিদ্ধ্বা বিব্যাধান্যৈস্ত্রিভিঃ শরৈঃ
স গাঢবিদ্ধো ব্যথিতো রথোপস্থ উপাবিশৎ
37.31
প্রতিলভ্য ততঃ সংজ্ঞাং শ্বেতাশ্বঃ কৃষ্ণসারথিঃ
ঐন্দ্রমস্ত্রমমেয়াত্মা প্রাদুশ্চক্রে ত্বরান্বিতঃ
ততো বাণসহস্রাণি সমুত্পন্নানি মারিষ
37.32
সর্বদিক্ষু ব্যদৃশ্যন্ত সূদয়ন্তো নৃপ দ্বিপান্
হয়ান্রথাংশ্চ সমরে শস্ত্রৈঃ শতসহস্রশঃ
37.33
বধ্যমানে ততঃ সৈন্যে বিপুলা ভীঃ সমাবিশৎ
সংশপ্তকগণানাং চ গোপালানাং চ ভারত
ন হি কশ্চিত্পুমাংস্তত্র যোঽর্জুনং প্রত্যয়ুধ্যত
37.34
পশ্যতাং তত্র বীরাণামহন্যত মহদ্বলম্
হন্যমানমপশ্যংশ্চ নিশ্চেষ্টাঃ স্ম পরাক্রমে
37.35
অয়ুতং তত্র যোধানাং হত্বা পাণ্ডুসুতো রণে
ব্যভ্রাজত রণে রাজন্বিধূমোঽগ্নিরিব জ্বলন্
37.36
চতুর্দশ সহস্রাণি যানি শিষ্টানি ভারত
রথানাময়ুতং চৈব ত্রিসাহস্রাশ্চ দন্তিনঃ
37.37
ততঃ সংশপ্তকা ভূয়ঃ পরিবব্রুর্ধনংজয়ম্
মর্তব্যমিতি নিশ্চিত্য জয়ং বাপি নিবর্তনম্
37.38
তত্র যুদ্ধং মহদ্ধ্যাসীত্তাবকানাং বিশাং পতে
শূরেণ বলিনা সার্ধং পাণ্ডবেন কিরীটিনা