Utshovঅধ্যায় 36
36.1
সংজয় উবাচ
ক্ষত্রিয়াস্তে মহারাজ পরস্পরবধৈষিণঃ
অন্যোন্যং সমরে জঘ্নুঃ কৃতবৈরাঃ পরস্পরম্
36.2
রথৌঘাশ্চ হয়ৌঘাশ্চ নরৌঘাশ্চ সমন্ততঃ
গজৌঘাশ্চ মহারাজ সংসক্তাঃ স্ম পরস্পরম্
36.3
গদানাং পরিঘাণাং চ কণপানাং চ সর্পতাম্
প্রাসানাং ভিণ্ডিপালানাং ভুশুণ্ডীনাং চ সর্বশঃ
36.4
সংপাতং চান্বপশ্যাম সংগ্রামে ভৃশদারুণে
শলভা ইব সংপেতুঃ সমন্তাচ্ছরবৃষ্টয়ঃ
36.5
নাগা নাগান্সমাসাদ্য ব্যধমন্ত পরস্পরম্
হয়া হয়াংশ্চ সমরে রথিনো রথিনস্তথা
পত্তয়ঃ পত্তিসংঘৈশ্চ হয়সংঘৈর্হয়াস্তথা
36.6
পত্তয়ো রথমাতঙ্গান্রথা হস্ত্যশ্বমেব চ
নাগাশ্চ সমরে ত্র্যঙ্গং মমৃদুঃ শীঘ্রগা নৃপ
36.7
পততাং তত্র শূরাণাং ক্রোশতাং চ পরস্পরম্
ঘোরমায়োধনং জজ্ঞে পশূনাং বৈশসং যথা
36.8
রুধিরেণ সমাস্তীর্ণা ভাতি ভারত মেদিনী
শক্রগোপগণাকীর্ণা প্রাবৃষীব যথা ধরা
36.9
যথা বা বাসসী শুক্লে মহারজনরঞ্জিতে
বিভৃয়াদ্যুবতিঃ শ্যামা তদ্বদাসীদ্বসুংধরা
মাংসশোণিতচিত্রেব শাতকৌম্ভময়ীব চ
36.10
ছিন্নানাং চোত্তমাঙ্গানাং বাহূনাং চোরুভিঃ সহ
কুণ্ডলানাং প্রবিদ্ধানাং ভূষণানাং চ ভারত
36.11
নিষ্কাণামধিসূত্রাণাং শরীরাণাং চ ধন্বিনাম্
বর্মণাং সপতাকানাং সংঘাস্তত্রাপতন্ভুবি
36.12
গজান্গজাঃ সমাসাদ্য বিষাণাগ্রৈরদারয়ন্
বিষাণাভিহতাস্তে চ ভ্রাজন্তে দ্বিরদা যথা
36.13
রুধিরেণাবসিক্তাঙ্গা গৈরিকপ্রস্রবা ইব
যথা ভ্রাজন্তি স্যন্দন্তঃ পর্বতা ধাতুমণ্ডিতাঃ
36.14
তোমরান্গজিভির্মুক্তান্প্রতীপানাস্থিতান্বহূন্
হস্তৈর্বিচেরুস্তে নাগা বভঞ্জুশ্চাপরে তথা
36.15
নারাচৈশ্ছিন্নবর্মাণো ভ্রাজন্তে স্ম গজোত্তমাঃ
হিমাগমে মহারাজ ব্যভ্রা ইব মহীধরাঃ
36.16
শরৈঃ কনকপুঙ্খৈস্তু চিতা রেজুর্গজোত্তমাঃ
উল্কাভিঃ সংপ্রদীপ্তাগ্রাঃ পর্বতা ইব মারিষ
36.17
কেচিদভ্যাহতা নাগা নাগৈর্নগনিভা ভুবি
নিপেতুঃ সমরে তস্মিন্পক্ষবন্ত ইবাদ্রয়ঃ
36.18
অপরে প্রাদ্রবন্নাগাঃ শল্যার্তা ব্রণপীডিতাঃ
প্রতিমানৈশ্চ কুম্ভৈশ্চ পেতুরুর্ব্যাং মহাহবে
36.19
নিষেদুঃ সিংহবচ্চান্যে নদন্তো ভৈরবান্রবান্
মম্লুশ্চ বহবো রাজংশ্চুকূজুশ্চাপরে তথা
36.20
হয়াশ্চ নিহতা বাণৈঃ স্বর্ণভাণ্ডপরিচ্ছদাঃ
নিষেদুশ্চৈব মম্লুশ্চ বভ্রমুশ্চ দিশো দশ
36.21
অপরে কৃষ্যমাণাশ্চ বিবেষ্টন্তো মহীতলে
ভাবান্বহুবিধাংশ্চক্রুস্তাডিতাঃ শরতোমরৈঃ
36.22
নরাস্তু নিহতা ভূমৌ কূজন্তস্তত্র মারিষ
দৃষ্ট্বা চ বান্ধবানন্যে পিতৄনন্যে পিতামহান্
36.23
ধাবমানান্পরাংশ্চৈব দৃষ্ট্বান্যে তত্র ভারত
গোত্রনামানি খ্যাতানি শশংসুরিতরেতরম্
36.24
তেষাং ছিন্না মহারাজ ভুজাঃ কনকভূষণাঃ
উদ্বেষ্টন্তে বিবেষ্টন্তে পতন্তে চোত্পতন্তি চ
36.25
নিপতন্তি তথা ভূমৌ স্ফুরন্তি চ সহস্রশঃ
বেগাংশ্চান্যে রণে চক্রুঃ স্ফুরন্ত ইব পন্নগাঃ
36.26
তে ভুজা ভোগিভোগাভাশ্চন্দনাক্তা বিশাং পতে
লোহিতার্দ্রা ভৃশং রেজুস্তপনীয়ধ্বজা ইব
36.27
বর্তমানে তথা ঘোরে সংকুলে সর্বতোদিশম্
অবিজ্ঞাতাঃ স্ম যুধ্যন্তে বিনিঘ্নন্তঃ পরস্পরম্
36.28
ভৌমেন রজসা কীর্ণে শস্ত্রসংপাতসংকুলে
নৈব স্বে ন পরে রাজন্ব্যজ্ঞায়ন্ত তমোবৃতে
36.29
তথা তদভবদ্যুদ্ধং ঘোররূপং ভয়ানকম্
শোণিতোদা মহানদ্যঃ প্রসস্রুস্তত্র চাসকৃৎ
36.30
শীর্ষপাষাণসংছন্নাঃ কেশশৈবলশাদ্বলাঃ
অস্থিসংঘাতসংকীর্ণা ধনুঃশরবরোত্তমাঃ
36.31
মাংসকর্দমপঙ্কাশ্চ শোণিতৌঘাঃ সুদারুণাঃ
নদীঃ প্রবর্তয়ামাসুর্যমরাষ্ট্রবিবর্ধনীঃ
36.32
তা নদ্যো ঘোররূপাশ্চ নয়ন্ত্যো যমসাদনম্
অবগাঢা মজ্জয়ন্ত্যঃ ক্ষত্রস্যাজনয়ন্ভয়ম্
36.33
ক্রব্যাদানাং নরব্যাঘ্র নর্দতাং তত্র তত্র হ
ঘোরমায়োধনং জজ্ঞে প্রেতরাজপুরোপমম্
36.34
উত্থিতান্যগণেয়ানি কবন্ধানি সমন্ততঃ
নৃত্যন্তি বৈ ভূতগণাঃ সংতৃপ্তা মাংসশোণিতৈঃ
36.35
পীত্বা চ শোণিতং তত্র বসাং পীত্বা চ ভারত
মেদোমজ্জাবসাতৃপ্তাস্তৃপ্তা মাংসস্য চৈব হি
ধাবমানাশ্চ দৃশ্যন্তে কাকগৃধ্রবলাস্তথা
36.36
শূরাস্তু সমরে রাজন্ভয়ং ত্যক্ত্বা সুদুস্ত্যজম্
যোধব্রতসমাখ্যাতাশ্চক্রুঃ কর্মাণ্যভীতবৎ
36.37
শরশক্তিসমাকীর্ণে ক্রব্যাদগণসংকুলে
ব্যচরন্ত গণৈঃ শূরাঃ খ্যাপয়ন্তঃ স্বপৌরুষম্
36.38
অন্যোন্যং শ্রাবয়ন্তি স্ম নামগোত্রাণি ভারত
পিতৃনামানি চ রণে গোত্রনামানি চাভিতঃ
36.39
শ্রাবয়ন্তো হি বহবস্তত্র যোধা বিশাং পতে
অন্যোন্যমবমৃদ্নন্তঃ শক্তিতোমরপট্টিশৈঃ
36.40
বর্তমানে তদা যুদ্ধে ঘোররূপে সুদারুণে
ব্যষীদত্কৌরবী সেনা ভিন্না নৌরিব সাগরে