Utshovঅধ্যায় 35
35.1
ধৃতরাষ্ট্র উবাচ
সুদুষ্করমিদং কর্ম কৃতং ভীমেন সংজয়
যেন কর্ণো মহাবাহূ রথোপস্থে নিপাতিতঃ
35.2
কর্ণো হ্যেকো রণে হন্তা সৃঞ্জয়ান্পাণ্ডবৈঃ সহ
ইতি দুর্যোধনঃ সূত প্রাব্রবীন্মাং মুহুর্মুহুঃ
35.3
পরাজিতং তু রাধেয়ং দৃষ্ট্বা ভীমেন সংয়ুগে
ততঃ পরং কিমকরোত্পুত্রো দুর্যোধনো মম
35.4
সংজয় উবাচ
বিভ্রান্তং প্রেক্ষ্য রাধেয়ং সূতপুত্রং মহাহবে
মহত্যা সেনয়া রাজন্সোদর্যান্সমভাষত
35.5
শীঘ্রং গচ্ছত ভদ্রং বো রাধেয়ং পরিরক্ষত
ভীমসেনভয়াগাধে মজ্জন্তং ব্যসনার্ণবে
35.6
তে তু রাজ্ঞা সমাদিষ্টা ভীমসেনজিঘাংসবঃ
অভ্যবর্তন্ত সংক্রুদ্ধাঃ পতংগা ইব পাবকম্
35.7
শ্রুতায়ুর্দুর্ধরঃ ক্রাথো বিবিত্সুর্বিকটঃ সমঃ
নিষঙ্গী কবচী পাশী তথা নন্দোপনন্দকৌ
35.8
দুষ্প্রধর্ষঃ সুবাহুশ্চ বাতবেগসুবর্চসৌ
ধনুর্গ্রাহো দুর্মদশ্চ তথা সত্ত্বসমঃ সহঃ
35.9
এতে রথৈঃ পরিবৃতা বীর্যবন্তো মহাবলাঃ
ভীমসেনং সমাসাদ্য সমন্তাত্পর্যবারয়ন্
তে ব্যমুঞ্চঞ্শরব্রাতান্নানালিঙ্গান্সমন্ততঃ
35.10
স তৈরভ্যর্দ্যমানস্তু ভীমসেনো মহাবলঃ
তেষামাপততাং ক্ষিপ্রং সুতানাং তে নরাধিপ
রথৈঃ পঞ্চাশতা সার্ধং পঞ্চাশন্ন্যহনদ্রথান্
35.11
বিবিত্সোস্তু ততঃ ক্রুদ্ধো ভল্লেনাপাহরচ্ছিরঃ
সকুণ্ডলশিরস্ত্রাণং পূর্ণচন্দ্রোপমং তদা
ভীমেন চ মহারাজ স পপাত হতো ভুবি
35.12
তং দৃষ্ট্বা নিহতং শূরং ভ্রাতরঃ সর্বতঃ প্রভো
অভ্যদ্রবন্ত সমরে ভীমং ভীমপরাক্রমম্
35.13
ততোঽপরাভ্যাং ভল্লাভ্যাং পুত্রয়োস্তে মহাহবে
জহার সমরে প্রাণান্ভীমো ভীমপরাক্রমঃ
35.14
তৌ ধরামন্বপদ্যেতাং বাতরুগ্ণাবিব দ্রুমৌ
বিকটশ্চ সমশ্চোভৌ দেবগর্ভসমৌ নৃপ
35.15
ততস্তু ত্বরিতো ভীমঃ ক্রাথং নিন্যে যমক্ষয়ম্
নারাচেন সুতীক্ষ্ণেন স হতো ন্যপতদ্ভুবি
35.16
হাহাকারস্ততস্তীব্রঃ সংবভূব জনেশ্বর
বধ্যমানেষু তে রাজংস্তদা পুত্রেষু ধন্বিষু
35.17
তেষাং সংলুলিতে সৈন্যে ভীমসেনো মহাবলঃ
নন্দোপনন্দৌ সমরে প্রাপয়দ্যমসাদনম্
35.18
ততস্তে প্রাদ্রবন্ভীতাঃ পুত্রাস্তে বিহ্বলীকৃতাঃ
ভীমসেনং রণে দৃষ্ট্বা কালান্তকয়মোপমম্
35.19
পুত্রাংস্তে নিহতান্দৃষ্ট্বা সূতপুত্রো মহামনাঃ
হংসবর্ণান্হয়ান্ভূয়ঃ প্রাহিণোদ্যত্র পাণ্ডবঃ
35.20
তে প্রেষিতা মহারাজ মদ্ররাজেন বাজিনঃ
ভীমসেনরথং প্রাপ্য সমসজ্জন্ত বেগিতাঃ
35.21
স সংনিপাতস্তুমুলো ঘোররূপো বিশাং পতে
আসীদ্রৌদ্রো মহারাজ কর্ণপাণ্ডবয়োর্মৃধে
35.22
দৃষ্ট্বা মম মহারাজ তৌ সমেতৌ মহারথৌ
আসীদ্বুদ্ধিঃ কথং নূনমেতদদ্য ভবিষ্যতি
35.23
ততো মুহূর্তাদ্রাজেন্দ্র নাতিকৃচ্ছ্রাদ্ধসন্নিব
বিরথং ভীমকর্মাণং ভীমং কর্ণশ্চকার হ
35.24
বিরথো ভরতশ্রেষ্ঠঃ প্রহসন্ননিলোপমঃ
গদাহস্তো মহাবাহুরপতত্স্যন্দনোত্তমাৎ
35.25
নাগান্সপ্তশতান্রাজন্নীষাদন্তান্প্রহারিণঃ
ব্যধমত্সহসা ভীমঃ ক্রুদ্ধরূপঃ পরংতপঃ
35.26
দন্তবেষ্টেষু নেত্রেষু কম্ভেষু স কটেষু চ
মর্মস্বপি চ মর্মজ্ঞো নিনদন্ব্যধমদ্ভৃশম্
35.27
ততস্তে প্রাদ্রবন্ভীতাঃ প্রতীপং প্রহিতাঃ পুনঃ
মহামাত্রৈস্তমাবব্রুর্মেঘা ইব দিবাকরম্
35.28
তান্স সপ্তশতান্নাগান্সারোহায়ুধকেতনান্
ভূমিষ্ঠো গদয়া জঘ্নে শরন্মেঘানিবানিলঃ
35.29
ততঃ সুবলপুত্রস্য নাগানতিবলান্পুনঃ
পোথয়ামাস কৌন্তেয়ো দ্বাপঞ্চাশতমাহবে
35.30
তথা রথশতং সাগ্রং পত্তীংশ্চ শতশোঽপরান্
ন্যহনত্পাণ্ডবো যুদ্ধে তাপয়ংস্তব বাহিনীম্
35.31
প্রতাপ্যমানং সূর্যেণ ভীমেন চ মহাত্মনা
তব সৈন্যং সংচুকোচ চর্ম বহ্নিগতং যথা
35.32
তে ভীমভয়সংত্রস্তাস্তাবকা ভরতর্ষভ
বিহায় সমরে ভীমং দুদ্রুবুর্বৈ দিশো দশ
35.33
রথাঃ পঞ্চশতাশ্চান্যে হ্রাদিনশ্চর্মবর্মিণঃ
ভীমমভ্যদ্রবংস্তূর্ণং শরপূগৈঃ সমন্ততঃ
35.34
তান্সসূতরথান্সর্বান্সপতাকাধ্বজায়ুধান্
পোথয়ামাস গদয়া ভীমো বিষ্ণুরিবাসুরান্
35.35
ততঃ শকুনিনির্দিষ্টাঃ সাদিনঃ শূরসংমতাঃ
ত্রিসাহস্রা যয়ুর্ভীমং শক্ত্যৃষ্টিপ্রাসপাণয়ঃ
35.36
তান্প্রত্যুদ্গম্য যবনানশ্বারোহান্বরারিহা
বিচরন্বিবিধান্মার্গান্ঘাতয়ামাস পোথয়ন্
35.37
তেষামাসীন্মহাঞ্শব্দস্তাডিতানাং চ সার্বশঃ
অসিভিশ্ছিদ্যমানানাং নডানামিব ভারত
35.38
এবং সুবলপুত্রস্য ত্রিসাহস্রান্হয়োত্তমান্
হত্বান্যং রথমাস্থায় ক্রুদ্ধো রাধেয়মভ্যয়াৎ
35.39
কর্ণোঽপি সমরে রাজন্ধর্মপুত্রমরিংদমম্
শরৈঃ প্রচ্ছাদয়ামাস সারথিং চাপ্যপাতয়ৎ
35.40
ততঃ সংপ্রদ্রুতং সংখ্যে রথং দৃষ্ট্বা মহারথঃ
অন্বধাবত্কিরন্বাণৈঃ কঙ্কপত্রৈরজিহ্মগৈঃ
35.41
রাজানমভি ধাবন্তং শরৈরাবৃত্য রোদসী
ক্রুদ্ধঃ প্রচ্ছাদয়ামাস শরজালেন মারুতিঃ
35.42
সংনিবৃত্তস্ততস্তূর্ণং রাধেয়ঃ শত্রুকর্শনঃ
ভীমং প্রচ্ছাদয়ামাস সমন্তান্নিশিতৈঃ শরৈঃ
35.43
ভীমসেনরথব্যগ্রং কর্ণং ভারত সাত্যকিঃ
অভ্যর্দয়দমেয়াত্মা পার্ষ্ণিগ্রহণকারণাৎ
অভ্যবর্তত কর্ণস্তমর্দিতোঽপি শরৈর্ভৃশম্
35.44
তাবন্যোন্যং সমাসাদ্য বৃষভৌ সর্বধন্বিনাম্
বিসৃজন্তৌ শরাংশ্চিত্রান্বিভ্রাজেতাং মনস্বিনৌ
35.45
তাভ্যাং বিয়তি রাজেন্দ্র বিততং ভীমদর্শনম্
ক্রৌঞ্চপৃষ্ঠারুণং রৌদ্রং বাণজালং ব্যদৃশ্যত
35.46
নৈব সূর্যপ্রভাং খং বা ন দিশঃ প্রদিশঃ কুতঃ
প্রাজ্ঞাসিষ্ম বয়ং তাভ্যাং শরৈর্মুক্তৈঃ সহস্রশঃ
35.47
মধ্যাহ্নে তপতো রাজন্ভাস্করস্য মহাপ্রভাঃ
হৃতাঃ সর্বাঃ শরৌঘৈস্তৈঃ কর্ণমাধবয়োস্তদা
35.48
সৌবলং কৃতবর্মাণং দ্রৌণিমাধিরথিং কৃপম্
সংসক্তান্পাণ্ডবৈর্দৃষ্ট্বা নিবৃত্তাঃ কুরবঃ পুনঃ
35.49
তেষামাপততাং শব্দস্তীব্র আসীদ্বিশাং পতে
উদ্ধূতানাং যথা বৃষ্ট্যা সাগরাণাং ভয়াবহঃ
35.50
তে সেনে ভৃশসংবিগ্নে দৃষ্ট্বান্যোন্যং মহারণে
হর্ষেণ মহতা যুক্তে পরিগৃহ্য পরস্পরম্
35.51
ততঃ প্রববৃতে যুদ্ধং মধ্যং প্রাপ্তে দিবাকরে
যাদৃশং ন কদাচিদ্ধি দৃষ্টপূর্বং ন চ শ্রুতম্
35.52
বলৌঘস্তু সমাসাদ্য বলৌঘং সহসা রণে
উপাসর্পত বেগেন জলৌঘ ইব সাগরম্
35.53
আসীন্নিনাদঃ সুমহান্বলৌঘানাং পরস্পরম্
গর্জতাং সাগরৌঘাণাং যথা স্যান্নিস্বনো মহান্
35.54
তে তু সেনে সমাসাদ্য বেগবত্যৌ পরস্পরম্
একীভাবমনুপ্রাপ্তে নদ্যাবিব সমাগমে
35.55
ততঃ প্রববৃতে যুদ্ধং ঘোররূপং বিশাং পতে
কুরূণাং পাণ্ডবানাং চ লিপ্সতাং সুমহদ্যশঃ
35.56
কুরূণাং গর্জতাং তত্র অবিচ্ছেদকৃতা গিরঃ
শ্রূয়ন্তে বিবিধা রাজন্নামান্যুদ্দিশ্য ভারত
35.57
যস্য যদ্ধি রণে ন্যঙ্গং পিতৃতো মাতৃতোঽপি বা
কর্মতঃ শীলতো বাপি স তচ্ছ্রাবয়তে যুধি
35.58
তান্দৃষ্ট্বা সমরে শূরাংস্তর্জয়ানান্পরস্পরম্
অভবন্মে মতী রাজন্নৈষামস্তীতি জীবিতম্
35.59
তেষাং দৃষ্ট্বা তু ক্রুদ্ধানাং বপূংষ্যমিততেজসাম্
অভবন্মে ভয়ং তীব্রং কথমেতদ্ভবিষ্যতি
35.60
ততস্তে পাণ্ডবা রাজন্কৌরবাশ্চ মহারথাঃ
ততক্ষুঃ সায়কৈস্তীক্ষ্ণৈর্নিঘ্নন্তো হি পরস্পরম্