Utshovঅধ্যায় 34
34.1
সংজয় উবাচ
তানভিদ্রবতো দৃষ্ট্বা পাণ্ডবাংস্তাবকং বলম্
ক্রোশতস্তব পুত্রস্য ন স্ম রাজন্ন্যবর্তত
34.2
ততঃ পক্ষাত্প্রপক্ষাচ্চ প্রপক্ষৈশ্চাপি দক্ষিণাৎ
উদস্তশস্ত্রাঃ কুরবো ভীমমভ্যদ্রবন্রণে
34.3
কর্ণোঽপি দৃষ্ট্বা দ্রবতো ধার্তরাষ্ট্রান্পরাঙ্মুখান্
হংসবর্ণান্হয়াগ্র্যাংস্তান্প্রৈষীদ্যত্র বৃকোদরম্
34.4
তে প্রেষিতা মহারাজ শল্যেনাহবশোভিনা
ভীমসেনরথং প্রাপ্য সমসজ্জন্ত বাজিনঃ
34.5
দৃষ্ট্বা কর্ণং সমায়ান্তং ভীমঃ ক্রোধসমন্বিতঃ
মতিং দধ্রে বিনাশায় কর্ণস্য ভরতর্ষভ
34.6
সোঽব্রবীত্সাত্যকিং বীরং ধৃষ্টদ্যুম্নং চ পার্ষতম্
এনং রক্ষত রাজানং ধর্মাত্মানং যুধিষ্ঠিরম্
সংশয়ান্মহতো মুক্তং কথংচিত্প্রেক্ষতো মম
34.7
অগ্রতো মে কৃতো রাজা ছিন্নসর্বপরিচ্ছদঃ
দুর্যোধনস্য প্রীত্যর্থং রাধেয়েন দুরাত্মনা
34.8
অন্তমদ্য করিষ্যামি তস্য দুঃখস্য পার্ষত
হন্তা বাস্মি রণে কর্ণং স বা মাং নিহনিষ্যতি
সংগ্রামেণ সুঘোরেণ সত্যমেতদ্ব্রবীমি বঃ
34.9
রাজানমদ্য ভবতাং ন্যাসভূতং দদামি বৈ
অস্য সংরক্ষণে সর্বে যতধ্বং বিগতজ্বরাঃ
34.10
এবমুক্ত্বা মহাবাহুঃ প্রায়াদাধিরথিং প্রতি
সিংহনাদেন মহতা সর্বাঃ সংনাদয়ন্দিশঃ
34.11
দৃষ্ট্বা ত্বরিতমায়ান্তং ভীমং যুদ্ধাভিনন্দিনম্
সূতপুত্রমথোবাচ মদ্রাণামীশ্বরো বিভুঃ
34.12
পশ্য কর্ণ মহাবাহুং ক্রুদ্ধং পাণ্ডবনন্দনম্
দীর্ঘকালার্জিতং ক্রোধং মোক্তুকামং ত্বয়ি ধ্রুবম্
34.13
ঈদৃশং নাস্য রূপং মে দৃষ্টপূর্বং কদাচন
অভিমন্যৌ হতে কর্ণ রাক্ষসে বা ঘটোত্কচে
34.14
ত্রৈলোক্যস্য সমস্তস্য শক্তঃ ক্রুদ্ধো নিবারণে
বিভর্তি যাদৃশং রূপং কালাগ্নিসদৃশং শুভম্
34.15
ইতি ব্রুবতি রাধেয়ং মদ্রাণামীশ্বরে নৃপ
অভ্যবর্তত বৈ কর্ণং ক্রোধদীপ্তো বৃকোদরঃ
34.16
তথাগতং তু সংপ্রেক্ষ্য ভীমং যুদ্ধাভিনন্দিনম্
অব্রবীদ্বচনং শল্যং রাধেয়ঃ প্রহসন্নিব
34.17
যদুক্তং বচনং মেঽদ্য ত্বয়া মদ্রজনেশ্বর
ভীমসেনং প্রতি বিভো তত্সত্যং নাত্র সংশয়ঃ
34.18
এষ শূরশ্চ বীরশ্চ ক্রোধনশ্চ বৃকোদরঃ
নিরপেক্ষঃ শরীরে চ প্রাণতশ্চ বলাধিকঃ
34.19
অজ্ঞাতবাসং বসতা বিরাটনগরে তদা
দ্রৌপদ্যাঃ প্রিয়কামেন কেবলং বাহুসংশ্রয়াৎ
গূঢভাবং সমাশ্রিত্য কীচকঃ সগণো হতঃ
34.20
সোঽদ্য সংগ্রামশিরসি সংনদ্ধঃ ক্রোধমূর্চ্ছিতঃ
কিংকরোদ্যতদণ্ডেন মৃত্যুনাপি ব্রজেদ্রণম্
34.21
চিরকালাভিলষিতো মমায়ং তু মনোরথঃ
অর্জুনং সমরে হন্যাং মাং বা হন্যাদ্ধনংজয়ঃ
স মে কদাচিদদ্যৈব ভবেদ্ভীমসমাগমাৎ
34.22
নিহতে ভীমসেনে তু যদি বা বিরথীকৃতে
অভিয়াস্যতি মাং পার্থস্তন্মে সাধু ভবিষ্যতি
অত্র যন্মন্যসে প্রাপ্তং তচ্ছীঘ্রং সংপ্রধারয়
34.23
এতচ্ছ্রুত্বা তু বচনং রাধেয়স্য মহাত্মনঃ
উবাচ বচনং শল্যঃ সূতপুত্রং তথাগতম্
34.24
অভিয়াসি মহাবাহো ভীমসেনং মহাবলম্
নিরস্য ভীমসেনং তু ততঃ প্রাপ্স্যসি ফল্গুনম্
34.25
যস্তে কামোঽভিলষিতশ্চিরাত্প্রভৃতি হৃদ্গতঃ
স বৈ সংপত্স্যতে কর্ণ সত্যমেতদ্ব্রবীমি তে
34.26
এবমুক্তে ততঃ কর্ণঃ শল্যং পুনরভাষত
হন্তাহমর্জুনং সংখ্যে মাং বা হন্তা ধনংজয়ঃ
যুদ্ধে মনঃ সমাধায় যাহি যাহীত্যচোদয়ৎ
34.27
ততঃ প্রায়াদ্রথেনাশু শল্যস্তত্র বিশাং পতে
যত্র ভীমো মহেষ্বাসো ব্যদ্রাবয়ত বাহিনীম্
34.28
ততস্তূর্যনিনাদশ্চ ভেরীণাং চ মহাস্বনঃ
উদতিষ্ঠত রাজেন্দ্র কর্ণভীমসমাগমে
34.29
ভীমসেনোঽথ সংক্রুদ্ধস্তব সৈন্যং দুরাসদম্
নারাচৈর্বিমলৈস্তীক্ষ্ণৈর্দিশঃ প্রাদ্রাবয়দ্বলী
34.30
স সংনিপাতস্তুমুলো ভীমরূপো বিশাং পতে
আসীদ্রৌদ্রো মহারাজ কর্ণপাণ্ডবয়োর্মৃধে
ততো মুহূর্তাদ্রাজেন্দ্র পাণ্ডবঃ কর্ণমাদ্রবৎ
34.31
তমাপতন্তং সংপ্রেক্ষ্য কর্ণো বৈকর্তনো বৃষঃ
আজঘানোরসি ক্রুদ্ধো নারাচেন স্তনান্তরে
পুনশ্চৈনমমেয়াত্মা শরবর্ষৈরবাকিরৎ
34.32
স বিদ্ধঃ সূতপুত্রেণ ছাদয়ামাস পত্রিভিঃ
বিব্যাধ নিশিতৈঃ কর্ণ নবভির্নতপর্বভিঃ
34.33
তস্য কর্ণো ধনুর্মধ্যে দ্বিধা চিচ্ছেদ পত্রিণা
অথ তং ছিন্নধন্বানমভ্যবিধ্যত্স্তনান্তরে
নারাচেন সুতীক্ষ্ণেন সর্বাবরণভেদিনা
34.34
সোঽন্যত্কার্মুকমাদায় সূতপুত্রং বৃকোদরঃ
রাজন্মর্মসু মর্মজ্ঞো বিদ্ধ্বা সুনিশিতৈঃ শরৈঃ
ননাদ বলবন্নাদং কম্পয়ন্নিব রোদসী
34.35
তং কর্ণঃ পঞ্চবিংশত্যা নারাচানাং সমার্দয়ৎ
মদোত্কটং বনে দৃপ্তমুল্কাভিরিব কুঞ্জরম্
34.36
ততঃ সায়কভিন্নাঙ্গঃ পাণ্ডবঃ ক্রোধমূর্চ্ছিতঃ
সংরম্ভামর্ষতাম্রাক্ষঃ সূতপুত্রবধেচ্ছয়া
34.37
স কার্মুকে মহাবেগং ভারসাধনমুত্তমম্
গিরীণামপি ভেত্তারং সায়কং সময়োজয়ৎ
34.38
বিকৃষ্য বলবচ্চাপমা কর্ণাদতিমারুতিঃ
তং মুমোচ মহেষ্বাসঃ ক্রুদ্ধঃ কর্ণজিঘাংসয়া
34.39
স বিসৃষ্টো বলবতা বাণো বজ্রাশনিস্বনঃ
অদারয়দ্রণে কর্ণং বজ্রবেগ ইবাচলম্
34.40
স ভীমসেনাভিহতো সূতপুত্রঃ কুরূদ্বহ
নিষসাদ রথোপস্থে বিসংজ্ঞঃ পৃতনাপতিঃ
34.41
ততো মদ্রাধিপো দৃষ্ট্বা বিসংজ্ঞং সূতনন্দনম্
অপোবাহ রথেনাজৌ কর্ণমাহবশোভিনম্
34.42
ততঃ পরাজিতে কর্ণে ধার্তরাষ্ট্রীং মহাচমূম্
ব্যদ্রাবয়দ্ভীমসেনো যথেন্দ্রো দানবীং চমূম্