Utshovঅধ্যায় 33
33.1
সংজয় উবাচ
বিদার্য কর্ণস্তাং সেনাং ধর্মরাজমুপাদ্রবৎ
রথহস্ত্যশ্বপত্তীনাং সহস্রৈঃ পরিবারিতঃ
33.2
নানায়ুধসহস্রাণি প্রেষিতান্যরিভির্বৃষঃ
ছিত্ত্বা বাণশতৈরুগ্রৈস্তানবিধ্যদসংভ্রমঃ
33.3
নিচকর্ত শিরাংস্যেষাং বাহূনূরূংশ্চ সর্বশঃ
তে হতা বসুধাং পেতুর্ভগ্নাশ্চান্যে বিদুদ্রুবুঃ
33.4
দ্রবিডান্ধ্রনিষাদাস্তু পুনঃ সাত্যকিচোদিতাঃ
অভ্যর্দয়ঞ্জিঘাংসন্তঃ পত্তয়ঃ কর্ণমাহবে
33.5
তে বিবাহুশিরস্ত্রাণাঃ প্রহতাঃ কর্ণসায়কৈঃ
পেতুঃ পৃথিব্যাং যুগপচ্ছিন্নং শালবনং যথা
33.6
এবং যোধশতান্যাজৌ সহস্রাণ্যয়ুতানি চ
হতানীয়ুর্মহীং দেহৈর্যশসাপূরয়ন্দিশঃ
33.7
অথ বৈকর্তনং কর্ণং রণে ক্রুদ্ধমিবান্তকম্
রুরুধুঃ পাণ্ডুপাঞ্চালা ব্যাধিং মন্ত্রৌষধৈরিব
33.8
স তান্প্রমৃদ্যাভ্যপতত্পুনরেব যুধিষ্ঠিরম্
মন্ত্রৌষধিক্রিয়াতীতো ব্যাধিরত্যুল্বণো যথা
33.9
স রাজগৃদ্ধিভী রুদ্ধঃ পাণ্ডুপাঞ্চালকেকয়ৈঃ
নাশকত্তানতিক্রান্তুং মৃত্যুর্ব্রহ্মবিদো যথা
33.10
ততো যুধিষ্ঠিরঃ কর্ণমদূরস্থং নিবারিতম্
অব্রবীত্পরবীরঘ্নঃ ক্রোধসংরক্তলোচনঃ
33.11
কর্ণ কর্ণ বৃথাদৃষ্টে সূতপুত্র বচঃ শৃণু
সদা স্পর্ধসি সংগ্রামে ফল্গুনেন যশস্বিনা
তথাস্মান্বাধসে নিত্যং ধার্তরাষ্ট্রমতে স্থিতঃ
33.12
যদ্বলং যচ্চ তে বীর্যং প্রদ্বেষো যশ্চ পাণ্ডুষু
তত্সর্বং দর্শয়স্বাদ্য পৌরুষং মহদাস্থিতঃ
যুদ্ধশ্রদ্ধাং স তেঽদ্যাহং বিনেষ্যামি মহাহবে
33.13
এবমুক্ত্বা মহারাজ কর্ণং পাণ্ডুসুতস্তদা
সুবর্ণপুঙ্খৈর্দশভির্বিব্যাধায়স্ময়ৈঃ শিতৈঃ
33.14
তং সূতপুত্রো নবভিঃ প্রত্যবিধ্যদরিংদমঃ
বত্সদন্তৈর্মহেষ্বাসঃ প্রহসন্নিব ভারত
33.15
ততঃ ক্ষুরাভ্যাং পাঞ্চাল্যৌ চক্ররক্ষৌ মহাত্মনঃ
জঘান সমরে শূরঃ শরৈঃ সংনতপর্বভিঃ
33.16
তাবুভৌ ধর্মরাজস্য প্রবীরৌ পরিপার্শ্বতঃ
রথাভ্যাশে চকাশেতে চন্দ্রস্যেব পুনর্বসূ
33.17
যুধিষ্ঠিরঃ পুনঃ কর্ণমবিধ্যত্ত্রিংশতা শরৈঃ
সুষেণং সত্যসেনং চ ত্রিভিস্ত্রিভিরতাডয়ৎ
33.18
শল্যং নবত্যা বিব্যাধ ত্রিসপ্তত্যা চ সূতজম্
তাংশ্চাস্য গোপ্তৄন্বিব্যাধ ত্রিভিস্ত্রিভিরজিহ্মগৈঃ
33.19
ততঃ প্রহস্যাধিরথির্বিধুন্বানঃ স কার্মুকম্
ভিত্ত্বা ভল্লেন রাজানং বিদ্ধ্বা ষষ্ট্যানদন্মুদা
33.20
ততঃ প্রবীরাঃ পাণ্ডূনামভ্যধাবন্যুধিষ্ঠিরম্
সূতপুত্রাত্পরীপ্সন্তঃ কর্ণমভ্যর্দয়ঞ্শরৈঃ
33.21
সাত্যকিশ্চেকিতানশ্চ যুয়ুত্সুঃ পাণ্ড্য এব চ
ধৃষ্টদ্যুম্নঃ শিখণ্ডী চ দ্রৌপদেয়াঃ প্রভদ্রকাঃ
33.22
যমৌ চ ভীমসেনশ্চ শিশুপালস্য চাত্মজঃ
কারূষা মত্স্যশেষাশ্চ কেকয়াঃ কাশিকোসলাঃ
এতে চ ত্বরিতা বীরা বসুষেণমবারয়ন্
33.23
জনমেজয়শ্চ পাঞ্চাল্যঃ কর্ণং বিব্যাধ সায়কৈঃ
বরাহকর্ণৈর্নারাচৈর্নালীকৈর্নিশিতৈঃ শরৈঃ
বত্সদন্তৈর্বিপাঠৈশ্চ ক্ষুরপ্রৈশ্চটকামুখৈঃ
33.24
নানাপ্রহরণৈশ্চোগ্রৈ রথহস্ত্যশ্বসাদিনঃ
সর্বতোঽভ্যাদ্রবন্কর্ণং পরিবার্য জিঘাংসয়া
33.25
স পাণ্ডবানাং প্রবরৈঃ সর্বতঃ সমভিদ্রুতঃ
উদৈরয়দ্ব্রাহ্মমস্ত্রং শরৈঃ সংপূরয়ন্দিশঃ
33.26
ততঃ শরমহাজ্বালো বীর্যোষ্মা কর্ণপাবকঃ
নির্দহন্পাণ্ডববনং চারু পর্যচরদ্রণে
33.27
স সংবার্য মহাস্ত্রাণি মহেষ্বাসো মহাত্মনাম্
প্রহস্য পুরুষেন্দ্রস্য শরৈশ্চিচ্ছেদ কার্মুকম্
33.28
ততঃ সংধায় নবতিং নিমেষান্নতপর্বণাম্
বিভেদ কবচং রাজ্ঞো রণে কর্ণঃ শিতৈঃ শরৈঃ
33.29
তদ্বর্ম হেমবিকৃতং ররাজ নিপতত্তদা
সবিদ্যুদভ্রং সবিতুঃ শিষ্টং বাতহতং যথা
33.30
তদঙ্গং পুরুষেন্দ্রস্য ভ্রষ্টবর্ম ব্যরোচত
রত্নৈরলংকৃতং দিব্যৈর্ব্যভ্রং নিশি যথা নভঃ
33.31
স বিবর্মা শরৈঃ পার্থো রুধিরেণ সমুক্ষিতঃ
ক্রুদ্ধঃ সর্বায়সীং শক্তিং চিক্ষেপাধিরথিং প্রতি
33.32
তাং জ্বলন্তীমিবাকাশে শরৈশ্চিচ্ছেদ সপ্তভিঃ
সা ছিন্না ভূমিমপতন্মহেষ্বাসস্য সায়কৈঃ
33.33
ততো বাহ্বোর্ললাটে চ হৃদি চৈব যুধিষ্ঠিরঃ
চতুর্ভিস্তোমরৈঃ কর্ণং তাডয়িত্বা মুদানদৎ
33.34
উদ্ভিন্নরুধিরঃ কর্ণঃ ক্রুদ্ধঃ সর্প ইব শ্বসন্
ধ্বজং চিচ্ছেদ ভল্লেন ত্রিভির্বিব্যাধ পাণ্ডবম্
ইষুধী চাস্য চিচ্ছেদ রথং চ তিলশোঽচ্ছিনৎ
33.35
এবং পার্থো ব্যপায়াত্স নিহতপ্রার্ষ্টিসারথিঃ
অশক্নুবন্প্রমুখতঃ স্থাতুং কর্ণস্য দুর্মনাঃ
33.36
তমভিদ্রুত্য রাধেয়ঃ স্কন্ধং সংস্পৃশ্য পাণিনা
অব্রবীত্প্রহসন্রাজন্কুত্সয়ন্নিব পাণ্ডবম্
33.37
কথং নাম কুলে জাতঃ ক্ষত্রধর্মে ব্যবস্থিতঃ
প্রজহ্যাত্সমরে শত্রূন্প্রাণান্রক্ষন্মহাহবে
33.38
ন ভবান্ক্ষত্রধর্মেষু কুশলোঽসীতি মে মতিঃ
ব্রাহ্মে বলে ভবান্যুক্তঃ স্বাধ্যায়ে যজ্ঞকর্মণি
33.39
মা স্ম যুধ্যস্ব কৌন্তেয় মা চ বীরান্সমাসদঃ
মা চৈনানপ্রিয়ং ব্রূহি মা চ ব্রজ মহারণম্
33.40
এবমুক্ত্বা ততঃ পার্থং বিসৃজ্য চ মহাবলঃ
ন্যহনত্পাণ্ডবীং সেনাং বজ্রহস্ত ইবাসুরীম্
ততঃ প্রায়াদ্দ্রুতং রাজন্ব্রীডন্নিব জনেশ্বরঃ
33.41
অথ প্রয়ান্তং রাজানমন্বয়ুস্তে তদাচ্যুতম্
চেদিপাণ্ডবপাঞ্চালাঃ সাত্যকিশ্চ মহারথঃ
দ্রৌপদেয়াস্তথা শূরা মাদ্রীপুত্রৌ চ পাণ্ডবৌ
33.42
ততো যুধিষ্ঠিরানীকং দৃষ্ট্বা কর্ণঃ পরাঙ্মুখম্
কুরুভিঃ সহিতো বীরৈঃ পৃষ্ঠগৈঃ পৃষ্ঠমন্বয়াৎ
33.43
শঙ্খভেরীনিনাদৈশ্চ কার্মুকাণাং চ নিস্বনৈঃ
বভূব ধার্তরাষ্ট্রাণাং সিংহনাদরবস্তদা
33.44
যুধিষ্ঠিরস্তু কৌরব্য রথমারুহ্য সত্বরঃ
শ্রুতকীর্তের্মহারাজ দৃষ্টবান্কর্ণবিক্রমম্
33.45
কাল্যমানং বলং দৃষ্ট্বা ধর্মরাজো যুধিষ্ঠিরঃ
তান্যোধানব্রবীত্ক্রুদ্ধো হতৈনং বৈ সহস্রশঃ
33.46
ততো রাজ্ঞাভ্যনুজ্ঞাতাঃ পাণ্ডবানাং মহারথাঃ
ভীমসেনমুখাঃ সর্বে পুত্রাংস্তে প্রত্যুপাদ্রবন্
33.47
অভবত্তুমুলঃ শব্দো যোধানাং তত্র ভারত
হস্ত্যশ্বরথপত্তীনাং শস্ত্রাণাং চ ততস্ততঃ
33.48
উত্তিষ্ঠত প্রহরত প্রৈতাভিপততেতি চ
ইতি ব্রুবাণা অন্যোন্যং জঘ্নুর্যোধা রণাজিরে
33.49
অভ্রচ্ছায়েব তত্রাসীচ্ছরবৃষ্টিভিরম্বরে
সমাবৃত্তৈর্নরবরৈর্নিঘ্নদ্ভিরিতরেতরম্
33.50
বিপতাকাধ্বজচ্ছত্রা ব্যশ্বসূতায়ুধা রণে
ব্যঙ্গাঙ্গাবয়বাঃ পেতুঃ ক্ষিতৌ ক্ষীণা হতেশ্বরাঃ
33.51
প্রবরাণীব শৈলানাং শিখরাণি দ্বিপোত্তমাঃ
সারোহা নিহতাঃ পেতুর্বজ্রভিন্না ইবাদ্রয়ঃ
33.52
ছিন্নভিন্নবিপর্যস্তৈর্বর্মালংকারবিগ্রহৈঃ
সারোহাস্তুরগাঃ পেতুর্হতবীরাঃ সহস্রশঃ
33.53
বিপ্রবিদ্ধায়ুধাঙ্গাশ্চ দ্বিরদাশ্বরথৈর্হতাঃ
প্রতিবীরৈশ্চ সংমর্দে পত্তিসংঘাঃ সহস্রশঃ
33.54
বিশালায়ততাম্রাক্ষৈঃ পদ্মেন্দুসদৃশাননৈঃ
শিরোভির্যুদ্ধশৌণ্ডানাং সর্বতঃ সংস্তৃতা মহী
33.55
তথা তু বিততে ব্যোম্নি নিস্বনং শুশ্রুবুর্জনাঃ
বিমানৈরপ্সরঃসংঘৈর্গীতবাদিত্রনিস্বনৈঃ
33.56
হতান্কৃত্তানভিমুখান্বীরান্বীরৈঃ সহস্রশঃ
আরোপ্যারোপ্য গচ্ছন্তি বিমানেষ্বপ্সরোগণাঃ
33.57
তদ্দৃষ্ট্বা মহদাশ্চর্যং প্রত্যক্ষং স্বর্গলিপ্সয়া
প্রহৃষ্টমনসঃ শূরাঃ ক্ষিপ্রং জগ্মুঃ পরস্পরম্
33.58
রথিনো রথিভিঃ সার্ধং চিত্রং যুয়ুধুরাহবে
পত্তয়ঃ পত্তিভির্নাগা নাগৈঃ সহ হয়ৈর্হয়াঃ
33.59
এবং প্রবৃত্তে সংগ্রামে গজবাজিজনক্ষয়ে
সৈন্যে চ রজসা ব্যাপ্তে স্বে স্বাঞ্জঘ্নুঃ পরে পরান্
33.60
কচাকচি বভৌ যুদ্ধং দন্তাদন্তি নখানখি
মুষ্টিয়ুদ্ধং নিয়ুদ্ধং চ দেহপাপ্মবিনাশনম্
33.61
তথা বর্ততি সংগ্রামে গজবাজিজনক্ষয়ে
নরাশ্বগজদেহেভ্যঃ প্রসৃতা লোহিতাপগা
নরাশ্বগজদেহান্সা ব্যুবাহ পতিতান্বহূন্
33.62
নরাশ্বগজসংবাধে নরাশ্বগজসাদিনাম্
লোহিতোদা মহাঘোরা নদী লোহিতকর্দমা
নরাশ্বগজদেহান্সা বহন্তী ভীরুভীষণী
33.63
তস্যাঃ পরমপারং চ ব্রজন্তি বিজয়ৈষিণঃ
গাধেন চ প্লবন্তশ্চ নিমজ্জ্যোন্মজ্জ্য চাপরে
33.64
তে তু লোহিতদিগ্ধাঙ্গা রক্তবর্মায়ুধাম্বরাঃ
সস্নুস্তস্যাং পপুশ্চাসৃঙ্মম্লুশ্চ ভরতর্ষভ
33.65
রথানশ্বান্নরান্নাগানায়ুধাভরণানি চ
বসনান্যথ বর্মাণি হন্যমানান্হতানপি
ভূমিং খং দ্যাং দিশশ্চৈব প্রায়ঃ পশ্যাম লোহিতম্
33.66
লোহিতস্য তু গন্ধেন স্পর্শেন চ রসেন চ
রূপেণ চাতিরিক্তেন শব্দেন চ বিসর্পতা
বিষাদঃ সুমহানাসীত্প্রায়ঃ সৈন্যস্য ভারত
33.67
তত্তু বিপ্রহতং সৈন্যং ভীমসেনমুখৈস্তব
ভূয়ঃ সমাদ্রবন্বীরাঃ সাত্যকিপ্রমুখা রথাঃ
33.68
তেষামাপততাং বেগমবিষহ্য মহাত্মনাম্
পুত্রাণাং তে মহত্সৈন্যমাসীদ্রাজন্পরাঙ্মুখম্
33.69
তত্প্রকীর্ণরথাশ্বেভং নরবাজিসমাকুলম্
বিধ্বস্তচর্মকবচং প্রবিদ্ধায়ুধকার্মুকম্
33.70
ব্যদ্রবত্তাবকং সৈন্যং লোড্যমানং সমন্ততঃ
সিংহার্দিতং মহারণ্যে যথা গজকুলং তথা