Utshovঅধ্যায় 32
32.1
ধৃতরাষ্ট্র উবাচ
তথা ব্যূঢেষ্বনীকেষু সংসক্তেষু চ সংজয়
সংশপ্তকান্কথং পার্থো গতঃ কর্ণশ্চ পাণ্ডবান্
32.2
এতদ্বিস্তরতো যুদ্ধং প্রব্রূহি কুশলো হ্যসি
ন হি তৃপ্যামি বীরাণাং শৃণ্বানো বিক্রমান্রণে
32.3
সংজয় উবাচ
তত্স্থানে সমবস্থাপ্য প্রত্যমিত্রং মহাবলম্
অব্যূহতার্জুনো ব্যূহং পুত্রস্য তব দুর্নয়ে
32.4
তত্সাদিনাগকলিলং পদাতিরথসংকুলম্
ধৃষ্টদ্যুম্নমুখৈর্ব্যূঢমশোভত মহদ্বলম্
32.5
পারাবতসবর্ণাশ্বশ্চন্দ্রাদিত্যসমদ্যুতিঃ
পার্ষতঃ প্রবভৌ ধন্বী কালো বিগ্রহবানিব
32.6
পার্ষতং ত্বভি সংতস্থুর্দ্রৌপদেয়া যুয়ুত্সবঃ
সানুগা ভীমবপুষশ্চন্দ্রং তারাগণা ইব
32.7
অথ ব্যূঢেষ্বনীকেষু প্রেক্ষ্য সংশপ্তকান্রণে
ক্রুদ্ধোঽর্জুনোঽভিদুদ্রাব ব্যাক্ষিপন্গাণ্ডিবং ধনুঃ
32.8
অথ সংশপ্তকাঃ পার্থমভ্যধাবন্বধৈষিণঃ
বিজয়ে কৃতসংকল্পা মৃত্যুং কৃত্বা নিবর্তনম্
32.9
তদশ্বসংঘবহুলং মত্তনাগরথাকুলম্
পত্তিমচ্ছূরবীরৌঘৈর্দ্রুতমর্জুনমাদ্রবৎ
32.10
স সংপ্রহারস্তুমুলস্তেষামাসীত্কিরীটিনা
তস্যৈব নঃ শ্রুতো যাদৃঙ্নিবাতকবচৈঃ সহ
32.11
রথানশ্বান্ধ্বজান্নাগান্পত্তীন্রথপতীনপি
ইষূন্ধনূংষি খড্গাংশ্চ চক্রাণি চ পরশ্বধান্
32.12
সায়ুধানুদ্যতান্বাহূনুদ্যতান্যায়ুধানি চ
চিচ্ছেদ দ্বিষতাং পার্থঃ শিরাংসি চ সহস্রশঃ
32.13
তস্মিন্সৈন্যে মহাবর্তে পাতালাবর্তসংনিভে
নিমগ্নং তং রথং মত্বা নেদুঃ সংশপ্তকা মুদা
32.14
স পুরস্তাদরীন্হত্বা পশ্চার্ধেনোত্তরেণ চ
দক্ষিণেন চ বীভত্সুঃ ক্রুদ্ধো রুদ্রঃ পশূনিব
32.15
অথ পাঞ্চালচেদীনাং সৃঞ্জয়ানাং চ মারিষ
ত্বদীয়ৈঃ সহ সংগ্রাম আসীত্পরমদারুণঃ
32.16
কৃপশ্চ কৃতবর্মা চ শকুনিশ্চাপি সৌবলঃ
হৃষ্টসেনাঃ সুসংরব্ধা রথানীকৈঃ প্রহারিণঃ
32.17
কোসলৈঃ কাশিমত্স্যৈশ্চ কারূষৈঃ কেকয়ৈরপি
শূরসেনৈঃ শূরবীরৈর্যুয়ুধুর্যুদ্ধদুর্মদাঃ
32.18
তেষামন্তকরং যুদ্ধং দেহপাপ্মপ্রণাশনম্
শূদ্রবিট্ক্ষত্রবীরাণাং ধর্ম্যং স্বর্গ্যং যশস্করম্
32.19
দুর্যোধনোঽপি সহিতো ভ্রাতৃভির্ভরতর্ষভ
গুপ্তঃ কুরুপ্রবীরৈশ্চ মদ্রাণাং চ মহারথৈঃ
32.20
পাণ্ডবৈঃ সহপাঞ্চালৈশ্চেদিভিঃ সাত্যকেন চ
যুধ্যমানং রণে কর্ণং কুরুবীরোঽভ্যপালয়ৎ
32.21
কর্ণোঽপি নিশিতৈর্বাণৈর্বিনিহত্য মহাচমূম্
প্রমৃদ্য চ রথশ্রেষ্ঠান্যুধিষ্ঠিরমপীডয়ৎ
32.22
বিপত্রায়ুধদেহাসূন্কৃত্বা শত্রূন্সহস্রশঃ
যুক্ত্বা স্বর্গয়শোভ্যাং চ স্বেভ্যো মুদমুদাবহৎ
32.23
ধৃতরাষ্ট্র উবাচ
যত্তত্প্রবিশ্য পার্থানাং সেনাং কুর্বঞ্জনক্ষয়ম্
কর্ণো রাজানমভ্যর্চ্ছত্তন্মমাচক্ষ্ব সংজয়
32.24
কে চ প্রবীরাঃ পার্থানাং যুধি কর্ণমবারয়ন্
কাংশ্চ প্রমথ্যাধিরথির্যুধিষ্ঠিরমপীডয়ৎ
32.25
সংজয় উবাচ
ধৃষ্টদ্যুম্নমুখান্পার্থান্দৃষ্ট্বা কর্ণো ব্যবস্থিতান্
সমভ্যধাবত্ত্বরিতঃ পাঞ্চালাঞ্শত্রুকর্শনঃ
32.26
তং তূর্ণমভিধাবন্তং পাঞ্চালা জিতকাশিনঃ
প্রত্যুদ্যয়ুর্মহারাজ হংসা ইব মহার্ণবম্
32.27
ততঃ শঙ্খসহস্রাণাং নিস্বনো হৃদয়ংগমঃ
প্রাদুরাসীদুভয়তো ভেরীশব্দশ্চ দারুণঃ
32.28
নানাবাদিত্রনাদশ্চ দ্বিপাশ্বরথনিস্বনঃ
সিংহনাদশ্চ বীরাণামভবদ্দারুণস্তদা
32.29
সাদ্রিদ্রুমার্ণবা ভূমিঃ সবাতাম্বুদমম্বরম্
সার্কেন্দুগ্রহনক্ষত্রা দ্যৌশ্চ ব্যক্তং ব্যঘূর্ণত
32.30
অতি ভূতানি তং শব্দং মেনিরেঽতি চ বিব্যথুঃ
যানি চাপ্লবসত্ত্বানি প্রায়স্তানি মৃতানি চ
32.31
অথ কর্ণো ভৃশং ক্রুদ্ধঃ শীঘ্রমস্ত্রমুদীরয়ন্
জঘান পাণ্ডবীং সেনামাসুরীং মঘবানিব
32.32
স পাণ্ডবরথাংস্তূর্ণং প্রবিশ্য বিসৃজঞ্শরান্
প্রভদ্রকাণাং প্রবরানহনত্সপ্তসপ্ততিম্
32.33
ততঃ সুপুঙ্খৈর্নিশিতৈ রথশ্রেষ্ঠো রথেষুভিঃ
অবধীত্পঞ্চবিংশত্যা পাঞ্চালান্পঞ্চবিংশতিম্
32.34
সুবর্ণপুঙ্খৈর্নারাচৈঃ পরকায়বিদারণৈঃ
চেদিকানবধীদ্বীরঃ শতশোঽথ সহস্রশঃ
32.35
তং তথা সমরে কর্ম কুর্বাণমতিমানুষম্
পরিবব্রুর্মহারাজ পাঞ্চালানাং রথব্রজাঃ
32.36
ততঃ সংধায় বিশিখান্পঞ্চ ভারত দুঃসহান্
পাঞ্চালানবধীত্পঞ্চ কর্ণো বৈকর্তনো বৃষঃ
32.37
ভানুদেবং চিত্রসেনং সেনাবিন্দুং চ ভারত
তপনং শূরসেনং চ পাঞ্চালানবধীদ্রণে
32.38
পাঞ্চালেষু চ শূরেষু বধ্যমানেষু সায়কৈঃ
হাহাকারো মহানাসীত্পাঞ্চালানাং মহাহবে
32.39
তেষাং সংকীর্যমাণানাং হাহাকারকৃতা দিশঃ
পুনরেব চ তান্কর্ণো জঘানাশু পতত্রিভিঃ
32.40
চক্ররক্ষৌ তু কর্ণস্য পুত্রৌ মারিষ দুর্জয়ৌ
সুষেণঃ সত্যসেনশ্চ ত্যক্ত্বা প্রাণানয়ুধ্যতাম্
32.41
পৃষ্ঠগোপস্তু কর্ণস্য জ্যেষ্ঠঃ পুত্রো মহারথঃ
বৃষসেনঃ স্বয়ং কর্ণং পৃষ্ঠতঃ পর্যপালয়ৎ
32.42
ধৃষ্টদ্যুম্নঃ সাত্যকিশ্চ দ্রৌপদেয়া বৃকোদরঃ
জনমেজয়ঃ শিখণ্ডী চ প্রবীরাশ্চ প্রভদ্রকাঃ
32.43
চেদিকেকয়পাঞ্চালা যমৌ মত্স্যাশ্চ দংশিতাঃ
সমভ্যধাবন্রাধেয়ং জিঘাংসন্তঃ প্রহারিণঃ
32.44
ত এনং বিবিধৈঃ শস্ত্রৈঃ শরধারাভিরেব চ
অভ্যবর্ষন্বিমৃদ্নন্তঃ প্রাবৃষীবাম্বুদা গিরিম্
32.45
পিতরং তু পরীপ্সন্তঃ কর্ণপুত্রাঃ প্রহারিণঃ
ত্বদীয়াশ্চাপরে রাজন্বীরা বীরানবারয়ন্
32.46
সুষেণো ভীমসেনস্য ছিত্ত্বা ভল্লেন কার্মুকম্
নারাচৈঃ সপ্তভির্বিদ্ধ্বা হৃদি ভীমং ননাদ হ
32.47
অথান্যদ্ধনুরাদায় সুদৃঢং ভীমবিক্রমঃ
সজ্যং বৃকোদরঃ কৃত্বা সুষেণস্যাচ্ছিনদ্ধনুঃ
32.48
বিব্যাধ চৈনং নবভিঃ ক্রুদ্ধো নৃত্যন্নিবেষুভিঃ
কর্ণং চ তূর্ণং বিব্যাধ ত্রিসপ্তত্যা শিতৈঃ শরৈঃ
32.49
সত্যসেনং চ দশভিঃ সাশ্বসূতধ্বজায়ুধম্
পশ্যতাং সুহৃদাং মধ্যে কর্ণপুত্রমপাতয়ৎ
32.50
ক্ষুরপ্রণুন্নং তত্তস্য শিরশ্চন্দ্রনিভাননম্
শুভদর্শনমেবাসীন্নালভ্রষ্টমিবাম্বুজম্
32.51
হত্বা কর্ণসুতং ভীমস্তাবকান্পুনরার্দয়ৎ
কৃপহার্দিক্যয়োশ্ছিত্ত্বা চাপে তাবপ্যথার্দয়ৎ
32.52
দুঃশাসনং ত্রিভির্বিদ্ধ্বা শকুনিং ষড্ভিরায়সৈঃ
উলূকং চ পতত্রিং চ চকার বিরথাবুভৌ
32.53
হে সুষেণ হতোঽসীতি ব্রুবন্নাদত্ত সায়কম্
তমস্য কর্ণশ্চিচ্ছেদ ত্রিভিশ্চৈনমতাডয়ৎ
32.54
অথান্যমপি জগ্রাহ সুপর্বাণং সুতেজনম্
সুষেণায়াসৃজদ্ভীমস্তমপ্যস্যাচ্ছিনদ্বৃষঃ
32.55
পুনঃ কর্ণস্ত্রিসপ্তত্যা ভীমসেনং রথেষুভিঃ
পুত্রং পরীপ্সন্বিব্যাধ ক্রূরং ক্রূরৈর্জিঘাংসয়া
32.56
সুষেণস্তু ধনুর্গৃহ্য ভারসাধনমুত্তমম্
নকুলং পঞ্চভির্বাণৈর্বাহ্বোরুরসি চার্দয়ৎ
32.57
নকুলস্তং তু বিংশত্যা বিদ্ধ্বা ভারসহৈর্দৃঢৈঃ
ননাদ বলবন্নাদং কর্ণস্য ভয়মাদধৎ
32.58
তং সুষেণো মহারাজ বিদ্ধ্বা দশভিরাশুগৈঃ
চিচ্ছেদ চ ধনুঃ শীঘ্রং ক্ষুরপ্রেণ মহারথঃ
32.59
অথান্যদ্ধনুরাদায় নকুলঃ ক্রোধমূর্চ্ছিতঃ
সুষেণং বহুভির্বাণৈর্বারয়ামাস সংয়ুগে
32.60
স তু বাণৈর্দিশো রাজন্নাচ্ছাদ্য পরবীরহা
আজঘ্নে সারথিং চাস্য সুষেণং চ ততস্ত্রিভিঃ
চিচ্ছেদ চাস্য সুদৃঢং ধনুর্ভল্লৈস্ত্রিভিস্ত্রিধা
32.61
অথান্যদ্ধনুরাদায় সুষেণঃ ক্রোধমূর্ছিতঃ
অবিধ্যন্নকুলং ষষ্ট্যা সহদেবং চ সপ্তভিঃ
32.62
তদ্যুদ্ধং সুমহদ্ঘোরমাসীদ্দেবাসুরোপমম্
নিঘ্নতাং সায়কৈস্তূর্ণমন্যোন্যস্য বধং প্রতি
32.63
সাত্যকির্বৃষসেনস্য হত্বা সূতং ত্রিভিঃ শরৈঃ
ধনুশ্চিচ্ছেদ ভল্লেন জঘানাশ্বাংশ্চ সপ্তভিঃ
ধ্বজমেকেষুণোন্মথ্য ত্রিভিস্তং হৃদ্যতাডয়ৎ
32.64
অথাবসন্নঃ স্বরথে মুহূর্তাত্পুনরুত্থিতঃ
অথো জিঘাংসুঃ শৈনেয়ং খড্গচর্মভৃদভ্যয়াৎ
32.65
তস্য চাপ্লবতঃ শীঘ্রং বৃষসেনস্য সাত্যকিঃ
বরাহকর্ণৈর্দশভিরবিধ্যদসিচর্মণী
32.66
দুঃশাসনস্তু তং দৃষ্ট্বা বিরথং ব্যায়ুধং কৃতম্
আরোপ্য স্বরথে তূর্ণমপোবাহ রথান্তরম্
32.67
অথান্যং রথমাস্থায় বৃষসেনো মহারথঃ
কর্ণস্য যুধি দুর্ধর্ষঃ পুনঃ পৃষ্ঠমপালয়ৎ
32.68
দুঃশাসনং তু শৈনেয়ো নবৈর্নবভিরাশুগৈঃ
বিসূতাশ্বরথং কৃত্বা ললাটে ত্রিভিরার্পয়ৎ
32.69
স ত্বন্যং রথমাস্থায় বিধিবত্কল্পিতং পুনঃ
যুয়ুধে পাণ্ডুভিঃ সার্ধং কর্ণস্যাপ্যায়য়ন্বলম্
32.70
ধৃষ্টদ্যুম্নস্ততঃ কর্ণমবিধ্যদ্দশভিঃ শরৈঃ
দ্রৌপদেয়াস্ত্রিসপ্তত্যা যুয়ুধানস্তু সপ্তভিঃ
32.71
ভীমসেনশ্চতুঃষষ্ট্যা সহদেবশ্চ পঞ্চভিঃ
নকুলস্ত্রিংশতা বাণৈঃ শতানীকশ্চ সপ্তভিঃ
শিখণ্ডী দশভির্বীরো ধর্মরাজঃ শতেন তু
32.72
এতে চান্যে চ রাজেন্দ্র প্রবীরা জয়গৃদ্ধিনঃ
অভ্যর্দয়ন্মহেষ্বাসং সূতপুত্রং মহামৃধে
32.73
তান্সূতপুত্রো বিশিখৈর্দশভির্দশভিঃ শিতৈঃ
রথে চারু চরন্বীরঃ প্রত্যবিধ্যদরিংদমঃ
32.74
তত্রাস্ত্রবীর্যং কর্ণস্য লাঘবং চ মহাত্মনঃ
অপশ্যাম মহারাজ তদদ্ভুতমিবাভবৎ
32.75
ন হ্যাদদানং দদৃশুঃ সংদধানং চ সায়কান্
বিমুঞ্চন্তং চ সংরম্ভাদ্দদৃশুস্তে মহারথম্
32.76
দ্যৌর্বিয়দ্ভূর্দিশশ্চাশু প্রণুন্না নিশিতৈঃ শরৈঃ
অরুণাভ্রাবৃতাকারং তস্মিন্দেশে বভৌ বিয়ৎ
32.77
নৃত্যন্নিব হি রাধেয়শ্চাপহস্তঃ প্রতাপবান্
যৈর্বিদ্ধঃ প্রত্যবিধ্যত্তানেকৈকং ত্রিগুণৈঃ শরৈঃ
32.78
দশভির্দশভিশ্চৈনান্পুনর্বিদ্ধ্বা ননাদ হ
সাশ্বসূতধ্বজচ্ছত্রাস্ততস্তে বিবরং দদুঃ
32.79
তান্প্রমৃদ্নন্মহেষ্বাসান্রাধেয়ঃ শরবৃষ্টিভিঃ
রাজানীকমসংবাধং প্রাবিশচ্ছত্রুকর্শনঃ
32.80
স রথাংস্ত্রিশতান্হত্বা চেদীনামনিবর্তিনাম্
রাধেয়ো নিশিতৈর্বাণৈস্ততোঽভ্যার্চ্ছদ্যুধিষ্ঠিরম্
32.81
ততস্তে পাণ্ডবা রাজঞ্শিখণ্ডী চ সসাত্যকিঃ
রাধেয়াত্পরিরক্ষন্তো রাজানং পর্যবারয়ন্
32.82
তথৈব তাবকাঃ সর্বে কর্ণং দুর্বারণং রণে
যত্তাঃ সেনামহেষ্বাসাঃ পর্যরক্ষন্ত সর্বশঃ
32.83
নানাবাদিত্রঘোষাশ্চ প্রাদুরাসন্বিশাং পতে
সিংহনাদশ্চ সংজজ্ঞে শূরাণামনিবর্তিনাম্
32.84
ততঃ পুনঃ সমাজগ্মুরভীতাঃ কুরুপাণ্ডবাঃ
যুধিষ্ঠিরমুখাঃ পার্থাঃ সূতপুত্রমুখা বয়ম্