Utshovঅধ্যায় 31
31.1
সংজয় উবাচ
ততঃ পরানীকভিদং ব্যূহমপ্রতিমং পরৈঃ
সমীক্ষ্য কর্ণঃ পার্থানাং ধৃষ্টদ্যুম্নাভিরক্ষিতম্
31.2
প্রয়য়ৌ রথঘোষেণ সিংহনাদরবেণ চ
বাদিত্রাণাং চ নিনদৈঃ কম্পয়ন্নিব মেদিনীম্
31.3
বেপমান ইব ক্রোধাদ্যুদ্ধশৌণ্ডঃ পরংতপঃ
প্রতিব্যূহ্য মহাতেজা যথাবদ্ভরতর্ষভ
31.4
ব্যধমত্পাণ্ডবীং সেনামাসুরীং মঘবানিব
যুধিষ্ঠিরং চাভিভবন্নপসব্যং চকার হ
31.5
ধৃতরাষ্ট্র উবাচ
কথং সংজয় রাধেয়ঃ প্রত্যব্যূহত পাণ্ডবান্
ধৃষ্টদ্যুম্নমুখান্বীরান্ভীমসেনাভিরক্ষিতান্
31.6
কে চ প্রপক্ষৌ পক্ষৌ বা মম সৈন্যস্য সংজয়
প্রবিভজ্য যথান্যায়ং কথং বা সমবস্থিতাঃ
31.7
কথং পাণ্ডুসুতাশ্চাপি প্রত্যব্যূহন্ত মামকান্
কথং চৈতন্মহায়ুদ্ধং প্রাবর্তত সুদারুণম্
31.8
ক্ব চ বীভত্সুরভবদ্যত্কর্ণোঽয়াদ্যুধিষ্ঠিরম্
কো হ্যর্জুনস্য সাংনিধ্যে শক্তোঽভ্যেতুং যুধিষ্ঠিরম্
31.9
সর্বভূতানি যো হ্যেকঃ খাণ্ডবে জিতবান্পুরা
কস্তমন্যত্র রাধেয়াত্প্রতিয়ুধ্যেজ্জিজীবিষুঃ
31.10
সংজয় উবাচ
শৃণু ব্যূহস্য রচনামর্জুনশ্চ যথা গতঃ
পরিদায় নৃপং তেভ্যঃ সংগ্রামশ্চাভবদ্যথা
31.11
কৃপঃ শারদ্বতো রাজন্মাগধশ্চ তরস্বিনঃ
সাত্বতঃ কৃতবর্মা চ দক্ষিণং পক্ষমাশ্রিতাঃ
31.12
তেষাং প্রপক্ষে শকুনিরুলূকশ্চ মহারথঃ
সাদিভির্বিমলপ্রাসৈস্তবানীকমরক্ষতাম্
31.13
গান্ধারিভিরসংভ্রান্তৈঃ পার্বতীয়ৈশ্চ দুর্জয়ৈঃ
শলভানামিব ব্রাতৈঃ পিশাচৈরিব দুর্দৃশৈঃ
31.14
চতুস্ত্রিংশত্সহস্রাণি রথানামনিবর্তিনাম্
সংশপ্তকা যুদ্ধশৌণ্ডা বামং পার্শ্বমপালয়ন্
31.15
সমুচ্চিতাস্তব সুতৈঃ কৃষ্ণার্জুনজিঘাংসবঃ
তেষাং প্রপক্ষঃ কাম্বোজাঃ শকাশ্চ যবনৈঃ সহ
31.16
নিদেশাত্সূতপুত্রস্য সরথাঃ সাশ্বপত্তয়ঃ
আহ্বয়ন্তোঽর্জুনং তস্থুঃ কেশবং চ মহাবলম্
31.17
মধ্যেসেনামুখং কর্ণো ব্যবাতিষ্ঠত দংশিতঃ
চিত্রবর্মাঙ্গদঃ স্রগ্বী পালয়ন্ধ্বজিনীমুখম্
31.18
রক্ষ্যমাণঃ সুসংরব্ধৈঃ পুত্রৈঃ শস্ত্রভৃতাং বরঃ
বাহিনীপ্রমুখং বীরঃ সংপ্রকর্ষন্নশোভত
31.19
অয়োরত্নির্মহাবাহুঃ সূর্যবৈশ্বানরদ্যুতিঃ
মহাদ্বিপস্কন্ধগতঃ পিঙ্গলঃ প্রিয়দর্শনঃ
দুঃশাসনো বৃতঃ সৈন্যৈঃ স্থিতো ব্যূহস্য পৃষ্ঠতঃ
31.20
তমন্বয়ান্মহারাজ স্বয়ং দুর্যোধনো নৃপঃ
চিত্রাশ্বৈশ্চিত্রসংনাহৈঃ সোদর্যৈরভিরক্ষিতঃ
31.21
রক্ষ্যমাণো মহাবীর্যৈঃ সহিতৈর্মদ্রকেকয়ৈঃ
অশোভত মহারাজ দেবৈরিব শতক্রতুঃ
31.22
অশ্বত্থামা কুরূণাং চ যে প্রবীরা মহারথাঃ
নিত্যমত্তাশ্চ মাতঙ্গাঃ শূরৈর্ম্লেচ্ছৈরধিষ্ঠিতাঃ
অন্বয়ুস্তদ্রথানীকং ক্ষরন্ত ইব তোয়দাঃ
31.23
তে ধ্বজৈর্বৈজয়ন্তীভির্জ্বলদ্ভিঃ পরমায়ুধৈঃ
সাদিভিশ্চাস্থিতা রেজুর্দ্রুমবন্ত ইবাচলাঃ
31.24
তেষাং পদাতিনাগানাং পাদরক্ষাঃ সহস্রশঃ
পট্টিশাসিধরাঃ শূরা বভূবুরনিবর্তিনঃ
31.25
সাদিভিঃ স্যন্দনৈর্নাগৈরধিকং সমলংকৃতৈঃ
স ব্যূহরাজো বিবভৌ দেবাসুরচমূপমঃ
31.26
বার্হস্পত্যঃ সুবিহিতো নায়কেন বিপশ্চিতা
নৃত্যতীব মহাব্যূহঃ পরেষামাদধদ্ভয়ম্
31.27
তস্য পক্ষপ্রপক্ষেভ্যো নিষ্পতন্তি যুয়ুত্সবঃ
পত্ত্যশ্বরথমাতঙ্গাঃ প্রাবৃষীব বলাহকাঃ
31.28
ততঃ সেনামুখে কর্ণং দৃষ্ট্বা রাজা যুধিষ্ঠিরঃ
ধনংজয়মমিত্রঘ্নমেকবীরমুবাচ হ
31.29
পশ্যার্জুন মহাব্যূহং কর্ণেন বিহিতং রণে
যুক্তং পক্ষৈঃ প্রপক্ষৈশ্চ সেনানীকং প্রকাশতে
31.30
তদেতদ্বৈ সমালোক্য প্রত্যমিত্রং মহদ্বলম্
যথা নাভিভবত্যস্মাংস্তথা নীতির্বিধীয়তাম্
31.31
এবমুক্তোঽর্জুনো রাজ্ঞা প্রাঞ্জলির্নৃপমব্রবীৎ
যথা ভবানাহ তথা তত্সর্বং ন তদন্যথা
31.32
যস্ত্বস্য বিহিতো ঘাতস্তং করিষ্যামি ভারত
প্রধানবধ এবাস্য বিনাশস্তং করোম্যহম্
31.33
যুধিষ্ঠির উবাচ
তস্মাত্ত্বমেব রাধেয়ং ভীমসেনঃ সুয়োধনম্
বৃষসেনং চ নকুলঃ সহদেবোঽপি সৌবলম্
31.34
দুঃশাসনং শতানীকো হার্দিক্যং শিনিপুংগবঃ
ধৃষ্টদ্যুম্নস্তথা দ্রৌণিং স্বয়ং যাস্যাম্যহং কৃপম্
31.35
দ্রৌপদেয়া ধার্তরাষ্ট্রাঞ্শিষ্টান্সহ শিখণ্ডিনা
তে তে চ তাংস্তানহিতানস্মাকং ঘ্নন্তু মামকাঃ
31.36
সংজয় উবাচ
ইত্যুক্তো ধর্মরাজেন তথেত্যুক্ত্বা ধনংজয়ঃ
ব্যাদিদেশ স্বসৈন্যানি স্বয়ং চাগাচ্চমূমুখম্
31.37
অথ তং রথমায়ান্তং দৃষ্ট্বাত্যদ্ভুতদর্শনম্
উবাচাধিরথিং শল্যঃ পুনস্তং যুদ্ধদুর্মদম্
31.38
অয়ং স রথ আয়াতি শ্বেতাশ্বঃ কৃষ্ণসারথিঃ
নিঘ্নন্নমিত্রান্কৌন্তেয়ো যং যং ত্বং পরিপৃচ্ছসি
31.39
শ্রূয়তে তুমুলঃ শব্দো রথনেমিস্বনো মহান্
এষ রেণুঃ সমুদ্ভূতো দিবমাবৃত্য তিষ্ঠতি
31.40
চক্রনেমিপ্রণুন্না চ কম্পতে কর্ণ মেদিনী
প্রবাত্যেষ মহাবায়ুরভিতস্তব বাহিনীম্
ক্রব্যাদা ব্যাহরন্ত্যেতে মৃগাঃ কুর্বন্তি ভৈরবম্
31.41
পশ্য কর্ণ মহাঘোরং ভয়দং লোমহর্ষণম্
কবন্ধং মেঘসংকাশং ভানুমাবৃত্য সংস্থিতম্
31.42
পশ্য যূথৈর্বহুবিধৈর্মৃগাণাং সর্বতোদিশম্
বলিভির্দৃপ্তশার্দূলৈরাদিত্যোঽভিনিরীক্ষ্যতে
31.43
পশ্য কঙ্কাংশ্চ গৃধ্রাংশ্চ সমবেতান্সহস্রশঃ
স্থিতানভিমুখান্ঘোরানন্যোন্যমভিভাষতঃ
31.44
সিতাশ্চাশ্বাঃ সমায়ুক্তাস্তব কর্ণ মহারথে
প্রদরাঃ প্রজ্বলন্ত্যেতে ধ্বজশ্চৈব প্রকম্পতে
31.45
উদীর্যতো হয়ান্পশ্য মহাকায়ান্মহাজবান্
প্লবমানান্দর্শনীয়ানাকাশে গরুডানিব
31.46
ধ্রুবমেষু নিমিত্তেষু ভূমিমাবৃত্য পার্থিবাঃ
স্বপ্স্যন্তি নিহতাঃ কর্ণ শতশোঽথ সহস্রশঃ
31.47
শঙ্খানাং তুমুলঃ শব্দঃ শ্রূয়তে লোমহর্ষণঃ
আনকানাং চ রাধেয় মৃদঙ্গানাং চ সর্বশঃ
31.48
বাণশব্দান্বহুবিধান্নরাশ্বরথনিস্বনান্
জ্যাতলত্রেষুশব্দাংশ্চ শৃণু কর্ণ মহাত্মনাম্
31.49
হেমরূপ্যপ্রমৃষ্টানাং বাসসাং শিল্পিনির্মিতাঃ
নানাবর্ণা রথে ভান্তি শ্বসনেন প্রকম্পিতাঃ
31.50
সহেমচন্দ্রতারার্কাঃ পতাকাঃ কিঙ্কিণীয়ুতাঃ
পশ্য কর্ণার্জুনস্যৈতাঃ সৌদামিন্য ইবাম্বুদে
31.51
ধ্বজাঃ কণকণায়ন্তে বাতেনাভিসমীরিতাঃ
সপতাকা রথাশ্চাপি পাঞ্চালানাং মহাত্মনাম্
31.52
নাগাশ্বরথপত্ত্যৌঘাংস্তাবকান্সমভিঘ্নতঃ
ধ্বজাগ্রং দৃশ্যতে ত্বস্য জ্যাশব্দশ্চাপি শ্রূয়তে
31.53
অদ্য দ্রষ্টাসি তং বীরং শ্বেতাশ্বং কৃষ্ণসারথিম্
নিঘ্নন্তং শাত্রবান্সংখ্যে যং কর্ণ পরিপৃচ্ছসি
31.54
অদ্য তৌ পুরুষব্যাঘ্রৌ লোহিতাক্ষৌ পরংতপৌ
বাসুদেবার্জুনৌ কর্ণ দ্রষ্টাস্যেকরথস্থিতৌ
31.55
সারথির্যস্য বার্ষ্ণেয়ো গাণ্ডীবং যস্য কার্মুকম্
তং চেদ্ধন্তাসি রাধেয় ত্বং নো রাজা ভবিষ্যসি
31.56
এষ সংশপ্তকাহূতস্তানেবাভিমুখো গতঃ
করোতি কদনং চৈষাং সংগ্রামে দ্বিষতাং বলী
ইতি ব্রুবাণং মদ্রেশং কর্ণঃ প্রাহাতিমন্যুমান্
31.57
পশ্য সংশপ্তকৈঃ ক্রুদ্ধৈঃ সর্বতঃ সমভিদ্রুতঃ
এষ সূর্য ইবাম্ভোদৈশ্ছন্নঃ পার্থো ন দৃশ্যতে
এতদন্তোঽর্জুনঃ শল্য নিমগ্নঃ শোকসাগরে
31.58
শল্য উবাচ
বরুণং কোঽম্ভসা হন্যাদিন্ধনেন চ পাবকম্
কো বানিলং নিগৃহ্ণীয়াত্পিবেদ্বা কো মহার্ণবম্
31.59
ঈদৃগ্রূপমহং মন্যে পার্থস্য যুধি নিগ্রহম্
ন হি শক্যোঽর্জুনো জেতুং সেন্দ্রৈঃ সর্বৈঃ সুরাসুরৈঃ
31.60
অথৈবং পরিতোষস্তে বাচোক্ত্বা সুমনা ভব
ন স শক্যো যুধা জেতুমন্যং কুরু মনোরথম্
31.61
বাহুভ্যামুদ্ধরেদ্ভূমিং দহেত্ক্রুদ্ধ ইমাঃ প্রজাঃ
পাতয়েত্ত্রিদিবাদ্দেবান্যোঽর্জুনং সমরে জয়েৎ
31.62
পশ্য কুন্তীসুতং বীরং ভীমমক্লিষ্টকারিণম্
প্রভাসন্তং মহাবাহুং স্থিতং মেরুমিবাচলম্
31.63
অমর্ষী নিত্যসংরব্ধশ্চিরং বৈরমনুস্মরন্
এষ ভীমো জয়প্রেপ্সুর্যুধি তিষ্ঠতি বীর্যবান্
31.64
এষ ধর্মভৃতাং শ্রেষ্ঠো ধর্মরাজো যুধিষ্ঠিরঃ
তিষ্ঠত্যসুকরঃ সংখ্যে পরৈঃ পরপুরংজয়ঃ
31.65
এতৌ চ পুরুষব্যাঘ্রাবশ্বিনাবিব সোদরৌ
নকুলঃ সহদেবশ্চ তিষ্ঠতো যুধি দুর্জয়ৌ
31.66
দৃশ্যন্ত এতে কার্ষ্ণেয়াঃ পঞ্চ পঞ্চাচলা ইব
ব্যবস্থিতা যোত্স্যমানাঃ সর্বেঽর্জুনসমা যুধি
31.67
এতে দ্রুপদপুত্রাশ্চ ধৃষ্টদ্যুম্নপুরোগমাঃ
হীনাঃ সত্যজিতা বীরাস্তিষ্ঠন্তি পরমৌজসঃ
31.68
ইতি সংবদতোরেব তয়োঃ পুরুষসিংহয়োঃ
তে সেনে সমসজ্জেতাং গঙ্গায়মুনবদ্ভৃশম্