Utshovঅধ্যায় 30
30.1
সংজয় উবাচ
ততঃ পুনর্মহারাজ মদ্ররাজমরিংদমম্
অভ্যভাষত রাধেয়ঃ সংনিবার্যোত্তরং বচঃ
30.2
যত্ত্বং নিদর্শনার্থং মাং শল্য জল্পিতবানসি
নাহং শক্যস্ত্বয়া বাচা বিভীষয়িতুমাহবে
30.3
যদি মাং দেবতাঃ সর্বা যোধয়েয়ুঃ সবাসবাঃ
তথাপি মে ভয়ং ন স্যাত্কিমু পার্থাত্সকেশবাৎ
30.4
নাহং ভীষয়িতুং শক্যো বাঙ্মাত্রেণ কথংচন
অন্যং জানীহি যঃ শক্যস্ত্বয়া ভীষয়িতুং রণে
30.5
নীচস্য বলমেতাবত্পারুষ্যং যত্ত্বমাত্থ মাম্
অশক্তোঽস্মদ্গুণান্প্রাপ্তুং বল্গসে বহু দুর্মতে
30.6
ন হি কর্ণঃ সমুদ্ভূতো ভয়ার্থমিহ মারিষ
বিক্রমার্থমহং জাতো যশোর্থং চ তথৈব চ
30.7
ইদং তু মে ত্বমেকাগ্রঃ শৃণু মদ্রজনাধিপ
সংনিধৌ ধৃতরাষ্ট্রস্য প্রোচ্যমানং ময়া শ্রুতম্
30.8
দেশাংশ্চ বিবিধাংশ্চিত্রান্পূর্ববৃত্তাংশ্চ পার্থিবান্
ব্রাহ্মণাঃ কথয়ন্তঃ স্ম ধৃতরাষ্ট্রমুপাসতে
30.9
তত্র বৃদ্ধঃ পুরাবৃত্তাঃ কথাঃ কাশ্চিদ্দ্বিজোত্তমঃ
বাহ্লীকদেশং মদ্রাংশ্চ কুত্সয়ন্বাক্যমব্রবীৎ
30.10
বহিষ্কৃতা হিমবতা গঙ্গয়া চ তিরস্কৃতাঃ
সরস্বত্যা যমুনয়া কুরুক্ষেত্রেণ চাপি যে
30.11
পঞ্চানাং সিন্ধুষষ্ঠানাং নদীনাং যেঽন্তরাশ্রিতাঃ
তান্ধর্মবাহ্যানশুচীন্বাহ্লীকান্পরিবর্জয়েৎ
30.12
গোবর্ধনো নাম বটঃ সুভাণ্ডং নাম চত্বরম্
এতদ্রাজকুলদ্বারমাকুমারঃ স্মরাম্যহম্
30.13
কার্যেণাত্যর্থগাঢেন বাহ্লীকেষূষিতং ময়া
তত এষাং সমাচারঃ সংবাসাদ্বিদিতো মম
30.14
শাকলং নাম নগরমাপগা নাম নিম্নগা
জর্তিকা নাম বাহ্লীকাস্তেষাং বৃত্তং সুনিন্দিতম্
30.15
ধানাগৌডাসবে পীত্বা গোমাংসং লশুনৈঃ সহ
অপূপমাংসবাট্যানামাশিনঃ শীলবর্জিতাঃ
30.16
হসন্তি গান্তি নৃত্যন্তি স্ত্রীভির্মত্তা বিবাসসঃ
নগরাগারবপ্রেষু বহির্মাল্যানুলেপনাঃ
30.17
মত্তাবগীতৈর্বিবিধৈঃ খরোষ্ট্রনিনদোপমৈঃ
আহুরন্যোন্যমুক্তানি প্রব্রুবাণা মদোত্কটাঃ
30.18
হা হতে হা হতেত্যেব স্বামিভর্তৃহতেতি চ
আক্রোশন্ত্যঃ প্রনৃত্যন্তি মন্দাঃ পর্বস্বসংয়তাঃ
30.19
তেষাং কিলাবলিপ্তানাং নিবসন্কুরুজাঙ্গলে
কশ্চিদ্বাহ্লীকমুখ্যানাং নাতিহৃষ্টমনা জগৌ
30.20
সা নূনং বৃহতী গৌরী সূক্ষ্মকম্বলবাসিনী
মামনুস্মরতী শেতে বাহ্লীকং কুরুবাসিনম্
30.21
শতদ্রুকনদীং তীর্ত্বা তাং চ রম্যামিরাবতীম্
গত্বা স্বদেশং দ্রক্ষ্যামি স্থূলশঙ্খাঃ শুভাঃ স্ত্রিয়ঃ
30.22
মনঃশিলোজ্জ্বলাপাঙ্গা গৌর্যস্ত্রিককুদাঞ্জনাঃ
কেবলাজিনসংবীতাঃ কূর্দন্ত্যঃ প্রিয়দর্শনাঃ
30.23
মৃদঙ্গানকশঙ্খানাং মর্দলানাং চ নিস্বনৈঃ
খরোষ্ট্রাশ্বতরৈশ্চৈব মত্তা যাস্যামহে সুখম্
30.24
শমীপীলুকরীরাণাং বনেষু সুখবর্ত্মসু
অপূপান্সক্তুপিণ্ডীশ্চ খাদন্তো মথিতান্বিতাঃ
30.25
পথিষু প্রবলা ভূত্বা কদাসমৃদিতেঽধ্বনি
খলোপহারং কুর্বাণাস্তাডয়িষ্যাম ভূয়সঃ
30.26
এবং হীনেষু ব্রাত্যেষু বাহ্লীকেষু দুরাত্মসু
কশ্চেতয়ানো নিবসেন্মুহূর্তমপি মানবঃ
30.27
ঈদৃশা ব্রাহ্মণেনোক্তা বাহ্লীকা মোঘচারিণঃ
যেষাং ষড্ভাগহর্তা ত্বমুভয়োঃ শুভপাপয়োঃ
30.28
ইত্যুক্ত্বা ব্রাহ্মণঃ সাধুরুত্তরং পুনরুক্তবান্
বাহ্লীকেষ্ববিনীতেষু প্রোচ্যমানং নিবোধত
30.29
তত্র স্ম রাক্ষসী গাতি সদা কৃষ্ণচতুর্দশীম্
নগরে শাকলে স্ফীতে আহত্য নিশি দুন্দুভিম্
30.30
কদা বা ঘোষিকা গাথাঃ পুনর্গাস্যন্তি শাকলে
গব্যস্য তৃপ্তা মাংসস্য পীত্বা গৌডং মহাসবম্
30.31
গৌরীভিঃ সহ নারীভির্বৃহতীভিঃ স্বলংকৃতাঃ
পলাণ্ডুগণ্ডূষয়ুতান্খাদন্তে চৈডকান্বহূন্
30.32
বারাহং কৌক্কুটং মাংসং গব্যং গার্দভমৌষ্ট্রকম্
ঐডং চ যে ন খাদন্তি তেষাং জন্ম নিরর্থকম্
30.33
ইতি গায়ন্তি যে মত্তাঃ শীধুনা শাকলাবতঃ
সবালবৃদ্ধাঃ কূর্দন্তস্তেষু বৃত্তং কথং ভবেৎ
30.34
ইতি শল্য বিজানীহি হন্ত ভূয়ো ব্রবীমি তে
যদন্যোঽপ্যুক্তবানস্মান্ব্রাহ্মণঃ কুরুসংসদি
30.35
পঞ্চ নদ্যো বহন্ত্যেতা যত্র পীলুবনান্যপি
শতদ্রুশ্চ বিপাশা চ তৃতীয়েরাবতী তথা
চন্দ্রভাগা বিতস্তা চ সিন্ধুষষ্ঠা বহির্গতাঃ
30.36
আরট্টা নাম তে দেশা নষ্টধর্মান্ন তান্ব্রজেৎ
ব্রাত্যানাং দাসমীয়ানাং বিদেহানাময়জ্বনাম্
30.37
ন দেবাঃ প্রতিগৃহ্ণন্তি পিতরো ব্রাহ্মণাস্তথা
তেষাং প্রনষ্টধর্মাণাং বাহ্লীকানামিতি শ্রুতিঃ
30.38
ব্রাহ্মণেন তথা প্রোক্তং বিদুষা সাধুসংসদি
কাষ্ঠকুণ্ডেষু বাহ্লীকা মৃণ্ময়েষু চ ভুঞ্জতে
সক্তুবাট্যাবলিপ্তেষু শ্বাদিলীঢেষু নির্ঘৃণাঃ
30.39
আবিকং চৌষ্ট্রিকং চৈব ক্ষীরং গার্দভমেব চ
তদ্বিকারাংশ্চ বাহ্লীকাঃ খাদন্তি চ পিবন্তি চ
30.40
পুত্রসংকরিণো জাল্মাঃ সর্বান্নক্ষীরভোজনাঃ
আরট্টা নাম বাহ্লীকা বর্জনীয়া বিপশ্চিতা
30.41
উত শল্য বিজানীহি হন্ত ভূয়ো ব্রবীমি তে
যদন্যোঽপ্যুক্তবান্সভ্যো ব্রাহ্মণঃ কুরুসংসদি
30.42
যুগংধরে পয়ঃ পীত্বা প্রোষ্য চাপ্যচ্যুতস্থলে
তদ্বদ্ভূতিলয়ে স্নাত্বা কথং স্বর্গং গমিষ্যতি
30.43
পঞ্চ নদ্যো বহন্ত্যেতা যত্র নিঃসৃত্য পর্বতাৎ
আরট্টা নাম বাহ্লীকা ন তেষ্বার্যো দ্ব্যহং বসেৎ
30.44
বহিশ্চ নাম হ্লীকশ্চ বিপাশায়াং পিশাচকৌ
তয়োরপত্যং বাহ্লীকা নৈষা সৃষ্টিঃ প্রজাপতেঃ
30.45
কারস্করান্মহিষকান্কলিঙ্গান্কীকটাটবীন্
কর্কোটকান্বীরকাংশ্চ দুর্ধর্মাংশ্চ বিবর্জয়েৎ
30.46
ইতি তীর্থানুসর্তারং রাক্ষসী কাচিদব্রবীৎ
একরাত্রা শমীগেহে মহোলূখলমেখলা
30.47
আরট্টা নাম তে দেশা বাহ্লীকা নাম তে জনাঃ
বসাতিসিন্ধুসৌবীরা ইতি প্রায়ো বিকুত্সিতাঃ
30.48
উত শল্য বিজানীহি হন্ত ভূয়ো ব্রবীমি তে
উচ্যমানং ময়া সম্যক্তদেকাগ্রমনাঃ শৃণু
30.49
ব্রাহ্মণঃ শিল্পিনো গেহমভ্যগচ্ছত্পুরাতিথিঃ
আচারং তত্র সংপ্রেক্ষ্য প্রীতঃ শিল্পিনমব্রবীৎ
30.50
ময়া হিমবতঃ শৃঙ্গমেকেনাধ্যুষিতং চিরম্
দৃষ্টাশ্চ বহবো দেশা নানাধর্মসমাকুলাঃ
30.51
ন চ কেন চ ধর্মেণ বিরুধ্যন্তে প্রজা ইমাঃ
সর্বে হি তেঽব্রুবন্ধর্মং যথোক্তং বেদপারগৈঃ
30.52
অটতা তু সদা দেশান্নানাধর্মসমাকুলান্
আগচ্ছতা মহারাজ বাহ্লীকেষু নিশামিতম্
30.53
তত্রৈব ব্রাহ্মণো ভূত্বা ততো ভবতি ক্ষত্রিয়ঃ
বৈশ্যঃ শূদ্রশ্চ বাহ্লীকস্ততো ভবতি নাপিতঃ
30.54
নাপিতশ্চ ততো ভূত্বা পুনর্ভবতি ব্রাহ্মণঃ
দ্বিজো ভূত্বা চ তত্রৈব পুনর্দাসোঽপি জায়তে
30.55
ভবত্যেকঃ কুলে বিপ্রঃ শিষ্টান্যে কামচারিণঃ
গান্ধারা মদ্রকাশ্চৈব বাহ্লীকাঃ কেঽপ্যচেতসঃ
30.56
এতন্ময়া শ্রুতং তত্র ধর্মসংকরকারকম্
কৃত্স্নামটিত্বা পৃথিবীং বাহ্লীকেষু বিপর্যয়ঃ
30.57
উত শল্য বিজানীহি হন্ত ভূয়ো ব্রবীমি তে
যদপ্যন্যোঽব্রবীদ্বাক্যং বাহ্লীকানাং বিকুত্সিতম্
30.58
সতী পুরা হৃতা কাচিদারট্টা কিল দস্যুভিঃ
অধর্মতশ্চোপয়াতা সা তানভ্যশপত্ততঃ
30.59
বালাং বন্ধুমতীং যন্মামধর্মেণোপগচ্ছথ
তস্মান্নার্যো ভবিষ্যন্তি বন্ধক্যো বৈ কুলেষু বঃ
ন চৈবাস্মাত্প্রমোক্ষ্যধ্বং ঘোরাত্পাপান্নরাধমাঃ
30.60
কুরবঃ সহপাঞ্চালাঃ শাল্বা মত্স্যাঃ সনৈমিষাঃ
কোসলাঃ কাশয়োঽঙ্গাশ্চ কলিঙ্গা মগধাস্তথা
30.61
চেদয়শ্চ মহাভাগা ধর্মং জানন্তি শাশ্বতম্
নানাদেশেষু সন্তশ্চ প্রায়ো বাহ্যা লয়াদৃতে
30.62
আ মত্স্যেভ্যঃ কুরুপাঞ্চালদেশ্যা; আ নৈমিষাচ্চেদয়ো যে বিশিষ্টাঃ
ধর্মং পুরাণমুপজীবন্তি সন্তো; মদ্রানৃতে পঞ্চনদাংশ্চ জিহ্মান্
30.63
এবং বিদ্বন্ধর্মকথাংশ্চ রাজং;স্তূষ্ণীংভূতো জডবচ্ছল্য ভূয়াঃ
ত্বং তস্য গোপ্তা চ জনস্য রাজা; ষড্ভাগহর্তা শুভদুষ্কৃতস্য
30.64
অথ বা দুষ্কৃতস্য ত্বং হর্তা তেষামরক্ষিতা
রক্ষিতা পুণ্যভাগ্রাজা প্রজানাং ত্বং ত্বপুণ্যভাক্
30.65
পূজ্যমানে পুরা ধর্মে সর্বদেশেষু শাশ্বতে
ধর্মং পাঞ্চনদং দৃষ্ট্বা ধিগিত্যাহ পিতামহঃ
30.66
ব্রাত্যানাং দাশমীয়ানাং কৃতেঽপ্যশুভকর্মণাম্
ইতি পাঞ্চনদং ধর্মমবমেনে পিতামহঃ
স্বধর্মস্থেষু বর্ণেষু সোঽপ্যেতং নাভিপূজয়েৎ
30.67
উত শল্য বিজানীহি হন্ত ভূয়ো ব্রবীমি তে
কল্মাষপাদঃ সরসি নিমজ্জন্রাক্ষসোঽব্রবীৎ
30.68
ক্ষত্রিয়স্য মলং ভৈক্ষং ব্রাহ্মণস্যানৃতং মলম্
মলং পৃথিব্যা বাহ্লীকাঃ স্ত্রীণাং মদ্রস্ত্রিয়ো মলম্
30.69
নিমজ্জমানমুদ্ধৃত্য কশ্চিদ্রাজা নিশাচরম্
অপৃচ্ছত্তেন চাখ্যাতং প্রোক্তবান্যন্নিবোধ তৎ
30.70
মানুষাণাং মলং ম্লেচ্ছা ম্লেচ্ছানাং মৌষ্টিকা মলম্
মৌষ্টিকানাং মলং শণ্ডাঃ শণ্ডানাং রাজয়াজকাঃ
30.71
রাজয়াজকয়াজ্যানাং মদ্রকাণাং চ যন্মলম্
তদ্ভবেদ্বৈ তব মলং যদ্যস্মান্ন বিমুঞ্চসি
30.72
ইতি রক্ষোপসৃষ্টেষু বিষবীর্যহতেষু চ
রাক্ষসং ভেষজং প্রোক্তং সংসিদ্ধং বচনোত্তরম্
30.73
ব্রাহ্মং পাঞ্চালাঃ কৌরবেয়াঃ স্বধর্মঃ; সত্যং মত্স্যাঃ শূরসেনাশ্চ যজ্ঞঃ
প্রাচ্যা দাসা বৃষলা দাক্ষিণাত্যাঃ; স্তেনা বাহ্লীকাঃ সংকরা বৈ সুরাষ্ট্রাঃ
30.74
কৃতঘ্নতা পরবিত্তাপহারঃ; সুরাপানং গুরুদারাবমর্শঃ
যেষাং ধর্মস্তান্প্রতি নাস্ত্যধর্ম; আরট্টকান্পাঞ্চনদান্ধিগস্তু
30.75
আ পাঞ্চালেভ্যঃ কুরবো নৈমিষাশ্চ; মত্স্যাশ্চৈবাপ্যথ জানন্তি ধর্মম্
কলিঙ্গকাশ্চাঙ্গকা মাগধাশ্চ; শিষ্টান্ধর্মানুপজীবন্তি বৃদ্ধাঃ
30.76
প্রাচীং দিশং শ্রিতা দেবা জাতবেদঃপুরোগমাঃ
দক্ষিণাং পিতরো গুপ্তাং যমেন শুভকর্মণা
30.77
প্রতীচীং বরুণঃ পাতি পালয়ন্নসুরান্বলী
উদীচীং ভগবান্সোমো ব্রহ্মণ্যো ব্রাহ্মণৈঃ সহ
30.78
রক্ষঃপিশাচান্হিমবান্গুহ্যকান্গন্ধমাদনঃ
ধ্রুবঃ সর্বাণি ভূতানি বিষ্ণুর্লোকাঞ্জনার্দনঃ
30.79
ইঙ্গিতজ্ঞাশ্চ মগধাঃ প্রেক্ষিতজ্ঞাশ্চ কোসলাঃ
অর্ধোক্তাঃ কুরুপাঞ্চালাঃ শাল্বাঃ কৃত্স্নানুশাসনাঃ
পার্বতীয়াশ্চ বিষমা যথৈব গিরয়স্তথা
30.80
সর্বজ্ঞা যবনা রাজঞ্শূরাশ্চৈব বিশেষতঃ
ম্লেচ্ছাঃ স্বসংজ্ঞানিয়তা নানুক্ত ইতরো জনঃ
30.81
প্রতিরব্ধাস্তু বাহ্লীকা ন চ কেচন মদ্রকাঃ
স ত্বমেতাদৃশঃ শল্য নোত্তরং বক্তুমর্হসি
30.82
এতজ্জ্ঞাত্বা জোষমাস্স্ব প্রতীপং মা স্ম বৈ কৃথাঃ
স ত্বাং পূর্বমহং হত্বা হনিষ্যে কেশবার্জুনৌ
30.83
শল্য উবাচ
আতুরাণাং পরিত্যাগঃ স্বদারসুতবিক্রয়ঃ
অঙ্গেষু বর্ততে কর্ণ যেষামধিপতির্ভবান্
30.84
রথাতিরথসংখ্যায়াং যত্ত্বা ভীষ্মস্তদাব্রবীৎ
তান্বিদিত্বাত্মনো দোষান্নির্মন্যুর্ভব মা ক্রুধঃ
30.85
সর্বত্র ব্রাহ্মণাঃ সন্তি সন্তি সর্বত্র ক্ষত্রিয়াঃ
বৈশ্যাঃ শূদ্রাস্তথা কর্ণ স্ত্রিয়ঃ সাধ্ব্যশ্চ সুব্রতাঃ
30.86
রমন্তে চোপহাসেন পুরুষাঃ পুরুষৈঃ সহ
অন্যোন্যমবতক্ষন্তো দেশে দেশে সমৈথুনাঃ
30.87
পরবাচ্যেষু নিপুণঃ সর্বো ভবতি সর্বদা
আত্মবাচ্যং ন জানীতে জানন্নপি বিমুহ্যতি
30.88
সংজয় উবাচ
কর্ণোঽপি নোত্তরং প্রাহ শল্যোঽপ্যভিমুখঃ পরান্
পুনঃ প্রহস্য রাধেয়ঃ পুনর্যাহীত্যচোদয়ৎ