Utshovঅধ্যায় 29
29.1
সংজয় উবাচ
মদ্রাধিপস্যাধিরথিস্তদৈবং; বচো নিশম্যাপ্রিয়মপ্রতীতঃ
উবাচ শল্যং বিদিতং মমৈত;দ্যথাবিধাবর্জুনবাসুদেবৌ
29.2
শৌরে রথং বাহয়তোঽর্জুনস্য; বলং মহাস্ত্রাণি চ পাণ্ডবস্য
অহং বিজানামি যথাবদদ্য; পরোক্ষভূতং তব তত্তু শল্য
29.3
তৌ চাপ্রধৃষ্যৌ শস্ত্রভৃতাং বরিষ্ঠৌ; ব্যপেতভীর্যোধয়িষ্যামি কৃষ্ণৌ
সংতাপয়ত্যভ্যধিকং তু রামা;চ্ছাপোঽদ্য মাং ব্রাহ্মণসত্তমাচ্চ
29.4
অবাত্সং বৈ ব্রাহ্মণচ্ছদ্মনাহং; রামে পুরা দিব্যমস্ত্রং চিকীর্ষুঃ
তত্রাপি মে দেবরাজেন বিঘ্নো; হিতার্থিনা ফল্গুনস্যৈব শল্য
29.5
কৃতোঽবভেদেন মমোরুমেত্য; প্রবিশ্য কীটস্য তনুং বিরূপাম্
গুরোর্ভয়াচ্চাপি ন চেলিবানহং; তচ্চাববুদ্ধো দদৃশে স বিপ্রঃ
29.6
পৃষ্টশ্চাহং তমবোচং মহর্ষিং; সূতোঽহমস্মীতি স মাং শশাপ
সূতোপধাবাপ্তমিদং ত্বয়াস্ত্রং; ন কর্মকালে প্রতিভাস্যতি ত্বাম্
29.7
অন্যত্র যস্মাত্তব মৃত্যুকালা;দব্রাহ্মণে ব্রহ্ম ন হি ধ্রুবং স্যাৎ
তদদ্য পর্যাপ্তমতীব শস্ত্র;মস্মিন্সংগ্রামে তুমুলে তাত ভীমে
29.8
অপাং পতির্বেগবানপ্রমেয়ো; নিমজ্জয়িষ্যন্নিবহান্প্রজানাম্
মহানগং যঃ কুরুতে সমুদ্রং; বেলৈব তং বারয়ত্যপ্রমেয়ম্
29.9
প্রমুঞ্চন্তং বাণসংঘানমোঘা;ন্মর্মচ্ছিদো বীরহণঃ সপত্রান্
কুন্তীপুত্রং প্রতিয়োত্স্যামি যুদ্ধে; জ্যাকর্ষিণামুত্তমমদ্য লোকে
29.10
এবং বলেনাতিবলং মহাস্ত্রং; সমুদ্রকল্পং সুদুরাপমুগ্রম্
শরৌঘিণং পার্থিবান্মজ্জয়ন্তং; বেলেব পার্থমিষুভিঃ সংসহিষ্যে
29.11
অদ্যাহবে যস্য ন তুল্যমন্যং; মন্যে মনুষ্যং ধনুরাদদানম্
সুরাসুরান্বৈ যুধি যো জয়েত; তেনাদ্য মে পশ্য যুদ্ধং সুঘোরম্
29.12
অতিমানী পাণ্ডবো যুদ্ধকামো; অমানুষৈরেষ্যতি মে মহাস্ত্রৈঃ
তস্যাস্ত্রমস্ত্রৈরভিহত্য সংখ্যে; শরোত্তমৈঃ পাতয়িষ্যামি পার্থম্
29.13
দিবাকরেণাপি সমং তপন্তং; সমাপ্তরশ্মিং যশসা জ্বলন্তম্
তমোনুদং মেঘ ইবাতিমাত্রো; ধনংজয়ং ছাদয়িষ্যামি বাণৈঃ
29.14
বৈশ্বানরং ধূমশিখং জ্বলন্তং; তেজস্বিনং লোকমিমং দহন্তম্
মেঘো ভূত্বা শরবর্ষৈর্যথাগ্নিং; তথা পার্থং শময়িষ্যামি যুদ্ধে
29.15
প্রমাথিনং বলবন্তং প্রহারিণং; প্রভঞ্জনং মাতরিশ্বানমুগ্রম্
যুদ্ধে সহিষ্যে হিমবানিবাচলো; ধনংজয়ং ক্রুদ্ধমমৃষ্যমাণম্
29.16
বিশারদং রথমার্গেষ্বসক্তং; ধুর্যং নিত্যং সমরেষু প্রবীরম্
লোকে বরং সর্বধনুর্ধরাণাং; ধনংজয়ং সংয়ুগে সংসহিষ্যে
29.17
অদ্যাহবে যস্য ন তুল্যমন্যং; মধ্যেমনুষ্যং ধনুরাদদানম্
সর্বামিমাং যঃ পৃথিবীং সহেত; তথা বিদ্বান্যোত্স্যমানোঽস্মি তেন
29.18
যঃ সর্বভূতানি সদেবকানি; প্রস্থেঽজয়ত্খাণ্ডবে সব্যসাচী
কো জীবিতং রক্ষমাণো হি তেন; যুয়ুত্সতে মামৃতে মানুষোঽন্যঃ
29.19
অহং তস্য পৌরুষং পাণ্ডবস্য; ব্রূয়াং হৃষ্টঃ সমিতৌ ক্ষত্রিয়াণাম্
কিং ত্বং মূর্খঃ প্রভষন্মূঢচেতা; মামবোচঃ পৌরুষমর্জুনস্য
29.20
অপ্রিয়ো যঃ পরুষো নিষ্ঠুরো হি; ক্ষুদ্রঃ ক্ষেপ্তা ক্ষমিণশ্চাক্ষমাবান্
হন্যামহং তাদৃশানাং শতানি; ক্ষমামি ত্বাং ক্ষময়া কালয়োগাৎ
29.21
অবোচস্ত্বং পাণ্ডবার্থেঽপ্রিয়াণি; প্রধর্ষয়ন্মাং মূঢবত্পাপকর্মন্
ময্যার্জবে জিহ্মগতির্হতস্ত্বং; মিত্রদ্রোহী সপ্তপদং হি মিত্রম্
29.22
কালস্ত্বয়ং মৃত্যুময়োঽতিদারুণো; দুর্যোধনো যুদ্ধমুপাগমদ্যৎ
তস্যার্থসিদ্ধিমভিকাঙ্ক্ষমাণ;স্তমভ্যেষ্যে যত্র নৈকান্ত্যমস্তি
29.23
মিত্রং মিদের্নন্দতেঃ প্রীয়তের্বা; সংত্রায়তের্মানদ মোদতের্বা
ব্রবীতি তচ্চামুত বিপ্রপূর্বা;ত্তচ্চাপি সর্বং মম দুর্যোধনেঽস্তি
29.24
শত্রুঃ শদেঃ শাসতেঃ শায়তের্বা; শৃণাতের্বা শ্বয়তের্বাপি সর্গে
উপসর্গাদ্বহুধা সূদতেশ্চ; প্রায়েণ সর্বং ত্বয়ি তচ্চ মহ্যম্
29.25
দুর্যোধনার্থং তব চাপ্রিয়ার্থং; যশোর্থমাত্মার্থমপীশ্বরার্থম্
তস্মাদহং পাণ্ডববাসুদেবৌ; যোত্স্যে যত্নাত্কর্ম তত্পশ্য মেঽদ্য
29.26
অস্ত্রাণি পশ্যাদ্য মমোত্তমানি; ব্রাহ্মাণি দিব্যান্যথ মানুষাণি
আসাদয়িষ্যাম্যহমুগ্রবীর্যং; দ্বিপোত্তমং মত্তমিবাভিমত্তঃ
29.27
অস্ত্রং ব্রাহ্মং মনসা তদ্ধ্যজয্যং; ক্ষেপ্স্যে পার্থায়াপ্রতিমং জয়ায়
তেনাপি মে নৈব মুচ্যেত যুদ্ধে; ন চেত্পতেদ্বিষমে মেঽদ্য চক্রম্
29.28
বৈবস্বতাদ্দণ্ডহস্তাদ্বরুণাদ্বাপি পাশিনঃ
সগদাদ্বা ধনপতেঃ সবজ্রাদ্বাপি বাসবাৎ
29.29
নান্যস্মাদপি কস্মাচ্চিদ্বিভিমো হ্যাততায়িনঃ
ইতি শল্য বিজানীহি যথা নাহং বিভেম্যভীঃ
29.30
তস্মাদ্ভয়ং ন মে পার্থান্নাপি চৈব জনার্দনাৎ
অদ্য যুদ্ধং হি তাভ্যাং মে সংপরায়ে ভবিষ্যতি
29.31
শ্বভ্রে তে পততাং চক্রমিতি মে ব্রাহ্মণোঽবদৎ
যুধ্যমানস্য সংগ্রামে প্রাপ্তস্যৈকায়নে ভয়ম্
29.32
তস্মাদ্বিভেমি বলবদ্ব্রাহ্মণব্যাহৃতাদহম্
এতে হি সোমরাজান ঈশ্বরাঃ সুখদুঃখয়োঃ
29.33
হোমধেন্বা বত্সমস্য প্রমত্ত ইষুণাহনম্
চরন্তমজনে শল্য ব্রাহ্মণাত্তপসো নিধেঃ
29.34
ঈষাদন্তান্সপ্তশতান্দাসীদাসশতানি চ
দদতো দ্বিজমুখ্যায় প্রসাদং ন চকার মে
29.35
কৃষ্ণানাং শ্বেতবত্সানাং সহস্রাণি চতুর্দশ
আহরন্ন লভে তস্মাত্প্রসাদং দ্বিজসত্তমাৎ
29.36
ঋদ্ধং গেহং সর্বকামৈর্যচ্চ মে বসু কিংচন
তত্সর্বমস্মৈ সত্কৃত্য প্রয়চ্ছামি ন চেচ্ছতি
29.37
ততোঽব্রবীন্মাং যাচন্তমপরাদ্ধং প্রয়ত্নতঃ
ব্যাহৃতং যন্ময়া সূত তত্তথা ন তদন্যথা
29.38
অনৃতোক্তং প্রজা হন্যাত্ততঃ পাপমবাপ্নুয়াৎ
তস্মাদ্ধর্মাভিরক্ষার্থং নানৃতং বক্তুমুত্সহে
29.39
মা ত্বং ব্রহ্মগতিং হিংস্যাঃ প্রায়শ্চিত্তং কৃতং ত্বয়া
মদ্বাক্যং নানৃতং লোকে কশ্চিত্কুর্যাত্সমাপ্নুহি
29.40
ইত্যেতত্তে ময়া প্রোক্তং ক্ষিপ্তেনাপি সুহৃত্তয়া
জানামি ত্বাধিক্ষিপন্তং জোষমাস্স্বোত্তরং শৃণু