Utshovঅধ্যায় 28
28.1
সংজয় উবাচ
মারিষাধিরথেঃ শ্রুত্বা বচো যুদ্ধাভিনন্দিনঃ
শল্যোঽব্রবীত্পুনঃ কর্ণং নিদর্শনমুদাহরন্
28.2
যথৈব মত্তো মদ্যেন ত্বং তথা ন চ বা তথা
তথাহং ত্বাং প্রমাদ্যন্তং চিকিত্সামি সুহৃত্তয়া
28.3
ইমাং কাকোপমাং কর্ণ প্রোচ্যমানাং নিবোধ মে
শ্রুত্বা যথেষ্টং কুর্যাস্ত্বং বিহীন কুলপাংসন
28.4
নাহমাত্মনি কিংচিদ্বৈ কিল্বিষং কর্ণ সংস্মরে
যেন ত্বং মাং মহাবাহো হন্তুমিচ্ছস্যনাগসম্
28.5
অবশ্যং তু ময়া বাচ্যং বুধ্যতাং যদি তে হিতম্
বিশেষতো রথস্থেন রাজ্ঞশ্চৈব হিতৈষিণা
28.6
সমং চ বিষমং চৈব রথিনশ্চ বলাবলম্
শ্রমঃ খেদশ্চ সততং হয়ানাং রথিনা সহ
28.7
আয়ুধস্য পরিজ্ঞানং রুতং চ মৃগপক্ষিণাম্
ভারশ্চাপ্যতিভারশ্চ শল্যানাং চ প্রতিক্রিয়া
28.8
অস্ত্রয়োগশ্চ যুদ্ধং চ নিমিত্তানি তথৈব চ
সর্বমেতন্ময়া জ্ঞেয়ং রথস্যাস্য কুটুম্বিনা
অতস্ত্বাং কথয়ে কর্ণ নিদর্শনমিদং পুনঃ
28.9
বৈশ্যঃ কিল সমুদ্রান্তে প্রভূতধনধান্যবান্
যজ্বা দানপতিঃ ক্ষান্তঃ স্বকর্মস্থোঽভবচ্ছুচিঃ
28.10
বহুপুত্রঃ প্রিয়াপত্যঃ সর্বভূতানুকম্পকঃ
রাজ্ঞো ধর্মপ্রধানস্য রাষ্ট্রে বসতি নির্ভয়ঃ
28.11
পুত্রাণাং তস্য বালানাং কুমারাণাং যশস্বিনাম্
কাকো বহূনামভবদুচ্ছিষ্টকৃতভোজনঃ
28.12
তস্মৈ সদা প্রয়চ্ছন্তি বৈশ্যপুত্রাঃ কুমারকাঃ
মাংসোদনং দধি ক্ষীরং পায়সং মধুসর্পিষী
28.13
স চোচ্ছিষ্টভৃতঃ কাকো বৈশ্যপুত্রৈঃ কুমারকৈঃ
সদৃশান্পক্ষিণো দৃপ্তঃ শ্রেয়সশ্চাবমন্যতে
28.14
অথ হংসাঃ সমুদ্রান্তে কদাচিদভিপাতিনঃ
গরুডস্য গতৌ তুল্যাশ্চক্রাঙ্গা হৃষ্টচেতসঃ
28.15
কুমারকাস্ততো হংসান্দৃষ্ট্বা কাকমথাব্রুবন্
ভবানেব বিশিষ্টো হি পতত্রিভ্যো বিহংগম
28.16
প্রতার্যমাণস্তু স তৈরল্পবুদ্ধিভিরণ্ডজঃ
তদ্বচঃ সত্যমিত্যেব মৌর্খ্যাদ্দর্পাচ্চ মন্যতে
28.17
তান্সোঽভিপত্য জিজ্ঞাসুঃ ক এষাং শ্রেষ্ঠভাগিতি
উচ্ছিষ্টদর্পিতঃ কাকো বহূনাং দূরপাতিনাম্
28.18
তেষাং যং প্রবরং মেনে হংসানাং দূরপাতিনাম্
তমাহ্বয়ত দুর্বুদ্ধিঃ পতাম ইতি পক্ষিণম্
28.19
তচ্ছ্রুত্বা প্রাহসন্হংসা যে তত্রাসন্সমাগতাঃ
ভাষতো বহু কাকস্য বলিনঃ পততাং বরাঃ
ইদমূচুশ্চ চক্রাঙ্গা বচঃ কাকং বিহংগমাঃ
28.20
বয়ং হংসাশ্চরামেমাং পৃথিবীং মানসৌকসঃ
পক্ষিণাং চ বয়ং নিত্যং দূরপাতেন পূজিতাঃ
28.21
কথং নু হংসং বলিনং বজ্রাঙ্গং দূরপাতিনম্
কাকো ভূত্বা নিপতনে সমাহ্বয়সি দুর্মতে
কথং ত্বং পতনং কাক সহাস্মাভির্ব্রবীষি তৎ
28.22
অথ হংসবচো মূঢঃ কুত্সয়িত্বা পুনঃ পুনঃ
প্রজগাদোত্তরং কাকঃ কত্থনো জাতিলাঘবাৎ
28.23
শতমেকং চ পাতানাং পতিতাস্মি ন সংশয়ঃ
শতয়োজনমেকৈকং বিচিত্রং বিবিধং তথা
28.24
উড্ডীনমবডীনং চ প্রডীনং ডীনমেব চ
নিডীনমথ সংডীনং তির্যক্চাতিগতানি চ
28.25
বিডীনং পরিডীনং চ পরাডীনং সুডীনকম্
অতিডীনং মহাডীনং নিডীনং পরিডীনকম্
28.26
গতাগতপ্রতিগতা বহ্বীশ্চ নিকুডীনিকাঃ
কর্তাস্মি মিষতাং বোঽদ্য ততো দ্রক্ষ্যথ মে বলম্
28.27
এবমুক্তে তু কাকেন প্রহস্যৈকো বিহংগমঃ
উবাচ হংসস্তং কাকং বচনং তন্নিবোধ মে
28.28
শতমেকং চ পাতানাং ত্বং কাক পতিতা ধ্রুবম্
একমেব তু যে পাতং বিদুঃ সর্বে বিহংগমাঃ
28.29
তমহং পতিতা কাক নান্যং জানামি কংচন
পত ত্বমপি রক্তাক্ষ যেন বা তেন মন্যসে
28.30
অথ কাকাঃ প্রজহসুর্যে তত্রাসন্সমাগতাঃ
কথমেকেন পাতেন হংসঃ পাতশতং জয়েৎ
28.31
একেনৈব শতস্যৈকং পাতেনাভিভবিষ্যতি
হংসস্য পতিতং কাকো বলবানাশুবিক্রমঃ
28.32
প্রপেততুঃ স্পর্ধয়াথ ততস্তৌ হংসবায়সৌ
একপাতী চ চক্রাঙ্গঃ কাকঃ পাতশতেন চ
28.33
পেতিবানথ চক্রাঙ্গঃ পেতিবানথ বায়সঃ
বিসিস্মাপয়িষুঃ পাতৈরাচক্ষাণোঽঽত্মনঃ ক্রিয়াম্
28.34
অথ কাকস্য চিত্রাণি পতিতানীতরাণি চ
দৃষ্ট্বা প্রমুদিতাঃ কাকা বিনেদুরথ তৈঃ স্বরৈঃ
28.35
হংসাংশ্চাবহসন্তি স্ম প্রাবদন্নপ্রিয়াণি চ
উত্পত্যোত্পত্য চ প্রাহুর্মুহূর্তমিতি চেতি চ
28.36
বৃক্ষাগ্রেভ্যঃ স্থলেভ্যশ্চ নিপতন্ত্যুত্পতন্তি চ
কুর্বাণা বিবিধান্রাবানাশংসন্তস্তদা জয়ম্
28.37
হংসস্তু মৃদুকেনৈব বিক্রান্তুমুপচক্রমে
প্রত্যহীয়ত কাকাচ্চ মুহূর্তমিব মারিষ
28.38
অবমন্য রয়ং হংসানিদং বচনমব্রবীৎ
যোঽসাবুত্পতিতো হংসঃ সোঽসাবেব প্রহীয়তে
28.39
অথ হংসঃ স তচ্ছ্রুত্বা প্রাপতত্পশ্চিমাং দিশম্
উপর্যুপরি বেগেন সাগরং বরুণালয়ম্
28.40
ততো ভীঃ প্রাবিশত্কাকং তদা তত্র বিচেতসম্
দ্বীপদ্রুমানপশ্যন্তং নিপতন্তং শ্রমান্বিতম্
নিপতেয়ং ক্ব নু শ্রান্ত ইতি তস্মিঞ্জলার্ণবে
28.41
অবিষহ্যঃ সমুদ্রো হি বহুসত্ত্বগণালয়ঃ
মহাভূতশতোদ্ভাসী নভসোঽপি বিশিষ্যতে
28.42
গাম্ভীর্যাদ্ধি সমুদ্রস্য ন বিশেষঃ কুলাধম
দিগম্বরাম্ভসাং কর্ণ সমুদ্রস্থা হি দুর্জয়াঃ
বিদূরপাতাত্তোয়স্য কিং পুনঃ কর্ণ বায়সঃ
28.43
অথ হংসোঽভ্যতিক্রম্য মুহূর্তমিতি চেতি চ
অবেক্ষমাণস্তং কাকং নাশক্নোদ্ব্যপসর্পিতুম্
অতিক্রম্য চ চক্রাঙ্গঃ কাকং তং সমুদৈক্ষত
28.44
তং তথা হীয়মানং চ হংসো দৃষ্ট্বাব্রবীদিদম্
উজ্জিহীর্ষুর্নিমজ্জন্তং স্মরন্সত্পুরুষব্রতম্
28.45
বহূনি পতনানি ত্বমাচক্ষাণো মুহুর্মুহুঃ
পতস্যব্যাহরংশ্চেদং ন নো গুহ্যং প্রভাষসে
28.46
কিং নাম পতনং কাক যত্ত্বং পতসি সাংপ্রতম্
জলং স্পৃশসি পক্ষাভ্যাং তুণ্ডেন চ পুনঃ পুনঃ
28.47
স পক্ষাভ্যাং স্পৃশন্নার্তস্তুণ্ডেন জলমর্ণবে
কাকো দৃঢং পরিশ্রান্তঃ সহসা নিপপাত হ
28.48
হংস উবাচ
শতমেকং চ পাতানাং যত্প্রভাষসি বায়স
নানাবিধানীহ পুরা তচ্চানৃতমিহাদ্য তে
28.49
কাক উবাচ
উচ্ছিষ্টদর্পিতো হংস মন্যেঽঽত্মানং সুপর্ণবৎ
অবমন্য বহূংশ্চাহং কাকানন্যাংশ্চ পক্ষিণঃ
প্রাণৈর্হংস প্রপদ্যে ত্বাং দ্বীপান্তং প্রাপয়স্ব মাম্
28.50
যদ্যহং স্বস্তিমান্হংস স্বদেশং প্রাপ্নুয়াং পুনঃ
ন কংচিদবমন্যেয়মাপদো মাং সমুদ্ধর
28.51
তমেবংবাদিনং দীনং বিলপন্তমচেতনম্
কাক কাকেতি বাশন্তং নিমজ্জন্তং মহার্ণবে
28.52
তথৈত্য বায়সং হংসো জলক্লিন্নং সুদুর্দশম্
পদ্ভ্যামুত্ক্ষিপ্য বেপন্তং পৃষ্ঠমারোপয়চ্ছনৈঃ
28.53
আরোপ্য পৃষ্ঠং কাকং তং হংসঃ কর্ণ বিচেতসম্
আজগাম পুনর্দ্বীপং স্পর্ধয়া পেততুর্যতঃ
28.54
সংস্থাপ্য তং চাপি পুনঃ সমাশ্বাস্য চ খেচরম্
গতো যথেপ্সিতং দেশং হংসো মন ইবাশুগঃ
28.55
উচ্ছিষ্টভোজনাত্কাকো যথা বৈশ্যকুলে তু সঃ
এবং ত্বমুচ্ছিষ্টভৃতো ধার্তরাষ্ট্রৈর্ন সংশয়ঃ
সদৃশাঞ্শ্রেয়সশ্চাপি সর্বান্কর্ণাতিমন্যসে
28.56
দ্রোণদ্রৌণিকৃপৈর্গুপ্তো ভীষ্মেণান্যৈশ্চ কৌরবৈঃ
বিরাটনগরে পার্থমেকং কিং নাবধীস্তদা
28.57
যত্র ব্যস্তাঃ সমস্তাশ্চ নির্জিতাঃ স্থ কিরীটিনা
সৃগালা ইব সিংহেন ক্ব তে বীর্যমভূত্তদা
28.58
ভ্রাতরং চ হতং দৃষ্ট্বা নির্জিতঃ সব্যসাচিনা
পশ্যতাং কুরুবীরাণাং প্রথমং ত্বং পলায়থাঃ
28.59
তথা দ্বৈতবনে কর্ণ গন্ধর্বৈঃ সমভিদ্রুতঃ
কুরূন্সমগ্রানুত্সৃজ্য প্রথমং ত্বং পলায়থাঃ
28.60
হত্বা জিত্বা চ গন্ধর্বাংশ্চিত্রসেনমুখান্রণে
কর্ণ দুর্যোধনং পার্থঃ সভার্যং সমমোচয়ৎ
28.61
পুনঃ প্রভাবঃ পার্থস্য পুরাণঃ কেশবস্য চ
কথিতঃ কর্ণ রামেণ সভায়াং রাজসংসদি
28.62
সততং চ তদশ্রৌষীর্বচনং দ্রোণভীষ্ময়োঃ
অবধ্যৌ বদতোঃ কৃষ্ণৌ সংনিধৌ বৈ মহীক্ষিতাম্
28.63
কিয়ন্তং তত্র বক্ষ্যামি যেন যেন ধনংজয়ঃ
ত্বত্তোঽতিরিক্তঃ সর্বেভ্যো ভূতেভ্যো ব্রাহ্মণো যথা
28.64
ইদানীমেব দ্রষ্টাসি প্রধনে স্যন্দনে স্থিতৌ
পুত্রং চ বসুদেবস্য পাণ্ডবং চ ধনংজয়ম্
28.65
দেবাসুরমনুষ্যেষু প্রখ্যাতৌ যৌ নরর্ষভৌ
প্রকাশেনাভিবিখ্যাতৌ ত্বং তু খদ্যোতবন্নৃষু
28.66
এবং বিদ্বান্মাবমংস্থাঃ সূতপুত্রাচ্যুতার্জুনৌ
নৃসিংহৌ তৌ নরশ্বা ত্বং জোষমাস্স্ব বিকত্থন