Utshovঅধ্যায় 27
27.1
সংজয় উবাচ
প্রয়ানেব তদা কর্ণো হর্ষয়ন্বাহিনীং তব
একৈকং সমরে দৃষ্ট্বা পাণ্ডবং পর্যপৃচ্ছত
27.2
যো মমাদ্য মহাত্মানং দর্শয়েচ্ছ্বেতবাহনম্
তস্মৈ দদ্যামভিপ্রেতং বরং যং মনসেচ্ছতি
27.3
স চেত্তদভিমন্যেত তস্মৈ দদ্যামহং পুনঃ
শকটং রত্নসংপূর্ণং যো মে ব্রূয়াদ্ধনংজয়ম্
27.4
স চেত্তদভিমন্যেত পুরুষোঽর্জুনদর্শিবান্
অন্যং তস্মৈ পুনর্দদ্যাং সৌবর্ণং হস্তিষড্গবম্
27.5
তথা তস্মৈ পুনর্দদ্যাং স্ত্রীণাং শতমলংকৃতম্
শ্যামানাং নিষ্ককণ্ঠীনাং গীতবাদ্যবিপশ্চিতাম্
27.6
স চেত্তদভিমন্যেত পুরুষোঽর্জুনদর্শিবান্
অন্যং তস্মৈ বরং দদ্যাং শ্বেতান্পঞ্চশতান্হয়ান্
27.7
হেমভাণ্ডপরিচ্ছন্নান্সুমৃষ্টমণিকুণ্ডলান্
সুদান্তানপি চৈবাহং দদ্যামষ্টশতান্পরান্
27.8
রথং চ শুভ্রং সৌবর্ণং দদ্যাং তস্মৈ স্বলংকৃতম্
যুক্তং পরমকাম্বোজৈর্যো মে ব্রূয়াদ্ধনংজয়ম্
27.9
অন্যং তস্মৈ বরং দদ্যাং কুঞ্জরাণাং শতানি ষট্
কাঞ্চনৈর্বিবিধৈর্ভাণ্ডৈরাচ্ছন্নান্হেমমালিনঃ
উত্পন্নানপরান্তেষু বিনীতান্হস্তিশিক্ষকৈঃ
27.10
স চেত্তদভিমন্যেত পুরুষোঽর্জুনদর্শিবান্
অন্যং তস্মৈ বরং দদ্যাং যমসৌ কাময়েত্স্বয়ম্
27.11
পুত্রদারান্বিহারাংশ্চ যদন্যদ্বিত্তমস্তি মে
তচ্চ তস্মৈ পুনর্দদ্যাং যদ্যত্স মনসেচ্ছতি
27.12
হত্বা চ সহিতৌ কৃষ্ণৌ তয়োর্বিত্তানি সর্বশঃ
তস্মৈ দদ্যামহং যো মে প্রব্রূয়াত্কেশবার্জুনৌ
27.13
এতা বাচঃ সুবহুশঃ কর্ণ উচ্চারয়ন্যুধি
দধ্মৌ সাগরসংভূতং সুস্বনং শঙ্খমুত্তমম্
27.14
তা বাচঃ সূতপুত্রস্য তথা যুক্তা নিশম্য তু
দুর্যোধনো মহারাজ প্রহৃষ্টঃ সানুগোঽভবৎ
27.15
ততো দুন্দুভিনির্ঘোষো মৃদঙ্গানাং চ সর্বশঃ
সিংহনাদঃ সবাদিত্রঃ কুঞ্জরাণাং চ নিস্বনঃ
27.16
প্রাদুরাসীত্তদা রাজংস্ত্বত্সৈন্যে ভরতর্ষভ
যোধানাং সংপ্রহৃষ্টানাং তথা সমভবত্স্বনঃ
27.17
তথা প্রহৃষ্টে সৈন্যে তু প্লবমানং মহারথম্
বিকত্থমানং সমরে রাধেয়মরিকর্শনম্
মদ্ররাজঃ প্রহস্যেদং বচনং প্রত্যভাষত
27.18
মা সূতপুত্র মানেন সৌবর্ণং হস্তিষড্গবম্
প্রয়চ্ছ পুরুষায়াদ্য দ্রক্ষ্যসি ত্বং ধনংজয়ম্
27.19
বাল্যাদিব ত্বং ত্যজসি বসু বৈশ্রবণো যথা
অয়ত্নেনৈব রাধেয় দ্রষ্টাস্যদ্য ধনংজয়ম্
27.20
পরাসৃজসি মিথ্যা কিং কিং চ ত্বং বহু মূঢবৎ
অপাত্রদানে যে দোষাস্তান্মোহান্নাববুধ্যসে
27.21
যত্প্রবেদয়সে বিত্তং বহুত্বেন খলু ত্বয়া
শক্যং বহুবিধৈর্যজ্ঞৈর্যষ্টুং সূত যজস্ব তৈঃ
27.22
যচ্চ প্রার্থয়সে হন্তুং কৃষ্ণৌ মোহান্মৃষৈব তৎ
ন হি শুশ্রুম সংমর্দে ক্রোষ্ট্রা সিংহৌ নিপাতিতৌ
27.23
অপ্রার্থিতং প্রার্থয়সে সুহৃদো ন হি সন্তি তে
যে ত্বাং ন বারয়ন্ত্যাশু প্রপতন্তং হুতাশনে
27.24
কালকার্যং ন জানীষে কালপক্বোঽস্যসংশয়ম্
বহ্ববদ্ধমকর্ণীয়ং কো হি ব্রূয়াজ্জিজীবিষুঃ
27.25
সমুদ্রতরণং দোর্ভ্যাং কণ্ঠে বদ্ধ্বা যথা শিলাম্
গির্যগ্রাদ্বা নিপতনং তাদৃক্তব চিকীর্ষিতম্
27.26
সহিতঃ সর্বয়োধৈস্ত্বং ব্যূঢানীকৈঃ সুরক্ষিতঃ
ধনংজয়েন যুধ্যস্ব শ্রেয়শ্চেত্প্রাপ্তুমিচ্ছসি
27.27
হিতার্থং ধার্তরাষ্ট্রস্য ব্রবীমি ত্বা ন হিংসয়া
শ্রদ্ধত্স্বৈতন্ময়া প্রোক্তং যদি তেঽস্তি জিজীবিষা
27.28
কর্ণ উবাচ
স্ববীর্যেঽহং পরাশ্বস্য প্রার্থয়াম্যর্জুনং রণে
ত্বং তু মিত্রমুখঃ শত্রুর্মাং ভীষয়িতুমিচ্ছসি
27.29
ন মামস্মাদভিপ্রায়াত্কশ্চিদদ্য নিবর্তয়েৎ
অপীন্দ্রো বজ্রমুদ্যম্য কিং নু মর্ত্যঃ করিষ্যতি
27.30
সংজয় উবাচ
ইতি কর্ণস্য বাক্যান্তে শল্যঃ প্রাহোত্তরং বচঃ
চুকোপয়িষুরত্যর্থং কর্ণং মদ্রেশ্বরঃ পুনঃ
27.31
যদা বৈ ত্বাং ফল্গুনবেগনুন্না; জ্যাচোদিতা হস্তবতা বিসৃষ্টাঃ
অন্বেতারঃ কঙ্কপত্রাঃ শিতাগ্রা;স্তদা তপ্স্যস্যর্জুনস্যাভিয়োগাৎ
27.32
যদা দিব্যং ধনুরাদায় পার্থঃ; প্রভাসয়ন্পৃতনাং সব্যসাচী
ত্বামর্দয়েত নিশিতৈঃ পৃষত্কৈ;স্তদা পশ্চাত্তপ্স্যসে সূতপুত্র
27.33
বালশ্চন্দ্রং মাতুরঙ্কে শয়ানো; যথা কশ্চিত্প্রার্থয়তেঽপহর্তুম্
তদ্বন্মোহাদ্যতমানো রথস্থ;স্ত্বং প্রার্থয়স্যর্জুনমদ্য জেতুম্
27.34
ত্রিশূলমাশ্লিষ্য সুতীক্ষ্ণধারং; সর্বাণি গাত্রাণি নিঘর্ষসি ত্বম্
সুতীক্ষ্ণধারোপমকর্মণা ত্বং; যুয়ুত্সসে যোঽর্জুনেনাদ্য কর্ণ
27.35
সিদ্ধং সিংহং কেসরিণং বৃহন্তং; বালো মূঢঃ ক্ষুদ্রমৃগস্তরস্বী
সমাহ্বয়েত্তদ্বদেতত্তবাদ্য; সমাহ্বানং সূতপুত্রার্জুনস্য
27.36
মা সূতপুত্রাহ্বয় রাজপুত্রং; মহাবীর্যং কেসরিণং যথৈব
বনে সৃগালঃ পিশিতস্য তৃপ্তো; মা পার্থমাসাদ্য বিনঙ্ক্ষ্যসি ত্বম্
27.37
ঈষাদন্তং মহানাগং প্রভিন্নকরটামুখম্
শশকাহ্বয়সে যুদ্ধে কর্ণ পার্থং ধনংজয়ম্
27.38
বিলস্থং কৃষ্ণসর্পং ত্বং বাল্যাত্কাষ্ঠেন বিধ্যসি
মহাবিষং পূর্ণকোশং যত্পার্থং যোদ্ধুমিচ্ছসি
27.39
সিংহং কেসরিণং ক্রুদ্ধমতিক্রম্যাভিনর্দসি
সৃগাল ইব মূঢত্বান্নৃসিংহং কর্ণ পাণ্ডবম্
27.40
সুপর্ণং পতগশ্রেষ্ঠং বৈনতেয়ং তরস্বিনম্
লট্বেবাহ্বয়সে পাতে কর্ণ পার্থং ধনংজয়ম্
27.41
সর্বাম্ভোনিলয়ং ভীমমূর্মিমন্তং ঝষায়ুতম্
চন্দ্রোদয়ে বিবর্তন্তমপ্লবঃ সংতিতীর্ষসি
27.42
ঋষভং দুন্দুভিগ্রীবং তীক্ষ্ণশৃঙ্গং প্রহারিণম্
বত্স আহ্বয়সে যুদ্ধে কর্ণ পার্থং ধনংজয়ম্
27.43
মহাঘোষং মহামেঘং দর্দুরঃ প্রতিনর্দসি
কামতোয়প্রদং লোকে নরপর্জন্যমর্জুনম্
27.44
যথা চ স্বগৃহস্থঃ শ্বা ব্যাঘ্রং বনগতং ভষেৎ
তথা ত্বং ভষসে কর্ণ নরব্যাঘ্রং ধনংজয়ম্
27.45
সৃগালোঽপি বনে কর্ণ শশৈঃ পরিবৃতো বসন্
মন্যতে সিংহমাত্মানং যাবত্সিংহং ন পশ্যতি
27.46
তথা ত্বমপি রাধেয় সিংহমাত্মানমিচ্ছসি
অপশ্যঞ্শত্রুদমনং নরব্যাঘ্রং ধনংজয়ম্
27.47
ব্যাঘ্রং ত্বং মন্যসেঽঽত্মানং যাবত্কৃষ্ণৌ ন পশ্যসি
সমাস্থিতাবেকরথে সূর্যাচন্দ্রমসাবিব
27.48
যাবদ্গাণ্ডীবনির্ঘোষং ন শৃণোষি মহাহবে
তাবদেব ত্বয়া কর্ণ শক্যং বক্তুং যথেচ্ছসি
27.49
রথশব্দধনুঃশব্দৈর্নাদয়ন্তং দিশো দশ
নর্দন্তমিব শার্দূলং দৃষ্ট্বা ক্রোষ্টা ভবিষ্যসি
27.50
নিত্যমেব সৃগালস্ত্বং নিত্যং সিংহো ধনংজয়ঃ
বীরপ্রদ্বেষণান্মূঢ নিত্যং ক্রোষ্টেব লক্ষ্যসে
27.51
যথাখুঃ স্যাদ্বিডালশ্চ শ্বা ব্যাঘ্রশ্চ বলাবলে
যথা সৃগালঃ সিংহশ্চ যথা চ শশকুঞ্জরৌ
27.52
যথানৃতং চ সত্যং চ যথা চাপি বিষামৃতে
তথা ত্বমপি পার্থশ্চ প্রখ্যাতাবাত্মকর্মভিঃ
27.53
সংজয় উবাচ
অধিক্ষিপ্তস্তু রাধেয়ঃ শল্যেনামিততেজসা
শল্যমাহ সুসংক্রুদ্ধো বাক্শল্যমবধারয়ন্
27.54
গুণান্গুণবতঃ শল্য গুণবান্বেত্তি নাগুণঃ
ত্বং তু নিত্যং গুণৈর্হীনঃ কিং জ্ঞাস্যস্যগুণো গুণান্
27.55
অর্জুনস্য মহাস্ত্রাণি ক্রোধং বীর্যং ধনুঃ শরান্
অহং শল্যাভিজানামি ন ত্বং জানাসি তত্তথা
27.56
এবমেবাত্মনো বীর্যমহং বীর্যং চ পাণ্ডবে
জানন্নেবাহ্বয়ে যুদ্ধে শল্য নাগ্নিং পতংগবৎ
27.57
অস্তি চায়মিষুঃ শল্য সুপুঙ্খো রক্তভোজনঃ
একতূণীশয়ঃ পত্রী সুধৌতঃ সমলংকৃতঃ
27.58
শেতে চন্দনপূর্ণেন পূজিতো বহুলাঃ সমাঃ
আহেয়ো বিষবানুগ্রো নরাশ্বদ্বিপসংঘহা
27.59
একবীরো মহারৌদ্রস্তনুত্রাস্থিবিদারণঃ
নির্ভিন্দ্যাং যেন রুষ্টোঽহমপি মেরুং মহাগিরিম্
27.60
তমহং জাতু নাস্যেয়মন্যস্মিন্ফল্গুনাদৃতে
কৃষ্ণাদ্বা দেবকীপুত্রাত্সত্যং চাত্র শৃণুষ্ব মে
27.61
তেনাহমিষুণা শল্য বাসুদেবধনংজয়ৌ
যোত্স্যে পরমসংক্রুদ্ধস্তত্কর্ম সদৃশং মম
27.62
সর্বেষাং বাসুদেবানাং কৃষ্ণে লক্ষ্মীঃ প্রতিষ্ঠিতা
সর্বেষাং পাণ্ডুপুত্রাণাং জয়ঃ পার্থে প্রতিষ্ঠিতঃ
উভয়ং তত্সমাসাদ্য কোঽতিবর্তিতুমর্হতি
27.63
তাবেতৌ পুরুষব্যাঘ্রৌ সমেতৌ স্যন্দনে স্থিতৌ
মামেকমভিসংয়াতৌ সুজাতং শল্য পশ্য মে
27.64
পিতৃষ্বসামাতুলজৌ ভ্রাতরাবপরাজিতৌ
মণী সূত্র ইব প্রোতৌ দ্রষ্টাসি নিহতৌ ময়া
27.65
অর্জুনে গাণ্ডিবং কৃষ্ণে চক্রং তার্ক্ষ্যকপিধ্বজৌ
ভীরূণাং ত্রাসজননৌ শল্য হর্ষকরৌ মম
27.66
ত্বং তু দুষ্প্রকৃতির্মূঢো মহায়ুদ্ধেষ্বকোবিদঃ
ভয়াবতীর্ণঃ সংত্রাসাদবদ্ধং বহু ভাষসে
27.67
সংস্তৌষি ত্বং তু কেনাপি হেতুনা তৌ কুদেশজ
তৌ হত্বা সমরে হন্তা ত্বামদ্ধা সহবান্ধবম্
27.68
পাপদেশজ দুর্বুদ্ধে ক্ষুদ্র ক্ষত্রিয়পাংসন
সুহৃদ্ভূত্বা রিপুঃ কিং মাং কৃষ্ণাভ্যাং ভীষয়ন্নসি
27.69
তৌ বা মমাদ্য হন্তারৌ হন্তাস্মি সমরে স্থিতৌ
নাহং বিভেমি কৃষ্ণাভ্যাং বিজানন্নাত্মনো বলম্
27.70
বাসুদেবসহস্রং বা ফল্গুনানাং শতানি চ
অহমেকো হনিষ্যামি জোষমাস্স্ব কুদেশজ
27.71
স্ত্রিয়ো বালাশ্চ বৃদ্ধাশ্চ প্রায়ঃ ক্রীডাগতা জনাঃ
যা গাথাঃ সংপ্রগায়ন্তি কুর্বন্তোঽধ্যয়নং যথা
তা গাথাঃ শৃণু মে শল্য মদ্রকেষু দুরাত্মসু
27.72
ব্রাহ্মণৈঃ কথিতাঃ পূর্বং যথাবদ্রাজসংনিধৌ
শ্রুত্বা চৈকমনা মূঢ ক্ষম বা ব্রূহি বোত্তরম্
27.73
মিত্রধ্রুঙ্মদ্রকো নিত্যং যো নো দ্বেষ্টি স মদ্রকঃ
মদ্রকে সংগতং নাস্তি ক্ষুদ্রবাক্যে নরাধমে
27.74
দুরাত্মা মদ্রকো নিত্যং নিত্যং চানৃতিকোঽনৃজুঃ
যাবদন্তং হি দৌরাত্ম্যং মদ্রকেষ্বিতি নঃ শ্রুতম্
27.75
পিতা মাতা চ পুত্রশ্চ শ্বশ্রূশ্বশুরমাতুলাঃ
জামাতা দুহিতা ভ্রাতা নপ্তা তে তে চ বান্ধবাঃ
27.76
বয়স্যাভ্যাগতাশ্চান্যে দাসীদাসং চ সংগতম্
পুংভির্বিমিশ্রা নার্যশ্চ জ্ঞাতাজ্ঞাতাঃ স্বয়েচ্ছয়া
27.77
যেষাং গৃহেষু শিষ্টানাং সক্তুমন্থাশিনাং সদা
পীত্বা সীধুং সগোমাংসং নর্দন্তি চ হসন্তি চ
27.78
যানি চৈবাপ্যবদ্ধানি প্রবর্তন্তে চ কামতঃ
কামপ্রলাপিনোঽন্যোন্যং তেষু ধর্মঃ কথং ভবেৎ
27.79
মদ্রকেষু বিলুপ্তেষু প্রখ্যাতাশুভকর্মসু
নাপি বৈরং ন সৌহার্দং মদ্রকেষু সমাচরেৎ
27.80
মদ্রকে সংগতং নাস্তি মদ্রকো হি সচাপলঃ
মদ্রকেষু চ দুঃস্পর্শং শৌচং গান্ধারকেষু চ
27.81
রাজয়াজকয়াজ্যেন নষ্টং দত্তং হবির্ভবেৎ
27.82
শূদ্রসংস্কারকো বিপ্রো যথা যাতি পরাভবম্
তথা ব্রহ্মদ্বিষো নিত্যং গচ্ছন্তীহ পরাভবম্
27.83
মদ্রকে সংগতং নাস্তি হতং বৃশ্চিকতো বিষম্
আথর্বণেন মন্ত্রেণ সর্বা শান্তিঃ কৃতা ভবেৎ
27.84
ইতি বৃশ্চিকদষ্টস্য নানাবিষহতস্য চ
কুর্বন্তি ভেষজং প্রাজ্ঞাঃ সত্যং তচ্চাপি দৃশ্যতে
এবং বিদ্বঞ্জোষমাস্স্ব শৃণু চাত্রোত্তরং বচঃ
27.85
বাসাংস্যুত্সৃজ্য নৃত্যন্তি স্ত্রিয়ো যা মদ্যমোহিতাঃ
মিথুনেঽসংয়তাশ্চাপি যথাকামচরাশ্চ তাঃ
তাসাং পুত্রঃ কথং ধর্মং মদ্রকো বক্তুমর্হতি
27.86
যাস্তিষ্ঠন্ত্যঃ প্রমেহন্তি যথৈবোষ্ট্রীদশেরকে
তাসাং বিভ্রষ্টলজ্জানাং নির্লজ্জানাং ততস্ততঃ
ত্বং পুত্রস্তাদৃশীনাং হি ধর্মং বক্তুমিহেচ্ছসি
27.87
সুবীরকং যাচ্যমানা মদ্রকা কষতি স্ফিজৌ
অদাতুকামা বচনমিদং বদতি দারুণম্
27.88
মা মা সুবীরকং কশ্চিদ্যাচতাং দয়িতো মম
পুত্রং দদ্যাং প্রতিপদং ন তু দদ্যাং সুবীরকম্
27.89
নার্যো বৃহত্যো নির্হ্রীকা মদ্রকাঃ কম্বলাবৃতাঃ
ঘস্মরা নষ্টশৌচাশ্চ প্রায় ইত্যনুশুশ্রুম
27.90
এবমাদি ময়ান্যৈর্বা শক্যং বক্তুং ভবেদ্বহু
আ কেশাগ্রান্নখাগ্রাচ্চ বক্তব্যেষু কুবর্ত্মসু
27.91
মদ্রকাঃ সিন্ধুসৌবীরা ধর্মং বিদ্যুঃ কথং ত্বিহ
পাপদেশোদ্ভবা ম্লেচ্ছা ধর্মাণামবিচক্ষণাঃ
27.92
এষ মুখ্যতমো ধর্মঃ ক্ষত্রিয়স্যেতি নঃ শ্রুতম্
যদাজৌ নিহতঃ শেতে সদ্ভিঃ সমভিপূজিতঃ
27.93
আয়ুধানাং সংপরায়ে যন্মুচ্যেয়মহং ততঃ
ন মে স প্রথমঃ কল্পো নিধনে স্বর্গমিচ্ছতঃ
27.94
সোঽহং প্রিয়ঃ সখা চাস্মি ধার্তরাষ্ট্রস্য ধীমতঃ
তদর্থে হি মম প্রাণা যচ্চ মে বিদ্যতে বসু
27.95
ব্যক্তং ত্বমপ্যুপহিতঃ পাণ্ডবৈঃ পাপদেশজ
যথা হ্যমিত্রবত্সর্বং ত্বমস্মাসু প্রবর্তসে
27.96
কামং ন খলু শক্যোঽহং ত্বদ্বিধানাং শতৈরপি
সংগ্রামাদ্বিমুখঃ কর্তুং ধর্মজ্ঞ ইব নাস্তিকৈঃ
27.97
সারঙ্গ ইব ঘর্মার্তঃ কামং বিলপ শুষ্য চ
নাহং ভীষয়িতুং শক্যঃ ক্ষত্রবৃত্তে ব্যবস্থিতঃ
27.98
তনুত্যজাং নৃসিংহানামাহবেষ্বনিবর্তিনাম্
যা গতির্গুরুণা প্রাঙ্মে প্রোক্তা রামেণ তাং স্মর
27.99
স্বেষাং ত্রাণার্থমুদ্যুক্তং বধায় দ্বিষতামপি
বিদ্ধি মামাস্থিতং বৃত্তং পৌরূরবসমুত্তমম্
27.100
ন তদ্ভূতং প্রপশ্যামি ত্রিষু লোকেষু মদ্রক
যো মামস্মাদভিপ্রায়াদ্বারয়েদিতি মে মতিঃ
27.101
এবং বিদ্বঞ্জোষমাস্স্ব ত্রাসাত্কিং বহু ভাষসে
মা ত্বা হত্বা প্রদাস্যামি ক্রব্যাদ্ভ্যো মদ্রকাধম
27.102
মিত্রপ্রতীক্ষয়া শল্য ধার্তরাষ্ট্রস্য চোভয়োঃ
অপবাদতিতিক্ষাভিস্ত্রিভিরেতৈর্হি জীবসি
27.103
পুনশ্চেদীদৃশং বাক্যং মদ্ররাজ বদিষ্যসি
শিরস্তে পাতয়িষ্যামি গদয়া বজ্রকল্পয়া
27.104
শ্রোতারস্ত্বিদমদ্যেহ দ্রষ্টারো বা কুদেশজ
কর্ণং বা জঘ্নতুঃ কৃষ্ণৌ কর্ণো বাপি জঘান তৌ
27.105
এবমুক্ত্বা তু রাধেয়ঃ পুনরেব বিশাং পতে
অব্রবীন্মদ্ররাজানং যাহি যাহীত্যসংভ্রমম্