Utshovঅধ্যায় 26
26.1
দুর্যোধন উবাচ
অয়ং তে কর্ণ সারথ্যং মদ্ররাজঃ করিষ্যতি
কৃষ্ণাদভ্যধিকো যন্তা দেবেন্দ্রস্যেব মাতলিঃ
26.2
যথা হরিহয়ৈর্যুক্তং সংগৃহ্ণাতি স মাতলিঃ
শল্যস্তব তথাদ্যায়ং সংয়ন্তা রথবাজিনাম্
26.3
যোধে ত্বয়ি রথস্থে চ মদ্ররাজে চ সারথৌ
রথশ্রেষ্ঠো ধ্রুবং সংখ্যে পার্থো নাভিভবিষ্যতি
26.4
সংজয় উবাচ
ততো দুর্যোধনো ভূয়ো মদ্ররাজং তরস্বিনম্
উবাচ রাজন্সংগ্রামে সংয়চ্ছন্তং হয়োত্তমান্
26.5
ত্বয়াভিগুপ্তো রাধেয়ো বিজেষ্যতি ধনংজয়ম্
ইত্যুক্তো রথমাস্থায় তথেতি প্রাহ ভারত
26.6
শল্যেঽভ্যুপগতে কর্ণঃ সারথিং সুমনোঽব্রবীৎ
স্বং সূত স্যন্দনং মহ্যং কল্পয়েত্যসকৃত্ত্বরন্
26.7
ততো জৈত্রং রথবরং গন্ধর্বনগরোপমম্
বিধিবত্কল্পিতং ভর্ত্রে জয়েত্যুক্ত্বা ন্যবেদয়ৎ
26.8
তং রথং রথিনাং শ্রেষ্ঠঃ কর্ণোঽভ্যর্চ্য যথাবিধি
সংপাদিতং ব্রহ্মবিদা পূর্বমেব পুরোধসা
26.9
কৃত্বা প্রদক্ষিণং যত্নাদুপস্থায় চ ভাস্করম্
সমীপস্থং মদ্ররাজং সমারোপয়দগ্রতঃ
26.10
ততঃ কর্ণস্য দুর্ধর্ষং স্যন্দনপ্রবরং মহৎ
আরুরোহ মহাতেজাঃ শল্যঃ সিংহ ইবাচলম্
26.11
ততঃ শল্যাস্থিতং রাজন্কর্ণঃ স্বরথমুত্তমম্
অধ্যতিষ্ঠদ্যথাম্ভোদং বিদ্যুত্বন্তং দিবাকরঃ
26.12
তাবেকরথমারূঢাবাদিত্যাগ্নিসমত্বিষৌ
ব্যভ্রাজেতাং যথা মেঘং সূর্যাগ্নী সহিতৌ দিবি
26.13
সংস্তূয়মানৌ তৌ বীরৌ তদাস্তাং দ্যুতিমত্তরৌ
ঋত্বিক্সদস্যৈরিন্দ্রাগ্নী হূয়মানাবিবাধ্বরে
26.14
স শল্যসংগৃহীতাশ্বে রথে কর্ণঃ স্থিতোঽভবৎ
ধনুর্বিস্ফারয়ন্ঘোরং পরিবেষীব ভাস্করঃ
26.15
আস্থিতঃ স রথশ্রেষ্ঠং কর্ণঃ শরগভস্তিমান্
প্রবভৌ পুরুষব্যাঘ্রো মন্দরস্থ ইবাংশুমান্
26.16
তং রথস্থং মহাবীরং যান্তং চামিততেজসম্
দুর্যোধনঃ স্ম রাধেয়মিদং বচনমব্রবীৎ
26.17
অকৃতং দ্রোণভীষ্মাভ্যাং দুষ্করং কর্ম সংয়ুগে
কুরুষ্বাধিরথে বীর মিষতাং সর্বধন্বিনাম্
26.18
মনোগতং মম হ্যাসীদ্ভীষ্মদ্রোণৌ মহারথৌ
অর্জুনং ভীমসেনং চ নিহন্তারাবিতি ধ্রুবম্
26.19
তাভ্যাং যদকৃতং বীর বীরকর্ম মহামৃধে
তত্কর্ম কুরু রাধেয় বজ্রপাণিরিবাপরঃ
26.20
গৃহাণ ধর্মরাজং বা জহি বা ত্বং ধনংজয়ম্
ভীমসেনং চ রাধেয় মাদ্রীপুত্রৌ যমাবপি
26.21
জয়শ্চ তেঽস্তু ভদ্রং চ প্রয়াহি পুরুষর্ষভ
পাণ্ডুপুত্রস্য সৈন্যানি কুরু সর্বাণি ভস্মসাৎ
26.22
ততস্তূর্যসহস্রাণি ভেরীণাময়ুতানি চ
বাদ্যমানান্যরোচন্ত মেঘশব্দা যথা দিবি
26.23
প্রতিগৃহ্য তু তদ্বাক্যং রথস্থো রথসত্তমঃ
অভ্যভাষত রাধেয়ঃ শল্যং যুদ্ধবিশারদম্
26.24
চোদয়াশ্বান্মহাবাহো যাবদ্ধন্মি ধনংজয়ম্
ভীমসেনং যমৌ চোভৌ রাজানং চ যুধিষ্ঠিরম্
26.25
অদ্য পশ্যতু মে শল্য বাহুবীর্যং ধনংজয়ঃ
অস্যতঃ কঙ্কপত্রাণাং সহস্রাণি শতানি চ
26.26
অদ্য ক্ষেপ্স্যাম্যহং শল্য শরান্পরমতেজনান্
পাণ্ডবানাং বিনাশায় দুর্যোধনজয়ায় চ
26.27
শল্য উবাচ
সূতপুত্র কথং নু ত্বং পাণ্ডবানবমন্যসে
সর্বাস্ত্রজ্ঞান্মহেষ্বাসান্সর্বানেব মহারথান্
26.28
অনিবর্তিনো মহাভাগানজেয়ান্সত্যবিক্রমান্
অপি সংজনয়েয়ুর্যে ভয়ং সাক্ষাচ্ছতক্রতোঃ
26.29
যদা শ্রোষ্যসি নির্ঘোষং বিস্ফূর্জিতমিবাশনেঃ
রাধেয় গাণ্ডিবস্যাজৌ তদা নৈবং বদিষ্যসি
26.30
সংজয় উবাচ
অনাদৃত্য তু তদ্বাক্যং মদ্ররাজেন ভাষিতম্
দ্রক্ষ্যস্যদ্যেত্যবোচদ্বৈ শল্যং কর্ণো নরেশ্বর
26.31
দৃষ্ট্বা কর্ণং মহেষ্বাসং যুয়ুত্সুং সমবস্থিতম্
চুক্রুশুঃ কুরবঃ সর্বে হৃষ্টরূপাঃ পরংতপ
26.32
ততো দুন্দুভিঘোষেণ ভেরীণাং নিনদেন চ
বাণশব্দৈশ্চ বিবিধৈর্গর্জিতৈশ্চ তরস্বিনাম্
নির্যয়ুস্তাবকা যুদ্ধে মৃত্যুং কৃত্বা নিবর্তনম্
26.33
প্রয়াতে তু ততঃ কর্ণে যোধেষু মুদিতেষু চ
চচাল পৃথিবী রাজন্ররাস চ সুবিস্বরম্
26.34
নিশ্চরন্তো ব্যদৃশ্যন্ত সূর্যাত্সপ্ত মহাগ্রহাঃ
উল্কাপাতশ্চ সংজজ্ঞে দিশাং দাহস্তথৈব চ
তথাশন্যশ্চ সংপেতুর্ববুর্বাতাশ্চ দারুণাঃ
26.35
মৃগপক্ষিগণাশ্চৈব বহুশঃ পৃতনাং তব
অপসব্যং তদা চক্রুর্বেদয়ন্তো মহদ্ভয়ম্
26.36
প্রস্থিতস্য চ কর্ণস্য নিপেতুস্তুরগা ভুবি
অস্থিবর্ষং চ পতিতমন্তরিক্ষাদ্ভয়ানকম্
26.37
জজ্বলুশ্চৈব শস্ত্রাণি ধ্বজাশ্চৈব চকম্পিরে
অশ্রূণি চ ব্যমুঞ্চন্ত বাহনানি বিশাং পতে
26.38
এতে চান্যে চ বহব উত্পাতাস্তত্র মারিষ
সমুত্পেতুর্বিনাশায় কৌরবাণাং সুদারুণাঃ
26.39
ন চ তান্গণয়ামাসুঃ সর্বে তে দৈবমোহিতাঃ
প্রস্থিতং সূতপুত্রং চ জয়েত্যূচুর্নরা ভুবি
নির্জিতান্পাণ্ডবাংশ্চৈব মেনিরে তব কৌরবাঃ
26.40
ততো রথস্থঃ পরবীরহন্তা; ভীষ্মদ্রোণাবাত্তবীর্যৌ নিরীক্ষ্য
সমজ্বলদ্ভারত পাবকাভো; বৈকর্তনোঽসৌ রথকুঞ্জরো বৃষঃ
26.41
স শল্যমাভাষ্য জগাদ বাক্যং; পার্থস্য কর্মাপ্রতিমং চ দৃষ্ট্বা
মানেন দর্পেণ চ দহ্যমানঃ; ক্রোধেন দীপ্যন্নিব নিঃশ্বসিত্বা
26.42
নাহং মহেন্দ্রাদপি বজ্রপাণেঃ; ক্রুদ্ধাদ্বিভেম্যাত্তধনূ রথস্থঃ
দৃষ্ট্বা তু ভীষ্মপ্রমুখাঞ্শয়ানা;ন্ন ত্বেব মাং স্থিরতা সংজহাতি
26.43
মহেন্দ্রবিষ্ণুপ্রতিমাবনিন্দিতৌ; রথাশ্বনাগপ্রবরপ্রমাথিনৌ
অবধ্যকল্পৌ নিহতৌ যদা পরৈ;স্ততো মমাদ্যাপি রণেঽস্তি সাধ্বসম্
26.44
সমীক্ষ্য সংখ্যেঽতিবলান্নরাধিপৈ;র্নরাশ্বমাতঙ্গরথাঞ্শরৈর্হতান্
কথং ন সর্বানহিতান্রণেঽবধী;ন্মহাস্ত্রবিদ্ব্রাহ্মণপুংগবো গুরুঃ
26.45
স সংস্মরন্দ্রোণহবং মহাহবে; ব্রবীমি সত্যং কুরবো নিবোধত
ন বো মদন্যঃ প্রসহেদ্রণেঽর্জুনং; ক্রমাগতং মৃত্যুমিবোগ্ররূপিণম্
26.46
শিক্ষা প্রসাদশ্চ বলং ধৃতিশ্চ; দ্রোণে মহাস্ত্রাণি চ সংনতিশ্চ
স চেদগান্মৃত্যুবশং মহাত্মা; সর্বানন্যানাতুরানদ্য মন্যে
26.47
নেহ ধ্রুবং কিংচিদপি প্রচিন্ত্যং; বিদুর্লোকে কর্মণোঽনিত্যয়োগাৎ
সূর্যোদয়ে কো হি বিমুক্তসংশয়ো; গর্বং কুর্বীতাদ্য গুরৌ নিপাতিতে
26.48
ন নূনমস্ত্রাণি বলং পরাক্রমঃ; ক্রিয়া সুনীতং পরমায়ুধানি বা
অলং মনুষ্যস্য সুখায় বর্তিতুং; তথা হি যুদ্ধে নিহতঃ পরৈর্গুরুঃ
26.49
হুতাশনাদিত্যসমানতেজসং; পরাক্রমে বিষ্ণুপুরংদরোপমম্
নয়ে বৃহস্পত্যুশনঃসমং সদা; ন চৈনমস্ত্রং তদপাত্সুদুঃসহম্
26.50
সংপ্রক্রুষ্টে রুদিতস্ত্রীকুমারে; পরাভূতে পৌরুষে ধার্তরাষ্ট্রে
ময়া কৃত্যমিতি জানামি শল্য; প্রয়াহি তস্মাদ্দ্বিষতামনীকম্
26.51
যত্র রাজা পাণ্ডবঃ সত্যসংধো; ব্যবস্থিতো ভীমসেনার্জুনৌ চ
বাসুদেবঃ সৃঞ্জয়াঃ সাত্যকিশ্চ; যমৌ চ কস্তৌ বিষহেন্মদন্যঃ
26.52
তস্মাত্ক্ষিপ্রং মদ্রপতে প্রয়াহি; রণে পাঞ্চালান্পাণ্ডবান্সৃঞ্জয়াংশ্চ
তান্বা হনিষ্যামি সমেত্য সংখ্যে; যাস্যামি বা দ্রোণমুখায় মন্যে
26.53
ন ত্বেবাহং ন গমিষ্যামি মধ্যং; তেষাং শূরাণামিতি মা শল্য বিদ্ধি
মিত্রদ্রোহো মর্ষণীয়ো ন মেঽয়ং; ত্যক্ত্বা প্রাণাননুয়াস্যামি দ্রোণম্
26.54
প্রাজ্ঞস্য মূঢস্য চ জীবিতান্তে; প্রাণপ্রমোক্ষোঽন্তকবক্ত্রগস্য
অতো বিদ্বন্নভিয়াস্যামি পার্থং; দিষ্টং ন শক্যং ব্যতিবর্তিতুং বৈ
26.55
কল্যাণবৃত্তঃ সততং হি রাজ;ন্বৈচিত্রবীর্যস্য সুতো মমাসীৎ
তস্যার্থসিদ্ধ্যর্থমহং ত্যজামি; প্রিয়ান্ভোগান্দুস্ত্যজং জীবিতং চ
26.56
বৈয়াঘ্রচর্মাণমকূজনাক্ষং; হৈমত্রিকোশং রজতত্রিবেণুম্
রথপ্রবর্হং তুরগপ্রবর্হৈ;র্যুক্তং প্রাদান্মহ্যমিদং হি রামঃ
26.57
ধনূংষি চিত্রাণি নিরীক্ষ্য শল্য; ধ্বজং গদাং সায়কাংশ্চোগ্ররূপান্
অসিং চ দীপ্তং পরমায়ুধং চ; শঙ্খং চ শুভ্রং স্বনবন্তমুগ্রম্
26.58
পতাকিনং বজ্রনিপাতনিস্বনং; সিতাশ্বয়ুক্তং শুভতূণশোভিতম্
ইমং সমাস্থায় রথং রথর্ষভং; রণে হনিষ্যাম্যহমর্জুনং বলাৎ
26.59
তং চেন্মৃত্যুঃ সর্বহরোঽভিরক্ষতে; সদাপ্রমত্তঃ সমরে পাণ্ডুপুত্রম্
তং বা হনিষ্যামি সমেত্য যুদ্ধে; যাস্যামি বা ভীষ্মমুখো যমায়
26.60
যমবরুণকুবেরবাসবা বা; যদি যুগপত্সগণা মহাহবে
জুগুপিষব ইহৈত্য পাণ্ডবং; কিমু বহুনা সহ তৈর্জয়ামি তম্
26.61
ইতি রণরভসস্য কত্থত;স্তদুপনিশম্য বচঃ স মদ্ররাট্
অবহসদবমন্য বীর্যবা;ন্প্রতিষিষিধে চ জগাদ চোত্তরম্
26.62
বিরম বিরম কর্ণ কত্থনা;দতিরভসোঽস্যতি চাপ্যয়ুক্তবাক্
ক্ব চ হি নরবরো ধনংজয়ঃ; ক্ব পুনরিহ ত্বমুপারমাবুধ
26.63
যদুসদনমুপেন্দ্রপালিতং; ত্রিদিবমিবামররাজরক্ষিতম্
প্রসভমিহ বিলোক্য কো হরে;ত্পুরুষবরাবরজামৃতেঽর্জুনাৎ
26.64
ত্রিভুবনসৃজমীশ্বরেশ্বরং; ক ইহ পুমান্ভবমাহ্বয়েদ্যুধি
মৃগবধকলহে ঋতেঽর্জুনা;ত্সুরপতিবীর্যসমপ্রভাবতঃ
26.65
অসুরসুরমহোরগান্নরা;ন্গরুডপিশাচসয়ক্ষরাক্ষসান্
ইষুভিরজয়দগ্নিগৌরবা;ত্স্বভিলষিতং চ হবির্দদৌ জয়ঃ
26.66
স্মরসি ননু যদা পরৈর্হৃতঃ; স চ ধৃতরাষ্ট্রসুতো বিমোক্ষিতঃ
দিনকরজ নরোত্তমৈর্যদা; মরুষু বহূন্বিনিহত্য তানরীন্
26.67
প্রথমমপি পলায়িতে ত্বয়ি; প্রিয়কলহা ধৃতরাষ্ট্রসূনবঃ
স্মরসি ননু যদা প্রমোচিতাঃ; খচরগণানবজিত্য পাণ্ডবৈঃ
26.68
সমুদিতবলবাহনাঃ পুনঃ; পুরুষবরেণ জিতাঃ স্থ গোগ্রহে
সগুরুগুরুসুতাঃ সভীষ্মকাঃ; কিমু ন জিতঃ স তদা ত্বয়ার্জুনঃ
26.69
ইদমপরমুপস্থিতং পুন;স্তব নিধনায় সুয়ুদ্ধমদ্য বৈ
যদি ন রিপুভয়াত্পলায়সে; সমরগতোঽদ্য হতোঽসি সূতজ
26.70
সংজয় উবাচ
ইতি বহুপরুষং প্রভাষতি; প্রমনসি মদ্রপতৌ রিপুস্তবম্
ভৃশমতিরুষিতঃ পরং বৃষঃ; কুরুপৃতনাপতিরাহ মদ্রপম্
26.71
ভবতু ভবতু কিং বিকত্থসে; ননু মম তস্য চ যুদ্ধমুদ্যতম্
যদি স জয়তি মাং মহাহবে; তত ইদমস্তু সুকত্থিতং তব
26.72
এবমস্ত্বিতি মদ্রেশ উক্ত্বা নোত্তরমুক্তবান্
যাহি মদ্রেশ চাপ্যেনং কর্ণঃ প্রাহ যুয়ুত্সয়া
26.73
স রথঃ প্রয়য়ৌ শত্রূঞ্শ্বেতাশ্বঃ শল্যসারথিঃ
নিঘ্নন্নমিত্রান্সমরে তমো ঘ্নন্সবিতা যথা
26.74
ততঃ প্রায়াত্প্রীতিমান্বৈ রথেন; বৈয়াঘ্রেণ শ্বেতয়ুজাথ কর্ণঃ
স চালোক্য ধ্বজিনীং পাণ্ডবানাং; ধনংজয়ং ত্বরয়া পর্যপৃচ্ছৎ