অধ্যায় 25

25.1

দুর্যোধন উবাচ
এবং স ভগবান্দেবঃ সর্বলোকপিতামহঃ
সারথ্যমকরোত্তত্র যত্র রুদ্রোঽভবদ্রথী

রথিনাভ্যধিকো বীরঃ কর্তব্যো রথসারথিঃ
তস্মাত্ত্বং পুরুষব্যাঘ্র নিয়চ্ছ তুরগান্যুধি

সংজয় উবাচ
ততঃ শল্যঃ পরিষ্বজ্য সুতং তে বাক্যমব্রবীৎ
দুর্যোধনমমিত্রঘ্নঃ প্রীতো মদ্রাধিপস্তদা

এবং চেন্মন্যসে রাজন্গান্ধারে প্রিয়দর্শন
তস্মাত্তে যত্প্রিয়ং কিংচিত্তত্সর্বং করবাণ্যহম্

যত্রাস্মি ভরতশ্রেষ্ঠ যোগ্যঃ কর্মণি কর্হিচিৎ
তত্র সর্বাত্মনা যুক্তো বক্ষ্যে কার্যধুরং তব

যত্তু কর্ণমহং ব্রূয়াং হিতকামঃ প্রিয়াপ্রিয়ম্
মম তত্ক্ষমতাং সর্বং ভবান্কর্ণশ্চ সর্বশঃ

কর্ণ উবাচ
ঈশানস্য যথা ব্রহ্মা যথা পার্থস্য কেশবঃ
তথা নিত্যং হিতে যুক্তো মদ্ররাজ ভজস্ব নঃ

শল্য উবাচ
আত্মনিন্দাত্মপূজা চ পরনিন্দা পরস্তবঃ
অনাচরিতমার্যাণাং বৃত্তমেতচ্চতুর্বিধম্

যত্তু বিদ্বন্প্রবক্ষ্যামি প্রত্যয়ার্থমহং তব
আত্মনঃ স্তবসংয়ুক্তং তন্নিবোধ যথাতথম্

অহং শক্রস্য সারথ্যে যোগ্যো মাতলিবত্প্রভো
অপ্রমাদপ্রয়োগাচ্চ জ্ঞানবিদ্যাচিকিত্সিতৈঃ

ততঃ পার্থেন সংগ্রামে যুধ্যমানস্য তেঽনঘ
বাহয়িষ্যামি তুরগান্বিজ্বরো ভব সূতজ