Chapter 25

25.1

दुर्योधन उवाच
एवं स भगवान्देवः सर्वलोकपितामहः
सारथ्यमकरोत्तत्र यत्र रुद्रोऽभवद्रथी

Duryodhana uvacha
Evam sa bhagavandevah sarvalokapitamahah
Sarathyamakarottatra yatra rudrobhavadrathi

रथिनाभ्यधिको वीरः कर्तव्यो रथसारथिः
तस्मात्त्वं पुरुषव्याघ्र नियच्छ तुरगान्युधि

Rathinabhyadhiko virah kartavyo rathasarathih
Tasmattvam purushavyaghra niyachchha turaganyudhi

संजय उवाच
ततः शल्यः परिष्वज्य सुतं ते वाक्यमब्रवीत्
दुर्योधनममित्रघ्नः प्रीतो मद्राधिपस्तदा

Sanjaya uvacha
Tatah shalyah parishvajya sutam te vakyamabravit
Duryodhanamamitraghnah prito madradhipastada

एवं चेन्मन्यसे राजन्गान्धारे प्रियदर्शन
तस्मात्ते यत्प्रियं किंचित्तत्सर्वं करवाण्यहम्

Evam chenmanyase rajangandhare priyadarshana
Tasmatte yatpriyam kinchittatsarvam karavanyaham

यत्रास्मि भरतश्रेष्ठ योग्यः कर्मणि कर्हिचित्
तत्र सर्वात्मना युक्तो वक्ष्ये कार्यधुरं तव

Yatrasmi bharatashreshtha yogyah karmani karhichit
Tatra sarvatmana yukto vakshye karyadhuram tava

यत्तु कर्णमहं ब्रूयां हितकामः प्रियाप्रियम्
मम तत्क्षमतां सर्वं भवान्कर्णश्च सर्वशः

Yattu karnamaham bruyam hitakamah priyapriyam
Mama tatkshamatam sarvam bhavankarnashcha sarvashah

कर्ण उवाच
ईशानस्य यथा ब्रह्मा यथा पार्थस्य केशवः
तथा नित्यं हिते युक्तो मद्रराज भजस्व नः

Karna uvacha
Ishanasya yatha brahma yatha parthasya keshavah
Tatha nityam hite yukto madraraja bhajasva nah

शल्य उवाच
आत्मनिन्दात्मपूजा च परनिन्दा परस्तवः
अनाचरितमार्याणां वृत्तमेतच्चतुर्विधम्

Shalya uvacha
Atmanindatmapuja cha paraninda parastavah
Anacharitamaryanam vrittametachchaturvidham

यत्तु विद्वन्प्रवक्ष्यामि प्रत्ययार्थमहं तव
आत्मनः स्तवसंयुक्तं तन्निबोध यथातथम्

Yattu vidvanpravakshyami pratyayarthamaham tava
Atmanah stavasanyuktam tannibodha yathatatham

अहं शक्रस्य सारथ्ये योग्यो मातलिवत्प्रभो
अप्रमादप्रयोगाच्च ज्ञानविद्याचिकित्सितैः

Aham shakrasya sarathye yogyo matalivatprabho
Apramadaprayogachcha gyanavidyachikitsitaih

ततः पार्थेन संग्रामे युध्यमानस्य तेऽनघ
वाहयिष्यामि तुरगान्विज्वरो भव सूतज

Tatah parthena sangrame yudhyamanasya tenagha
Vahayishyami turaganvijvaro bhava sutaja