UtshovChapter 26
26.1
दुर्योधन उवाच
अयं ते कर्ण सारथ्यं मद्रराजः करिष्यति
कृष्णादभ्यधिको यन्ता देवेन्द्रस्येव मातलिः
Duryodhana uvacha
Ayam te karna sarathyam madrarajah karishyati
Krishnadabhyadhiko yanta devendrasyeva matalih
26.2
यथा हरिहयैर्युक्तं संगृह्णाति स मातलिः
शल्यस्तव तथाद्यायं संयन्ता रथवाजिनाम्
Yatha harihayairyuktam sangrihnati sa matalih
Shalyastava tathadyayam sanyanta rathavajinam
26.3
योधे त्वयि रथस्थे च मद्रराजे च सारथौ
रथश्रेष्ठो ध्रुवं संख्ये पार्थो नाभिभविष्यति
Yodhe tvayi rathasthe cha madraraje cha sarathau
Rathashreshtho dhruvam sankhye partho nabhibhavishyati
26.4
संजय उवाच
ततो दुर्योधनो भूयो मद्रराजं तरस्विनम्
उवाच राजन्संग्रामे संयच्छन्तं हयोत्तमान्
Sanjaya uvacha
Tato duryodhano bhuyo madrarajam tarasvinam
Uvacha rajansangrame sanyachchhantam hayottaman
26.5
त्वयाभिगुप्तो राधेयो विजेष्यति धनंजयम्
इत्युक्तो रथमास्थाय तथेति प्राह भारत
Tvayabhigupto radheyo vijeshyati dhananjayam
Ityukto rathamasthaya tatheti praha bharata
26.6
शल्येऽभ्युपगते कर्णः सारथिं सुमनोऽब्रवीत्
स्वं सूत स्यन्दनं मह्यं कल्पयेत्यसकृत्त्वरन्
Shalyebhyupagate karnah sarathim sumanobravit
Svam suta syandanam mahyam kalpayetyasakrittvaran
26.7
ततो जैत्रं रथवरं गन्धर्वनगरोपमम्
विधिवत्कल्पितं भर्त्रे जयेत्युक्त्वा न्यवेदयत्
Tato jaitram rathavaram gandharvanagaropamam
Vidhivatkalpitam bhartre jayetyuktva nyavedayat
26.8
तं रथं रथिनां श्रेष्ठः कर्णोऽभ्यर्च्य यथाविधि
संपादितं ब्रह्मविदा पूर्वमेव पुरोधसा
Tam ratham rathinam shreshthah karnobhyarchya yathavidhi
Sampaditam brahmavida purvameva purodhasa
26.9
कृत्वा प्रदक्षिणं यत्नादुपस्थाय च भास्करम्
समीपस्थं मद्रराजं समारोपयदग्रतः
Kritva pradakshinam yatnadupasthaya cha bhaskaram
Samipastham madrarajam samaropayadagratah
26.10
ततः कर्णस्य दुर्धर्षं स्यन्दनप्रवरं महत्
आरुरोह महातेजाः शल्यः सिंह इवाचलम्
Tatah karnasya durdharsham syandanapravaram mahat
Aruroha mahatejah shalyah sinha ivachalam
26.11
ततः शल्यास्थितं राजन्कर्णः स्वरथमुत्तमम्
अध्यतिष्ठद्यथाम्भोदं विद्युत्वन्तं दिवाकरः
Tatah shalyasthitam rajankarnah svarathamuttamam
Adhyatishthadyathambhodam vidyutvantam divakarah
26.12
तावेकरथमारूढावादित्याग्निसमत्विषौ
व्यभ्राजेतां यथा मेघं सूर्याग्नी सहितौ दिवि
Tavekarathamarudhavadityagnisamatvishau
Vyabhrajetam yatha megham suryagni sahitau divi
26.13
संस्तूयमानौ तौ वीरौ तदास्तां द्युतिमत्तरौ
ऋत्विक्सदस्यैरिन्द्राग्नी हूयमानाविवाध्वरे
Sanstuyamanau tau virau tadastam dyutimattarau
Ritviksadasyairindragni huyamanavivadhvare
26.14
स शल्यसंगृहीताश्वे रथे कर्णः स्थितोऽभवत्
धनुर्विस्फारयन्घोरं परिवेषीव भास्करः
Sa shalyasangrihitashve rathe karnah sthitobhavat
Dhanurvispharayanghoram pariveshiva bhaskarah
26.15
आस्थितः स रथश्रेष्ठं कर्णः शरगभस्तिमान्
प्रबभौ पुरुषव्याघ्रो मन्दरस्थ इवांशुमान्
Asthitah sa rathashreshtham karnah sharagabhastiman
Prababhau purushavyaghro mandarastha ivanshuman
26.16
तं रथस्थं महावीरं यान्तं चामिततेजसम्
दुर्योधनः स्म राधेयमिदं वचनमब्रवीत्
Tam rathastham mahaviram yantam chamitatejasam
Duryodhanah sma radheyamidam vachanamabravit
26.17
अकृतं द्रोणभीष्माभ्यां दुष्करं कर्म संयुगे
कुरुष्वाधिरथे वीर मिषतां सर्वधन्विनाम्
Akritam dronabhishmabhyam dushkaram karma sanyuge
Kurushvadhirathe vira mishatam sarvadhanvinam
26.18
मनोगतं मम ह्यासीद्भीष्मद्रोणौ महारथौ
अर्जुनं भीमसेनं च निहन्ताराविति ध्रुवम्
Manogatam mama hyasidbhishmadronau maharathau
Arjunam bhimasenam cha nihantaraviti dhruvam
26.19
ताभ्यां यदकृतं वीर वीरकर्म महामृधे
तत्कर्म कुरु राधेय वज्रपाणिरिवापरः
Tabhyam yadakritam vira virakarma mahamridhe
Tatkarma kuru radheya vajrapanirivaparah
26.20
गृहाण धर्मराजं वा जहि वा त्वं धनंजयम्
भीमसेनं च राधेय माद्रीपुत्रौ यमावपि
Grihana dharmarajam va jahi va tvam dhananjayam
Bhimasenam cha radheya madriputrau yamavapi
26.21
जयश्च तेऽस्तु भद्रं च प्रयाहि पुरुषर्षभ
पाण्डुपुत्रस्य सैन्यानि कुरु सर्वाणि भस्मसात्
Jayashcha testu bhadram cha prayahi purusharshabha
Panduputrasya sainyani kuru sarvani bhasmasat
26.22
ततस्तूर्यसहस्राणि भेरीणामयुतानि च
वाद्यमानान्यरोचन्त मेघशब्दा यथा दिवि
Tatasturyasahasrani bherinamayutani cha
Vadyamananyarochanta meghashabda yatha divi
26.23
प्रतिगृह्य तु तद्वाक्यं रथस्थो रथसत्तमः
अभ्यभाषत राधेयः शल्यं युद्धविशारदम्
Pratigrihya tu tadvakyam rathastho rathasattamah
Abhyabhashata radheyah shalyam yuddhavisharadam
26.24
चोदयाश्वान्महाबाहो यावद्धन्मि धनंजयम्
भीमसेनं यमौ चोभौ राजानं च युधिष्ठिरम्
Chodayashvanmahabaho yavaddhanmi dhananjayam
Bhimasenam yamau chobhau rajanam cha yudhishthiram
26.25
अद्य पश्यतु मे शल्य बाहुवीर्यं धनंजयः
अस्यतः कङ्कपत्राणां सहस्राणि शतानि च
Adya pashyatu me shalya bahuviryam dhananjayah
Asyatah kankapatranam sahasrani shatani cha
26.26
अद्य क्षेप्स्याम्यहं शल्य शरान्परमतेजनान्
पाण्डवानां विनाशाय दुर्योधनजयाय च
Adya kshepsyamyaham shalya sharanparamatejanan
Pandavanam vinashaya duryodhanajayaya cha
26.27
शल्य उवाच
सूतपुत्र कथं नु त्वं पाण्डवानवमन्यसे
सर्वास्त्रज्ञान्महेष्वासान्सर्वानेव महारथान्
Shalya uvacha
Sutaputra katham nu tvam pandavanavamanyase
Sarvastragyanmaheshvasansarvaneva maharathan
26.28
अनिवर्तिनो महाभागानजेयान्सत्यविक्रमान्
अपि संजनयेयुर्ये भयं साक्षाच्छतक्रतोः
Anivartino mahabhaganajeyansatyavikraman
Api sanjanayeyurye bhayam sakshachchhatakratoh
26.29
यदा श्रोष्यसि निर्घोषं विस्फूर्जितमिवाशनेः
राधेय गाण्डिवस्याजौ तदा नैवं वदिष्यसि
Yada shroshyasi nirghosham visphurjitamivashaneh
Radheya gandivasyajau tada naivam vadishyasi
26.30
संजय उवाच
अनादृत्य तु तद्वाक्यं मद्रराजेन भाषितम्
द्रक्ष्यस्यद्येत्यवोचद्वै शल्यं कर्णो नरेश्वर
Sanjaya uvacha
Anadritya tu tadvakyam madrarajena bhashitam
Drakshyasyadyetyavochadvai shalyam karno nareshvara
26.31
दृष्ट्वा कर्णं महेष्वासं युयुत्सुं समवस्थितम्
चुक्रुशुः कुरवः सर्वे हृष्टरूपाः परंतप
Drishtva karnam maheshvasam yuyutsum samavasthitam
Chukrushuh kuravah sarve hrishtarupah parantapa
26.32
ततो दुन्दुभिघोषेण भेरीणां निनदेन च
बाणशब्दैश्च विविधैर्गर्जितैश्च तरस्विनाम्
निर्ययुस्तावका युद्धे मृत्युं कृत्वा निवर्तनम्
Tato dundubhighoshena bherinam ninadena cha
Banashabdaishcha vividhairgarjitaishcha tarasvinam
Niryayustavaka yuddhe mrityum kritva nivartanam
26.33
प्रयाते तु ततः कर्णे योधेषु मुदितेषु च
चचाल पृथिवी राजन्ररास च सुविस्वरम्
Prayate tu tatah karne yodheshu muditeshu cha
Chachala prithivi rajanrarasa cha suvisvaram
26.34
निश्चरन्तो व्यदृश्यन्त सूर्यात्सप्त महाग्रहाः
उल्कापातश्च संजज्ञे दिशां दाहस्तथैव च
तथाशन्यश्च संपेतुर्ववुर्वाताश्च दारुणाः
Nishcharanto vyadrishyanta suryatsapta mahagrahah
Ulkapatashcha sanjagye disham dahastathaiva cha
Tathashanyashcha sampeturvavurvatashcha darunah
26.35
मृगपक्षिगणाश्चैव बहुशः पृतनां तव
अपसव्यं तदा चक्रुर्वेदयन्तो महद्भयम्
Mrigapakshiganashchaiva bahushah pritanam tava
Apasavyam tada chakrurvedayanto mahadbhayam
26.36
प्रस्थितस्य च कर्णस्य निपेतुस्तुरगा भुवि
अस्थिवर्षं च पतितमन्तरिक्षाद्भयानकम्
Prasthitasya cha karnasya nipetusturaga bhuvi
Asthivarsham cha patitamantarikshadbhayanakam
26.37
जज्वलुश्चैव शस्त्राणि ध्वजाश्चैव चकम्पिरे
अश्रूणि च व्यमुञ्चन्त वाहनानि विशां पते
Jajvalushchaiva shastrani dhvajashchaiva chakampire
Ashruni cha vyamunchanta vahanani visham pate
26.38
एते चान्ये च बहव उत्पातास्तत्र मारिष
समुत्पेतुर्विनाशाय कौरवाणां सुदारुणाः
Ete chanye cha bahava utpatastatra marisha
Samutpeturvinashaya kauravanam sudarunah
26.39
न च तान्गणयामासुः सर्वे ते दैवमोहिताः
प्रस्थितं सूतपुत्रं च जयेत्यूचुर्नरा भुवि
निर्जितान्पाण्डवांश्चैव मेनिरे तव कौरवाः
Na cha tanganayamasuh sarve te daivamohitah
Prasthitam sutaputram cha jayetyuchurnara bhuvi
Nirjitanpandavanshchaiva menire tava kauravah
26.40
ततो रथस्थः परवीरहन्ता; भीष्मद्रोणावात्तवीर्यौ निरीक्ष्य
समज्वलद्भारत पावकाभो; वैकर्तनोऽसौ रथकुञ्जरो वृषः
Tato rathasthah paravirahanta; bhishmadronavattaviryau nirikshya
Samajvaladbharata pavakabho; vaikartanosau rathakunjaro vrishah
26.41
स शल्यमाभाष्य जगाद वाक्यं; पार्थस्य कर्माप्रतिमं च दृष्ट्वा
मानेन दर्पेण च दह्यमानः; क्रोधेन दीप्यन्निव निःश्वसित्वा
Sa shalyamabhashya jagada vakyam; parthasya karmapratimam cha drishtva
Manena darpena cha dahyamanah; krodhena dipyanniva nihshvasitva
26.42
नाहं महेन्द्रादपि वज्रपाणेः; क्रुद्धाद्बिभेम्यात्तधनू रथस्थः
दृष्ट्वा तु भीष्मप्रमुखाञ्शयाना;न्न त्वेव मां स्थिरता संजहाति
Naham mahendradapi vajrapaneh; kruddhadbibhemyattadhanu rathasthah
Drishtva tu bhishmapramukhanshayana;nna tveva mam sthirata sanjahati
26.43
महेन्द्रविष्णुप्रतिमावनिन्दितौ; रथाश्वनागप्रवरप्रमाथिनौ
अवध्यकल्पौ निहतौ यदा परै;स्ततो ममाद्यापि रणेऽस्ति साध्वसम्
Mahendravishnupratimavaninditau; rathashvanagapravarapramathinau
Avadhyakalpau nihatau yada parai;stato mamadyapi ranesti sadhvasam
26.44
समीक्ष्य संख्येऽतिबलान्नराधिपै;र्नराश्वमातङ्गरथाञ्शरैर्हतान्
कथं न सर्वानहितान्रणेऽवधी;न्महास्त्रविद्ब्राह्मणपुंगवो गुरुः
Samikshya sankhyetibalannaradhipai;rnarashvamatangarathansharairhatan
Katham na sarvanahitanranevadhi;nmahastravidbrahmanapungavo guruh
26.45
स संस्मरन्द्रोणहवं महाहवे; ब्रवीमि सत्यं कुरवो निबोधत
न वो मदन्यः प्रसहेद्रणेऽर्जुनं; क्रमागतं मृत्युमिवोग्ररूपिणम्
Sa sansmarandronahavam mahahave; bravimi satyam kuravo nibodhata
Na vo madanyah prasahedranerjunam; kramagatam mrityumivograrupinam
26.46
शिक्षा प्रसादश्च बलं धृतिश्च; द्रोणे महास्त्राणि च संनतिश्च
स चेदगान्मृत्युवशं महात्मा; सर्वानन्यानातुरानद्य मन्ये
Shiksha prasadashcha balam dhritishcha; drone mahastrani cha sannatishcha
Sa chedaganmrityuvasham mahatma; sarvananyanaturanadya manye
26.47
नेह ध्रुवं किंचिदपि प्रचिन्त्यं; विदुर्लोके कर्मणोऽनित्ययोगात्
सूर्योदये को हि विमुक्तसंशयो; गर्वं कुर्वीताद्य गुरौ निपातिते
Neha dhruvam kinchidapi prachintyam; vidurloke karmanonityayogat
Suryodaye ko hi vimuktasanshayo; garvam kurvitadya gurau nipatite
26.48
न नूनमस्त्राणि बलं पराक्रमः; क्रिया सुनीतं परमायुधानि वा
अलं मनुष्यस्य सुखाय वर्तितुं; तथा हि युद्धे निहतः परैर्गुरुः
Na nunamastrani balam parakramah; kriya sunitam paramayudhani va
Alam manushyasya sukhaya vartitum; tatha hi yuddhe nihatah parairguruh
26.49
हुताशनादित्यसमानतेजसं; पराक्रमे विष्णुपुरंदरोपमम्
नये बृहस्पत्युशनःसमं सदा; न चैनमस्त्रं तदपात्सुदुःसहम्
Hutashanadityasamanatejasam; parakrame vishnupurandaropamam
Naye brihaspatyushanahsamam sada; na chainamastram tadapatsuduhsaham
26.50
संप्रक्रुष्टे रुदितस्त्रीकुमारे; पराभूते पौरुषे धार्तराष्ट्रे
मया कृत्यमिति जानामि शल्य; प्रयाहि तस्माद्द्विषतामनीकम्
Samprakrushte ruditastrikumare; parabhute paurushe dhartarashtre
Maya krityamiti janami shalya; prayahi tasmaddvishatamanikam
26.51
यत्र राजा पाण्डवः सत्यसंधो; व्यवस्थितो भीमसेनार्जुनौ च
वासुदेवः सृञ्जयाः सात्यकिश्च; यमौ च कस्तौ विषहेन्मदन्यः
Yatra raja pandavah satyasandho; vyavasthito bhimasenarjunau cha
Vasudevah srinjayah satyakishcha; yamau cha kastau vishahenmadanyah
26.52
तस्मात्क्षिप्रं मद्रपते प्रयाहि; रणे पाञ्चालान्पाण्डवान्सृञ्जयांश्च
तान्वा हनिष्यामि समेत्य संख्ये; यास्यामि वा द्रोणमुखाय मन्ये
Tasmatkshipram madrapate prayahi; rane panchalanpandavansrinjayanshcha
Tanva hanishyami sametya sankhye; yasyami va dronamukhaya manye
26.53
न त्वेवाहं न गमिष्यामि मध्यं; तेषां शूराणामिति मा शल्य विद्धि
मित्रद्रोहो मर्षणीयो न मेऽयं; त्यक्त्वा प्राणाननुयास्यामि द्रोणम्
Na tvevaham na gamishyami madhyam; tesham shuranamiti ma shalya viddhi
Mitradroho marshaniyo na meyam; tyaktva pranananuyasyami dronam
26.54
प्राज्ञस्य मूढस्य च जीवितान्ते; प्राणप्रमोक्षोऽन्तकवक्त्रगस्य
अतो विद्वन्नभियास्यामि पार्थं; दिष्टं न शक्यं व्यतिवर्तितुं वै
Pragyasya mudhasya cha jivitante; pranapramokshontakavaktragasya
Ato vidvannabhiyasyami partham; dishtam na shakyam vyativartitum vai
26.55
कल्याणवृत्तः सततं हि राज;न्वैचित्रवीर्यस्य सुतो ममासीत्
तस्यार्थसिद्ध्यर्थमहं त्यजामि; प्रियान्भोगान्दुस्त्यजं जीवितं च
Kalyanavrittah satatam hi raja;nvaichitraviryasya suto mamasit
Tasyarthasiddhyarthamaham tyajami; priyanbhogandustyajam jivitam cha
26.56
वैयाघ्रचर्माणमकूजनाक्षं; हैमत्रिकोशं रजतत्रिवेणुम्
रथप्रबर्हं तुरगप्रबर्है;र्युक्तं प्रादान्मह्यमिदं हि रामः
Vaiyaghracharmanamakujanaksham; haimatrikosham rajatatrivenum
Rathaprabarham turagaprabarhai;ryuktam pradanmahyamidam hi ramah
26.57
धनूंषि चित्राणि निरीक्ष्य शल्य; ध्वजं गदां सायकांश्चोग्ररूपान्
असिं च दीप्तं परमायुधं च; शङ्खं च शुभ्रं स्वनवन्तमुग्रम्
Dhanunshi chitrani nirikshya shalya; dhvajam gadam sayakanshchograrupan
Asim cha diptam paramayudham cha; shankham cha shubhram svanavantamugram
26.58
पताकिनं वज्रनिपातनिस्वनं; सिताश्वयुक्तं शुभतूणशोभितम्
इमं समास्थाय रथं रथर्षभं; रणे हनिष्याम्यहमर्जुनं बलात्
Patakinam vajranipatanisvanam; sitashvayuktam shubhatunashobhitam
Imam samasthaya ratham ratharshabham; rane hanishyamyahamarjunam balat
26.59
तं चेन्मृत्युः सर्वहरोऽभिरक्षते; सदाप्रमत्तः समरे पाण्डुपुत्रम्
तं वा हनिष्यामि समेत्य युद्धे; यास्यामि वा भीष्ममुखो यमाय
Tam chenmrityuh sarvaharobhirakshate; sadapramattah samare panduputram
Tam va hanishyami sametya yuddhe; yasyami va bhishmamukho yamaya
26.60
यमवरुणकुबेरवासवा वा; यदि युगपत्सगणा महाहवे
जुगुपिषव इहैत्य पाण्डवं; किमु बहुना सह तैर्जयामि तम्
Yamavarunakuberavasava va; yadi yugapatsagana mahahave
Jugupishava ihaitya pandavam; kimu bahuna saha tairjayami tam
26.61
इति रणरभसस्य कत्थत;स्तदुपनिशम्य वचः स मद्रराट्
अवहसदवमन्य वीर्यवा;न्प्रतिषिषिधे च जगाद चोत्तरम्
Iti ranarabhasasya katthata;stadupanishamya vachah sa madrarat
Avahasadavamanya viryava;npratishishidhe cha jagada chottaram
26.62
विरम विरम कर्ण कत्थना;दतिरभसोऽस्यति चाप्ययुक्तवाक्
क्व च हि नरवरो धनंजयः; क्व पुनरिह त्वमुपारमाबुध
Virama virama karna katthana;datirabhasosyati chapyayuktavak
Kva cha hi naravaro dhananjayah; kva punariha tvamuparamabudha
26.63
यदुसदनमुपेन्द्रपालितं; त्रिदिवमिवामरराजरक्षितम्
प्रसभमिह विलोक्य को हरे;त्पुरुषवरावरजामृतेऽर्जुनात्
Yadusadanamupendrapalitam; tridivamivamararajarakshitam
Prasabhamiha vilokya ko hare;tpurushavaravarajamriterjunat
26.64
त्रिभुवनसृजमीश्वरेश्वरं; क इह पुमान्भवमाह्वयेद्युधि
मृगवधकलहे ऋतेऽर्जुना;त्सुरपतिवीर्यसमप्रभावतः
Tribhuvanasrijamishvareshvaram; ka iha pumanbhavamahvayedyudhi
Mrigavadhakalahe riterjuna;tsurapativiryasamaprabhavatah
26.65
असुरसुरमहोरगान्नरा;न्गरुडपिशाचसयक्षराक्षसान्
इषुभिरजयदग्निगौरवा;त्स्वभिलषितं च हविर्ददौ जयः
Asurasuramahoragannara;ngarudapishachasayaksharakshasan
Ishubhirajayadagnigaurava;tsvabhilashitam cha havirdadau jayah
26.66
स्मरसि ननु यदा परैर्हृतः; स च धृतराष्ट्रसुतो विमोक्षितः
दिनकरज नरोत्तमैर्यदा; मरुषु बहून्विनिहत्य तानरीन्
Smarasi nanu yada parairhritah; sa cha dhritarashtrasuto vimokshitah
Dinakaraja narottamairyada; marushu bahunvinihatya tanarin
26.67
प्रथममपि पलायिते त्वयि; प्रियकलहा धृतराष्ट्रसूनवः
स्मरसि ननु यदा प्रमोचिताः; खचरगणानवजित्य पाण्डवैः
Prathamamapi palayite tvayi; priyakalaha dhritarashtrasunavah
Smarasi nanu yada pramochitah; khacharagananavajitya pandavaih
26.68
समुदितबलवाहनाः पुनः; पुरुषवरेण जिताः स्थ गोग्रहे
सगुरुगुरुसुताः सभीष्मकाः; किमु न जितः स तदा त्वयार्जुनः
Samuditabalavahanah punah; purushavarena jitah stha gograhe
Sagurugurusutah sabhishmakah; kimu na jitah sa tada tvayarjunah
26.69
इदमपरमुपस्थितं पुन;स्तव निधनाय सुयुद्धमद्य वै
यदि न रिपुभयात्पलायसे; समरगतोऽद्य हतोऽसि सूतज
Idamaparamupasthitam puna;stava nidhanaya suyuddhamadya vai
Yadi na ripubhayatpalayase; samaragatodya hatosi sutaja
26.70
संजय उवाच
इति बहुपरुषं प्रभाषति; प्रमनसि मद्रपतौ रिपुस्तवम्
भृशमतिरुषितः परं वृषः; कुरुपृतनापतिराह मद्रपम्
Sanjaya uvacha
Iti bahuparusham prabhashati; pramanasi madrapatau ripustavam
Bhrishamatirushitah param vrishah; kurupritanapatiraha madrapam
26.71
भवतु भवतु किं विकत्थसे; ननु मम तस्य च युद्धमुद्यतम्
यदि स जयति मां महाहवे; तत इदमस्तु सुकत्थितं तव
Bhavatu bhavatu kim vikatthase; nanu mama tasya cha yuddhamudyatam
Yadi sa jayati mam mahahave; tata idamastu sukatthitam tava
26.72
एवमस्त्विति मद्रेश उक्त्वा नोत्तरमुक्तवान्
याहि मद्रेश चाप्येनं कर्णः प्राह युयुत्सया
Evamastviti madresha uktva nottaramuktavan
Yahi madresha chapyenam karnah praha yuyutsaya
26.73
स रथः प्रययौ शत्रूञ्श्वेताश्वः शल्यसारथिः
निघ्नन्नमित्रान्समरे तमो घ्नन्सविता यथा
Sa rathah prayayau shatrunshvetashvah shalyasarathih
Nighnannamitransamare tamo ghnansavita yatha
26.74
ततः प्रायात्प्रीतिमान्वै रथेन; वैयाघ्रेण श्वेतयुजाथ कर्णः
स चालोक्य ध्वजिनीं पाण्डवानां; धनंजयं त्वरया पर्यपृच्छत्
Tatah prayatpritimanvai rathena; vaiyaghrena shvetayujatha karnah
Sa chalokya dhvajinim pandavanam; dhananjayam tvaraya paryaprichchhat