Utshovঅধ্যায় 24
24.1
দুর্যোধন উবাচ
ভূয় এব তু মদ্রেশ যত্তে বক্ষ্যামি তচ্ছৃণু
যথা পুরা বৃত্তমিদং যুদ্ধে দেবাসুরে বিভো
24.2
যদুক্তবান্পিতুর্মহ্যং মার্কণ্ডেয়ো মহানৃষিঃ
তদশেষেণ ব্রুবতো মম রাজর্ষিসত্তম
ত্বং নিবোধ ন চাপ্যত্র কর্তব্যা তে বিচারণা
24.3
দেবানামসুরাণাং চ মহানাসীত্সমাগমঃ
বভূব প্রথমো রাজন্সংগ্রামস্তারকাময়ঃ
নির্জিতাশ্চ তদা দৈত্যা দৈবতৈরিতি নঃ শ্রুতম্
24.4
নির্জিতেষু চ দৈত্যেষু তারকস্য সুতাস্ত্রয়ঃ
তারাক্ষঃ কমলাক্ষশ্চ বিদ্যুন্মালী চ পার্থিব
24.5
তপ উগ্রং সমাস্থায় নিয়মে পরমে স্থিতাঃ
তপসা কর্শয়ামাসুর্দেহান্স্বাঞ্শত্রুতাপন
24.6
দমেন তপসা চৈব নিয়মেন চ পার্থিব
তেষাং পিতামহঃ প্রীতো বরদঃ প্রদদৌ বরান্
24.7
অবধ্যত্বং চ তে রাজন্সর্বভূতেষু সর্বদা
সহিতা বরয়ামাসুঃ সর্বলোকপিতামহম্
24.8
তানব্রবীত্তদা দেবো লোকানাং প্রভুরীশ্বরঃ
নাস্তি সর্বামরত্বং হি নিবর্তধ্বমতোঽসুরাঃ
বরমন্যং বৃণীধ্বং বৈ যাদৃশং সংপ্ররোচতে
24.9
ততস্তে সহিতা রাজন্সংপ্রধার্যাসকৃদ্বহু
সর্বলোকেশ্বরং বাক্যং প্রণম্যৈনমথাব্রুবন্
24.10
অস্মাকং ত্বং বরং দেব প্রয়চ্ছেমং পিতামহ
বয়ং পুরাণি ত্রীণ্যেব সমাস্থায় মহীমিমাম্
বিচরিষ্যাম লোকেঽস্মিংস্ত্বত্প্রসাদপুরস্কৃতাঃ
24.11
ততো বর্ষসহস্রে তু সমেষ্যামঃ পরস্পরম্
একীভাবং গমিষ্যন্তি পুরাণ্যেতানি চানঘ
24.12
সমাগতানি চৈতানি যো হন্যাদ্ভগবংস্তদা
একেষুণা দেববরঃ স নো মৃত্যুর্ভবিষ্যতি
এবমস্ত্বিতি তান্দেবঃ প্রত্যুক্ত্বা প্রাবিশদ্দিবম্
24.13
তে তু লব্ধবরাঃ প্রীতাঃ সংপ্রধার্য পরস্পরম্
পুরত্রয়বিসৃষ্ট্যর্থং ময়ং বব্রুর্মহাসুরম্
বিশ্বকর্মাণমজরং দৈত্যদানবপূজিতম্
24.14
ততো ময়ঃ স্বতপসা চক্রে ধীমান্পুরাণি হ
ত্রীণি কাঞ্চনমেকং তু রৌপ্যং কার্ষ্ণায়সং তথা
24.15
কাঞ্চনং দিবি তত্রাসীদন্তরিক্ষে চ রাজতম্
আয়সং চাভবদ্ভূমৌ চক্রস্থং পৃথিবীপতে
24.16
একৈকং যোজনশতং বিস্তারায়ামসংমিতম্
গৃহাট্টাট্টালকয়ুতং বৃহত্প্রাকারতোরণম্
24.17
গুণপ্রসবসংবাধমসংবাধমনাময়ম্
প্রাসাদৈর্বিবিধৈশ্চৈব দ্বারৈশ্চাপ্যুপশোভিতম্
24.18
পুরেষু চাভবন্রাজন্রাজানো বৈ পৃথক্পৃথক্
কাঞ্চনং তারকাক্ষস্য চিত্রমাসীন্মহাত্মনঃ
রাজতং কমলাক্ষস্য বিদ্যুন্মালিন আয়সম্
24.19
ত্রয়স্তে দৈত্যরাজানস্ত্রীঁল্লোকানাশু তেজসা
আক্রম্য তস্থুর্বর্ষাণাং পূগান্নাম প্রজাপতিঃ
24.20
তেষাং দানবমুখ্যানাং প্রয়ুতান্যর্বুদানি চ
কোট্যশ্চাপ্রতিবীরাণাং সমাজগ্মুস্ততস্ততঃ
মহদৈশ্বর্যমিচ্ছন্তস্ত্রিপুরং দুর্গমাশ্রিতাঃ
24.21
সর্বেষাং চ পুনস্তেষাং সর্বয়োগবহো ময়ঃ
তমাশ্রিত্য হি তে সর্বে অবর্তন্তাকুতোভয়াঃ
24.22
যো হি যং মনসা কামং দধ্যৌ ত্রিপুরসংশ্রয়ঃ
তস্মৈ কামং ময়স্তং তং বিদধে মায়য়া তদা
24.23
তারকাক্ষসুতশ্চাসীদ্ধরির্নাম মহাবলঃ
তপস্তেপে পরমকং যেনাতুষ্যত্পিতামহঃ
24.24
স তুষ্টমবৃণোদ্দেবং বাপী ভবতু নঃ পুরে
শস্ত্রৈর্বিনিহতা যত্র ক্ষিপ্তাঃ স্যুর্বলবত্তরাঃ
24.25
স তু লব্ধ্বা বরং বীরস্তারকাক্ষসুতো হরিঃ
সসৃজে তত্র বাপীং তাং মৃতানাং জীবনীং প্রভো
24.26
যেন রূপেণ দৈত্যস্তু যেন বেষেণ চৈব হ
মৃতস্তস্যাং পরিক্ষিপ্তস্তাদৃশেনৈব জজ্ঞিবান্
24.27
তাং প্রাপ্য ত্রৈপুরস্থাস্তু সর্বাঁল্লোকান্ববাধিরে
মহতা তপসা সিদ্ধাঃ সুরাণাং ভয়বর্ধনাঃ
ন তেষামভবদ্রাজন্ক্ষয়ো যুদ্ধে কথংচন
24.28
ততস্তে লোভমোহাভ্যামভিভূতা বিচেতসঃ
নির্হ্রীকাঃ সংস্থিতিং সর্বে স্থাপিতাং সমলূলুপন্
24.29
বিদ্রাব্য সগণান্দেবাংস্তত্র তত্র তদা তদা
বিচেরুঃ স্বেন কামেন বরদানেন দর্পিতাঃ
24.30
দেবারণ্যানি সর্বাণি প্রিয়াণি চ দিবৌকসাম্
ঋষীণামাশ্রমান্পুণ্যান্যূপাঞ্জনপদাংস্তথা
ব্যনাশয়ন্ত মর্যাদা দানবা দুষ্টচারিণঃ
24.31
তে দেবাঃ সহিতাঃ সর্বে পিতামহমরিংদম
অভিজগ্মুস্তদাখ্যাতুং বিপ্রকারং সুরেতরৈঃ
24.32
তে তত্ত্বং সর্বমাখ্যায় শিরসাভিপ্রণম্য চ
বধোপায়মপৃচ্ছন্ত ভগবন্তং পিতামহম্
24.33
শ্রুত্বা তদ্ভগবান্দেবো দেবানিদমুবাচ হ
অসুরাশ্চ দুরাত্মানস্তে চাপি বিবুধদ্বিষঃ
অপরাধ্যন্তি সততং যে যুষ্মান্পীডয়ন্ত্যুত
24.34
অহং হি তুল্যঃ সর্বেষাং ভূতানাং নাত্র সংশয়ঃ
অধার্মিকাস্তু হন্তব্যা ইত্যহং প্রব্রবীমি বঃ
24.35
তে যূয়ং স্থাণুমীশানং জিষ্ণুমক্লিষ্টকারিণম্
যোদ্ধারং বৃণুতাদিত্যাঃ স তান্হন্তা সুরেতরান্
24.36
ইতি তস্য বচঃ শ্রুত্বা দেবাঃ শক্রপুরোগমাঃ
ব্রহ্মাণমগ্রতঃ কৃত্বা বৃষাঙ্কং শরণং যয়ুঃ
24.37
তপঃ পরং সমাতস্থুর্গৃণন্তো ব্রহ্ম শাশ্বতম্
ঋষিভিঃ সহ ধর্মজ্ঞা ভবং সর্বাত্মনা গতাঃ
24.38
তুষ্টুবুর্বাগ্ভিরর্থ্যাভির্ভয়েষ্বভয়কৃত্তমম্
সর্বাত্মানং মহাত্মানং যেনাপ্তং সর্বমাত্মনা
24.39
তপোবিশেষৈর্বহুভির্যোগং যো বেদ চাত্মনঃ
যঃ সাংখ্যমাত্মনো বেদ যস্য চাত্মা বশে সদা
24.40
তে তং দদৃশুরীশানং তেজোরাশিমুমাপতিম্
অনন্যসদৃশং লোকে ব্রতবন্তমকল্মষম্
24.41
একং চ ভগবন্তং তে নানারূপমকল্পয়ন্
আত্মনঃ প্রতিরূপাণি রূপাণ্যথ মহাত্মনি
পরস্পরস্য চাপশ্যন্সর্বে পরমবিস্মিতাঃ
24.42
সর্বভূতময়ং চেশং তমজং জগতঃ পতিম্
দেবা ব্রহ্মর্ষয়শ্চৈব শিরোভির্ধরণীং গতাঃ
24.43
তান্স্বস্তিবাক্যেনাভ্যর্চ্য সমুত্থাপ্য চ শংকরঃ
ব্রূত ব্রূতেতি ভগবান্স্ময়মানোঽভ্যভাষত
24.44
ত্র্যম্বকেণাভ্যনুজ্ঞাতাস্ততস্তেঽস্বস্থচেতসঃ
নমো নমস্তেঽস্তু বিভো তত ইত্যব্রুবন্ভবম্
24.45
নমো দেবাতিদেবায় ধন্বিনে চাতিমন্যবে
প্রজাপতিমখঘ্নায় প্রজাপতিভিরীড্যসে
24.46
নমঃ স্তুতায় স্তুত্যায় স্তূয়মানায় মৃত্যবে
বিলোহিতায় রুদ্রায় নীলগ্রীবায় শূলিনে
24.47
অমোঘায় মৃগাক্ষায় প্রবরায়ুধয়োধিনে
দুর্বারণায় শুক্রায় ব্রহ্মণে ব্রহ্মচারিণে
24.48
ঈশানায়াপ্রমেয়ায় নিয়ন্ত্রে চর্মবাসসে
তপোনিত্যায় পিঙ্গায় ব্রতিনে কৃত্তিবাসসে
24.49
কুমারপিত্রে ত্র্যক্ষায় প্রবরায়ুধধারিণে
প্রপন্নার্তিবিনাশায় ব্রহ্মদ্বিট্সংঘঘাতিনে
24.50
বনস্পতীনাং পতয়ে নরাণাং পতয়ে নমঃ
গবাং চ পতয়ে নিত্যং যজ্ঞানাং পতয়ে নমঃ
24.51
নমোঽস্তু তে সসৈন্যায় ত্র্যম্বকায়োগ্রতেজসে
মনোবাক্কর্মভির্দেব ত্বাং প্রপন্নান্ভজস্ব নঃ
24.52
ততঃ প্রসন্নো ভগবান্স্বাগতেনাভিনন্দ্য তান্
প্রোবাচ ব্যেতু বস্ত্রাসো ব্রূত কিং করবাণি বঃ
24.53
পিতৃদেবর্ষিসংঘেভ্যো বরে দত্তে মহাত্মনা
সত্কৃত্য শংকরং প্রাহ ব্রহ্মা লোকহিতং বচঃ
24.54
তবাতিসর্গাদ্দেবেশ প্রাজাপত্যমিদং পদম্
ময়াধিতিষ্ঠতা দত্তো দানবেভ্যো মহান্বরঃ
24.55
তানতিক্রান্তমর্যাদান্নান্যঃ সংহর্তুমর্হতি
ত্বামৃতে ভূতভব্যেশ ত্বং হ্যেষাং প্রত্যরির্বধে
24.56
স ত্বং দেব প্রপন্নানাং যাচতাং চ দিবৌকসাম্
কুরু প্রসাদং দেবেশ দানবাঞ্জহি শূলভৃৎ
24.57
শ্রীভগবানুবাচ
হন্তব্যাঃ শত্রবঃ সর্বে যুষ্মাকমিতি মে মতিঃ
ন ত্বেকোঽহং বধে তেষাং সমর্থো বৈ সুরদ্বিষাম্
24.58
তে যূয়ং সহিতাঃ সর্বে মদীয়েনাস্ত্রতেজসা
জয়ধ্বং যুধি তাঞ্শত্রূন্সংঘাতো হি মহাবলঃ
24.59
দেবা ঊচুঃ
অস্মত্তেজোবলং যাবত্তাবদ্দ্বিগুণমেব চ
তেষামিতি হ মন্যামো দৃষ্টতেজোবলা হি তে
24.60
ভগবানুবাচ
বধ্যাস্তে সর্বতঃ পাপা যে যুষ্মাস্বপরাধিনঃ
মম তেজোবলার্ধেন সর্বাংস্তান্ঘ্নত শাত্রবান্
24.61
দেবা ঊচুঃ
বিভর্তুং তেজসোঽর্ধং তে ন শক্ষ্যামো মহেশ্বর
সর্বেষাং নো বলার্ধেন ত্বমেব জহি শাত্রবান্
24.62
দুর্যোধন উবাচ
ততস্তথেতি দেবেশস্তৈরুক্তো রাজসত্তম
অর্ধমাদায় সর্বেভ্যস্তেজসাভ্যধিকোঽভবৎ
24.63
স তু দেবো বলেনাসীত্সর্বেভ্যো বলবত্তরঃ
মহাদেব ইতি খ্যাতস্তদাপ্রভৃতি শংকরঃ
24.64
ততোঽব্রবীন্মহাদেবো ধনুর্বাণধরস্ত্বহম্
হনিষ্যামি রথেনাজৌ তান্রিপূন্বৈ দিবৌকসঃ
24.65
তে যূয়ং মে রথং চৈব ধনুর্বাণং তথৈব চ
পশ্যধ্বং যাবদদ্যৈতান্পাতয়ামি মহীতলে
24.66
দেবা ঊচুঃ
মূর্তিসর্বস্বমাদায় ত্রৈলোক্যস্য ততস্ততঃ
রথং তে কল্পয়িষ্যাম দেবেশ্বর মহৌজসম্
24.67
তথৈব বুদ্ধ্যা বিহিতং বিশ্বকর্মকৃতং শুভম্
ততো বিবুধশার্দূলাস্তং রথং সমকল্পয়ন্
24.68
বন্ধুরং পৃথিবীং দেবীং বিশালপুরমালিনীম্
সপর্বতবনদ্বীপাং চক্রুর্ভূতধরাং তদা
24.69
মন্দরং পর্বতং চাক্ষং জঙ্ঘাস্তস্য মহানদীঃ
দিশশ্চ প্রদিশশ্চৈব পরিবারং রথস্য হি
24.70
অনুকর্ষান্গ্রহান্দীপ্তান্বরূথং চাপি তারকাঃ
ধর্মার্থকামসংয়ুক্তং ত্রিবেণুং চাপি বন্ধুরম্
ওষধীর্বিবিধাস্তত্র নানাপুষ্পফলোদ্গমাঃ
24.71
সূর্যাচন্দ্রমসৌ কৃত্বা চক্রে রথবরোত্তমে
পক্ষৌ পূর্বাপরৌ তত্র কৃতে রাত্র্যহনী শুভে
24.72
দশ নাগপতীনীষাং ধৃতরাষ্ট্রমুখান্দৃঢাম্
দ্যাং যুগং যুগচর্মাণি সংবর্তকবলাহকান্
24.73
শম্যাং ধৃতিং চ মেধাং চ স্থিতিং সংনতিমেব চ
গ্রহনক্ষত্রতারাভিশ্চর্ম চিত্রং নভস্তলম্
24.74
সুরাম্বুপ্রেতবিত্তানাং পতীঁল্লোকেশ্বরান্হয়ান্
সিনীবালীমনুমতিং কুহূং রাকাং চ সুব্রতাম্
যোক্ত্রাণি চক্রুর্বাহানাং রোহকাংশ্চাপি কণ্ঠকম্
24.75
কর্ম সত্যং তপোঽর্থশ্চ বিহিতাস্তত্র রশ্ময়ঃ
অধিষ্ঠানং মনস্ত্বাসীত্পরিরথ্যং সরস্বতী
24.76
নানাবর্ণাশ্চ চিত্রাশ্চ পতাকাঃ পবনেরিতাঃ
বিদ্যুদিন্দ্রধনুর্নদ্ধং রথং দীপ্তং ব্যদীপয়ৎ
24.77
এবং তস্মিন্মহারাজ কল্পিতে রথসত্তমে
দেবৈর্মনুজশার্দূল দ্বিষতামভিমর্দনে
24.78
স্বান্যায়ুধানি মুখ্যানি ন্যদধাচ্ছংকরো রথে
রথয়ষ্টিং বিয়ত্কৃষ্টাং স্থাপয়ামাস গোবৃষম্
24.79
ব্রহ্মদণ্ডঃ কালদণ্ডো রুদ্রদণ্ডস্তথা জ্বরঃ
পরিস্কন্দা রথস্যাস্য সর্বতোদিশমুদ্যতাঃ
24.80
অথর্বাঙ্গিরসাবাস্তাং চক্ররক্ষৌ মহাত্মনঃ
ঋগ্বেদঃ সামবেদশ্চ পুরাণং চ পুরঃসরাঃ
24.81
ইতিহাসয়জুর্বেদৌ পৃষ্ঠরক্ষৌ বভূবতুঃ
দিব্যা বাচশ্চ বিদ্যাশ্চ পরিপার্শ্বচরাঃ কৃতাঃ
24.82
তোত্ত্রাদয়শ্চ রাজেন্দ্র বষট্কারস্তথৈব চ
ওংকারশ্চ মুখে রাজন্নতিশোভাকরোঽভবৎ
24.83
বিচিত্রমৃতুভিঃ ষড্ভিঃ কৃত্বা সংবত্সরং ধনুঃ
তস্মান্নৄণাং কালরাত্রির্জ্যা কৃতা ধনুষোঽজরা
24.84
ইষুশ্চাপ্যভবদ্বিষ্ণুর্জ্বলনঃ সোম এব চ
অগ্নীষোমৌ জগত্কৃত্স্নং বৈষ্ণবং চোচ্যতে জগৎ
24.85
বিষ্ণুশ্চাত্মা ভগবতো ভবস্যামিততেজসঃ
তস্মাদ্ধনুর্জ্যাসংস্পর্শং ন বিষেহুর্হরস্য তে
24.86
তস্মিঞ্শরে তিগ্মমন্যুর্মুমোচাবিষহং প্রভুঃ
ভৃগ্বঙ্গিরোমন্যুভবং ক্রোধাগ্নিমতিদুঃসহম্
24.87
স নীললোহিতো ধূম্রঃ কৃত্তিবাসা ভয়ংকরঃ
আদিত্যায়ুতসংকাশস্তেজোজ্বালাবৃতো জ্বলন্
24.88
দুশ্চ্যাবশ্চ্যাবনো জেতা হন্তা ব্রহ্মদ্বিষাং হরঃ
নিত্যং ত্রাতা চ হন্তা চ ধর্মাধর্মাশ্রিতাঞ্জনান্
24.89
প্রমাথিভির্ঘোররূপৈর্ভীমোদগ্রৈর্গণৈর্বৃতঃ
বিভাতি ভগবান্স্থাণুস্তৈরেবাত্মগুণৈর্বৃতঃ
24.90
তস্যাঙ্গানি সমাশ্রিত্য স্থিতং বিশ্বমিদং জগৎ
জঙ্গমাজঙ্গমং রাজঞ্শুশুভেঽদ্ভুতদর্শনম্
24.91
দৃষ্ট্বা তু তং রথং দিব্যং কবচী স শরাসনী
বাণমাদত্ত তং দিব্যং সোমবিষ্ণ্বগ্নিসংভবম্
24.92
তস্য বাজাংস্ততো দেবাঃ কল্পয়াং চক্রিরে বিভোঃ
পুণ্যগন্ধবহং রাজঞ্শ্বসনং রাজসত্তম
24.93
তমাস্থায় মহাদেবস্ত্রাসয়ন্দৈবতান্যপি
আরুরোহ তদা যত্তঃ কম্পয়ন্নিব রোদসী
24.94
স শোভমানো বরদঃ খড্গী বাণী শরাসনী
হসন্নিবাব্রবীদ্দেবো সারথিঃ কো ভবিষ্যতি
24.95
তমব্রুবন্দেবগণা যং ভবান্সংনিয়োক্ষ্যতে
স ভবিষ্যতি দেবেশ সারথিস্তে ন সংশয়ঃ
24.96
তানব্রবীত্পুনর্দেবো মত্তঃ শ্রেষ্ঠতরো হি যঃ
তং সারথিং কুরুধ্বং মে স্বয়ং সংচিন্ত্য মাচিরম্
24.97
এতচ্ছ্রুত্বা ততো দেবা বাক্যমুক্তং মহাত্মনা
গত্বা পিতামহং দেবং প্রসাদ্যৈবং বচোঽব্রুবন্
24.98
দেব ত্বয়েদং কথিতং ত্রিদশারিনিবর্হণম্
তথা চ কৃতমস্মাভিঃ প্রসন্নো বৃষভধ্বজঃ
24.99
রথশ্চ বিহিতোঽস্মাভির্বিচিত্রায়ুধসংবৃতঃ
সারথিং তু ন জানীমঃ কঃ স্যাত্তস্মিন্রথোত্তমে
24.100
তস্মাদ্বিধীয়তাং কশ্চিত্সারথির্দেবসত্তম
সফলাং তাং গিরং দেব কর্তুমর্হসি নো বিভো
24.101
এবমস্মাসু হি পুরা ভগবন্নুক্তবানসি
হিতং কর্তাস্মি ভবতামিতি তত্কর্তুমর্হসি
24.102
স দেব যুক্তো রথসত্তমো নো; দুরাবরো দ্রাবণঃ শাত্রবাণাম্
পিনাকপাণির্বিহিতোঽত্র যোদ্ধা; বিভীষয়ন্দানবানুদ্যতোঽসৌ
24.103
তথৈব বেদাশ্চতুরো হয়াগ্র্যা; ধরা সশৈলা চ রথো মহাত্মন্
নক্ষত্রবংশোঽনুগতো বরূথে; যস্মিন্যোদ্ধা সারথিনাভিরক্ষ্যঃ
24.104
তত্র সারথিরেষ্টব্যঃ সর্বৈরেতৈর্বিশেষবান্
তত্প্রতিষ্ঠো রথো দেব হয়া যোদ্ধা তথৈব চ
কবচানি চ শস্ত্রাণি কার্মুকং চ পিতামহ
24.105
ত্বামৃতে সারথিং তত্র নান্যং পশ্যামহে বয়ম্
ত্বং হি সর্বৈর্গুণৈর্যুক্তো দেবতাভ্যোঽধিকঃ প্রভো
সারথ্যে তূর্ণমারোহ সংয়চ্ছ পরমান্হয়ান্
24.106
ইতি তে শিরসা নত্বা ত্রিলোকেশং পিতামহম্
দেবাঃ প্রসাদয়ামাসুঃ সারথ্যায়েতি নঃ শ্রুতম্
24.107
ব্রহ্মোবাচ
নাত্র কিংচিন্মৃষা বাক্যং যদুক্তং বো দিবৌকসঃ
সংয়চ্ছামি হয়ানেষ যুধ্যতো বৈ কপর্দিনঃ
24.108
ততঃ স ভগবান্দেবো লোকস্রষ্টা পিতামহঃ
সারথ্যে কল্পিতো দেবৈরীশানস্য মহাত্মনঃ
24.109
তস্মিন্নারোহতি ক্ষিপ্রং স্যন্দনং লোকপূজিতে
শিরোভিরগমংস্তূর্ণং তে হয়া বাতরংহসঃ
24.110
মহেশ্বরে ত্বারুহতি জানুভ্যামগমন্মহীম্
24.111
অভীশূন্হি ত্রিলোকেশঃ সংগৃহ্য প্রপিতামহঃ
তানশ্বাংশ্চোদয়ামাস মনোমারুতরংহসঃ
24.112
ততোঽধিরূঢে বরদে প্রয়াতে চাসুরান্প্রতি
সাধু সাধ্বিতি বিশ্বেশঃ স্ময়মানোঽভ্যভাষত
24.113
যাহি দেব যতো দৈত্যাশ্চোদয়াশ্বানতন্দ্রিতঃ
পশ্য বাহ্বোর্বলং মেঽদ্য নিঘ্নতঃ শাত্রবান্রণে
24.114
ততস্তাংশ্চোদয়ামাস বায়ুবেগসমাঞ্জবে
যেন তত্ত্রিপুরং রাজন্দৈত্যদানবরক্ষিতম্
24.115
অথাধিজ্যং ধনুঃ কৃত্বা শর্বঃ সংধায় তং শরম্
যুক্ত্বা পাশুপতাস্ত্রেণ ত্রিপুরং সমচিন্তয়ৎ
24.116
তস্মিন্স্থিতে তদা রাজন্ক্রুদ্ধে বিধৃতকার্মুকে
পুরাণি তানি কালেন জগ্মুরেকত্বতাং তদা
24.117
একীভাবং গতে চৈব ত্রিপুরে সমুপাগতে
বভূব তুমুলো হর্ষো দৈবতানাং মহাত্মনাম্
24.118
ততো দেবগণাঃ সর্বে সিদ্ধাশ্চ পরমর্ষয়ঃ
জয়েতি বাচো মুমুচুঃ সংস্তুবন্তো মুদান্বিতাঃ
24.119
ততোঽগ্রতঃ প্রাদুরভূত্ত্রিপুরং জঘ্নুষোঽসুরান্
অনির্দেশ্যোগ্রবপুষো দেবস্যাসহ্যতেজসঃ
24.120
স তদ্বিকৃষ্য ভগবান্দিব্যং লোকেশ্বরো ধনুঃ
ত্রৈলোক্যসারং তমিষুং মুমোচ ত্রিপুরং প্রতি
তত্সাসুরগণং দগ্ধ্বা প্রাক্ষিপত্পশ্চিমার্ণবে
24.121
এবং তত্ত্রিপুরং দগ্ধং দানবাশ্চাপ্যশেষতঃ
মহেশ্বরেণ ক্রুদ্ধেন ত্রৈলোক্যস্য হিতৈষিণা
24.122
স চাত্মক্রোধজো বহ্নির্হাহেত্যুক্ত্বা নিবারিতঃ
মা কার্ষীর্ভস্মসাল্লোকানিতি ত্র্যক্ষোঽব্রবীচ্চ তম্
24.123
ততঃ প্রকৃতিমাপন্না দেবা লোকাস্তথর্ষয়ঃ
তুষ্টুবুর্বাগ্ভিরর্থ্যাভিঃ স্থাণুমপ্রতিমৌজসম্
24.124
তেঽনুজ্ঞাতা ভগবতা জগ্মুঃ সর্বে যথাগতম্
কৃতকামাঃ প্রসন্নেন প্রজাপতিমুখাঃ সুরাঃ
24.125
যথৈব ভগবান্ব্রহ্মা লোকধাতা পিতামহঃ
সংয়চ্ছ ত্বং হয়ানস্য রাধেয়স্য মহাত্মনঃ
24.126
ত্বং হি কৃষ্ণাচ্চ কর্ণাচ্চ ফল্গুনাচ্চ বিশেষতঃ
বিশিষ্টো রাজশার্দূল নাস্তি তত্র বিচারণা
24.127
যুদ্ধে হ্যয়ং রুদ্রকল্পস্ত্বং চ ব্রহ্মসমোঽনঘ
তস্মাচ্ছক্তৌ যুবাং জেতুং মচ্ছত্রূংস্তাবিবাসুরান্
24.128
যথা শল্যাদ্য কর্ণোঽয়ং শ্বেতাশ্বং কৃষ্ণসারথিম্
প্রমথ্য হন্যাত্কৌন্তেয়ং তথা শীঘ্রং বিধীয়তাম্
ত্বয়ি কর্ণশ্চ রাজ্যং চ বয়ং চৈব প্রতিষ্ঠিতাঃ
24.129
ইমং চাপ্যপরং ভূয় ইতিহাসং নিবোধ মে
পিতুর্মম সকাশে যং ব্রাহ্মণঃ প্রাহ ধর্মবিৎ
24.130
শ্রুত্বা চৈতদ্বচশ্চিত্রং হেতুকার্যার্থসংহিতম্
কুরু শল্য বিনিশ্চিত্য মা ভূদত্র বিচারণা
24.131
ভার্গবাণাং কুলে জাতো জমদগ্নির্মহাতপাঃ
তস্য রামেতি বিখ্যাতঃ পুত্রস্তেজোগুণান্বিতঃ
24.132
স তীব্রং তপ আস্থায় প্রসাদয়িতবান্ভবম্
অস্ত্রহেতোঃ প্রসন্নাত্মা নিয়তঃ সংয়তেন্দ্রিয়ঃ
24.133
তস্য তুষ্টো মহাদেবো ভক্ত্যা চ প্রশমেন চ
হৃদ্গতং চাস্য বিজ্ঞায় দর্শয়ামাস শংকরঃ
24.134
ঈশ্বর উবাচ
রাম তুষ্টোঽস্মি ভদ্রং তে বিদিতং মে তবেপ্সিতম্
কুরুষ্ব পূতমাত্মানং সর্বমেতদবাপ্স্যসি
24.135
দাস্যামি তে তদাস্ত্রাণি যদা পূতো ভবিষ্যসি
অপাত্রমসমর্থং চ দহন্ত্যস্ত্রাণি ভার্গব
24.136
ইত্যুক্তো জামদগ্ন্যস্তু দেবদেবেন শূলিনা
প্রত্যুবাচ মহাত্মানং শিরসাবনতঃ প্রভুম্
24.137
যদা জানাসি দেবেশ পাত্রং মামস্ত্রধারণে
তদা শুশ্রূষতেঽস্ত্রাণি ভবান্মে দাতুমর্হতি
24.138
দুর্যোধন উবাচ
ততঃ স তপসা চৈব দমেন নিয়মেন চ
পূজোপহারবলিভির্হোমমন্ত্রপুরস্কৃতৈঃ
24.139
আরাধয়িতবাঞ্শর্বং বহূন্বর্ষগণাংস্তদা
প্রসন্নশ্চ মহাদেবো ভার্গবস্য মহাত্মনঃ
24.140
অব্রবীত্তস্য বহুশো গুণান্দেব্যাঃ সমীপতঃ
ভক্তিমানেষ সততং ময়ি রামো দৃঢব্রতঃ
24.141
এবং তস্য গুণান্প্রীতো বহুশোঽকথয়ত্প্রভুঃ
দেবতানাং পিতৄণাং চ সমক্ষমরিসূদনঃ
24.142
এতস্মিন্নেব কালে তু দৈত্যা আসন্মহাবলাঃ
তৈস্তদা দর্পমোহান্ধৈরবাধ্যন্ত দিবৌকসঃ
24.143
ততঃ সংভূয় বিবুধাস্তান্হন্তুং কৃতনিশ্চয়াঃ
চক্রুঃ শত্রুবধে যত্নং ন শেকুর্জেতুমেব তে
24.144
অভিগম্য ততো দেবা মহেশ্বরমথাব্রুবন্
প্রসাদয়ন্তস্তং ভক্ত্যা জহি শত্রুগণানিতি
24.145
প্রতিজ্ঞায় ততো দেবো দেবতানাং রিপুক্ষয়ম্
রামং ভার্গবমাহূয় সোঽভ্যভাষত শংকরঃ
24.146
রিপূন্ভার্গব দেবানাং জহি সর্বান্সমাগতান্
লোকানাং হিতকামার্থং মত্প্রীত্যর্থং তথৈব চ
24.147
রাম উবাচ
অকৃতাস্ত্রস্য দেবেশ কা শক্তির্মে মহেশ্বর
নিহন্তুং দানবান্সর্বান্কৃতাস্ত্রান্যুদ্ধদুর্মদান্
24.148
ঈশ্বর উবাচ
গচ্ছ ত্বং মদনুধ্যানান্নিহনিষ্যসি দানবান্
বিজিত্য চ রিপূন্সর্বান্গুণান্প্রাপ্স্যসি পুষ্কলান্
24.149
দুর্যোধন উবাচ
এতচ্ছ্রুত্বা চ বচনং প্রতিগৃহ্য চ সর্বশঃ
রামঃ কৃতস্বস্ত্যয়নঃ প্রয়য়ৌ দানবান্প্রতি
24.150
অবধীদ্দেবশত্রূংস্তান্মদদর্পবলান্বিতান্
বজ্রাশনিসমস্পর্শৈঃ প্রহারৈরেব ভার্গবঃ
24.151
স দানবৈঃ ক্ষততনুর্জামদগ্ন্যো দ্বিজোত্তমঃ
সংস্পৃষ্টঃ স্থাণুনা সদ্যো নির্ব্রণঃ সমজায়ত
24.152
প্রীতশ্চ ভগবান্দেবঃ কর্মণা তেন তস্য বৈ
বরান্প্রাদাদ্ব্রহ্মবিদে ভার্গবায় মহাত্মনে
24.153
উক্তশ্চ দেবদেবেন প্রীতিয়ুক্তেন শূলিনা
নিপাতাত্তব শস্ত্রাণাং শরীরে যাভবদ্রুজা
24.154
তয়া তে মানুষং কর্ম ব্যপোঢং ভৃগুনন্দন
গৃহাণাস্ত্রাণি দিব্যানি মত্সকাশাদ্যথেপ্সিতম্
24.155
ততোঽস্ত্রাণি সমস্তানি বরাংশ্চ মনসেপ্সিতান্
লব্ধ্বা বহুবিধান্রামঃ প্রণম্য শিরসা শিবম্
24.156
অনুজ্ঞাং প্রাপ্য দেবেশাজ্জগাম স মহাতপাঃ
এবমেতত্পুরাবৃত্তং তদা কথিতবানৃষিঃ
24.157
ভার্গবোঽপ্যদদাত্সর্বং ধনুর্বেদং মহাত্মনে
কর্ণায় পুরুষব্যাঘ্র সুপ্রীতেনান্তরাত্মনা
24.158
বৃজিনং হি ভবেত্কিংচিদ্যদি কর্ণস্য পার্থিব
নাস্মৈ হ্যস্ত্রাণি দিব্যানি প্রাদাস্যদ্ভৃগুনন্দনঃ
24.159
নাপি সূতকুলে জাতং কর্ণং মন্যে কথংচন
দেবপুত্রমহং মন্যে ক্ষত্রিয়াণাং কুলোদ্ভবম্
24.160
সকুণ্ডলং সকবচং দীর্ঘবাহুং মহারথম্
কথমাদিত্যসদৃশং মৃগী ব্যাঘ্রং জনিষ্যতি
24.161
পশ্য হ্যস্য ভুজৌ পীনৌ নাগরাজকরোপমৌ
বক্ষঃ পশ্য বিশালং চ সর্বশত্রুনিবর্হণম্