Utshovঅধ্যায় 23
23.1
সংজয় উবাচ
পুত্রস্তব মহারাজ মদ্ররাজমিদং বচঃ
বিনয়েনোপসংগম্য প্রণয়াদ্বাক্যমব্রবীৎ
23.2
সত্যব্রত মহাভাগ দ্বিষতামঘবর্ধন
মদ্রেশ্বর রণে শূর পরসৈন্যভয়ংকর
23.3
শ্রুতবানসি কর্ণস্য ব্রুবতো বদতাং বর
যথা নৃপতিসিংহানাং মধ্যে ত্বাং বরয়ত্যয়ম্
23.4
তস্মাত্পার্থবিনাশার্থং হিতার্থং মম চৈব হি
সারথ্যং রথিনাং শ্রেষ্ঠ সুমনাঃ কর্তুমর্হসি
23.5
অস্যাভীশুগ্রহো লোকে নান্যোঽস্তি ভবতা সমঃ
স পাতু সর্বতঃ কর্ণং ভবান্ব্রহ্মেব শংকরম্
23.6
পার্থস্য সচিবঃ কৃষ্ণো যথাভীশুগ্রহো বরঃ
তথা ত্বমপি রাধেয়ং সর্বতঃ পরিপালয়
23.7
ভীষ্মো দ্রোণঃ কৃপঃ কর্ণো ভবান্ভোজশ্চ বীর্যবান্
শকুনিঃ সৌবলো দ্রৌণিরহমেব চ নো বলম্
এষামেব কৃতো ভাগো নবধা পৃতনাপতে
23.8
নৈব ভাগোঽত্র ভীষ্মস্য দ্রোণস্য চ মহাত্মনঃ
তাভ্যামতীত্য তৌ ভাগৌ নিহতা মম শত্রবঃ
23.9
বৃদ্ধৌ হি তৌ নরব্যাঘ্রৌ ছলেন নিহতৌ চ তৌ
কৃত্বা নসুকরং কর্ম গতৌ স্বর্গমিতোঽনঘ
23.10
তথান্যে পুরুষব্যাঘ্রাঃ পরৈর্বিনিহতা যুধি
অস্মদীয়াশ্চ বহবঃ স্বর্গায়োপগতা রণে
ত্যক্ত্বা প্রাণান্যথাশক্তি চেষ্টাঃ কৃত্বা চ পুষ্কলাঃ
23.11
কর্ণো হ্যেকো মহাবাহুরস্মত্প্রিয়হিতে রতঃ
ভবাংশ্চ পুরুষব্যাঘ্র সর্বলোকমহারথঃ
তস্মিঞ্জয়াশা বিপুলা মম মদ্রজনাধিপ
23.12
পার্থস্য সমরে কৃষ্ণো যথাভীশুবরগ্রহঃ
তেন যুক্তো রণে পার্থো রক্ষ্যমাণশ্চ পার্থিব
যানি কর্মাণি কুরুতে প্রত্যক্ষাণি তথৈব তে
23.13
পূর্বং ন সমরে হ্যেবমবধীদর্জুনো রিপূন্
অহন্যহনি মদ্রেশ দ্রাবয়ন্দৃশ্যতে যুধি
23.14
ভাগোঽবশিষ্টঃ কর্ণস্য তব চৈব মহাদ্যুতে
তং ভাগং সহ কর্ণেন যুগপন্নাশয়াহবে
23.15
সূর্যারুণৌ যথা দৃষ্ট্বা তমো নশ্যতি মারিষ
তথা নশ্যন্তু কৌন্তেয়াঃ সপাঞ্চালাঃ সসৃঞ্জয়াঃ
23.16
রথানাং প্রবরঃ কর্ণো যন্তৄণাং প্রবরো ভবান্
সংনিপাতঃ সমো লোকে ভবতোর্নাস্তি কশ্চন
23.17
যথা সর্বাস্ববস্থাসু বার্ষ্ণেয়ঃ পাতি পাণ্ডবম্
তথা ভবান্পরিত্রাতু কর্ণং বৈকর্তনং রণে
23.18
ত্বয়া সারথিনা হ্যেষ অপ্রধৃষ্যো ভবিষ্যতি
দেবতানামপি রণে সশক্রাণাং মহীপতে
কিং পুনঃ পাণ্ডবেয়ানাং মাতিশঙ্কীর্বচো মম
23.19
দুর্যোধনবচঃ শ্রুত্বা শল্যঃ ক্রোধসমন্বিতঃ
ত্রিশিখাং ভ্রুকুটীং কৃত্বা ধুন্বন্হস্তৌ পুনঃ পুনঃ
23.20
ক্রোধরক্তে মহানেত্রে পরিবর্ত্য মহাভুজঃ
কুলৈশ্বর্যশ্রুতিবলৈর্দৃপ্তঃ শল্যোঽব্রবীদিদম্
23.21
অবমন্যসে মাং গান্ধারে ধ্রুবং মাং পরিশঙ্কসে
যন্মাং ব্রবীষি বিস্রব্ধং সারথ্যং ক্রিয়তামিতি
23.22
অস্মত্তোঽভ্যধিকং কর্ণং মন্যমানঃ প্রশংসসি
ন চাহং যুধি রাধেয়ং গণয়ে তুল্যমাত্মনা
23.23
আদিশ্যতামভ্যধিকো মমাংশঃ পৃথিবীপতে
তমহং সমরে হত্বা গমিষ্যামি যথাগতম্
23.24
অথ বাপ্যেক এবাহং যোত্স্যামি কুরুনন্দন
পশ্য বীর্যং মমাদ্য ত্বং সংগ্রামে দহতো রিপূন্
23.25
ন চাভিকামান্কৌরব্য বিধায় হৃদয়ে পুমান্
অস্মদ্বিধঃ প্রবর্তেত মা মা ত্বমতিশঙ্কিথাঃ
23.26
যুধি চাপ্যবমানো মে ন কর্তব্যঃ কথংচন
পশ্য হীমৌ মম ভুজৌ বজ্রসংহননোপমৌ
23.27
ধনুঃ পশ্য চ মে চিত্রং শরাংশ্চাশীবিষোপমান্
রথং পশ্য চ মে কৢপ্তং সদশ্বৈর্বাতবেগিতৈঃ
গদাং চ পশ্য গান্ধারে হেমপট্টবিভূষিতাম্
23.28
দারয়েয়ং মহীং ক্রুদ্ধো বিকিরেয়ং চ পর্বতান্
শোষয়েয়ং সমুদ্রাংশ্চ তেজসা স্বেন পার্থিব
23.29
তন্মামেবংবিধং জানন্সমর্থমরিনিগ্রহে
কস্মাদ্যুনক্ষি সারথ্যে ন্যূনস্যাধিরথের্নৃপ
23.30
ন নাম ধুরি রাজেন্দ্র প্রয়োক্তুং ত্বমিহার্হসি
ন হি পাপীয়সঃ শ্রেয়ান্ভূত্বা প্রেষ্যত্বমুত্সহে
23.31
যো হ্যভ্যুপগতং প্রীত্যা গরীয়াংসং বশে স্থিতম্
বশে পাপীয়সো ধত্তে তত্পাপমধরোত্তরম্
23.32
ব্রাহ্মণা ব্রহ্মণা সৃষ্টা মুখাত্ক্ষত্রমথোরসঃ
ঊরুভ্যামসৃজদ্বৈশ্যাঞ্শূদ্রান্পদ্ভ্যামিতি শ্রুতিঃ
তেভ্যো বর্ণবিশেষাশ্চ প্রতিলোমানুলোমজাঃ
23.33
অথান্যোন্যস্য সংয়োগাচ্চাতুর্বর্ণ্যস্য ভারত
গোপ্তারঃ সংগ্রহীতারো দাতারঃ ক্ষত্রিয়াঃ স্মৃতাঃ
23.34
যাজনাধ্যাপনৈর্বিপ্রা বিশুদ্ধৈশ্চ প্রতিগ্রহৈঃ
লোকস্যানুগ্রহার্থায় স্থাপিতা ব্রহ্মণা ভুবি
23.35
কৃষিশ্চ পাশুপাল্যং চ বিশাং দানং চ সর্বশঃ
ব্রহ্মক্ষত্রবিশাং শূদ্রা বিহিতাঃ পরিচারকাঃ
23.36
ব্রহ্মক্ষত্রস্য বিহিতাঃ সূতা বৈ পরিচারকাঃ
ন বিট্শূদ্রস্য তত্রৈব শৃণু বাক্যং মমানঘ
23.37
সোঽহং মূর্ধাবসিক্তঃ সন্রাজর্ষিকুলসংভবঃ
মহারথঃ সমাখ্যাতঃ সেব্যঃ স্তব্যশ্চ বন্দিনাম্
23.38
সোঽহমেতাদৃশো ভূত্বা নেহারিকুলমর্দন
সূতপুত্রস্য সংগ্রামে সারথ্যং কর্তুমুত্সহে
23.39
অবমানমহং প্রাপ্য ন যোত্স্যামি কথংচন
আপৃচ্ছ্য ত্বাদ্য গান্ধারে গমিষ্যামি যথাগতম্
23.40
এবমুক্ত্বা নরব্যাঘ্রঃ শল্যঃ সমিতিশোভনঃ
উত্থায় প্রয়য়ৌ তূর্ণং রাজমধ্যাদমর্ষিতঃ
23.41
প্রণয়াদ্বহুমানাচ্চ তং নিগৃহ্য সুতস্তব
অব্রবীন্মধুরং বাক্যং সাম সর্বার্থসাধকম্
23.42
যথা শল্য ত্বমাত্থেদমেবমেতদসংশয়ম্
অভিপ্রায়স্তু মে কশ্চিত্তং নিবোধ জনেশ্বর
23.43
ন কর্ণোঽভ্যধিকস্ত্বত্তঃ শঙ্কে নৈব কথংচন
ন হি মদ্রেশ্বরো রাজা কুর্যাদ্যদনৃতং ভবেৎ
23.44
ঋতমেব হি পূর্বাস্তে বহন্তি পুরুষোত্তমাঃ
তস্মাদার্তায়নিঃ প্রোক্তো ভবানিতি মতির্মম
23.45
শল্যভূতশ্চ শত্রূণাং যস্মাত্ত্বং ভুবি মানদ
তস্মাচ্ছল্যেতি তে নাম কথ্যতে পৃথিবীপতে
23.46
যদেব ব্যাহৃতং পূর্বং ভবতা ভূরিদক্ষিণ
তদেব কুরু ধর্মজ্ঞ মদর্থং যদ্যদুচ্যসে
23.47
ন চ ত্বত্তো হি রাধেয়ো ন চাহমপি বীর্যবান্
বৃণীমস্ত্বাং হয়াগ্র্যাণাং যন্তারমিতি সংয়ুগে
23.48
যথা হ্যভ্যধিকং কর্ণং গুণৈস্তাত ধনংজয়াৎ
বাসুদেবাদপি ত্বাং চ লোকোঽয়মিতি মন্যতে
23.49
কর্ণো হ্যভ্যধিকঃ পার্থাদস্ত্রৈরেব নরর্ষভ
ভবানপ্যধিকঃ কৃষ্ণাদশ্বয়ানে বলে তথা
23.50
যথাশ্বহৃদয়ং বেদ বাসুদেবো মহামনাঃ
দ্বিগুণং ত্বং তথা বেত্থ মদ্ররাজ ন সংশয়ঃ
23.51
শল্য উবাচ
যন্মা ব্রবীষি গান্ধারে মধ্যে সৈন্যস্য কৌরব
বিশিষ্টং দেবকীপুত্রাত্প্রীতিমানস্ম্যহং ত্বয়ি
23.52
এষ সারথ্যমাতিষ্ঠে রাধেয়স্য যশস্বিনঃ
যুধ্যতঃ পাণ্ডবাগ্র্যেণ যথা ত্বং বীর মন্যসে
23.53
সময়শ্চ হি মে বীর কশ্চিদ্বৈকর্তনং প্রতি
উত্সৃজেয়ং যথাশ্রদ্ধমহং বাচোঽস্য সংনিধৌ
23.54
সংজয় উবাচ
তথেতি রাজন্পুত্রস্তে সহ কর্ণেন ভারত
অব্রবীন্মদ্ররাজস্য সুতং ভরতসত্তম