Utshovঅধ্যায় 22
22.1
ধৃতরাষ্ট্র উবাচ
স্বেন চ্ছন্দেন নঃ সর্বান্নাবধীদ্ব্যক্তমর্জুনঃ
ন হ্যস্য সমরে মুচ্যেতান্তকোঽপ্যাততায়িনঃ
22.2
পার্থো হ্যেকোঽহরদ্ভদ্রামেকশ্চাগ্নিমতর্পয়ৎ
একশ্চেমাং মহীং জিত্বা চক্রে বলিভৃতো নৃপান্
22.3
একো নিবাতকবচানবধীদ্দিব্যকার্মুকঃ
একঃ কিরাতরূপেণ স্থিতং শর্বময়োধয়ৎ
22.4
একোঽভ্যরক্ষদ্ভরতানেকো ভবমতোষয়ৎ
তেনৈকেন জিতাঃ সর্বে মদীয়া উগ্রতেজসঃ
তে ন নিন্দ্যাঃ প্রশস্যাশ্চ যত্তে চক্রুর্ব্রবীহি তৎ
22.5
সংজয় উবাচ
হতপ্রহতবিধ্বস্তা বিবর্মায়ুধবাহনাঃ
দীনস্বরা দূয়মানা মানিনঃ শত্রুভির্জিতাঃ
22.6
শিবিরস্থাঃ পুনর্মন্ত্রং মন্ত্রয়ন্তি স্ম কৌরবাঃ
ভগ্নদংষ্ট্রা হতবিষাঃ পদাক্রান্তা ইবোরগাঃ
22.7
তানব্রবীত্ততঃ কর্ণঃ ক্রুদ্ধঃ সর্প ইব শ্বসন্
করং করেণাভিপীড্য প্রেক্ষমাণস্তবাত্মজম্
22.8
যত্তো দৃঢশ্চ দক্ষশ্চ ধৃতিমানর্জুনঃ সদা
স বোধয়তি চাপ্যেনং প্রাপ্তকালমধোক্ষজঃ
22.9
সহসাস্ত্রবিসর্গেণ বয়ং তেনাদ্য বঞ্চিতাঃ
শ্বস্ত্বহং তস্য সংকল্পং সর্বং হন্তা মহীপতে
22.10
এবমুক্তস্তথেত্যুক্ত্বা সোঽনুজজ্ঞে নৃপোত্তমান্
সুখোষিতাস্তে রজনীং হৃষ্টা যুদ্ধায় নির্যয়ুঃ
22.11
তেঽপশ্যন্বিহিতং ব্যূহং ধর্মরাজেন দুর্জয়ম্
প্রয়ত্নাত্কুরুমুখ্যেন বৃহস্পত্যুশনোমতাৎ
22.12
অথ প্রতীপকর্তারং সততং বিজিতাত্মনাম্
সস্মার বৃষভস্কন্ধং কর্ণং দুর্যোধনস্তদা
22.13
পুরংদরসমং যুদ্ধে মরুদ্গণসমং বলে
কার্তবীর্যসমং বীর্যে কর্ণং রাজ্ঞোঽগমন্মনঃ
সূতপুত্রং মহেষ্বাসং বন্ধুমাত্যয়িকেষ্বিব
22.14
ধৃতরাষ্ট্র উবাচ
যদ্বোঽগমন্মনো মন্দাঃ কর্ণং বৈকর্তনং তদা
অপ্যদ্রাক্ষত তং যূয়ং শীতার্তা ইব ভাস্করম্
22.15
কৃতেঽবহারে সৈন্যানাং প্রবৃত্তে চ রণে পুনঃ
কথং বৈকর্তনঃ কর্ণস্তত্রায়ুধ্যত সংজয়
কথং চ পাণ্ডবাঃ সর্বে যুয়ুধুস্তত্র সূতজম্
22.16
কর্ণো হ্যেকো মহাবাহুর্হন্যাত্পার্থান্সসোমকান্
কর্ণস্য ভুজয়োর্বীর্যং শক্রবিষ্ণুসমং মতম্
তথাস্ত্রাণি সুঘোরাণি বিক্রমশ্চ মহাত্মনঃ
22.17
দুর্যোধনং তদা দৃষ্ট্বা পাণ্ডবেন ভৃশার্দিতম্
পরাক্রান্তান্পাণ্ডুসুতান্দৃষ্ট্বা চাপি মহাহবে
22.18
কর্ণমাশ্রিত্য সংগ্রামে দর্পো দুর্যোধনে পুনঃ
জেতুমুত্সহতে পার্থান্সপুত্রান্সহকেশবান্
22.19
অহো বত মহদ্দুঃখং যত্র পাণ্ডুসুতান্রণে
নাতরদ্রভসঃ কর্ণো দৈবং নূনং পরায়ণম্
অহো দ্যূতস্য নিষ্ঠেয়ং ঘোরা সংপ্রতি বর্ততে
22.20
অহো দুঃখানি তীব্রাণি দুর্যোধনকৃতান্যহম্
সহিষ্যামি সুঘোরাণি শল্যভূতানি সংজয়
22.21
সৌবলং চ তথা তাত নীতিমানিতি মন্যতে
22.22
যুদ্ধেষু নাম দিব্যেষু বর্তমানেষু সংজয়
অশ্রৌষং নিহতান্পুত্রান্নিত্যমেব চ নির্জিতান্
22.23
ন পাণ্ডবানাং সমরে কশ্চিদস্তি নিবারকঃ
স্ত্রীমধ্যমিব গাহন্তি দৈবং হি বলবত্তরম্
22.24
সংজয় উবাচ
অতিক্রান্তং হি যত্কার্যং পশ্চাচ্চিন্তয়তীতি চ
তচ্চাস্য ন ভবেত্কার্যং চিন্তয়া চ বিনশ্যতি
22.25
তদিদং তব কার্যং তু দূরপ্রাপ্তং বিজানতা
ন কৃতং যত্ত্বয়া পূর্বং প্রাপ্তাপ্রাপ্তবিচারণে
22.26
উক্তোঽসি বহুধা রাজন্মা যুধ্যস্বেতি পাণ্ডবৈঃ
গৃহ্ণীষে ন চ তন্মোহাত্পাণ্ডবেষু বিশাং পতে
22.27
ত্বয়া পাপানি ঘোরাণি সমাচীর্ণানি পাণ্ডুষু
ত্বত্কৃতে বর্ততে ঘোরঃ পার্থিবানাং জনক্ষয়ঃ
22.28
তত্ত্বিদানীমতিক্রম্য মা শুচো ভরতর্ষভ
শৃণু সর্বং যথাবৃত্তং ঘোরং বৈশসমচ্যুত
22.29
প্রভাতায়াং রজন্যাং তু কর্ণো রাজানমভ্যয়াৎ
সমেত্য চ মহাবাহুর্দুর্যোধনমভাষত
22.30
অদ্য রাজন্সমেষ্যামি পাণ্ডবেন যশস্বিনা
হনিষ্যামি চ তং বীরং স বা মাং নিহনিষ্যতি
22.31
বহুত্বান্মম কার্যাণাং তথা পার্থস্য পার্থিব
নাভূত্সমাগমো রাজন্মম চৈবার্জুনস্য চ
22.32
ইদং তু মে যথাপ্রজ্ঞং শৃণু বাক্যং বিশাং পতে
অনিহত্য রণে পার্থং নাহমেষ্যামি ভারত
22.33
হতপ্রবীরে সৈন্যেঽস্মিন্ময়ি চৈব স্থিতে যুধি
অভিয়াস্যতি মাং পার্থঃ শক্রশক্ত্যা বিনাকৃতম্
22.34
ততঃ শ্রেয়স্করং যত্তে তন্নিবোধ জনেশ্বর
আয়ুধানাং চ যদ্বীর্যং দ্রব্যাণামর্জুনস্য চ
22.35
কায়স্য মহতো ভেদে লাঘবে দূরপাতনে
সৌষ্ঠবে চাস্ত্রয়োগে চ সব্যসাচী ন মত্সমঃ
22.36
সর্বায়ুধমহামাত্রং বিজয়ং নাম তদ্ধনুঃ
ইন্দ্রার্থমভিকামেন নির্মিতং বিশ্বকর্মণা
22.37
যেন দৈত্যগণান্রাজঞ্জিতবান্বৈ শতক্রতুঃ
যস্য ঘোষেণ দৈত্যানাং বিমুহ্যন্তি দিশো দশ
তদ্ভার্গবায় প্রায়চ্ছচ্ছক্রঃ পরমসংমতম্
22.38
তদ্দিব্যং ভার্গবো মহ্যমদদাদ্ধনুরুত্তমম্
যেন যোত্স্যে মহাবাহুমর্জুনং জয়তাং বরম্
যথেন্দ্রঃ সমরে সর্বান্দৈতেয়ান্বৈ সমাগতান্
22.39
ধনুর্ঘোরং রামদত্তং গাণ্ডীবাত্তদ্বিশিষ্যতে
ত্রিঃসপ্তকৃত্বঃ পৃথিবী ধনুষা তেন নির্জিতা
22.40
ধনুষো যস্য কর্মাণি দিব্যানি প্রাহ ভার্গবঃ
তদ্রামো হ্যদদান্মহ্যং যেন যোত্স্যামি পাণ্ডবম্
22.41
অদ্য দুর্যোধনাহং ত্বাং নন্দয়িষ্যে সবান্ধবম্
নিহত্য সমরে বীরমর্জুনং জয়তাং বরম্
22.42
সপর্বতবনদ্বীপা হতদ্বিড্ভূঃ সসাগরা
পুত্রপৌত্রপ্রতিষ্ঠা তে ভবিষ্যত্যদ্য পার্থিব
22.43
নাসাধ্যং বিদ্যতে মেঽদ্য ত্বত্প্রিয়ার্থং বিশেষতঃ
সম্যগ্ধর্মানুরক্তস্য সিদ্ধিরাত্মবতো যথা
22.44
ন হি মাং সমরে সোঢুং স শক্তোঽগ্নিং তরুর্যথা
অবশ্যং তু ময়া বাচ্যং যেন হীনোঽস্মি ফল্গুনাৎ
22.45
জ্যা তস্য ধনুষো দিব্যা তথাক্ষয্যৌ মহেষুধী
তস্য দিব্যং ধনুঃ শ্রেষ্ঠং গাণ্ডীবমজরং যুধি
22.46
বিজয়ং চ মহদ্দিব্যং মমাপি ধনুরুত্তমম্
তত্রাহমধিকঃ পার্থাদ্ধনুষা তেন পার্থিব
22.47
ময়া চাভ্যধিকো বীরঃ পাণ্ডবস্তন্নিবোধ মে
রশ্মিগ্রাহশ্চ দাশার্হঃ সর্বলোকনমস্কৃতঃ
22.48
অগ্নিদত্তশ্চ বৈ দিব্যো রথঃ কাঞ্চনভূষণঃ
অচ্ছেদ্যঃ সর্বতো বীর বাজিনশ্চ মনোজবাঃ
ধ্বজশ্চ দিব্যো দ্যুতিমান্বানরো বিস্ময়ংকরঃ
22.49
কৃষ্ণশ্চ স্রষ্টা জগতো রথং তমভিরক্ষতি
এভির্দ্রব্যৈরহং হীনো যোদ্ধুমিচ্ছামি পাণ্ডবম্
22.50
অয়ং তু সদৃশো বীরঃ শল্যঃ সমিতিশোভনঃ
সারথ্যং যদি মে কুর্যাদ্ধ্রুবস্তে বিজয়ো ভবেৎ
22.51
তস্য মে সারথিঃ শল্যো ভবত্বসুকরঃ পরৈঃ
নারাচান্গার্ধ্রপত্রাংশ্চ শকটানি বহন্তু মে
22.52
রথাশ্চ মুখ্যা রাজেন্দ্র যুক্তা বাজিভিরুত্তমৈঃ
আয়ান্তু পশ্চাত্সততং মামেব ভরতর্ষভ
22.53
এবমভ্যধিকঃ পার্থাদ্ভবিষ্যামি গুণৈরহম্
শল্যো হ্যভ্যধিকঃ কৃষ্ণাদর্জুনাদধিকো হ্যহম্
22.54
যথাশ্বহৃদয়ং বেদ দাশার্হঃ পরবীরহা
তথা শল্যোঽপি জানীতে হয়ানাং বৈ মহারথঃ
22.55
বাহুবীর্যে সমো নাস্তি মদ্ররাজস্য কশ্চন
তথাস্ত্রৈর্মত্সমো নাস্তি কশ্চিদেব ধনুর্ধরঃ
22.56
তথা শল্যসমো নাস্তি হয়য়ানে হ কশ্চন
সোঽয়মভ্যধিকঃ পার্থাদ্ভবিষ্যতি রথো মম
22.57
এতত্কৃতং মহারাজ ত্বয়েচ্ছামি পরংতপ
এবং কৃতে কৃতং মহ্যং সর্বকামৈর্ভবিষ্যতি
22.58
ততো দ্রষ্টাসি সমরে যত্করিষ্যামি ভারত
সর্বথা পাণ্ডবান্সর্বাঞ্জেষ্যাম্যদ্য সমাগতান্
22.59
দুর্যোধন উবাচ
সর্বমেতত্করিষ্যামি যথা ত্বং কর্ণ মন্যসে
সোপাসঙ্গা রথাঃ সাশ্বা অনুয়াস্যন্তি সূতজ
22.60
নারাচান্গার্ধ্রপক্ষাংশ্চ শকটানি বহন্তু তে
অনুয়াস্যাম কর্ণ ত্বাং বয়ং সর্বে চ পার্থিবাঃ
22.61
সংজয় উবাচ
এবমুক্ত্বা মহারাজ তব পুত্রাঃ প্রতাপবান্
অভিগম্যাব্রবীদ্রাজা মদ্ররাজমিদং বচঃ