Utshovঅধ্যায় 21
21.1
সংজয় উবাচ
ততঃ কর্ণং পুরস্কৃত্য ত্বদীয়া যুদ্ধদুর্মদাঃ
পুনরাবৃত্য সংগ্রামং চক্রুর্দেবাসুরোপমম্
21.2
দ্বিরদরথনরাশ্বশঙ্খশব্দৈঃ; পরিহৃষিতা বিবিধৈশ্চ শস্ত্রপাতৈঃ
দ্বিরদরথপদাতিসার্থবাহাঃ; পরিপতিতাভিমুখাঃ প্রজহ্রিরে তে
21.3
শরপরশুবরাসিপট্টিশৈ;রিষুভিরনেকবিধৈশ্চ সাদিতাঃ
দ্বিরদরথহয়া মহাহবে; বরপুরুষৈঃ পুরুষাশ্চ বাহনৈঃ
21.4
কমলদিনকরেন্দুসংনিভৈঃ; সিতদশনৈঃ সুমুখাক্ষিনাসিকৈঃ
রুচিরমুকুটকুণ্ডলৈর্মহী; পুরুষশিরোভিরবস্তৃতা বভৌ
21.5
পরিঘমুসলশক্তিতোমরৈ;র্নখরভুশুণ্ডিগদাশতৈর্দ্রুতাঃ
দ্বিরদনরহয়াঃ সহস্রশো; রুধিরনদীপ্রবহাস্তদাভবন্
21.6
প্রহতনররথাশ্বকুঞ্জরং; প্রতিভয়দর্শনমুল্বণং তদা
তদহিতনিহতং বভৌ বলং; পিতৃপতিরাষ্ট্রমিব প্রজাক্ষয়ে
21.7
অথ তব নরদেব সৈনিকা;স্তব চ সুতাঃ সুরসূনুসংনিভাঃ
অমিতবলপুরঃসরা রণে; কুরুবৃষভাঃ শিনিপুত্রমভ্যয়ুঃ
21.8
তদতিরুচিরভীমমাবভৌ; পুরুষবরাশ্বরথদ্বিপাকুলম্
লবণজলসমুদ্ধতস্বনং; বলমমরাসুরসৈন্যসংনিভম্
21.9
সুরপতিসমবিক্রমস্তত;স্ত্রিদশবরাবরজোপমং যুধি
দিনকরকিরণপ্রভৈঃ পৃষত্কৈ; রবিতনয়োঽভ্যহনচ্ছিনিপ্রবীরম্
21.10
তমপি সরথবাজিসারথিং; শিনিবৃষভো বিবিধৈঃ শরৈস্ত্বরন্
ভুজগবিষসমপ্রভৈ রণে; পুরুষবরং সমবাস্তৃণোত্তদা
21.11
শিনিবৃষভশরপ্রপীডিতং; তব সুহৃদো বসুষেণমভ্যয়ুঃ
ত্বরিতমতিরথা রথর্ষভং; দ্বিরদরথাশ্বপদাতিভিঃ সহ
21.12
তমুদধিনিভমাদ্রবদ্বলী; ত্বরিততরৈঃ সমভিদ্রুতং পরৈঃ
দ্রুপদসুতসখস্তদাকরো;ত্পুরুষরথাশ্বগজক্ষয়ং মহৎ
21.13
অথ পুরুষবরৌ কৃতাহ্নিকৌ; ভবমভিপূজ্য যথাবিধি প্রভুম্
অরিবধকৃতনিশ্চয়ৌ দ্রুতং; তব বলমর্জুনকেশবৌ সৃতৌ
21.14
জলদনিনদনিস্বনং রথং; পবনবিধূতপতাককেতনম্
সিতহয়মুপয়ান্তমন্তিকং; হৃতমনসো দদৃশুস্তদারয়ঃ
21.15
অথ বিস্ফার্য গাণ্ডীবং রণে নৃত্যন্নিবার্জুনঃ
শরসংবাধমকরোত্খং দিশঃ প্রদিশস্তথা
21.16
রথান্বিমানপ্রতিমান্সজ্জয়ন্ত্রায়ুধধ্বজান্
সসারথীংস্তদা বাণৈরভ্রাণীবানিলোঽবধীৎ
21.17
গজান্গজপ্রয়ন্তৄংশ্চ বৈজয়ন্ত্যায়ুধধ্বজান্
সাদিনোঽশ্বাংশ্চ পত্তীংশ্চ শরৈর্নিন্যে যমক্ষয়ম্
21.18
তমন্তকমিব ক্রুদ্ধমনিবার্যং মহারথম্
দুর্যোধনোঽভ্যয়াদেকো নিঘ্নন্বাণৈঃ পৃথগ্বিধৈঃ
21.19
তস্যার্জুনো ধনুঃ সূতং কেতুমশ্বাংশ্চ সায়কৈঃ
হত্বা সপ্তভিরেকৈকং ছত্রং চিচ্ছেদ পত্রিণা
21.20
নবমং চ সমাসাদ্য ব্যসৃজত্প্রতিঘাতিনম্
দুর্যোধনায়েষুবরং তং দ্রৌণিঃ সপ্তধাচ্ছিনৎ
21.21
ততো দ্রৌণের্ধনুশ্ছিত্ত্বা হত্বা চাশ্ববরাঞ্শরৈঃ
কৃপস্যাপি তথাত্যুগ্রং ধনুশ্চিচ্ছেদ পাণ্ডবঃ
21.22
হার্দিক্যস্য ধনুশ্ছিত্ত্বা ধ্বজং চাশ্বং তথাবধীৎ
দুঃশাসনস্যেষুবরং ছিত্ত্বা রাধেয়মভ্যয়াৎ
21.23
অথ সাত্যকিমুত্সৃজ্য ত্বরন্কর্ণোঽর্জুনং ত্রিভিঃ
বিদ্ধ্বা বিব্যাধ বিংশত্যা কৃষ্ণং পার্থং পুনস্ত্রিভিঃ
21.24
অথ সাত্যকিরাগত্য কর্ণং বিদ্ধ্বা শিতৈঃ শরৈঃ
নবত্যা নবভিশ্চোগ্রৈঃ শতেন পুনরার্দয়ৎ
21.25
ততঃ প্রবীরাঃ পাণ্ডূনাং সর্বে কর্ণমপীডয়ন্
যুধামন্যুঃ শিখণ্ডী চ দ্রৌপদেয়াঃ প্রভদ্রকাঃ
21.26
উত্তমৌজা যুয়ুত্সুশ্চ যমৌ পার্ষত এব চ
চেদিকারূষমত্স্যানাং কেকয়ানাং চ যদ্বলম্
চেকিতানশ্চ বলবান্ধর্মরাজশ্চ সুব্রতঃ
21.27
এতে রথাশ্বদ্বিরদৈঃ পত্তিভিশ্চোগ্রবিক্রমৈঃ
পরিবার্য রণে কর্ণং নানাশস্ত্রৈরবাকিরন্
ভাষন্তো বাগ্ভিরুগ্রাভিঃ সর্বে কর্ণবধে বৃতাঃ
21.28
তাং শস্ত্রবৃষ্টিং বহুধা ছিত্ত্বা কর্ণঃ শিতৈঃ শরৈঃ
অপোবাহ স্ম তান্সর্বান্দ্রুমান্ভঙ্ক্ত্বেব মারুতঃ
21.29
রথিনঃ সমহামাত্রান্গজানশ্বান্সসাদিনঃ
শরব্রাতাংশ্চ সংক্রুদ্ধো নিঘ্নন্কর্ণো ব্যদৃশ্যত
21.30
তদ্বধ্যমানং পাণ্ডূনাং বলং কর্ণাস্ত্রতেজসা
বিশস্ত্রক্ষতদেহং চ প্রায় আসীত্পরাঙ্মুখম্
21.31
অথ কর্ণাস্ত্রমস্ত্রেণ প্রতিহত্যার্জুনঃ স্বয়ম্
দিশঃ খং চৈব ভূমিং চ প্রাবৃণোচ্ছরবৃষ্টিভিঃ
21.32
মুসলানীব নিষ্পেতুঃ পরিঘা ইব চেষবঃ
শতঘ্ন্য ইব চাপ্যন্যে বজ্রাণ্যুগ্রাণি বাপরে
21.33
তৈর্বধ্যমানং তত্সৈন্যং সপত্ত্যশ্বরথদ্বিপম্
নিমীলিতাক্ষমত্যর্থমুদভ্রাম্যত্সমন্ততঃ
21.34
নিষ্কৈবল্যং তদা যুদ্ধং প্রাপুরশ্বনরদ্বিপাঃ
বধ্যমানাঃ শরৈরন্যে তদা ভীতাঃ প্রদুদ্রুবুঃ
21.35
এবং তেষাং তদা যুদ্ধে সংসক্তানাং জয়ৈষিণাম্
গিরিমস্তং সমাসাদ্য প্রত্যপদ্যত ভানুমান্
21.36
তমসা চ মহারাজ রজসা চ বিশেষতঃ
ন কিংচিত্প্রত্যপশ্যাম শুভং বা যদি বাশুভম্
21.37
তে ত্রসন্তো মহেষ্বাসা রাত্রিয়ুদ্ধস্য ভারত
অপয়ানং ততশ্চক্রুঃ সহিতাঃ সর্ববাজিভিঃ
21.38
কৌরবেষু চ যাতেষু তদা রাজন্দিনক্ষয়ে
জয়ং সুমনসঃ প্রাপ্য পার্থাঃ স্বশিবিরং যয়ুঃ
21.39
বাদিত্রশব্দৈর্বিবিধৈঃ সিংহনাদৈশ্চ নর্তিতৈঃ
পরানবহসন্তশ্চ স্তুবন্তশ্চাচ্যুতার্জুনৌ
21.40
কৃতেঽবহারে তৈর্বীরৈঃ সৈনিকাঃ সর্ব এব তে
আশিষঃ পাণ্ডবেয়েষু প্রায়ুজ্যন্ত নরেশ্বরাঃ
21.41
ততঃ কৃতেঽবহারে চ প্রহৃষ্টাঃ কুরুপাণ্ডবাঃ
নিশায়াং শিবিরং গত্বা ন্যবিশন্ত নরেশ্বরাঃ
21.42
যক্ষরক্ষঃপিশাচাশ্চ শ্বাপদানি চ সংঘশঃ
জগ্মুরায়োধনং ঘোরং রুদ্রস্যানর্তনোপমম্