Utshovঅধ্যায় 20
20.1
ধৃতরাষ্ট্র উবাচ
অতিতীব্রাণি দুঃখানি দুঃসহানি বহূনি চ
তবাহং সংজয়াশ্রৌষং পুত্রাণাং মম সংক্ষয়ম্
20.2
তথা তু মে কথয়সে যথা যুদ্ধং তু বর্ততে
ন সন্তি সূত কৌরব্যা ইতি মে নৈষ্ঠিকী মতিঃ
20.3
দুর্যোধনস্তু বিরথঃ কৃতস্তত্র মহারণে
ধর্মপুত্রঃ কথং চক্রে তস্মিন্বা নৃপতিঃ কথম্
20.4
অপরাহ্ণে কথং যুদ্ধমভবল্লোমহর্ষণম্
তন্মমাচক্ষ্ব তত্ত্বেন কুশলো হ্যসি সংজয়
20.5
সংজয় উবাচ
সংসক্তেষু চ সৈন্যেষু যুধ্যমানেষু ভাগশঃ
রথমন্যং সমাস্থায় পুত্রস্তব বিশাং পতে
20.6
ক্রোধেন মহতাবিষ্টঃ সবিষো ভুজগো যথা
দুর্যোধনস্তু দৃষ্ট্বা বৈ ধর্মরাজং যুধিষ্ঠিরম্
উবাচ সূত ত্বরিতং যাহি যাহীতি ভারত
20.7
অত্র মাং প্রাপয় ক্ষিপ্রং সারথে যত্র পাণ্ডবঃ
ধ্রিয়মাণেন ছত্রেণ রাজা রাজতি দংশিতঃ
20.8
স সূতশ্চোদিতো রাজ্ঞা রাজ্ঞঃ স্যন্দনমুত্তমম্
যুধিষ্ঠিরস্যাভিমুখং প্রেষয়ামাস সংয়ুগে
20.9
ততো যুধিষ্ঠিরঃ ক্রুদ্ধঃ প্রমত্ত ইব সদ্গবঃ
সারথিং চোদয়ামাস যাহি যত্র সুয়োধনঃ
20.10
তৌ সমাজগ্মতুর্বীরৌ ভ্রাতরৌ রথসত্তমৌ
সমেত্য চ মহাবীর্যৌ সংনদ্ধৌ যুদ্ধদুর্মদৌ
ততক্ষতুর্মহেষ্বাসৌ শরৈরন্যোন্যমাহবে
20.11
ততো দুর্যোধনো রাজা ধর্মশীলস্য মারিষ
শিলাশিতেন ভল্লেন ধনুশ্চিচ্ছেদ সংয়ুগে
তং নামৃষ্যত সংক্রুদ্ধো ব্যবসায়ং যুধিষ্ঠিরঃ
20.12
অপবিধ্য ধনুশ্ছিন্নং ক্রোধসংরক্তলোচনঃ
অন্যত্কার্মুকমাদায় ধর্মপুত্রশ্চমূমুখে
20.13
দুর্যোধনস্য চিচ্ছেদ ধ্বজং কার্মুকমেব চ
অথান্যদ্ধনুরাদায় প্রত্যবিধ্যত পাণ্ডবম্
20.14
তাবন্যোন্যং সুসংরব্ধৌ শরবর্ষাণ্যমুঞ্চতাম্
সিংহাবিব সুসংক্রুদ্ধৌ পরস্পরজিগীষয়া
20.15
অন্যোন্যং জঘ্নতুশ্চৈব নর্দমানৌ বৃষাবিব
অন্যোন্যং প্রেক্ষমাণৌ চ চেরতুস্তৌ মহারথৌ
20.16
ততঃ পূর্ণায়তোত্সৃষ্টৈরন্যোন্যং সুকৃতব্রণৌ
বিরেজতুর্মহারাজ পুষ্পিতাবিব কিংশুকৌ
20.17
ততো রাজন্প্রতিভয়ান্সিংহনাদান্মুহুর্মুহুঃ
তলয়োশ্চ তথা শব্দান্ধনুষোশ্চ মহাহবে
20.18
শঙ্খশব্দরবাংশ্চৈব চক্রতুস্তৌ রথোত্তমৌ
অন্যোন্যং চ মহারাজ পীডয়াং চক্রতুর্ভৃশম্
20.19
ততো যুধিষ্ঠিরো রাজা তব পুত্রং ত্রিভিঃ শরৈঃ
আজঘানোরসি ক্রুদ্ধো বজ্রবেগো দুরাসদঃ
20.20
প্রতিবিব্যাধ তং তূর্ণং তব পুত্রো মহীপতিম্
পঞ্চভির্নিশিতৈর্বাণৈর্হেমপুঙ্খৈঃ শিলাশিতৈঃ
20.21
ততো দুর্যোধনো রাজা শক্তিং চিক্ষেপ ভারত
সর্বপারশবীং তীক্ষ্ণাং মহোল্কাপ্রতিমাং তদা
20.22
তামাপতন্তীং সহসা ধর্মরাজঃ শিলাশিতৈঃ
ত্রিভিশ্চিচ্ছেদ সহসা তং চ বিব্যাধ সপ্তভিঃ
20.23
নিপপাত ততঃ সাথ হেমদণ্ডা মহাঘনা
নিপতন্তী মহোল্কেব ব্যরাজচ্ছিখিসংনিভা
20.24
শক্তিং বিনিহতাং দৃষ্ট্বা পুত্রস্তব বিশাং পতে
নবভির্নিশিতৈর্ভল্লৈর্নিজঘান যুধিষ্ঠিরম্
20.25
সোঽতিবিদ্ধো বলবতামগ্রণীঃ শত্রুতাপনঃ
দুর্যোধনং সমুদ্দিশ্য বাণং জগ্রাহ সত্বরঃ
20.26
সমাধত্ত চ তং বাণং ধনুষ্যুগ্রং মহাবলঃ
চিক্ষেপ চ ততো রাজা রাজ্ঞঃ ক্রুদ্ধঃ পরাক্রমী
20.27
স তু বাণঃ সমাসাদ্য তব পুত্রং মহারথম্
ব্যমোহয়ত রাজানং ধরণীং চ জগাম হ
20.28
ততো দুর্যোধনঃ ক্রুদ্ধো গদামুদ্যম্য বেগিতঃ
বিধিত্সুঃ কলহস্যান্তমভিদুদ্রাব পাণ্ডবম্
20.29
তমালক্ষ্যোদ্যতগদং দণ্ডহস্তমিবান্তকম্
ধর্মরাজো মহাশক্তিং প্রাহিণোত্তব সূনবে
দীপ্যমানাং মহাবেগাং মহোল্কাং জ্বলিতামিব
20.30
রথস্থঃ স তয়া বিদ্ধো বর্ম ভিত্ত্বা মহাহবে
ভৃশং সংবিগ্নহৃদয়ঃ পপাত চ মুমোহ চ
20.31
ততস্ত্বরিতমাগত্য কৃতবর্মা তবাত্মজম্
প্রত্যপদ্যত রাজানং মগ্নং বৈ ব্যসনার্ণবে
20.32
ভীমোঽপি মহতীং গৃহ্য গদাং হেমপরিষ্কৃতাম্
অভিদুদ্রাব বেগেন কৃতবর্মাণমাহবে
এবং তদভবদ্যুদ্ধং ত্বদীয়ানাং পরৈঃ সহ