Utshovঅধ্যায় 19
19.1
সংজয় উবাচ
শ্বেতাশ্বোঽপি মহারাজ ব্যধমত্তাবকং বলম্
যথা বায়ুঃ সমাসাদ্য তূলরাশিং সমন্ততঃ
19.2
প্রত্যুদ্যয়ুস্ত্রিগর্তাস্তং শিবয়ঃ কৌরবৈঃ সহ
শাল্বাঃ সংশপ্তকাশ্চৈব নারায়ণবলং চ যৎ
19.3
সত্যসেনঃ সত্যকীর্তির্মিত্রদেবঃ শ্রুতংজয়ঃ
সৌশ্রুতিশ্চিত্রসেনশ্চ মিত্রবর্মা চ ভারত
19.4
ত্রিগর্তরাজঃ সমরে ভ্রাতৃভিঃ পরিবারিতঃ
পুত্রৈশ্চৈব মহেষ্বাসৈর্নানাশস্ত্রধরৈর্যুধি
19.5
তে সৃজন্তঃ শরব্রাতান্কিরন্তোঽর্জুনমাহবে
অভ্যদ্রবন্ত সমরে বার্যোঘা ইব সাগরম্
19.6
তে ত্বর্জুনং সমাসাদ্য যোধাঃ শতসহস্রশঃ
অগচ্ছন্বিলয়ং সর্বে তার্ক্ষ্যং দৃষ্ট্বেব পন্নগাঃ
19.7
তে বধ্যমানাঃ সমরে নাজহুঃ পাণ্ডবং তদা
দহ্যমানা যথা রাজঞ্শলভা ইব পাবকম্
19.8
সত্যসেনস্ত্রিভির্বাণৈর্বিব্যাধ যুধি পাণ্ডবম্
মিত্রদেবস্ত্রিষষ্ট্যা চ চন্দ্রদেবশ্চ সপ্তভিঃ
19.9
মিত্রবর্মা ত্রিসপ্তত্যা সৌশ্রুতিশ্চাপি পঞ্চভিঃ
শত্রুংজয়শ্চ বিংশত্যা সুশর্মা নবভিঃ শরৈঃ
19.10
শত্রুংজয়ং চ রাজানং হত্বা তত্র শিলাশিতৈঃ
সৌশ্রুতেঃ সশিরস্ত্রাণং শিরঃ কায়াদপাহরৎ
ত্বরিতশ্চন্দ্রদেবং চ শরৈর্নিন্যে যমক্ষয়ম্
19.11
অথেতরান্মহারাজ যতমানান্মহারথান্
পঞ্চভিঃ পঞ্চভির্বাণৈরেকৈকং প্রত্যবারয়ৎ
19.12
সত্যসেনস্তু সংক্রুদ্ধস্তোমরং ব্যসৃজন্মহৎ
সমুদ্দিশ্য রণে কৃষ্ণং সিংহনাদং ননাদ চ
19.13
স নির্ভিদ্য ভুজং সব্যং মাধবস্য মহাত্মনঃ
অয়স্ময়ো মহাচণ্ডো জগাম ধরণীং তদা
19.14
মাধবস্য তু বিদ্ধস্য তোমরেণ মহারণে
প্রতোদঃ প্রাপতদ্ধস্তাদ্রশ্ময়শ্চ বিশাং পতে
19.15
স প্রতোদং পুনর্গৃহ্য রশ্মীংশ্চৈব মহায়শাঃ
বাহয়ামাস তানশ্বান্সত্যসেনরথং প্রতি
19.16
বিষ্বক্সেনং তু নির্ভিন্নং প্রেক্ষ্য পার্থো ধনংজয়ঃ
সত্যসেনং শরৈস্তীক্ষ্ণৈর্দারয়িত্বা মহাবলঃ
19.17
ততঃ সুনিশিতৈর্বাণৈ রাজ্ঞস্তস্য মহচ্ছিরঃ
কুণ্ডলোপচিতং কায়াচ্চকর্ত পৃতনান্তরে
19.18
তং নিহত্য শিতৈর্বাণৈর্মিত্রবর্মাণমাক্ষিপৎ
বত্সদন্তেন তীক্ষ্ণেন সারথিং চাস্য মারিষ
19.19
ততঃ শরশতৈর্ভূয়ঃ সংশপ্তকগণান্বশী
পাতয়ামাস সংক্রুদ্ধঃ শতশোঽথ সহস্রশঃ
19.20
ততো রজতপুঙ্খেন রাজ্ঞঃ শীর্ষং মহাত্মনঃ
মিত্রদেবস্য চিচ্ছেদ ক্ষুরপ্রেণ মহায়শাঃ
সুশর্মাণং চ সংক্রুদ্ধো জত্রুদেশে সমার্দয়ৎ
19.21
ততঃ সংশপ্তকাঃ সর্বে পরিবার্য ধনংজয়ম্
শস্ত্রৌঘৈর্মমৃদুঃ ক্রুদ্ধা নাদয়ন্তো দিশো দশ
19.22
অভ্যর্দিতস্তু তৈর্জিষ্ণুঃ শক্রতুল্যপরাক্রমঃ
ঐন্দ্রমস্ত্রমমেয়াত্মা প্রাদুশ্চক্রে মহারথঃ
ততঃ শরসহস্রাণি প্রাদুরাসন্বিশাং পতে
19.23
ধ্বজানাং ছিদ্যমানানাং কার্মুকাণাং চ সংয়ুগে
রথানাং সপতাকানাং তূণীরাণাং শরৈঃ সহ
19.24
অক্ষাণামথ যোক্ত্রাণাং চক্রাণাং রশ্মিভিঃ সহ
কূবরাণাং বরূথানাং পৃষত্কানাং চ সংয়ুগে
19.25
অশ্মনাং পততাং চৈব প্রাসানামৃষ্টিভিঃ সহ
গদানাং পরিঘাণাং চ শক্তীনাং তোমরৈঃ সহ
19.26
শতঘ্নীনাং সচক্রাণাং ভুজানামূরুভিঃ সহ
কণ্ঠসূত্রাঙ্গদানাং চ কেয়ূরাণাং চ মারিষ
19.27
হারাণামথ নিষ্কাণাং তনুত্রাণাং চ ভারত
ছত্রাণাং ব্যজনানাং চ শিরসাং মুকুটৈঃ সহ
অশ্রূয়ত মহাঞ্শব্দস্তত্র তত্র বিশাং পতে
19.28
সকুণ্ডলানি স্বক্ষীণি পূর্ণচন্দ্রনিভানি চ
শিরাংস্যুর্ব্যামদৃশ্যন্ত তারাগণ ইবাম্বরে
19.29
সুস্রগ্বীণি সুবাসাংসি চন্দনেনোক্ষিতানি চ
শরীরাণি ব্যদৃশ্যন্ত হতানাং চ মহীতলে
গন্ধর্বনগরাকারং ঘোরমায়োধনং তদা
19.30
নিহতৈ রাজপুত্রৈশ্চ ক্ষত্রিয়ৈশ্চ মহাবলৈঃ
হস্তিভিঃ পতিতৈশ্চৈব তুরগৈশ্চাভবন্মহী
অগম্যমার্গা সমরে বিশীর্ণৈরিব পর্বতৈঃ
19.31
নাসীচ্চক্রপথশ্চৈব পাণ্ডবস্য মহাত্মনঃ
নিঘ্নতঃ শাত্রবান্ভল্লৈর্হস্ত্যশ্বং চামিতং মহৎ
19.32
আ তুম্বাদবসীদন্তি রথচক্রাণি মারিষ
রণে বিচরতস্তস্য তস্মিঁল্লোহিতকর্দমে
19.33
সীদমানানি চক্রাণি সমূহুস্তুরগা ভৃশম্
শ্রমেণ মহতা যুক্তা মনোমারুতরংহসঃ
19.34
বধ্যমানং তু তত্সৈন্যং পাণ্ডুপুত্রেণ ধন্বিনা
প্রায়শো বিমুখং সর্বং নাবতিষ্ঠত সংয়ুগে
19.35
তাঞ্জিত্বা সমরে জিষ্ণুঃ সংশপ্তকগণান্বহূন্
ররাজ স মহারাজ বিধূমোঽগ্নিরিব জ্বলন্
19.36
যুধিষ্ঠিরং মহারাজ বিসৃজন্তং শরান্বহূন্
স্বয়ং দুর্যোধনো রাজা প্রত্যগৃহ্ণাদভীতবৎ
19.37
তমাপতন্তং সহসা তব পুত্রং মহাবলম্
ধর্মরাজো দ্রুতং বিদ্ধ্বা তিষ্ঠ তিষ্ঠেতি চাব্রবীৎ
19.38
স চ তং প্রতিবিব্যাধ নবভির্নিশিতৈঃ শরৈঃ
সারথিং চাস্য ভল্লেন ভৃশং ক্রুদ্ধোঽভ্যতাডয়ৎ
19.39
ততো যুধিষ্ঠিরো রাজা হেমপুঙ্খাঞ্শিলীমুখান্
দুর্যোধনায় চিক্ষেপ ত্রয়োদশ শিলাশিতান্
19.40
চতুর্ভিশ্চতুরো বাহাংস্তস্য হত্বা মহারথঃ
পঞ্চমেন শিরঃ কায়াত্সারথেস্তু সমাক্ষিপৎ
19.41
ষষ্ঠেন চ ধ্বজং রাজ্ঞঃ সপ্তমেন চ কার্মুকম্
অষ্টমেন তথা খড্গং পাতয়ামাস ভূতলে
পঞ্চভির্নৃপতিং চাপি ধর্মরাজোঽর্দয়দ্ভৃশম্
19.42
হতাশ্বাত্তু রথাত্তস্মাদবপ্লুত্য সুতস্তব
উত্তমং ব্যসনং প্রাপ্তো ভূমাবেব ব্যতিষ্ঠত
19.43
তং তু কৃচ্ছ্রগতং দৃষ্ট্বা কর্ণদ্রৌণিকৃপাদয়ঃ
অভ্যবর্তন্ত সহিতাঃ পরীপ্সন্তো নরাধিপম্
19.44
অথ পাণ্ডুসুতাঃ সর্বে পরিবার্য যুধিষ্ঠিরম্
অভ্যয়ুঃ সমরে রাজংস্ততো যুদ্ধমবর্তত
19.45
অথ তূর্যসহস্রাণি প্রাবাদ্যন্ত মহামৃধে
ক্ষ্বেডাঃ কিলকিলাশব্দাঃ প্রাদুরাসন্মহীপতে
যদভ্যগচ্ছন্সমরে পাঞ্চালাঃ কৌরবৈঃ সহ
19.46
নরা নরৈঃ সমাজগ্মুর্বারণা বরবারণৈঃ
রথাশ্চ রথিভিঃ সার্ধং হয়াশ্চ হয়সাদিভিঃ
19.47
দ্বংদ্বান্যাসন্মহারাজ প্রেক্ষণীয়ানি সংয়ুগে
বিস্মাপনান্যচিন্ত্যানি শস্ত্রবন্ত্যুত্তমানি চ
19.48
অয়ুধ্যন্ত মহাবেগাঃ পরস্পরবধৈষিণঃ
অন্যোন্যং সমরে জঘ্নুর্যোধব্রতমনুষ্ঠিতাঃ
ন হি তে সমরং চক্রুঃ পৃষ্ঠতো বৈ কথংচন
19.49
মুহূর্তমেব তদ্যুদ্ধমাসীন্মধুরদর্শনম্
তত উন্মত্তবদ্রাজন্নির্মর্যাদমবর্তত
19.50
রথী নাগং সমাসাদ্য বিচরন্রণমূর্ধনি
প্রেষয়ামাস কালায় শরৈঃ সংনতপর্বভিঃ
19.51
নাগা হয়ান্সমাসাদ্য বিক্ষিপন্তো বহূনথ
দ্রাবয়ামাসুরত্যুগ্রাস্তত্র তত্র তদা তদা
19.52
বিদ্রাব্য চ বহূনশ্বান্নাগা রাজন্বলোত্কটাঃ
বিষাণৈশ্চাপরে জঘ্নুর্মমৃদুশ্চাপরে ভৃশম্
19.53
সাশ্বারোহাংশ্চ তুরগান্বিষাণৈর্বিভিদূ রণে
অপরাংশ্চিক্ষিপুর্বেগাত্প্রগৃহ্যাতিবলাস্তথা
19.54
পাদাতৈরাহতা নাগা বিবরেষু সমন্ততঃ
চক্রুরার্তস্বরং ঘোরং ব্যদ্রবন্ত দিশো দশ
19.55
পদাতীনাং তু সহসা প্রদ্রুতানাং মহামৃধে
উত্সৃজ্যাভরণং তূর্ণমবপ্লুত্য রণাজিরে
19.56
নিমিত্তং মন্যমানাস্তু পরিণম্য মহাগজাঃ
জগৃহুর্বিভিদুশ্চৈব চিত্রাণ্যাভরণানি চ
19.57
প্রতিমানেষু কুম্ভেষু দন্তবেষ্টেষু চাপরে
নিগৃহীতা ভৃশং নাগাঃ প্রাসতোমরশক্তিভিঃ
19.58
নিগৃহ্য চ গদাঃ কেচিত্পার্শ্বস্থৈর্ভৃশদারুণৈঃ
রথাশ্বসাদিভিস্তত্র সংভিন্না ন্যপতন্ভুবি
19.59
সরথং সাদিনং তত্র অপরে তু মহাগজাঃ
ভূমাবমৃদ্নন্বেগেন সবর্মাণং পতাকিনম্
19.60
রথং নাগাঃ সমাসাদ্য ধুরি গৃহ্য চ মারিষ
ব্যাক্ষিপন্সহসা তত্র ঘোররূপে মহামৃধে
19.61
নারাচৈর্নিহতশ্চাপি নিপপাত মহাগজঃ
পর্বতস্যেব শিখরং বজ্রভগ্নং মহীতলে
19.62
যোধা যোধান্সমাসাদ্য মুষ্টিভির্ব্যহনন্যুধি
কেশেষ্বন্যোন্যমাক্ষিপ্য চিচ্ছিদুর্বিভিদুঃ সহ
19.63
উদ্যম্য চ ভুজাবন্যো নিক্ষিপ্য চ মহীতলে
পদা চোরঃ সমাক্রম্য স্ফুরতো ব্যহনচ্ছিরঃ
19.64
মৃতমন্যো মহারাজ পদ্ভ্যাং তাডিতবাংস্তদা
জীবতশ্চ তথৈবান্যঃ শস্ত্রং কায়ে ন্যমজ্জয়ৎ
19.65
মুষ্টিয়ুদ্ধং মহচ্চাসীদ্যোধানাং তত্র ভারত
তথা কেশগ্রহশ্চোগ্রো বাহুয়ুদ্ধং চ কেবলম্
19.66
সমাসক্তস্য চান্যেন অবিজ্ঞাতস্তথাপরঃ
জহার সমরে প্রাণান্নানাশস্ত্রৈরনেকধা
19.67
সংসক্তেষু চ যোধেষু বর্তমানে চ সংকুলে
কবন্ধান্যুত্থিতানি স্ম শতশোঽথ সহস্রশঃ
19.68
লোহিতৈঃ সিচ্যমানানি শস্ত্রাণি কবচানি চ
মহারঙ্গানুরক্তানি বস্ত্রাণীব চকাশিরে
19.69
এবমেতন্মহায়ুদ্ধং দারুণং ভৃশসংকুলম্
উন্মত্তরঙ্গপ্রতিমং শব্দেনাপূরয়জ্জগৎ
19.70
নৈব স্বে ন পরে রাজন্বিজ্ঞায়ন্তে শরাতুরাঃ
যোদ্ধব্যমিতি যুধ্যন্তে রাজানো জয়গৃদ্ধিনঃ
19.71
স্বান্স্বে জঘ্নুর্মহারাজ পরাংশ্চৈব সমাগতান্
উভয়োঃ সেনয়োর্বীরৈর্ব্যাকুলং সমপদ্যত
19.72
রথৈর্ভগ্নৈর্মহারাজ বারণৈশ্চ নিপাতিতৈঃ
হয়ৈশ্চ পতিতৈস্তত্র নরৈশ্চ বিনিপাতিতৈঃ
19.73
অগম্যরূপা পৃথিবী মাংসশোণিতকর্দমা
ক্ষণেনাসীন্মহারাজ ক্ষতজৌঘপ্রবর্তিনী
19.74
পাঞ্চালানবধীত্কর্ণস্ত্রিগর্তাংশ্চ ধনংজয়ঃ
ভীমসেনঃ কুরূন্রাজন্হস্ত্যনীকং চ সর্বশঃ
19.75
এবমেষ ক্ষয়ো বৃত্তঃ কুরুপাণ্ডবসেনয়োঃ
অপরাহ্ণে মহারাজ কাঙ্ক্ষন্ত্যোর্বিপুলং জয়ম্