Utshovঅধ্যায় 18
18.1
সংজয় উবাচ
যুয়ুত্সুং তব পুত্রং তু প্রাদ্রবন্তং মহদ্বলম্
উলূকোঽভ্যপতত্তূর্ণং তিষ্ঠ তিষ্ঠেতি চাব্রবীৎ
18.2
যুয়ুত্সুস্তু ততো রাজঞ্শিতধারেণ পত্রিণা
উলূকং তাডয়ামাস বজ্রেণেন্দ্র ইবাচলম্
18.3
উলূকস্তু ততঃ ক্রুদ্ধস্তব পুত্রস্য সংয়ুগে
ক্ষুরপ্রেণ ধনুশ্ছিত্ত্বা তাডয়ামাস কর্ণিনা
18.4
তদপাস্য ধনুশ্ছিন্নং যুয়ুত্সুর্বেগবত্তরম্
অন্যদাদত্ত সুমহচ্চাপং সংরক্তলোচনঃ
18.5
শাকুনিং চ ততঃ ষষ্ট্যা বিব্যাধ ভরতর্ষভ
সারথিং ত্রিভিরানর্ছত্তং চ ভূয়ো ব্যবিধ্যত
18.6
উলূকস্তং তু বিংশত্যা বিদ্ধ্বা হেমবিভূষিতৈঃ
অথাস্য সমরে ক্রুদ্ধো ধ্বজং চিচ্ছেদ কাঞ্চনম্
18.7
স চ্ছিন্নয়ষ্টিঃ সুমহাঞ্শীর্যমাণো মহাধ্বজঃ
পপাত প্রমুখে রাজন্যুয়ুত্সোঃ কাঞ্চনোজ্জ্বলঃ
18.8
ধ্বজমুন্মথিতং দৃষ্ট্বা যুয়ুত্সুঃ ক্রোধমূর্ছিতঃ
উলূকং পঞ্চভির্বাণৈরাজঘান স্তনান্তরে
18.9
উলূকস্তস্য ভল্লেন তৈলধৌতেন মারিষ
শিরশ্চিচ্ছেদ সহসা যন্তুর্ভরতসত্তম
18.10
জঘান চতুরোঽশ্বাংশ্চ তং চ বিব্যাধ পঞ্চভিঃ
সোঽতিবিদ্ধো বলবতা প্রত্যপায়াদ্রথান্তরম্
18.11
তং নির্জিত্য রণে রাজন্নুলূকস্ত্বরিতো যয়ৌ
পাঞ্চালান্সৃঞ্জয়াংশ্চৈব বিনিঘ্নন্নিশিতৈঃ শরৈঃ
18.12
শতানীকং মহারাজ শ্রুতকর্মা সুতস্তব
ব্যশ্বসূতরথং চক্রে নিমেষার্ধাদসংভ্রমম্
18.13
হতাশ্বে তু রথে তিষ্ঠঞ্শতানীকো মহাবলঃ
গদাং চিক্ষেপ সংক্রুদ্ধস্তব পুত্রস্য মারিষ
18.14
সা কৃত্বা স্যন্দনং ভস্ম হয়াংশ্চৈব সসারথীন্
পপাত ধরণীং তূর্ণং দারয়ন্তীব ভারত
18.15
তাবুভৌ বিরথৌ বীরৌ কুরূণাং কীর্তিবর্ধনৌ
অপাক্রমেতাং যুদ্ধার্তৌ প্রেক্ষমাণৌ পরস্পরম্
18.16
পুত্রস্তু তব সংভ্রান্তো বিবিত্সো রথমাবিশৎ
শতানীকোঽপি ত্বরিতঃ প্রতিবিন্ধ্যরথং গতঃ
18.17
সুতসোমস্তু শকুনিং বিব্যাধ নিশিতৈঃ শরৈঃ
নাকম্পয়ত সংরব্ধো বার্যোঘ ইব পর্বতম্
18.18
সুতসোমস্তু তং দৃষ্ট্বা পিতুরত্যন্তবৈরিণম্
শরৈরনেকসাহস্রৈশ্ছাদয়ামাস ভারত
18.19
তাঞ্শরাঞ্শকুনিস্তূর্ণং চিচ্ছেদান্যৈঃ পতত্রিভিঃ
লঘ্বস্ত্রশ্চিত্রয়োধী চ জিতকাশী চ সংয়ুগে
18.20
নিবার্য সমরে চাপি শরাংস্তান্নিশিতৈঃ শরৈঃ
আজঘান সুসংক্রুদ্ধঃ সুতসোমং ত্রিভিঃ শরৈঃ
18.21
তস্যাশ্বান্কেতনং সূতং তিলশো ব্যধমচ্ছরৈঃ
স্যালস্তব মহাবীর্যস্ততস্তে চুক্রুশুর্জনাঃ
18.22
হতাশ্বো বিরথশ্চৈব ছিন্নধন্বা চ মারিষ
ধন্বী ধনুর্বরং গৃহ্য রথাদ্ভূমাবতিষ্ঠত
ব্যসৃজত্সায়কাংশ্চৈব স্বর্ণপুঙ্খাঞ্শিলাশিতান্
18.23
ছাদয়ামাসুরথ তে তব স্যালস্য তং রথম্
পতংগানামিব ব্রাতাঃ শরব্রাতা মহারথম্
18.24
রথোপস্থান্সমীক্ষ্যাপি বিব্যথে নৈব সৌবলঃ
প্রমৃদ্নংশ্চ শরাংস্তাংস্তাঞ্শরব্রাতৈর্মহায়শাঃ
18.25
তত্রাতুষ্যন্ত যোধাশ্চ সিদ্ধাশ্চাপি দিবি স্থিতাঃ
সুতসোমস্য তত্কর্ম দৃষ্ট্বাশ্রদ্ধেয়মদ্ভুতম্
রথস্থং নৃপতিং তং তু পদাতিঃ সন্নয়োধয়ৎ
18.26
তস্য তীক্ষ্ণৈর্মহাবেগৈর্ভল্লৈঃ সংনতপর্বভিঃ
ব্যহনত্কার্মুকং রাজা তূণীরং চৈব সর্বশঃ
18.27
স চ্ছিন্নধন্বা সমরে খড্গমুদ্যম্য নানদন্
বৈডূর্যোত্পলবর্ণাভং হস্তিদন্তময়ত্সরুম্
18.28
ভ্রাম্যমাণং ততস্তং তু বিমলাম্বরবর্চসম্
কালোপমং ততো মেনে সুতসোমস্য ধীমতঃ
18.29
সোঽচরত্সহসা খড্গী মণ্ডলানি সহস্রশঃ
চতুর্বিংশন্মহারাজ শিক্ষাবলসমন্বিতঃ
18.30
সৌবলস্তু ততস্তস্য শরাংশ্চিক্ষেপ বীর্যবান্
তানাপতত এবাশু চিচ্ছেদ পরমাসিনা
18.31
ততঃ ক্রুদ্ধো মহারাজ সৌবলঃ পরবীরহা
প্রাহিণোত্সুতসোমস্য শরানাশীবিষোপমান্
18.32
চিচ্ছেদ তাংশ্চ খড্গেন শিক্ষয়া চ বলেন চ
দর্শয়ঁল্লাঘবং যুদ্ধে তার্ক্ষ্যবীর্যসমদ্যুতিঃ
18.33
তস্য সংচরতো রাজন্মণ্ডলাবর্তনে তদা
ক্ষুরপ্রেণ সুতীক্ষ্ণেন খড্গং চিচ্ছেদ সুপ্রভম্
18.34
স চ্ছিন্নঃ সহসা ভূমৌ নিপপাত মহানসিঃ
অবশস্য স্থিতং হস্তে তং খড্গং সত্সরুং তদা
18.35
ছিন্নমাজ্ঞায় নিস্ত্রিংশমবপ্লুত্য পদানি ষট্
প্রাবিধ্যত ততঃ শেষং সুতসোমো মহারথঃ
18.36
স চ্ছিত্ত্বা সগুণং চাপং রণে তস্য মহাত্মনঃ
পপাত ধরণীং তূর্ণং স্বর্ণবজ্রবিভূষিতঃ
সুতসোমস্ততোঽগচ্ছচ্ছ্রুতকীর্তের্মহারথম্
18.37
সৌবলোঽপি ধনুর্গৃহ্য ঘোরমন্যত্সুদুঃসহম্
অভ্যয়াত্পাণ্ডবানীকং নিঘ্নঞ্শত্রুগণান্বহূন্
18.38
তত্র নাদো মহানাসীত্পাণ্ডবানাং বিশাং পতে
সৌবলং সমরে দৃষ্ট্বা বিচরন্তমভীতবৎ
18.39
তান্যনীকানি দৃপ্তানি শস্ত্রবন্তি মহান্তি চ
দ্রাব্যমাণান্যদৃশ্যন্ত সৌবলেন মহাত্মনা
18.40
যথা দৈত্যচমূং রাজন্দেবরাজো মমর্দ হ
তথৈব পাণ্ডবীং সেনাং সৌবলেয়ো ব্যনাশয়ৎ
18.41
ধৃষ্টদ্যুম্নং কৃপো রাজন্বারয়ামাস সংয়ুগে
যথা দৃপ্তং বনে নাগং শরভো বারয়েদ্যুধি
18.42
নিরুদ্ধঃ পার্ষতস্তেন গৌতমেন বলীয়সা
পদাত্পদং বিচলিতুং নাশক্নোত্তত্র ভারত
18.43
গৌতমস্য বপুর্দৃষ্ট্বা ধৃষ্টদ্যুম্নরথং প্রতি
বিত্রেসুঃ সর্বভূতানি ক্ষয়ং প্রাপ্তং চ মেনিরে
18.44
তত্রাবোচন্বিমনসো রথিনঃ সাদিনস্তথা
দ্রোণস্য নিধনে নূনং সংক্রুদ্ধো দ্বিপদাং বরঃ
18.45
শারদ্বতো মহাতেজা দিব্যাস্ত্রবিদুদারধীঃ
অপি স্বস্তি ভবেদদ্য ধৃষ্টদ্যুম্নস্য গৌতমাৎ
18.46
অপীয়ং বাহিনী কৃত্স্না মুচ্যেত মহতো ভয়াৎ
অপ্যয়ং ব্রাহ্মণঃ সর্বান্ন নো হন্যাত্সমাগতান্
18.47
যাদৃশং দৃশ্যতে রূপমন্তকপ্রতিমং ভৃশম্
গমিষ্যত্যদ্য পদবীং ভারদ্বাজস্য সংয়ুগে
18.48
আচার্যঃ ক্ষিপ্রহস্তশ্চ বিজয়ী চ সদা যুধি
অস্ত্রবান্বীর্যসংপন্নঃ ক্রোধেন চ সমন্বিতঃ
18.49
পার্ষতশ্চ ভৃশং যুদ্ধে বিমুখোঽদ্যাপি লক্ষ্যতে
ইত্যেবং বিবিধা বাচস্তাবকানাং পরৈঃ সহ
18.50
বিনিঃশ্বস্য ততঃ ক্রুদ্ধঃ কৃপঃ শারদ্বতো নৃপ
পার্ষতং ছাদয়ামাস নিশ্চেষ্টং সর্বমর্মসু
18.51
স বধ্যমানঃ সমরে গৌতমেন মহাত্মনা
কর্তব্যং ন প্রজানাতি মোহিতঃ পরমাহবে
18.52
তমব্রবীত্ততো যন্তা কচ্চিত্ক্ষেমং নু পার্ষত
ঈদৃশং ব্যসনং যুদ্ধে ন তে দৃষ্টং কদাচন
18.53
দৈবয়োগাত্তু তে বাণা নাতরন্মর্মভেদিনঃ
প্রেষিতা দ্বিজমুখ্যেন মর্মাণ্যুদ্দিশ্য সর্বশঃ
18.54
ব্যাবর্তয়ে তত্র রথং নদীবেগমিবার্ণবাৎ
অবধ্যং ব্রাহ্মণং মন্যে যেন তে বিক্রমো হতঃ
18.55
ধৃষ্টদ্যুম্নস্ততো রাজঞ্শনকৈরব্রবীদ্বচঃ
মুহ্যতে মে মনস্তাত গাত্রে স্বেদশ্চ জায়তে
18.56
বেপথুং চ শরীরে মে রোমহর্ষং চ পশ্য বৈ
বর্জয়ন্ব্রাহ্মণং যুদ্ধে শনৈর্যাহি যতোঽচ্যুতঃ
18.57
অর্জুনং ভীমসেনং বা সমরে প্রাপ্য সারথে
ক্ষেমমদ্য ভবেদ্যন্তরিতি মে নৈষ্ঠিকী মতিঃ
18.58
ততঃ প্রায়ান্মহারাজ সারথিস্ত্বরয়ন্হয়ান্
যতো ভীমো মহেষ্বাসো যুয়ুধে তব সৈনিকৈঃ
18.59
প্রদ্রুতং তু রথং দৃষ্ট্বা ধৃষ্টদ্যুম্নস্য মারিষ
কিরঞ্শরশতান্যেব গৌতমোঽনুয়য়ৌ তদা
18.60
শঙ্খং চ পূরয়ামাস মুহুর্মুহুররিংদমঃ
পার্ষতং প্রাদ্রবদ্যন্তং মহেন্দ্র ইব শম্বরম্
18.61
শিখণ্ডিনং তু সমরে ভীষ্মমৃত্যুং দুরাসদম্
হার্দিক্যো বারয়ামাস স্ময়ন্নিব মুহুর্মুহুঃ
18.62
শিখণ্ডী চ সমাসাদ্য হৃদিকানাং মহারথম্
পঞ্চভির্নিশিতৈর্ভল্লৈর্জত্রুদেশে সমার্দয়ৎ
18.63
কৃতবর্মা তু সংক্রুদ্ধো ভিত্ত্বা ষষ্টিভিরাশুগৈঃ
ধনুরেকেন চিচ্ছেদ হসন্রাজন্মহারথঃ
18.64
অথান্যদ্ধনুরাদায় দ্রুপদস্যাত্মজো বলী
তিষ্ঠ তিষ্ঠেতি সংক্রুদ্ধো হার্দিক্যং প্রত্যভাষত
18.65
ততোঽস্য নবতিং বাণান্রুক্মপুঙ্খান্সুতেজনান্
প্রেষয়ামাস রাজেন্দ্র তেঽস্যাভ্রশ্যন্ত বর্মণঃ
18.66
বিতথাংস্তান্সমালক্ষ্য পতিতাংশ্চ মহীতলে
ক্ষুরপ্রেণ সুতীক্ষ্ণেন কার্মুকং চিচ্ছিদে বলী
18.67
অথৈনং ছিন্নধন্বানং ভগ্নশৃঙ্গমিবর্ষভম্
অশীত্যা মার্গণৈঃ ক্রুদ্ধো বাহ্বোরুরসি চার্দয়ৎ
18.68
কৃতবর্মা তু সংক্রুদ্ধো মার্গণৈঃ কৃতবিক্ষতঃ
ধনুরন্যত্সমাদায় সমার্গণগণং প্রভো
শিখণ্ডিনং বাণবরৈঃ স্কন্ধদেশেঽভ্যতাডয়ৎ
18.69
স্কন্ধদেশে স্থিতৈর্বাণৈঃ শিখণ্ডী চ ররাজ হ
শাখাপ্রতানৈর্বিমলৈঃ সুমহান্স যথা দ্রুমঃ
18.70
তাবন্যোন্যং ভৃশং বিদ্ধ্বা রুধিরেণ সমুক্ষিতৌ
অন্যোন্যশৃঙ্গাভিহতৌ রেজতুর্বৃষভাবিব
18.71
অন্যোন্যস্য বধে যত্নং কুর্বাণৌ তৌ মহারথৌ
রথাভ্যাং চেরতুস্তত্র মণ্ডলানি সহস্রশঃ
18.72
কৃতবর্মা মহারাজ পার্ষতং নিশিতৈঃ শরৈঃ
রণে বিব্যাধ সপ্তত্যা স্বর্ণপুঙ্খৈঃ শিলাশিতৈঃ
18.73
ততোঽস্য সমরে বাণং ভোজঃ প্রহরতাং বরঃ
জীবিতান্তকরং ঘোরং ব্যসৃজত্ত্বরয়ান্বিতঃ
18.74
স তেনাভিহতো রাজন্মূর্ছামাশু সমাবিশৎ
ধ্বজয়ষ্টিং চ সহসা শিশ্রিয়ে কশ্মলাবৃতঃ
18.75
অপোবাহ রণাত্তং তু সারথী রথিনাং বরম্
হার্দিক্যশরসংতপ্তং নিঃশ্বসন্তং পুনঃ পুনঃ
18.76
পরাজিতে ততঃ শূরে দ্রুপদস্য সুতে প্রভো
প্রাদ্রবত্পাণ্ডবী সেনা বধ্যমানা সমন্ততঃ