Utshovঅধ্যায় 17
17.1
সংজয় উবাচ
হস্তিভিস্তু মহামাত্রাস্তব পুত্রেণ চোদিতাঃ
ধৃষ্টদ্যুম্নং জিঘাংসন্তঃ ক্রুদ্ধাঃ পার্ষতমভ্যয়ুঃ
17.2
প্রাচ্যাশ্চ দাক্ষিণাত্যাশ্চ প্রবীরা গজয়োধিনঃ
অঙ্গা বঙ্গাশ্চ পুণ্ড্রাশ্চ মাগধাস্তাম্রলিপ্তকাঃ
17.3
মেকলাঃ কোশলা মদ্রা দশার্ণা নিষধাস্তথা
গজয়ুদ্ধেষু কুশলাঃ কলিঙ্গৈঃ সহ ভারত
17.4
শরতোমরনারাচৈর্বৃষ্টিমন্ত ইবাম্বুদাঃ
সিষিচুস্তে ততঃ সর্বে পাঞ্চালাচলমাহবে
17.5
তান্সংমিমর্দিষুর্নাগান্পার্ষ্ণ্যঙ্গুষ্ঠাঙ্কুশৈর্ভৃশম্
পোথিতান্পার্ষতো বাণৈর্নারাচৈশ্চাভ্যবীবৃষৎ
17.6
একৈকং দশভিঃ ষড্ভিরষ্টাভিরপি ভারত
দ্বিরদানভিবিব্যাধ ক্ষিপ্তৈর্গিরিনিভাঞ্শরৈঃ
প্রচ্ছাদ্যমানো দ্বিরদৈর্মেঘৈরিব দিবাকরঃ
17.7
পর্যাসুঃ পাণ্ডুপাঞ্চালা নদন্তো নিশিতায়ুধাঃ
তান্নাগানভিবর্ষন্তো জ্যাতন্ত্রীশরনাদিতৈঃ
17.8
নকুলঃ সহদেবশ্চ দ্রৌপদেয়াঃ প্রভদ্রকাঃ
সাত্যকিশ্চ শিখণ্ডী চ চেকিতানশ্চ বীর্যবান্
17.9
তে ম্লেচ্ছৈঃ প্রেষিতা নাগা নরানশ্বান্রথানপি
হস্তৈরাক্ষিপ্য মমৃদুঃ পদ্ভিশ্চাপ্যতিমন্যবঃ
17.10
বিভিদুশ্চ বিষাণাগ্রৈঃ সমাক্ষিপ্য চ চিক্ষিপুঃ
বিষাণলগ্নৈশ্চাপ্যন্যে পরিপেতুর্বিভীষণাঃ
17.11
প্রমুখে বর্তমানং তু দ্বিপং বঙ্গস্য সাত্যকিঃ
নারাচেনোগ্রবেগেন ভিত্ত্বা মর্মণ্যপাতয়ৎ
17.12
তস্যাবর্জিতনাগস্য দ্বিরদাদুত্পতিষ্যতঃ
নারাচেনাভিনদ্বক্ষঃ সোঽপতদ্ভুবি সাত্যকেঃ
17.13
পুণ্ড্রস্যাপততো নাগং চলন্তমিব পর্বতম্
সহদেবঃ প্রয়ত্নাত্তৈর্নারাচৈর্ব্যহনত্ত্রিভিঃ
17.14
বিপতাকং বিয়ন্তারং বিবর্মধ্বজজীবিতম্
তং কৃত্বা দ্বিরদং ভূয়ঃ সহদেবোঽঙ্গমভ্যগাৎ
17.15
সহদেবং তু নকুলো বারয়িত্বাঙ্গমার্দয়ৎ
নারাচৈর্যমদণ্ডাভৈস্ত্রিভির্নাগং শতেন চ
17.16
দিবাকরকরপ্রখ্যানঙ্গশ্চিক্ষেপ তোমরান্
নকুলায় শতান্যষ্টৌ ত্রিধৈকৈকং তু সোঽচ্ছিনৎ
17.17
তথার্ধচন্দ্রেণ শিরস্তস্য চিচ্ছেদ পাণ্ডবঃ
স পপাত হতো ম্লেচ্ছস্তেনৈব সহ দন্তিনা
17.18
আচার্যপুত্রে নিহতে হস্তিশিক্ষাবিশারদে
অঙ্গাঃ ক্রুদ্ধা মহামাত্রা নাগৈর্নকুলমভ্যয়ুঃ
17.19
চলত্পতাকৈঃ প্রমুখৈর্হেমকক্ষ্যাতনুচ্ছদৈঃ
মিমর্দিষন্তস্ত্বরিতাঃ প্রদীপ্তৈরিব পর্বতৈঃ
17.20
মেকলোত্কলকালিঙ্গা নিষাদাস্তাম্রলিপ্তকাঃ
শরতোমরবর্ষাণি বিমুঞ্চন্তো জিঘাংসবঃ
17.21
তৈশ্ছাদ্যমানং নকুলং দিবাকরমিবাম্বুদৈঃ
পরি পেতুঃ সুসংরব্ধাঃ পাণ্ডুপাঞ্চালসোমকাঃ
17.22
ততস্তদভবদ্যুদ্ধং রথিনাং হস্তিভিঃ সহ
সৃজতাং শরবর্ষাণি তোমরাংশ্চ সহস্রশঃ
17.23
নাগানাং প্রস্ফুটুঃ কুম্ভা মর্মাণি বিবিধানি চ
দন্তাশ্চৈবাতিবিদ্ধানাং নারাচৈর্ভূষণানি চ
17.24
তেষামষ্টৌ মহানাগাংশ্চতুঃষষ্ট্যা সুতেজনৈঃ
সহদেবো জঘানাশু তে পেতুঃ সহ সাদিভিঃ
17.25
অঞ্জোগতিভিরায়ম্য প্রয়ত্নাদ্ধনুরুত্তমম্
নারাচৈরহনন্নাগান্নকুলঃ কুরুনন্দন
17.26
ততঃ শৈনেয়পাঞ্চাল্যৌ দ্রৌপদেয়াঃ প্রভদ্রকাঃ
শিখণ্ডী চ মহানাগান্সিষিচুঃ শরবৃষ্টিভিঃ
17.27
তে পাণ্ডুয়োধাম্বুধরৈঃ শত্রুদ্বিরদপর্বতাঃ
বাণবর্ষৈর্হতাঃ পেতুর্বজ্রবর্ষৈরিবাচলাঃ
17.28
এবং হত্বা তব গজাংস্তে পাণ্ডুনরকুঞ্জরাঃ
দ্রুতং সেনামবৈক্ষন্ত ভিন্নকূলামিবাপগাম্
17.29
তে তাং সেনামবালোক্য পাণ্ডুপুত্রস্য সৈনিকাঃ
বিক্ষোভয়িত্বা চ পুনঃ কর্ণমেবাভিদুদ্রুবুঃ
17.30
সহদেবং ততঃ ক্রুদ্ধং দহন্তং তব বাহিনীম্
দুঃশাসনো মহারাজ ভ্রাতা ভ্রাতরমভ্যয়াৎ
17.31
তৌ সমেতৌ মহায়ুদ্ধে দৃষ্ট্বা তত্র নরাধিপাঃ
সিংহনাদরবাংশ্চক্রুর্বাসাংস্যাদুধুবুশ্চ হ
17.32
ততো ভারত ক্রুদ্ধেন তব পুত্রেণ ধন্বিনা
পাণ্ডুপুত্রস্ত্রিভির্বাণৈর্বক্ষস্যভিহতো বলী
17.33
সহদেবস্ততো রাজন্নারাচেন তবাত্মজম্
বিদ্ধ্বা বিব্যাধ সপ্তত্যা সারথিং চ ত্রিভিস্ত্রিভিঃ
17.34
দুঃশাসনস্তদা রাজংশ্ছিত্ত্বা চাপং মহাহবে
সহদেবং ত্রিসপ্তত্যা বাহ্বোরুরসি চার্দয়ৎ
17.35
সহদেবস্ততঃ ক্রুদ্ধঃ খড্গং গৃহ্য মহাহবে
ব্যাবিধ্যত যুধাং শ্রেষ্ঠঃ শ্রীমাংস্তব সুতং প্রতি
17.36
সমার্গণগণং চাপং ছিত্ত্বা তস্য মহানসিঃ
নিপপাত ততো ভূমৌ চ্যুতঃ সর্প ইবাম্বরাৎ
17.37
অথান্যদ্ধনুরাদায় সহদেবঃ প্রতাপবান্
দুঃশাসনায় চিক্ষেপ বাণমন্তকরং ততঃ
17.38
তমাপতন্তং বিশিখং যমদণ্ডোপমত্বিষম্
খড্গেন শিতধারেণ দ্বিধা চিচ্ছেদ কৌরবঃ
17.39
তমাপতন্তং সহসা নিস্ত্রিংশং নিশিতৈঃ শরৈঃ
পাতয়ামাস সমরে সহদেবো হসন্নিব
17.40
ততো বাণাংশ্চতুঃষষ্টিং তব পুত্রো মহারণে
সহদেবরথে তূর্ণং পাতয়ামাস ভারত
17.41
তাঞ্শরান্সমরে রাজন্বেগেনাপততো বহূন্
একৈকং পঞ্চভির্বাণৈঃ সহদেবো ন্যকৃন্তত
17.42
স নিবার্য মহাবাণাংস্তব পুত্রেণ প্রেষিতান্
অথাস্মৈ সুবহূন্বাণান্মাদ্রীপুত্রঃ সমাচিনোৎ
17.43
ততঃ ক্রুদ্ধো মহারাজ সহদেবঃ প্রতাপবান্
সমাধত্ত শরং ঘোরং মৃত্যুকালান্তকোপমম্
বিকৃষ্য বলবচ্চাপং তব পুত্রায় সোঽসৃজৎ
17.44
স তং নির্ভিদ্য বেগেন ভিত্ত্বা চ কবচং মহৎ
প্রাবিশদ্ধরণীং রাজন্বল্মীকমিব পন্নগঃ
ততঃ স মুমুহে রাজংস্তব পুত্রো মহারথঃ
17.45
মূঢং চৈনং সমালক্ষ্য সারথিস্ত্বরিতো রথম্
অপোবাহ ভৃশং ত্রস্তো বধ্যমানং শিতৈঃ শরৈঃ
17.46
পরাজিত্য রণে তং তু পাণ্ডবঃ পাণ্ডুপূর্বজ
দুর্যোধনবলং হৃষ্টঃ প্রামথদ্বৈ সমন্ততঃ
17.47
পিপীলিকাপুটং রাজন্যথামৃদ্নান্নরো রুষা
তথা সা কৌরবী সেনা মৃদিতা তেন ভারত
17.48
নকুলং রভসং যুদ্ধে দারয়ন্তং বরূথিনীম্
কর্ণো বৈকর্তনো রাজন্বারয়ামাস বৈ তদা
17.49
নকুলশ্চ তদা কর্ণং প্রহসন্নিদমব্রবীৎ
চিরস্য বত দৃষ্টোঽহং দৈবতৈঃ সৌম্যচক্ষুষা
17.50
যস্য মে ত্বং রণে পাপ চক্ষুর্বিষয়মাগতঃ
ত্বং হি মূলমনর্থানাং বৈরস্য কলহস্য চ
17.51
ত্বদ্দোষাত্কুরবঃ ক্ষীণাঃ সমাসাদ্য পরস্পরম্
ত্বামদ্য সমরে হত্বা কৃতকৃত্যোঽস্মি বিজ্বরঃ
17.52
এবমুক্তঃ প্রত্যুবাচ নকুলং সূতনন্দনঃ
সদৃশং রাজপুত্রস্য ধন্বিনশ্চ বিশেষতঃ
17.53
প্রহরস্ব রণে বাল পশ্যামস্তব পৌরুষম্
কর্ম কৃত্বা রণে শূর ততঃ কত্থিতুমর্হসি
17.54
অনুক্ত্বা সমরে তাত শূরা যুধ্যন্তি শক্তিতঃ
স যুধ্যস্ব ময়া শক্ত্যা বিনেষ্যে দর্পমদ্য তে
17.55
ইত্যুক্ত্বা প্রাহরত্তূর্ণং পাণ্ডুপুত্রায় সূতজঃ
বিব্যাধ চৈনং সমরে ত্রিসপ্তত্যা শিলীমুখৈঃ
17.56
নকুলস্তু ততো বিদ্ধঃ সূতপুত্রেণ ভারত
অশীত্যাশীবিষপ্রখ্যৈঃ সূতপুত্রমবিধ্যত
17.57
তস্য কর্ণো ধনুশ্ছিত্ত্বা স্বর্ণপুঙ্খৈঃ শিলাশিতৈঃ
ত্রিংশতা পরমেষ্বাসঃ শরৈঃ পাণ্ডবমার্দয়ৎ
17.58
তে তস্য কবচং ভিত্ত্বা পপুঃ শোণিতমাহবে
আশীবিষা যথা নাগা ভিত্ত্বা গাং সলিলং পপুঃ
17.59
অথান্যদ্ধনুরাদায় হেমপৃষ্ঠং দুরাসদম্
কর্ণং বিব্যাধ বিংশত্যা সারথিং চ ত্রিভিঃ শরৈঃ
17.60
ততঃ ক্রুদ্ধো মহারাজ নকুলঃ পরবীরহা
ক্ষুরপ্রেণ সুতীক্ষ্ণেন কর্ণস্য ধনুরচ্ছিনৎ
17.61
অথৈনং ছিন্নধন্বানং সায়কানাং শতৈস্ত্রিভিঃ
আজঘ্নে প্রহসন্বীরঃ সর্বলোকমহারথম্
17.62
কর্ণমভ্যর্দিতং দৃষ্ট্বা পাণ্ডুপুত্রেণ মারিষ
বিস্ময়ং পরমং জগ্মূ রথিনঃ সহ দৈবতৈঃ
17.63
অথান্যদ্ধনুরাদায় কর্ণো বৈকর্তনস্তদা
নকুলং পঞ্চভির্বাণৈর্জত্রুদেশে সমার্দয়ৎ
17.64
উরঃস্থৈরথ তৈর্বাণৈর্মাদ্রীপুত্রো ব্যরোচত
স্বরশ্মিভিরিবাদিত্যো ভুবনে বিসৃজন্প্রভাম্
17.65
নকুলস্তু ততঃ কর্ণং বিদ্ধ্বা সপ্তভিরায়সৈঃ
অথাস্য ধনুষঃ কোটিং পুনশ্চিচ্ছেদ মারিষ
17.66
সোঽন্যত্কার্মুকমাদায় সমরে বেগবত্তরম্
নকুলস্য ততো বাণৈঃ সর্বতোঽবারয়দ্দিশঃ
17.67
সংছাদ্যমানঃ সহসা কর্ণচাপচ্যুতৈঃ শরৈঃ
চিচ্ছেদ স শরাংস্তূর্ণং শরৈরেব মহারথঃ
17.68
ততো বাণময়ং জালং বিততং ব্যোম্ন্যদৃশ্যত
খদ্যোতানাং গণৈরেব সংপতদ্ভির্যথা নভঃ
17.69
তৈর্বিমুক্তৈঃ শরশতৈশ্ছাদিতং গগনং তদা
শলভানাং যথা ব্রাতৈস্তদ্বদাসীত্সমাকুলম্
17.70
তে শরা হেমবিকৃতাঃ সংপতন্তো মুহুর্মুহুঃ
শ্রেণীকৃতা অভাসন্ত হংসাঃ শ্রেণীগতা ইব
17.71
বাণজালাবৃতে ব্যোম্নি ছাদিতে চ দিবাকরে
সমসর্পত্ততো ভূতং কিংচিদেব বিশাং পতে
17.72
নিরুদ্ধে তত্র মার্গে তু শরসংঘৈঃ সমন্ততঃ
ব্যরোচতাং মহাভাগৌ বালসূর্যাবিবোদিতৌ
17.73
কর্ণচাপচ্যুতৈর্বাণৈর্বধ্যমানাস্তু সোমকাঃ
অবালীয়ন্ত রাজেন্দ্র বেদনার্তাঃ শরার্দিতাঃ
17.74
নকুলস্য তথা বাণৈর্বধ্যমানা চমূস্তব
ব্যশীর্যত দিশো রাজন্বাতনুন্না ইবাম্বুদাঃ
17.75
তে সেনে বধ্যমানে তু তাভ্যাং দিব্যৈর্মহাশরৈঃ
শরপাতমপক্রম্য ততঃ প্রেক্ষকবত্স্থিতে
17.76
প্রোত্সারিতে জনে তস্মিন্কর্ণপাণ্ডবয়োঃ শরৈঃ
বিব্যাধাতে মহাত্মানাবন্যোন্যং শরবৃষ্টিভিঃ
17.77
নিদর্শয়ন্তৌ ত্বস্ত্রাণি দিব্যানি রণমূর্ধনি
ছাদয়ন্তৌ চ সহসা পরস্পরবধৈষিণৌ
17.78
নকুলেন শরা মুক্তাঃ কঙ্কবর্হিণবাসসঃ
তে তু কর্ণমবচ্ছাদ্য ব্যতিষ্ঠন্ত যথা পরে
17.79
শরবেশ্মপ্রবিষ্টৌ তৌ দদৃশাতে ন কৈশ্চন
চন্দ্রসূর্যৌ যথা রাজংশ্ছাদ্যমানৌ জলাগমে
17.80
ততঃ ক্রুদ্ধো রণে কর্ণঃ কৃত্বা ঘোরতরং বপুঃ
পাণ্ডবং ছাদয়ামাস সমন্তাচ্ছরবৃষ্টিভিঃ
17.81
স চ্ছাদ্যমানঃ সমরে সূতপুত্রেণ পাণ্ডবঃ
ন চকার ব্যথাং রাজন্ভাস্করো জলদৈর্যথা
17.82
ততঃ প্রহস্যাধিরথিঃ শরজালানি মারিষ
প্রেষয়ামাস সমরে শতশোঽথ সহস্রশঃ
17.83
একচ্ছায়মভূত্সর্বং তস্য বাণৈর্মহাত্মনঃ
অভ্রচ্ছায়েব সংজজ্ঞে সংপতদ্ভিঃ শরোত্তমৈঃ
17.84
ততঃ কর্ণো মহারাজ ধনুশ্ছিত্ত্বা মহাত্মনঃ
সারথিং পাতয়ামাস রথনীডাদ্ধসন্নিব
17.85
তথাশ্বাংশ্চতুরশ্চাস্য চতুর্ভির্নিশিতৈঃ শরৈঃ
যমস্য সদনং তূর্ণং প্রেষয়ামাস ভারত
17.86
অথাস্য তং রথং তূর্ণং তিলশো ব্যধমচ্ছরৈঃ
পতাকাং চক্ররক্ষৌ চ ধ্বজং খড্গং চ মারিষ
শতচন্দ্রং ততশ্চর্ম সর্বোপকরণানি চ
17.87
হতাশ্বো বিরথশ্চৈব বিবর্মা চ বিশাং পতে
অবতীর্য রথাত্তূর্ণং পরিঘং গৃহ্য বিষ্ঠিতঃ
17.88
তমুদ্যতং মহাঘোরং পরিঘং তস্য সূতজঃ
ব্যহনত্সায়কৈ রাজঞ্শতশোঽথ সহস্রশঃ
17.89
ব্যায়ুধং চৈনমালক্ষ্য শরৈঃ সংনতপর্বভিঃ
আর্দয়দ্বহুশঃ কর্ণো ন চৈনং সমপীডয়ৎ
17.90
স বধ্যমানঃ সমরে কৃতাস্ত্রেণ বলীয়সা
প্রাদ্রবত্সহসা রাজন্নকুলো ব্যাকুলেন্দ্রিয়ঃ
17.91
তমভিদ্রুত্য রাধেয়ঃ প্রহসন্বৈ পুনঃ পুনঃ
সজ্যমস্য ধনুঃ কণ্ঠে সোঽবাসৃজত ভারত
17.92
ততঃ স শুশুভে রাজন্কণ্ঠাসক্তমহাধনুঃ
পরিবেষমনুপ্রাপ্তো যথা স্যাদ্ব্যোম্নি চন্দ্রমাঃ
যথৈব চ সিতো মেঘঃ শক্রচাপেন শোভিতঃ
17.93
তমব্রবীত্তদা কর্ণো ব্যর্থং ব্যাহৃতবানসি
বদেদানীং পুনর্হৃষ্টো বধ্যং মাং ত্বং পুনঃ পুনঃ
17.94
মা যোত্সীর্গুরুভিঃ সার্ধং বলবদ্ভিশ্চ পাণ্ডব
সদৃশৈস্তাত যুধ্যস্ব ব্রীডাং মা কুরু পাণ্ডব
গৃহং বা গচ্ছ মাদ্রেয় যত্র বা কৃষ্ণফল্গুনৌ
17.95
এবমুক্ত্বা মহারাজ ব্যসর্জয়ত তং ততঃ
বধপ্রাপ্তং তু তং রাজন্নাবধীত্সূতনন্দনঃ
স্মৃত্বা কুন্ত্যা বচো রাজংস্তত এনং ব্যসর্জয়ৎ
17.96
বিসৃষ্টঃ পাণ্ডবো রাজন্সূতপুত্রেণ ধন্বিনা
ব্রীডন্নিব জগামাথ যুধিষ্ঠিররথং প্রতি
17.97
আরুরোহ রথং চাপি সূতপুত্রপ্রতাপিতঃ
নিঃশ্বসন্দুঃখসংতপ্তঃ কুম্ভে ক্ষিপ্ত ইবোরগঃ
17.98
তং বিসৃজ্য রণে কর্ণঃ পাঞ্চালাংস্ত্বরিতো যয়ৌ
রথেনাতিপতাকেন চন্দ্রবর্ণহয়েন চ
17.99
তত্রাক্রন্দো মহানাসীত্পাণ্ডবানাং বিশাং পতে
দৃষ্ট্বা সেনাপতিং যান্তং পাঞ্চালানাং রথব্রজান্
17.100
তত্রাকরোন্মহারাজ কদনং সূতনন্দনঃ
মধ্যং গতে দিনকরে চক্রবত্প্রচরন্প্রভুঃ
17.101
ভগ্নচক্রৈ রথৈঃ কেচিচ্ছিন্নধ্বজপতাকিভিঃ
সসূতৈর্হতসূতৈশ্চ ভগ্নাক্ষৈশ্চৈব মারিষ
হ্রিয়মাণানপশ্যাম পাঞ্চালানাং রথব্রজান্
17.102
তত্র তত্র চ সংভ্রান্তা বিচেরুর্মত্তকুঞ্জরাঃ
দবাগ্নিনা পরীতাঙ্গা যথৈব স্যুর্মহাবনে
17.103
ভিন্নকুম্ভা বিরুধিরাশ্ছিন্নহস্তাশ্চ বারণাঃ
ভিন্নগাত্রবরাশ্চৈব চ্ছিন্নবালাশ্চ মারিষ
ছিন্নাভ্রাণীব সংপেতুর্বধ্যমানা মহাত্মনা
17.104
অপরে ত্রাসিতা নাগা নারাচশততোমরৈঃ
তমেবাভিমুখা যান্তি শলভা ইব পাবকম্
17.105
অপরে নিষ্টনন্তঃ স্ম ব্যদৃশ্যন্ত মহাদ্বিপাঃ
ক্ষরন্তঃ শোণিতং গাত্রৈর্নগা ইব জলপ্লবম্
17.106
উরশ্ছদৈর্বিমুক্তাশ্চ বালবন্ধৈশ্চ বাজিনঃ
রাজতৈশ্চ তথা কাংস্যৈঃ সৌবর্ণৈশ্চৈব ভূষণৈঃ
17.107
হীনা আস্তরণৈশ্চৈব খলীনৈশ্চ বিবর্জিতাঃ
চামরৈশ্চ কুথাভিশ্চ তূণীরৈঃ পতিতৈরপি
17.108
নিহতৈঃ সাদিভিশ্চৈব শূরৈরাহবশোভিভিঃ
অপশ্যাম রণে তত্র ভ্রাম্যমাণান্হয়োত্তমান্
17.109
প্রাসৈঃ খড্গৈশ্চ সংস্যূতানৃষ্টিভিশ্চ নরাধিপ
হয়য়োধানপশ্যাম কঞ্চুকোষ্ণীষধারিণঃ
17.110
রথান্হেমপরিষ্কারান্সুয়ুক্তাঞ্জবনৈর্হয়ৈঃ
ভ্রমমাণানপশ্যাম হতেষু রথিষু দ্রুতম্
17.111
ভগ্নাক্ষকূবরান্কাংশ্চিচ্ছিন্নচক্রাংশ্চ মারিষ
বিপতাকাধ্বজাংশ্চান্যাঞ্ছিন্নেষায়ুগবন্ধুরান্
17.112
বিহীনান্রথিনস্তত্র ধাবমানান্সমন্ততঃ
সূর্যপুত্রশরৈস্ত্রস্তানপশ্যাম বিশাং পতে
17.113
বিশস্ত্রাংশ্চ তথৈবান্যান্সশস্ত্রাংশ্চ বহূন্হতান্
তাবকাঞ্জালসংছন্নানুরোঘণ্টাবিভূষিতান্
17.114
নানাবর্ণবিচিত্রাভিঃ পতাকাভিরলংকৃতান্
পদাতীনন্বপশ্যাম ধাবমানান্সমন্ততঃ
17.115
শিরাংসি বাহূনূরূংশ্চ ছিন্নানন্যাংস্তথা যুধি
কর্ণচাপচ্যুতৈর্বাণৈরপশ্যাম বিনাকৃতান্
17.116
মহান্ব্যতিকরো রৌদ্রো যোধানামন্বদৃশ্যত
কর্ণসায়কনুন্নানাং হতানাং নিশিতৈঃ শরৈঃ
17.117
তে বধ্যমানাঃ সমরে সূতপুত্রেণ সৃঞ্জয়াঃ
তমেবাভিমুখা যান্তি পতংগা ইব পাবকম্
17.118
তং দহন্তমনীকানি তত্র তত্র মহারথম্
ক্ষত্রিয়া বর্জয়ামাসুর্যুগান্তাগ্নিমিবোল্বণম্
17.119
হতশেষাস্তু যে বীরাঃ পাঞ্চালানাং মহারথাঃ
তান্প্রভগ্নান্দ্রুতান্কর্ণঃ পৃষ্ঠতো বিকিরঞ্শরৈঃ
অভ্যধাবত তেজস্বী বিশীর্ণকবচধ্বজান্
17.120
তাপয়ামাস তান্বাণৈঃ সূতপুত্রো মহারথঃ
মধ্যংদিনমনুপ্রাপ্তো ভূতানীব তমোনুদঃ