Utshovঅধ্যায় 16
16.1
ধৃতরাষ্ট্র উবাচ
পাণ্ড্যে হতে কিমকরোদর্জুনো যুধি সংজয়
একবীরেণ কর্ণেন দ্রাবিতেষু পরেষু চ
16.2
সমাপ্তবিদ্যো বলবান্যুক্তো বীরশ্চ পাণ্ডবঃ
সর্বভূতেষ্বনুজ্ঞাতঃ শংকরেণ মহাত্মনা
16.3
তস্মান্মহদ্ভয়ং তীব্রমমিত্রঘ্নাদ্ধনংজয়াৎ
স যত্তত্রাকরোত্পার্থস্তন্মমাচক্ষ্ব সংজয়
16.4
সংজয় উবাচ
হতে পাণ্ড্যেঽর্জুনং কৃষ্ণস্ত্বরন্নাহ বচো হিতম্
পশ্যাতিমান্যং রাজানমপয়াতাংশ্চ পাণ্ডবান্
16.5
অশ্বত্থাম্নশ্চ সংকল্পাদ্ধতাঃ কর্ণেন সৃঞ্জয়াঃ
তথাশ্বনরনাগানাং কৃতং চ কদনং মহৎ
ইত্যাচষ্ট সুদুর্ধর্ষো বাসুদেবঃ কিরীটিনে
16.6
এতচ্ছ্রুত্বা চ দৃষ্ট্বা চ ভ্রাতুর্ঘোরং মহদ্ভয়ম্
বাহয়াশ্বান্হৃষীকেশ ক্ষিপ্রমিত্যাহ পাণ্ডবঃ
16.7
ততঃ প্রায়াদ্ধৃষীকেশো রথেনাপ্রতিয়োধিনা
দারুণশ্চ পুনস্তত্র প্রাদুরাসীত্সমাগমঃ
16.8
ততঃ প্রববৃতে ভূয়ঃ সংগ্রামো রাজসত্তম
কর্ণস্য পাণ্ডবানাং চ যমরাষ্ট্রবিবর্ধনঃ
16.9
ধনূংষি বাণান্পরিঘানসিতোমরপট্টিশান্
মুসলানি ভুশুণ্ডীশ্চ শক্তিঋষ্টিপরশ্বধান্
16.10
গদাঃ প্রাসানসীন্কুন্তান্ভিণ্ডিপালান্মহাঙ্কুশান্
প্রগৃহ্য ক্ষিপ্রমাপেতুঃ পরস্পরজিগীষয়া
16.11
বাণজ্যাতলশব্দেন দ্যাং দিশঃ প্রদিশো বিয়ৎ
পৃথিবীং নেমিঘোষেণ নাদয়ন্তোঽভ্যয়ুঃ পরান্
16.12
তেন শব্দেন মহতা সংহৃষ্টাশ্চক্রুরাহবম্
বীরা বীরৈর্মহাঘোরং কলহান্তং তিতীর্ষবঃ
16.13
জ্যাতলত্রধনুঃশব্দাঃ কুঞ্জরাণাং চ বৃংহিতম্
তাডিতানাং চ পততাং নিনাদঃ সুমহানভূৎ
16.14
বাণশব্দাংশ্চ বিবিধাঞ্শূরাণামভিগর্জতাম্
শ্রুত্বা শব্দং ভৃশং ত্রেসুর্জঘ্নুর্মম্লুশ্চ ভারত
16.15
তেষাং নানদ্যতাং চৈব শস্ত্রবৃষ্টিং চ মুঞ্চতাম্
বহূনাধিরথিঃ কর্ণঃ প্রমমাথ রণেষুভিঃ
16.16
পঞ্চ পাঞ্চালবীরাণাং রথান্দশ চ পঞ্চ চ
সাশ্বসূতধ্বজান্কর্ণঃ শরৈর্নিন্যে যমক্ষয়ম্
16.17
যোধমুখ্যা মহাবীর্যাঃ পাণ্ডূনাং কর্ণমাহবে
শীঘ্রাস্ত্রা দিবমাবৃত্য পরিবব্রুঃ সমন্ততঃ
16.18
ততঃ কর্ণো দ্বিষত্সেনাং শরবর্ষৈর্বিলোডয়ন্
বিজগাহেঽণ্ডজাপূর্ণাং পদ্মিনীমিব যূথপঃ
16.19
দ্বিষন্মধ্যমবস্কন্দ্য রাধেয়ো ধনুরুত্তমম্
বিধুন্বানঃ শিতৈর্বাণৈঃ শিরাংস্যুন্মথ্য পাতয়ৎ
16.20
চর্মবর্মাণি সংছিন্দ্য নির্বাপমিব দেহিনাম্
বিষেহুর্নাস্য সংপর্কং দ্বিতীয়স্য পতত্রিণঃ
16.21
বর্মদেহাসুমথনৈর্ধনুষঃ প্রচ্যুতৈঃ শরৈঃ
মৌর্ব্যা তলত্রৈর্ন্যবধীত্কশয়া বাজিনো যথা
16.22
পাণ্ডুসৃঞ্জয়পাঞ্চালাঞ্শরগোচরমানয়ৎ
মমর্দ কর্ণস্তরসা সিংহো মৃগগণানিব
16.23
ততঃ পাঞ্চালপুত্রাশ্চ দ্রৌপদেয়াশ্চ মারিষ
যমৌ চ যুয়ুধানশ্চ সহিতাঃ কর্ণমভ্যয়ুঃ
16.24
ব্যায়চ্ছমানাঃ সুভৃশং কুরুপাণ্ডবসৃঞ্জয়াঃ
প্রিয়ানসূন্রণে ত্যক্ত্বা যোধা জগ্মুঃ পরস্পরম্
16.25
সুসংনদ্ধাঃ কবচিনঃ সশিরস্ত্রাণভূষণাঃ
গদাভির্মুসলৈশ্চান্যে পরিঘৈশ্চ মহারথাঃ
16.26
সমভ্যধাবন্ত ভৃশং দেবা দণ্ডৈরিবোদ্যতৈঃ
নদন্তশ্চাহ্বয়ন্তশ্চ প্রবল্গন্তশ্চ মারিষ
16.27
ততো নিজঘ্নুরন্যোন্যং পেতুশ্চাহবতাডিতাঃ
বমন্তো রুধিরং গাত্রৈর্বিমস্তিষ্কেক্ষণা যুধি
16.28
দন্তপূর্ণৈঃ সরুধিরৈর্বক্ত্রৈর্দাডিমসংনিভৈঃ
জীবন্ত ইব চাপ্যেতে তস্থুঃ শস্ত্রোপবৃংহিতাঃ
16.29
পরস্পরং চাপ্যপরে পট্টিশৈরসিভিস্তথা
শক্তিভির্ভিণ্ডিপালৈশ্চ নখরপ্রাসতোমরৈঃ
16.30
ততক্ষুশ্চিচ্ছিদুশ্চান্যে বিভিদুশ্চিক্ষিপুস্তথা
সংচকর্তুশ্চ জঘ্নুশ্চ ক্রুদ্ধা নির্বিভিদুশ্চ হ
16.31
পেতুরন্যোন্যনিহতা ব্যসবো রুধিরোক্ষিতাঃ
ক্ষরন্তঃ স্বরসং রক্তং প্রকৃতাশ্চন্দনা ইব
16.32
রথৈ রথা বিনিহতা হস্তিনশ্চাপি হস্তিভিঃ
নরা নরবরৈঃ পেতুরশ্বাশ্চাশ্বৈঃ সহস্রশঃ
16.33
ধ্বজাঃ শিরাংসি চ্ছত্রাণি দ্বিপহস্তা নৃণাং ভুজাঃ
ক্ষুরৈর্ভল্লার্ধচন্দ্রৈশ্চ ছিন্নাঃ শস্ত্রাণি তত্যজুঃ
16.34
নরাংশ্চ নাগাংশ্চ রথান্হয়ান্মমৃদুরাহবে
অশ্বারোহৈর্হতাঃ শূরাশ্ছিন্নহস্তাশ্চ দন্তিনঃ
16.35
সপতাকা ধ্বজাঃ পেতুর্বিশীর্ণা ইব পর্বতাঃ
পত্তিভিশ্চ সমাপ্লুত্য দ্বিরদাঃ স্যন্দনাস্তথা
16.36
প্রহতা হন্যমানাশ্চ পতিতাশ্চৈব সর্বশঃ
অশ্বারোহাঃ সমাসাদ্য ত্বরিতাঃ পত্তিভির্হতাঃ
সাদিভিঃ পত্তিসংঘাশ্চ নিহতা যুধি শেরতে
16.37
মৃদিতানীব পদ্মানি প্রম্লানা ইব চ স্রজঃ
হতানাং বদনান্যাসন্গাত্রাণি চ মহামতে
16.38
রূপাণ্যত্যর্থকাম্যানি দ্বিরদাশ্বনৃণাং নৃপ
সমুন্নানীব বস্ত্রাণি প্রাপুর্দুর্দর্শতাং পরম্