Utshovঅধ্যায় 15
15.1
ধৃতরাষ্ট্র উবাচ
প্রোক্তস্ত্বয়া পূর্বমেব প্রবীরো লোকবিশ্রুতঃ
ন ত্বস্য কর্ম সংগ্রামে ত্বয়া সংজয় কীর্তিতম্
15.2
তস্য বিস্তরতো ব্রূহি প্রবীরস্যাদ্য বিক্রমম্
শিক্ষাং প্রভাবং বীর্যং চ প্রমাণং দর্পমেব চ
15.3
সংজয় উবাচ
দ্রোণভীষ্মকৃপদ্রৌণিকর্ণার্জুনজনার্দনান্
সমাপ্তবিদ্যান্ধনুষি শ্রেষ্ঠান্যান্মন্যসে যুধি
15.4
তুল্যতা কর্ণভীষ্মাভ্যামাত্মনো যেন দৃশ্যতে
বাসুদেবার্জুনাভ্যাং চ ন্যূনতাং নাত্মনীচ্ছতি
15.5
স পাণ্ড্যো নৃপতিশ্রেষ্ঠঃ সর্বশস্ত্রভৃতাং বরঃ
কর্ণস্যানীকমবধীত্পরিভূত ইবান্তকঃ
15.6
তদুদীর্ণরথাশ্বং চ পত্তিপ্রবরকুঞ্জরম্
কুলালচক্রবদ্ভ্রান্তং পাণ্ড্যেনাধিষ্ঠিতং বলম্
15.7
ব্যশ্বসূতধ্বজরথান্বিপ্রবিদ্ধায়ুধান্রিপূন্
সম্যগস্তৈঃ শরৈঃ পাণ্ড্যো বায়ুর্মেঘানিবাক্ষিপৎ
15.8
দ্বিরদান্প্রহতপ্রোথান্বিপতাকধ্বজায়ুধান্
সপাদরক্ষানবধীদ্বজ্রেণারীনিবারিহা
15.9
সশক্তিপ্রাসতূণীরানশ্বারোহান্হয়ানপি
পুলিন্দখশবাহ্লীকান্নিষাদান্ধ্রকতঙ্গণান্
15.10
দাক্ষিণাত্যাংশ্চ ভোজাংশ্চ ক্রূরান্সংগ্রামকর্কশান্
বিশস্ত্রকবচান্বাণৈঃ কৃত্বা পাণ্ড্যোঽকরোদ্ব্যসূন্
15.11
চতুরঙ্গং বলং বাণৈর্নিঘ্নন্তং পাণ্ড্যমাহবে
দৃষ্ট্বা দ্রৌণিরসংভ্রান্তমসংভ্রান্ততরোঽভ্যয়াৎ
15.12
আভাষ্য চৈনং মধুরমভি নৃত্যন্নভীতবৎ
প্রাহ প্রহরতাং শ্রেষ্ঠঃ স্মিতপূর্বং সমাহ্বয়ন্
15.13
রাজন্কমলপত্রাক্ষ প্রধানায়ুধবাহন
বজ্রসংহননপ্রখ্য প্রধানবলপৌরুষ
15.14
মুষ্টিশ্লিষ্টায়ুধাভ্যাং চ ব্যায়তাভ্যাং মহদ্ধনুঃ
দোর্ভ্যাং বিস্ফারয়ন্ভাসি মহাজলদবদ্ভৃশম্
15.15
শরবর্ষৈর্মহাবেগৈরমিত্রানভিবর্ষতঃ
মদন্যং নানুপশ্যামি প্রতিবীরং তবাহবে
15.16
রথদ্বিরদপত্ত্যশ্বানেকঃ প্রমথসে বহূন্
মৃগসংঘানিবারণ্যে বিভীর্ভীমবলো হরিঃ
15.17
মহতা রথঘোষেণ দিবং ভূমিং চ নাদয়ন্
বর্ষান্তে সস্যহা পীথো ভাভিরাপূরয়ন্নিব
15.18
সংস্পৃশানঃ শরাংস্তীক্ষ্ণাংস্তূণাদাশীবিষোপমান্
ময়ৈবৈকেন যুধ্যস্ব ত্র্যম্বকেণান্ধকো যথা
15.19
এবমুক্তস্তথেত্যুক্ত্বা প্রহরেতি চ তাডিতঃ
কর্ণিনা দ্রোণতনয়ং বিব্যাধ মলয়ধ্বজঃ
15.20
মর্মভেদিভিরত্যুগ্রৈর্বাণৈরগ্নিশিখোপমৈঃ
স্ময়ন্নভ্যহনদ্দ্রৌণিঃ পাণ্ড্যমাচার্যসত্তমঃ
15.21
ততো নবাপরাংস্তীক্ষ্ণান্নারাচান্কঙ্কবাসসঃ
গত্যা দশম্যা সংয়ুক্তানশ্বত্থামা ব্যবাসৃজৎ
15.22
তেষাং পঞ্চাচ্ছিনত্পাণ্ড্যঃ পঞ্চভির্নিশিতৈঃ শরৈঃ
চত্বারোঽভ্যাহনন্বাহানাশু তে ব্যসবোঽভবন্
15.23
অথ দ্রোণসুতস্যেষূংস্তাংশ্ছিত্ত্বা নিশিতৈঃ শরৈঃ
ধনুর্জ্যাং বিততাং পাণ্ড্যশ্চিচ্ছেদাদিত্যবর্চসঃ
15.24
বিজ্যং ধনুরথাধিজ্যং কৃত্বা দ্রৌণিরমিত্রহা
ততঃ শরসহস্রাণি প্রেষয়ামাস পাণ্ড্যতঃ
ইষুসংবাধমাকাশমকরোদ্দিশ এব চ
15.25
ততস্তানস্যতঃ সর্বান্দ্রৌণের্বাণান্মহাত্মনঃ
জানানোঽপ্যক্ষয়ান্পাণ্ড্যোঽশাতয়ত্পুরুষর্ষভঃ
15.26
প্রহিতাংস্তান্প্রয়ত্নেন ছিত্ত্বা দ্রৌণেরিষূনরিঃ
চক্ররক্ষৌ ততস্তস্য প্রাণুদন্নিশিতৈঃ শরৈঃ
15.27
অথারের্লাঘবং দৃষ্ট্বা মণ্ডলীকৃতকার্মুকঃ
প্রাস্যদ্দ্রোণসুতো বাণান্বৃষ্টিং পূষানুজো যথা
15.28
অষ্টাবষ্টগবান্যূহুঃ শকটানি যদায়ুধম্
অহ্নস্তদষ্টভাগেন দ্রৌণিশ্চিক্ষেপ মারিষ
15.29
তমন্তকমিব ক্রুদ্ধমন্তকালান্তকোপমম্
যে যে দদৃশিরে তত্র বিসংজ্ঞাঃ প্রায়শোঽভবন্
15.30
পর্জন্য ইব ঘর্মান্তে বৃষ্ট্যা সাদ্রিদ্রুমাং মহীম্
আচার্যপুত্রস্তাং সেনাং বাণবৃষ্ট্যাভ্যবীবৃষৎ
15.31
দ্রৌণিপর্জন্যমুক্তাং তাং বাণবৃষ্টিং সুদুঃসহাম্
বায়ব্যাস্ত্রেণ স ক্ষিপ্রং রুদ্ধ্বা পাণ্ড্যানিলোঽনদৎ
15.32
তস্য নানদতঃ কেতুং চন্দনাগুরুভূষিতম্
মলয়প্রতিমং দ্রৌণিশ্ছিত্ত্বাশ্বাংশ্চতুরোঽহনৎ
15.33
সূতমেকেষুণা হত্বা মহাজলদনিস্বনম্
ধনুশ্ছিত্ত্বার্ধচন্দ্রেণ ব্যধমত্তিলশো রথম্
15.34
অস্ত্রৈরস্ত্রাণি সংবার্য ছিত্ত্বা সর্বায়ুধানি চ
প্রাপ্তমপ্যহিতং দ্রৌণির্ন জঘান রণেপ্সয়া
15.35
হতেশ্বরো দন্তিবরঃ সুকল্পিত;স্ত্বরাভিসৃষ্টঃ প্রতিশর্মগো বলী
তমধ্যতিষ্ঠন্মলয়েশ্বরো মহা;ন্যথাদ্রিশৃঙ্গং হরিরুন্নদংস্তথা
15.36
স তোমরং ভাস্কররশ্মিসংনিভং; বলাস্ত্রসর্গোত্তময়ত্নমন্যুভিঃ
সসর্জ শীঘ্রং প্রতিপীডয়ন্গজং; গুরোঃ সুতায়াদ্রিপতীশ্বরো নদন্
15.37
মণিপ্রতানোত্তমবজ্রহাটকৈ;রলংকৃতং চাংশুকমাল্যমৌক্তিকৈঃ
হতোঽস্যসাবিত্যসকৃন্মুদা নদ;ন্পরাভিনদ্দ্রৌণিবরাঙ্গভূষণম্
15.38
তদর্কচন্দ্রগ্রহপাবকত্বিষং; ভৃশাভিঘাতাত্পতিতং বিচূর্ণিতম্
মহেন্দ্রবজ্রাভিহতং মহাবনং; যথাদ্রিশৃঙ্গং ধরণীতলে তথা
15.39
ততঃ প্রজজ্বাল পরেণ মন্যুনা; পদাহতো নাগপতির্যথা তথা
সমাদধে চান্তকদণ্ডসংনিভা;নিষূনমিত্রান্তকরাংশ্চতুর্দশ
15.40
দ্বিপস্য পাদাগ্রকরান্স পঞ্চভি;র্নৃপস্য বাহূ চ শিরোঽথ চ ত্রিভিঃ
জঘান ষড্ভিঃ ষডৃতূত্তমত্বিষঃ; স পাণ্ড্যরাজানুচরান্মহারথান্
15.41
সুদীর্ঘবৃত্তৌ বরচন্দনোক্ষিতৌ; সুবর্ণমুক্তামণিবজ্রভূষিতৌ
ভুজৌ ধরায়াং পতিতৌ নৃপস্য তৌ; বিবেষ্টতুস্তার্ক্ষ্যহতাবিবোরগৌ
15.42
শিরশ্চ তত্পূর্ণশশিপ্রভাননং; সরোষতাম্রায়তনেত্রমুন্নসম্
ক্ষিতৌ বিবভ্রাজ পতত্সকুণ্ডলং; বিশাখয়োর্মধ্যগতঃ শশী যথা
15.43
সমাপ্তবিদ্যং তু গুরোঃ সুতং নৃপঃ; সমাপ্তকর্মাণমুপেত্য তে সুতঃ
সুহৃদ্বৃতোঽত্যর্থমপূজয়ন্মুদা; জিতে বলৌ বিষ্ণুমিবামরেশ্বরঃ