Utshovঅধ্যায় 14
14.1
সংজয় উবাচ
প্রত্যাগত্য পুনর্জিষ্ণুরহন্সংশপ্তকান্বহূন্
বক্রানুবক্রগমনাদঙ্গারক ইব গ্রহঃ
14.2
পার্থবাণহতা রাজন্নরাশ্বরথকুঞ্জরাঃ
বিচেলুর্বভ্রমুর্নেদুঃ পেতুর্মম্লুশ্চ মারিষ
14.3
ধুর্যং ধুর্যতরান্সূতান্রথাংশ্চ পরিসংক্ষিপন্
পাণীন্পাণিগতং শস্ত্রং বাহূনপি শিরাংসি চ
14.4
ভল্লৈঃ ক্ষুরৈরর্ধচন্দ্রৈর্বত্সদন্তৈশ্চ পাণ্ডবঃ
চিচ্ছেদামিত্রবীরাণাং সমরে প্রতিয়ুধ্যতাম্
14.5
বাশিতার্থে যুয়ুত্সন্তো বৃষভা বৃষভং যথা
আপতন্ত্যর্জুনং শূরাঃ শতশোঽথ সহস্রশঃ
14.6
তেষাং তস্য চ তদ্যুদ্ধমভবল্লোমহর্ষণম্
ত্রৈলোক্যবিজয়ে যাদৃগ্দৈত্যানাং সহ বজ্রিণা
14.7
তমবিধ্যত্ত্রিভির্বাণৈর্দন্দশূকৈরিবাহিভিঃ
উগ্রায়ুধস্ততস্তস্য শিরঃ কায়াদপাহরৎ
14.8
তেঽর্জুনং সর্বতঃ ক্রুদ্ধা নানাশস্ত্রৈরবীবৃষন্
মরুদ্ভিঃ প্রেষিতা মেঘা হিমবন্তমিবোষ্ণগে
14.9
অস্ত্রৈরস্ত্রাণি সংবার্য দ্বিষতাং সর্বতোঽর্জুনঃ
সম্যগস্তৈঃ শরৈঃ সর্বান্সহিতানহনদ্বহূন্
14.10
ছিন্নত্রিবেণুজঙ্ঘেষান্নিহতপার্ষ্ণিসারথীন্
সংছিন্নরশ্মিয়োক্ত্রাক্ষান্ব্যনুকর্ষয়ুগান্রথান্
বিধ্বস্তসর্বসংনাহান্বাণৈশ্চক্রেঽর্জুনস্ত্বরন্
14.11
তে রথাস্তত্র বিধ্বস্তাঃ পরার্ধ্যা ভান্ত্যনেকশঃ
ধনিনামিব বেশ্মানি হতান্যগ্ন্যনিলাম্বুভিঃ
14.12
দ্বিপাঃ সংভিন্নমর্মাণো বজ্রাশনিসমৈঃ শরৈঃ
পেতুর্গির্যগ্রবেশ্মানি বজ্রবাতাগ্নিভির্যথা
14.13
সারোহাস্তুরগাঃ পেতুর্বহবোঽর্জুনতাডিতাঃ
নির্জিহ্বান্ত্রাঃ ক্ষিতৌ ক্ষীণা রুধিরার্দ্রাঃ সুদুর্দৃশঃ
14.14
নরাশ্বনাগা নারাচৈঃ সংস্যূতাঃ সব্যসাচিনা
বভ্রমুশ্চস্খলুঃ পেতুর্নেদুর্মম্লুশ্চ মারিষ
14.15
অণকৈশ্চ শিলাধৌতৈর্বজ্রাশনিবিষোপমৈঃ
শরৈর্নিজঘ্নিবান্পার্থো মহেন্দ্র ইব দানবান্
14.16
মহার্হবর্মাভরণা নানারূপাম্বরায়ুধাঃ
সরথাঃ সধ্বজা বীরা হতাঃ পার্থেন শেরতে
14.17
বিজিতাঃ পুণ্যকর্মাণো বিশিষ্টাভিজনশ্রুতাঃ
গতাঃ শরীরৈর্বসুধামূর্জিতৈঃ কর্মভির্দিবম্
14.18
অথার্জুনরথং বীরাস্ত্বদীয়াঃ সমুপাদ্রবন্
নানাজনপদাধ্যক্ষাঃ সগণা জাতমন্যবঃ
14.19
উহ্যমানা রথাশ্বৈস্তে পত্তয়শ্চ জিঘাংসবঃ
সমভ্যধাবন্নস্যন্তো বিবিধং ক্ষিপ্রমায়ুধম্
14.20
তদায়ুধমহাবর্ষং ক্ষিপ্তং যোধমহাম্বুদৈঃ
ব্যধমন্নিশিতৈর্বাণৈঃ ক্ষিপ্রমর্জুনমারুতঃ
14.21
সাশ্বপত্তিদ্বিপরথং মহাশস্ত্রৌঘমপ্লবম্
সহসা সংতিতীর্ষন্তং পার্থং শস্ত্রাস্ত্রসেতুনা
14.22
অথাব্রবীদ্বাসুদেবঃ পার্থং কিং ক্রীডসেঽনঘ
সংশপ্তকান্প্রমথ্যৈতাংস্ততঃ কর্ণবধে ত্বর
14.23
তথেত্যুক্ত্বার্জুনঃ ক্ষিপ্রং শিষ্টান্সংশপ্তকাংস্তদা
আক্ষিপ্য শস্ত্রেণ বলাদ্দৈত্যানিন্দ্র ইবাবধীৎ
14.24
আদধত্সংদধন্নেষূন্দৃষ্টঃ কৈশ্চিদ্রণেঽর্জুনঃ
বিমুঞ্চন্বা শরাঞ্শীঘ্রং দৃশ্যতে স্ম হি কৈরপি
14.25
আশ্চর্যমিতি গোবিন্দো ব্রুবন্নশ্বানচোদয়ৎ
হংসাংসগৌরাস্তে সেনাং হংসাঃ সর ইবাবিশন্
14.26
ততঃ সংগ্রামভূমিং তাং বর্তমানে জনক্ষয়ে
অবেক্ষমাণো গোবিন্দঃ সব্যসাচিনমব্রবীৎ
14.27
এষ পার্থ মহারৌদ্রো বর্ততে ভরতক্ষয়ঃ
পৃথিব্যাং পার্থিবানাং বৈ দুর্যোধনকৃতে মহান্
14.28
পশ্য ভারত চাপানি রুক্মপৃষ্ঠানি ধন্বিনাম্
মহতামপবিদ্ধানি কলাপানিষুধীস্তথা
14.29
জাতরূপময়ৈঃ পুঙ্খৈঃ শরাংশ্চ নতপর্বণঃ
তৈলধৌতাংশ্চ নারাচান্নির্মুক্তানিব পন্নগান্
14.30
হস্তিদন্তত্সরূন্খড্গাঞ্জাতরূপপরিষ্কৃতান্
আকীর্ণাংস্তোমরাংশ্চাপাংশ্চিত্রান্হেমবিভূষিতান্
14.31
বর্মাণি চাপবিদ্ধানি রুক্মপৃষ্ঠানি ভারত
সুবর্ণবিকৃতান্প্রাসাঞ্শক্তীঃ কনকভূষিতাঃ
14.32
জাম্বূনদময়ৈঃ পট্টৈর্বদ্ধাশ্চ বিপুলা গদাঃ
জাতরূপময়ীশ্চর্ষ্টীঃ পট্টিশান্হেমভূষিতান্
14.33
দণ্ডৈঃ কনকচিত্রৈশ্চ বিপ্রবিদ্ধান্পরশ্বধান্
অয়স্কুশান্তান্পতিতান্মুসলানি গুরূণি চ
14.34
শতঘ্নীঃ পশ্য চিত্রাশ্চ বিপুলান্পরিঘাংস্তথা
চক্রাণি চাপবিদ্ধানি মুদ্গরাংশ্চ বহূন্রণে
14.35
নানাবিধানি শস্ত্রাণি প্রগৃহ্য জয়গৃদ্ধিনঃ
জীবন্ত ইব লক্ষ্যন্তে গতসত্ত্বাস্তরস্বিনঃ
14.36
গদাবিমথিতৈর্গাত্রৈর্মুসলৈর্ভিন্নমস্তকান্
গজবাজিরথক্ষুণ্ণান্পশ্য যোধান্সহস্রশঃ
14.37
মনুষ্যগজবাজীনাং শরশক্ত্যৃষ্টিতোমরৈঃ
নিস্ত্রিংশৈঃ পট্টিশৈঃ প্রাসৈর্নখরৈর্লগুডৈরপি
14.38
শরীরৈর্বহুধা ভিন্নৈঃ শোণিতৌঘপরিপ্লুতৈঃ
গতাসুভিরমিত্রঘ্ন সংবৃতা রণভূময়ঃ
14.39
বাহুভিশ্চন্দনাদিগ্ধৈঃ সাঙ্গদৈঃ শুভভূষণৈঃ
সতলত্রৈঃ সকেয়ূরৈর্ভাতি ভারত মেদিনী
14.40
সাঙ্গুলিত্রৈর্ভুজাগ্রৈশ্চ বিপ্রবিদ্ধৈরলংকৃতৈঃ
হস্তিহস্তোপমৈশ্ছিন্নৈরূরুভিশ্চ তরস্বিনাম্
14.41
বদ্ধচূডামণিবরৈঃ শিরোভিশ্চ সকুণ্ডলৈঃ
নিকৃত্তৈর্বৃষভাক্ষাণাং বিরাজতি বসুংধরা
14.42
কবন্ধৈঃ শোণিতাদিগ্ধৈশ্ছিন্নগাত্রশিরোধরৈঃ
ভূর্ভাতি ভরতশ্রেষ্ঠ শান্তার্চির্ভিরিবাগ্নিভিঃ
14.43
রথান্বহুবিধান্ভগ্নান্হেমকিঙ্কিণিনঃ শুভান্
অশ্বাংশ্চ বহুধা পশ্য শোণিতেন পরিপ্লুতান্
14.44
যোধানাং চ মহাশঙ্খান্পাণ্ডুরাংশ্চ প্রকীর্ণকান্
নিরস্তজিহ্বান্মাতঙ্গাঞ্শয়ানান্পর্বতোপমান্
14.45
বৈজয়ন্তীবিচিত্রাংশ্চ হতাংশ্চ গজয়োধিনঃ
বারণানাং পরিস্তোমান্সুয়ুক্তাম্বরকম্বলান্
14.46
বিপাটিতা বিচিত্রাশ্চ রূপচিত্রাঃ কুথাস্তথা
ভিন্নাশ্চ বহুধা ঘণ্টাঃ পতদ্ভিশ্চূর্ণিতা গজৈঃ
14.47
বৈডূর্যমণিদণ্ডাংশ্চ পতিতানঙ্কুশান্ভুবি
বদ্ধাঃ সাদিধ্বজাগ্রেষু সুবর্ণবিকৃতাঃ কশাঃ
14.48
বিচিত্রান্মণিচিত্রাংশ্চ জাতরূপপরিষ্কৃতান্
অশ্বাস্তরপরিস্তোমান্রাঙ্কবান্পতিতান্ভুবি
14.49
চূডামণীন্নরেন্দ্রাণাং বিচিত্রাঃ কাঞ্চনস্রজঃ
ছত্রাণি চাপবিদ্ধানি চামরব্যজনানি চ
14.50
চন্দ্রনক্ষত্রভাসৈশ্চ বদনৈশ্চারুকুণ্ডলৈঃ
কৢপ্তশ্মশ্রুভিরত্যর্থং বীরাণাং সমলংকৃতৈঃ
বদনৈঃ পশ্য সংছন্নাং মহীং শোণিতকর্দমাম্
14.51
সজীবাংশ্চ নরান্পশ্য কূজমানান্সমন্ততঃ
উপাস্যমানান্বহুভির্ন্যস্তশস্ত্রৈর্বিশাং পতে
14.52
জ্ঞাতিভিঃ সহিতৈস্তত্র রোদমানৈর্মুহুর্মুহুঃ
ব্যুত্ক্রান্তানপরান্যোধাংশ্ছাদয়িত্বা তরস্বিনঃ
পুনর্যুদ্ধায় গচ্ছন্তি জয়গৃদ্ধাঃ প্রমন্যবঃ
14.53
অপরে তত্র তত্রৈব পরিধাবন্তি মানিনঃ
জ্ঞাতিভিঃ পতিতৈঃ শূরৈর্যাচ্যমানাস্তথোদকম্
14.54
জলার্থং চ গতাঃ কেচিন্নিষ্প্রাণা বহবোঽর্জুন
সংনিবৃত্তাশ্চ তে শূরাস্তান্দৃষ্ট্বৈব বিচেতসঃ
14.55
জলং দৃষ্ট্বা প্রধাবন্তি ক্রোশমানাঃ পরস্পরম্
জলং পীত্বা মৃতান্পশ্য পিবতোঽন্যাংশ্চ ভারত
14.56
পরিত্যজ্য প্রিয়ানন্যে বান্ধবান্বান্ধবপ্রিয়
ব্যুত্ক্রান্তাঃ সমদৃশ্যন্ত তত্র তত্র মহারণে
14.57
পশ্যাপরান্নরশ্রেষ্ঠ সংদষ্টৌষ্ঠপুটান্পুনঃ
ভ্রুকুটীকুটিলৈর্বক্ত্রৈঃ প্রেক্ষমাণান্সমন্ততঃ
14.58
এতত্তবৈবানুরূপং কর্মার্জুন মহাহবে
দিবি বা দেবরাজস্য ত্বয়া যত্কৃতমাহবে
14.59
এবং তাং দর্শয়ন্কৃষ্ণো যুদ্ধভূমিং কিরীটিনে
গচ্ছন্নেবাশৃণোচ্ছব্দং দুর্যোধনবলে মহৎ
14.60
শঙ্খদুন্দুভিনির্ঘোষান্ভেরীপণবমিশ্রিতান্
রথাশ্বগজনাদাংশ্চ শস্ত্রশব্দাংশ্চ দারুণান্
14.61
প্রবিশ্য তদ্বলং কৃষ্ণস্তুরগৈর্বাতবেগিভিঃ
পাণ্ড্যেনাভ্যর্দিতাং সেনাং ত্বদীয়াং বীক্ষ্য ধিষ্ঠিতঃ
14.62
স হি নানাবিধৈর্বাণৈরিষ্বাসপ্রবরো যুধি
ন্যহনদ্দ্বিষতাং ব্রাতান্গতাসূনন্তকো যথা
14.63
গজবাজিমনুষ্যাণাং শরীরাণি শিতৈঃ শরৈঃ
ভিত্ত্বা প্রহরতাং শ্রেষ্ঠো বিদেহাসূংশ্চকার সঃ
14.64
শত্রুপ্রবীরৈরস্তানি নানাশস্ত্রাণি সায়কৈঃ
ভিত্ত্বা তানহনত্পাণ্ড্যঃ শত্রূঞ্শক্র ইবাসুরান্