Utshovঅধ্যায় 13
13.1
সংজয় উবাচ
অথোত্তরেণ পাণ্ডূনাং সেনায়াং ধ্বনিরুত্থিতঃ
রথনাগাশ্বপত্তীনাং দণ্ডধারেণ বধ্যতাম্
13.2
নিবর্তয়িত্বা তু রথং কেশবোঽর্জুনমব্রবীৎ
বাহয়ন্নেব তুরগান্গরুডানিলরংহসঃ
13.3
মাগধোঽথাপ্যতিক্রান্তো দ্বিরদেন প্রমাথিনা
ভগদত্তাদনবরঃ শিক্ষয়া চ বলেন চ
13.4
এনং হত্বা নিহন্তাসি পুনঃ সংশপ্তকানিতি
বাক্যান্তে প্রাপয়ত্পার্থং দণ্ডধারান্তিকং প্রতি
13.5
স মাগধানাং প্রবরোঽঙ্কুশগ্রহো; গ্রহেষ্বসহ্যো বিকচো যথা গ্রহঃ
সপত্নসেনাং প্রমমাথ দারুণো; মহীং সমগ্রাং বিকচো যথা গ্রহঃ
13.6
সুকল্পিতং দানবনাগসংনিভং; মহাভ্রসংহ্রাদমমিত্রমর্দনম্
রথাশ্বমাতঙ্গগণান্সহস্রশঃ; সমাস্থিতো হন্তি শরৈর্দ্বিপানপি
13.7
রথানধিষ্ঠায় সবাজিসারথী;ন্রথাংশ্চ পদ্ভিস্ত্বরিতো ব্যপোথয়ৎ
দ্বিপাংশ্চ পদ্ভ্যাং চরণৈঃ করেণ চ; দ্বিপাস্থিতো হন্তি স কালচক্রবৎ
13.8
নরাংশ্চ কার্ষ্ণায়সবর্মভূষণা;ন্নিপাত্য সাশ্বানপি পত্তিভিঃ সহ
ব্যপোথয়দ্দন্তিবরেণ শুষ্মিণা; সশব্দবত্স্থূলনডান্যথা তথা
13.9
অথার্জুনো জ্যাতলনেমিনিস্বনে; মৃদঙ্গভেরীবহুশঙ্খনাদিতে
নরাশ্বমাতঙ্গসহস্রনাদিতৈ; রথোত্তমেনাভ্যপতদ্দ্বিপোত্তমম্
13.10
ততোঽর্জুনং দ্বাদশভিঃ শরোত্তমৈ;র্জনার্দনং ষোডশভিঃ সমার্দয়ৎ
স দণ্ডধারস্তুরগাংস্ত্রিভিস্ত্রিভি;স্ততো ননাদ প্রজহাস চাসকৃৎ
13.11
ততোঽস্য পার্থঃ সগুণেষুকার্মুকং; চকর্ত ভল্লৈর্ধ্বজমপ্যলংকৃতম্
পুনর্নিয়ন্তৄন্সহ পাদগোপ্তৃভি;স্ততস্তু চুক্রোধ গিরিব্রজেশ্বরঃ
13.12
ততোঽর্জুনং ভিন্নকটেন দন্তিনা; ঘনাঘনেনানিলতুল্যরংহসা
অতীব চুক্ষোভয়িষুর্জনার্দনং; ধনংজয়ং চাভিজঘান তোমরৈঃ
13.13
অথাস্য বাহূ দ্বিপহস্তসংনিভৌ; শিরশ্চ পূর্ণেন্দুনিভাননং ত্রিভিঃ
ক্ষুরৈঃ প্রচিচ্ছেদ সহৈব পাণ্ডব;স্ততো দ্বিপং বাণশতৈঃ সমার্দয়ৎ
13.14
স পার্থবাণৈস্তপনীয়ভূষণৈঃ; সমারুচত্কাঞ্চনবর্মভৃদ্দ্বিপঃ
তথা চকাশে নিশি পর্বতো যথা; দবাগ্নিনা প্রজ্বলিতৌষধিদ্রুমঃ
13.15
স বেদনার্তোঽম্বুদনিস্বনো নদং;শ্চলন্ভ্রমন্প্রস্খলিতোঽঽতুরো দ্রবন্
পপাত রুগ্ণঃ সনিয়ন্তৃকস্তথা; যথা গিরির্বজ্রনিপাতচূর্ণিতঃ
13.16
হিমাবদাতেন সুবর্ণমালিনা; হিমাদ্রিকূটপ্রতিমেন দন্তিনা
হতে রণে ভ্রাতরি দণ্ড আব্রজ;জ্জিঘাংসুরিন্দ্রাবরজং ধনংজয়ম্
13.17
স তোমরৈরর্ককরপ্রভৈস্ত্রিভি;র্জনার্দনং পঞ্চভিরেব চার্জুনম্
সমর্পয়িত্বা বিননাদ চার্দয়ং;স্ততোঽস্য বাহূ বিচকর্ত পাণ্ডবঃ
13.18
ক্ষুরপ্রকৃত্তৌ সুভৃশং সতোমরৌ; চ্যুতাঙ্গদৌ চন্দনরূষিতৌ ভুজৌ
গজাত্পতন্তৌ যুগপদ্বিরেজতু;র্যথাদ্রিশৃঙ্গাত্পতিতৌ মহোরগৌ
13.19
অথার্ধচন্দ্রেণ হৃতং কিরীটিনা; পপাত দণ্ডস্য শিরঃ ক্ষিতিং দ্বিপাৎ
তচ্ছোণিতাভং নিপতদ্বিরেজে; দিবাকরোঽস্তাদিব পশ্চিমাং দিশম্
13.20
অথ দ্বিপং শ্বেতনগাগ্রসংনিভং; দিবাকরাংশুপ্রতিমৈঃ শরোত্তমৈঃ
বিভেদ পার্থঃ স পপাত নানদ;ন্হিমাদ্রিকূটঃ কুলিশাহতো যথা
13.21
ততোঽপরে তত্প্রতিমা গজোত্তমা; জিগীষবঃ সংয়তি সব্যসাচিনম্
তথা কৃতাস্তেন যথৈব তৌ দ্বিপৌ; ততঃ প্রভগ্নং সুমহদ্রিপোর্বলম্
13.22
গজা রথাশ্বাঃ পুরুষাশ্চ সংঘশঃ; পরস্পরঘ্নাঃ পরিপেতুরাহবে
পরস্পরপ্রস্খলিতাঃ সমাহতা; ভৃশং চ তত্তত্কুলভাষিণো হতাঃ
13.23
অথার্জুনং স্বে পরিবার্য সৈনিকাঃ; পুরংদরং দেবগণা ইবাব্রুবন্
অভৈষ্ম যস্মান্মরণাদিব প্রজাঃ; স বীর দিষ্ট্যা নিহতস্ত্বয়া রিপুঃ
13.24
ন চেত্পরিত্রাস্য ইমাঞ্জনান্ভয়া;দ্দ্বিষদ্ভিরেবং বলিভিঃ প্রপীডিতান্
তথাভবিষ্যদ্দ্বিষতাং প্রমোদনং; যথা হতেষ্বেষ্বিহ নোঽরিষু ত্বয়া
13.25
ইতীব ভূয়শ্চ সুহৃদ্ভিরীরিতা; নিশম্য বাচঃ সুমনাস্ততোঽর্জুনঃ
যথানুরূপং প্রতিপূজ্য তং জনং; জগাম সংশপ্তকসংঘহা পুনঃ