Utshovঅধ্যায় 12
12.1
ধৃতরাষ্ট্র উবাচ
যথা সংশপ্তকৈঃ সার্ধমর্জুনস্যাভবদ্রণঃ
অন্যেষাং চ মদীয়ানাং পাণ্ডবৈস্তদ্ব্রবীহি মে
12.2
সংজয় উবাচ
শৃণু রাজন্যথাবৃত্তং সংগ্রামং ব্রুবতো মম
বীরাণাং শত্রুভিঃ সার্ধং দেহপাপ্মপ্রণাশনম্
12.3
পার্থঃ সংশপ্তকগণং প্রবিশ্যার্ণবসংনিভম্
ব্যক্ষোভয়দমিত্রঘ্নো মহাবাত ইবার্ণবম্
12.4
শিরাংস্যুন্মথ্য বীরাণাং শিতৈর্ভল্লৈর্ধনংজয়ঃ
পূর্ণচন্দ্রাভবক্ত্রাণি স্বক্ষিভ্রূদশনানি চ
সংতস্তার ক্ষিতিং ক্ষিপ্রং বিনালৈর্নলিনৈরিব
12.5
সুবৃত্তানায়তান্পুষ্টাংশ্চন্দনাগুরুভূষিতান্
সায়ুধান্সতনুত্রাণান্পঞ্চাস্যোরগসংনিভান্
বাহূন্ক্ষুরৈরমিত্রাণাং বিচকর্তার্জুনো রণে
12.6
ধুর্যান্ধুর্যতরান্সূতান্ধ্বজাংশ্চাপানি সায়কান্
পাণীনরত্নীনসকৃদ্ভল্লৈশ্চিচ্ছেদ পাণ্ডবঃ
12.7
দ্বিপান্হয়ান্রথাংশ্চৈব সারোহানর্জুনো রণে
শরৈরনেকসাহস্রৈ রাজন্নিন্যে যমক্ষয়ম্
12.8
তং প্রবীরং প্রতীয়াতা নর্দমানা ইবর্ষভাঃ
বাশিতার্থমভিক্রুদ্ধা হুংকৃত্বা চাভিদুদ্রুবুঃ
নিঘ্নন্তমভিজঘ্নুস্তে শরৈঃ শৃঙ্গৈরিবর্ষভাঃ
12.9
তস্য তেষাং চ তদ্যুদ্ধমভবল্লোমহর্ষণম্
ত্রৈলোক্যবিজয়ে যাদৃগ্দৈত্যানাং সহ বজ্রিণা
12.10
অস্ত্রৈরস্ত্রাণি সংবার্য দ্বিষতাং সর্বতোঽর্জুনঃ
ইষুভির্বহুভিস্তূর্ণং বিদ্ধ্বা প্রাণান্ররাস সঃ
12.11
ছিন্নত্রিবেণুচক্রাক্ষান্হতয়োধাশ্বসারথীন্
বিধ্বস্তায়ুধতূণীরান্সমুন্মথিতকেতনান্
12.12
সংছিন্নয়োক্ত্ররশ্মীকান্বিত্রিবেণূন্বিকূবরান্
বিধ্বস্তবন্ধুরয়ুগান্বিশস্তায়ুধমণ্ডলান্
রথান্বিশকলীকুর্বন্মহাভ্রাণীব মারুতঃ
12.13
বিস্মাপয়ন্প্রেক্ষণীয়ং দ্বিষাতাং ভয়বর্ধনম্
মহারথসহস্রস্য সমং কর্মার্জুনোঽকরোৎ
12.14
সিদ্ধদেবর্ষিসংঘাশ্চ চারণাশ্চৈব তুষ্টুবুঃ
দেবদুন্দুভয়ো নেদুঃ পুষ্পবর্ষাণি চাপতন্
কেশবার্জুনয়োর্মূর্ধ্নি প্রাহ বাক্চাশরীরিণী
12.15
চন্দ্রার্কানিলবহ্নীনাং কান্তিদীপ্তিবলদ্যুতীঃ
যৌ সদা বিভ্রতুর্বীরৌ তাবিমৌ কেশবার্জুনৌ
12.16
ব্রহ্মেশানাবিবাজয্যৌ বীরাবেকরথে স্থিতৌ
সর্বভূতবরৌ বীরৌ নরনারায়ণাবুভৌ
12.17
ইত্যেতন্মহদাশ্চর্যং দৃষ্ট্বা শ্রুত্বা চ ভারত
অশ্বত্থামা সুসংয়ত্তঃ কৃষ্ণাবভ্যদ্রবদ্রণে
12.18
অথ পাণ্ডবমস্যন্তং যমকালান্তকাঞ্শরান্
সেষুণা পাণিনাহূয় হসন্দ্রৌণিরথাব্রবীৎ
12.19
যদি মাং মন্যসে বীর প্রাপ্তমর্হমিবাতিথিম্
ততঃ সর্বাত্মনাদ্য ত্বং যুদ্ধাতিথ্যং প্রয়চ্ছ মে
12.20
এবমাচার্যপুত্রেণ সমাহূতো যুয়ুত্সয়া
বহু মেনেঽর্জুনোঽঽত্মানমিদং চাহ জনার্দনম্
12.21
সংশপ্তকাশ্চ মে বধ্যা দ্রৌণিরাহ্বয়তে চ মাম্
যদত্রানন্তরং প্রাপ্তং প্রশাধি ত্বং মহাভুজ
12.22
এবমুক্তোঽবহত্পার্থং কৃষ্ণো দ্রোণাত্মজান্তিকম্
জৈত্রেণ বিধিনাহূতং বায়ুরিন্দ্রমিবাধ্বরে
12.23
তমামন্ত্র্যৈকমনসা কেশবো দ্রৌণিমব্রবীৎ
অশ্বত্থামন্স্থিরো ভূত্বা প্রহরাশু সহস্ব চ
12.24
নির্বেষ্টুং ভর্তৃপিণ্ডং হি কালোঽয়মুপজীবিনাম্
সূক্ষ্মো বিবাদো বিপ্রাণাং স্থূলৌ ক্ষাত্রৌ জয়াজয়ৌ
12.25
যাং ন সংক্ষমসে মোহাদ্দিব্যাং পার্থস্য সত্ক্রিয়াম্
তামাপ্তুমিচ্ছন্যুধ্যস্ব স্থিরো ভূত্বাদ্য পাণ্ডবম্
12.26
ইত্যুক্তো বাসুদেবেন তথেত্যুক্ত্বা দ্বিজোত্তমঃ
বিব্যাধ কেশবং ষষ্ট্যা নারাচৈরর্জুনং ত্রিভিঃ
12.27
তস্যার্জুনঃ সুসংক্রুদ্ধস্ত্রিভির্ভল্লৈঃ শরাসনম্
চিচ্ছেদাথান্যদাদত্ত দ্রৌণির্ঘোরতরং ধনুঃ
12.28
সজ্যং কৃত্বা নিমেষাত্তদ্বিব্যাধার্জুনকেশবৌ
ত্রিভিঃ শরৈর্বাসুদেবং সহস্রেণ চ পাণ্ডবম্
12.29
ততঃ শরসহস্রাণি প্রয়ুতান্যর্বুদানি চ
সসৃজে দ্রৌণিরায়স্তঃ সংস্তভ্য চ রণেঽর্জুনম্
12.30
ইষুধের্ধনুষো জ্যায়া অঙ্গুলীভ্যশ্চ মারিষ
বাহ্বোঃ করাভ্যামুরসো বদনঘ্রাণনেত্রতঃ
12.31
কর্ণাভ্যাং শিরসোঽঙ্গেভ্যো লোমবর্ত্মভ্য এব চ
রথধ্বজেভ্যশ্চ শরা নিষ্পেতুর্ব্রহ্মবাদিনঃ
12.32
শরজালেন মহতা বিদ্ধ্বা কেশবপাণ্ডবৌ
ননাদ মুদিতো দ্রৌণির্মহামেঘৌঘনিস্বনঃ
12.33
তস্য নানদতঃ শ্রুত্বা পাণ্ডবোঽচ্যুতমব্রবীৎ
পশ্য মাধব দৌরাত্ম্যং দ্রোণপুত্রস্য মাং প্রতি
12.34
বধপ্রাপ্তৌ মন্যতে নৌ প্রবেশ্য শরবেশ্মনি
এষোঽস্য হন্মি সংকল্পং শিক্ষয়া চ বলেন চ
12.35
অশ্বত্থাম্নঃ শরানস্তাংশ্ছিত্ত্বৈকৈকং ত্রিধা ত্রিধা
ব্যধমদ্ভরতশ্রেষ্ঠো নীহারমিব মারুতঃ
12.36
ততঃ সংশপ্তকান্ভূয়ঃ সাশ্বসূতরথদ্বিপান্
ধ্বজপত্তিগণানুগ্রৈর্বাণৈর্বিব্যাধ পাণ্ডবঃ
12.37
যে যে দদৃশিরে তত্র যদ্যদ্রূপং যথা যথা
তে তে তত্তচ্ছরৈর্ব্যাপ্তং মেনিরেঽঽত্মানমেব চ
12.38
তে গাণ্ডীবপ্রণুদিতা নানারূপাঃ পতত্রিণঃ
ক্রোশে সাগ্রে স্থিতান্ঘ্নন্তি দ্বিপাংশ্চ পুরুষান্রণে
12.39
ভল্লৈশ্ছিন্নাঃ করাঃ পেতুঃ করিণাং মদকর্ষিণাম্
ছিন্না যথা পরশুভিঃ প্রবৃদ্ধাঃ শরদি দ্রুমাঃ
12.40
পশ্চাত্তু শৈলবত্পেতুস্তে গজাঃ সহ সাদিভিঃ
বজ্রিবজ্রপ্রমথিতা যথৈবাদ্রিচয়াস্তথা
12.41
গন্ধর্বনগরাকারান্বিধিবত্কল্পিতান্রথান্
বিনীতজবনান্যুক্তানাস্থিতান্যুদ্ধদুর্মদান্
12.42
শরৈর্বিশকলীকুর্বন্নমিত্রানভ্যবীবৃষৎ
অলংকৃতানশ্বসাদীন্পত্তীংশ্চাহন্ধনংজয়ঃ
12.43
ধনংজয়য়ুগান্তার্কঃ সংশপ্তকমহার্ণবম্
ব্যশোষয়ত দুঃশোষং তীব্রৈঃ শরগভস্তিভিঃ
12.44
পুনর্দ্রৌণিমহাশৈলং নারাচৈঃ সূর্যসংনিভৈঃ
নির্বিভেদ মহাবেগৈস্ত্বরন্বজ্রীব পর্বতম্
12.45
তমাচার্যসুতঃ ক্রুদ্ধঃ সাশ্বয়ন্তারমাশুগৈঃ
যুয়ুত্সুর্নাশকদ্যোদ্ধুং পার্থস্তানন্তরাচ্ছিনৎ
12.46
ততঃ পরমসংক্রুদ্ধঃ কাণ্ডকোশানবাসৃজৎ
অশ্বত্থামাভিরূপায় গৃহানতিথয়ে যথা
12.47
অথ সংশপ্তকাংস্ত্যক্ত্বা পাণ্ডবো দ্রৌণিমভ্যয়াৎ
অপাঙ্ক্তেয়মিব ত্যক্ত্বা দাতা পাঙ্ক্তেয়মর্থিনম্
12.48
ততঃ সমভবদ্যুদ্ধং শুক্রাঙ্গিরসবর্চসোঃ
নক্ষত্রমভিতো ব্যোম্নি শুক্রাঙ্গিরসয়োরিব
12.49
সংতাপয়ন্তাবন্যোন্যং দীপ্তৈঃ শরগভস্তিভিঃ
লোকত্রাসকরাবাস্তাং বিমার্গস্থৌ গ্রহাবিব
12.50
ততোঽবিধ্যদ্ভ্রুবোর্মধ্যে নারাচেনার্জুনো ভৃশম্
স তেন বিবভৌ দ্রৌণিরূর্ধ্বরশ্মির্যথা রবিঃ
12.51
অথ কৃষ্ণৌ শরশতৈরশ্বত্থাম্নার্দিতৌ ভৃশম্
সরশ্মিজালনিকরৌ যুগান্তার্কাবিবাসতুঃ
12.52
ততোঽর্জুনঃ সর্বতোধারমস্ত্র;মবাসৃজদ্বাসুদেবাভিগুপ্তঃ
দ্রৌণায়নিং চাভ্যহনত্পৃষত্কৈ;র্বজ্রাগ্নিবৈবস্বতদণ্ডকল্পৈঃ
12.53
স কেশবং চার্জুনং চাতিতেজা; বিব্যাধ মর্মস্বতিরৌদ্রকর্মা
বাণৈঃ সুমুক্তৈরতিতীব্রবেগৈ;র্যৈরাহতো মৃত্যুরপি ব্যথেত
12.54
দ্রৌণেরিষূনর্জুনঃ সংনিবার্য; ব্যায়চ্ছতস্তদ্দ্বিগুণৈঃ সুপুঙ্খৈঃ
তং সাশ্বসূতধ্বজমেকবীর;মাবৃত্য সংশপ্তকসৈন্যমার্ছৎ
12.55
ধনূংষি বাণানিষুধীর্ধনুর্জ্যাঃ; পাণীন্ভুজান্পাণিগতং চ শস্ত্রম্
ছত্রাণি কেতূংস্তুরগানথৈষাং; বস্ত্রাণি মাল্যান্যথ ভূষণানি
12.56
চর্মাণি বর্মাণি মনোরথাংশ্চ; প্রিয়াণি সর্বাণি শিরাংসি চৈব
চিচ্ছেদ পার্থো দ্বিষতাং প্রমুক্তৈ;র্বাণৈঃ স্থিতানামপরাঙ্মুখানাম্
12.57
সুকল্পিতাঃ স্যন্দনবাজিনাগাঃ; সমাস্থিতাঃ কৃতয়ত্নৈর্নৃবীরৈঃ
পার্থেরিতৈর্বাণগণৈর্নিরস্তা;স্তৈরেব সার্ধং নৃবরৈর্নিপেতুঃ
12.58
পদ্মার্কপূর্ণেন্দুসমাননানি; কিরীটমালামুকুটোত্কটানি
ভল্লার্ধচন্দ্রক্ষুরহিংসিতানি; প্রপেতুরুর্ব্যাং নৃশিরাংস্যজস্রম্
12.59
অথ দ্বিপৈর্দেবপতিদ্বিপাভৈ;র্দেবারিদর্পোল্বণমন্যুদর্পৈঃ
কলিঙ্গবঙ্গাঙ্গনিষাদবীরা; জিঘাংসবঃ পাণ্ডবমভ্যধাবন্
12.60
তেষাং দ্বিপানাং বিচকর্ত পার্থো; বর্মাণি মর্মাণি করান্নিয়ন্তৄন্
ধ্বজাঃ পতাকাশ্চ ততঃ প্রপেতু;র্বজ্রাহতানীব গিরেঃ শিরাংসি
12.61
তেষু প্ররুগ্ণেষু গুরোস্তনূজং; বাণৈঃ কিরীটী নবসূর্যবর্ণৈঃ
প্রচ্ছাদয়ামাস মহাভ্রজালৈ;র্বায়ুঃ সমুদ্যুক্তমিবাংশুমন্তম্
12.62
ততোঽর্জুনেষূনিষুভির্নিরস্য; দ্রৌণিঃ শরৈরর্জুনবাসুদেবৌ
প্রচ্ছাদয়িত্ব দিবি চন্দ্রসূর্যৌ; ননাদ সোঽম্ভোদ ইবাতপান্তে
12.63
তমর্জুনস্তাংশ্চ পুনস্ত্বদীয়া;নভ্যর্দিতস্তৈরবিকৃত্তশস্ত্রৈঃ
বাণান্ধকারং সহসৈব কৃত্বা; বিব্যাধ সর্বানিষুভিঃ সুপুঙ্খৈঃ
12.64
নাপ্যাদদত্সংদধন্নৈব মুঞ্চ;ন্বাণান্রণেঽদৃশ্যত সব্যসাচী
হতাংশ্চ নাগাংস্তুরগান্পদাতী;ন্সংস্যূতদেহান্দদৃশূ রথাংশ্চ
12.65
সংধায় নারাচবরান্দশাশু; দ্রৌণিস্ত্বরন্নেকমিবোত্সসর্জ
তেষাং চ পঞ্চার্জুনমভ্যবিধ্য;ন্পঞ্চাচ্যুতং নির্বিভিদুঃ সুমুক্তাঃ
12.66
তৈরাহতৌ সর্বমনুষ্যমুখ্যা;বসৃক্ক্ষরন্তৌ ধনদেন্দ্রকল্পৌ
সমাপ্তবিদ্যেন যথাভিভূতৌ; হতৌ স্বিদেতৌ কিমু মেনিরেঽন্যে
12.67
অথার্জুনং প্রাহ দশার্হনাথঃ; প্রমাদ্যসে কিং জহি যোধমেতম্
কুর্যাদ্ধি দোষং সমুপেক্ষিতোঽসৌ; কষ্টো ভবেদ্ব্যাধিরিবাক্রিয়াবান্
12.68
তথেতি চোক্ত্বাচ্যুতমপ্রমাদী; দ্রৌণিং প্রয়ত্নাদিষুভিস্ততক্ষ
ছিত্ত্বাশ্বরশ্মীংস্তুরগানবিধ্য;ত্তে তং রণাদূহুরতীব দূরম্
12.69
আবৃত্য নেয়েষ পুনস্তু যুদ্ধং; পার্থেন সার্ধং মতিমান্বিমৃশ্য
জানঞ্জয়ং নিয়তং বৃষ্ণিবীরে; ধনংজয়ে চাঙ্গিরসাং বরিষ্ঠঃ
12.70
প্রতীপকায়ে তু রণাদশ্বত্থাম্নি হৃতে হয়ৈঃ
মন্ত্রৌষধিক্রিয়াদানৈর্ব্যাধৌ দেহাদিবাহৃতে
12.71
সংশপ্তকানভিমুখৌ প্রয়াতৌ কেশবার্জুনৌ
বাতোদ্ধূতপতাকেন স্যন্দনেনৌঘনাদিনা