UtshovChapter 32
32.1
धृतराष्ट्र उवाच
तथा व्यूढेष्वनीकेषु संसक्तेषु च संजय
संशप्तकान्कथं पार्थो गतः कर्णश्च पाण्डवान्
Dhritarashtra uvacha
Tatha vyudheshvanikeshu sansakteshu cha sanjaya
Sanshaptakankatham partho gatah karnashcha pandavan
32.2
एतद्विस्तरतो युद्धं प्रब्रूहि कुशलो ह्यसि
न हि तृप्यामि वीराणां शृण्वानो विक्रमान्रणे
Etadvistarato yuddham prabruhi kushalo hyasi
Na hi tripyami viranam shrinvano vikramanrane
32.3
संजय उवाच
तत्स्थाने समवस्थाप्य प्रत्यमित्रं महाबलम्
अव्यूहतार्जुनो व्यूहं पुत्रस्य तव दुर्नये
Sanjaya uvacha
Tatsthane samavasthapya pratyamitram mahabalam
Avyuhatarjuno vyuham putrasya tava durnaye
32.4
तत्सादिनागकलिलं पदातिरथसंकुलम्
धृष्टद्युम्नमुखैर्व्यूढमशोभत महद्बलम्
Tatsadinagakalilam padatirathasankulam
Dhrishtadyumnamukhairvyudhamashobhata mahadbalam
32.5
पारावतसवर्णाश्वश्चन्द्रादित्यसमद्युतिः
पार्षतः प्रबभौ धन्वी कालो विग्रहवानिव
Paravatasavarnashvashchandradityasamadyutih
Parshatah prababhau dhanvi kalo vigrahavaniva
32.6
पार्षतं त्वभि संतस्थुर्द्रौपदेया युयुत्सवः
सानुगा भीमवपुषश्चन्द्रं तारागणा इव
Parshatam tvabhi santasthurdraupadeya yuyutsavah
Sanuga bhimavapushashchandram taragana iva
32.7
अथ व्यूढेष्वनीकेषु प्रेक्ष्य संशप्तकान्रणे
क्रुद्धोऽर्जुनोऽभिदुद्राव व्याक्षिपन्गाण्डिवं धनुः
Atha vyudheshvanikeshu prekshya sanshaptakanrane
Kruddhorjunobhidudrava vyakshipangandivam dhanuh
32.8
अथ संशप्तकाः पार्थमभ्यधावन्वधैषिणः
विजये कृतसंकल्पा मृत्युं कृत्वा निवर्तनम्
Atha sanshaptakah parthamabhyadhavanvadhaishinah
Vijaye kritasankalpa mrityum kritva nivartanam
32.9
तदश्वसंघबहुलं मत्तनागरथाकुलम्
पत्तिमच्छूरवीरौघैर्द्रुतमर्जुनमाद्रवत्
Tadashvasanghabahulam mattanagarathakulam
Pattimachchhuraviraughairdrutamarjunamadravat
32.10
स संप्रहारस्तुमुलस्तेषामासीत्किरीटिना
तस्यैव नः श्रुतो यादृङ्निवातकवचैः सह
Sa sampraharastumulasteshamasitkiritina
Tasyaiva nah shruto yadrinnivatakavachaih saha
32.11
रथानश्वान्ध्वजान्नागान्पत्तीन्रथपतीनपि
इषून्धनूंषि खड्गांश्च चक्राणि च परश्वधान्
Rathanashvandhvajannaganpattinrathapatinapi
Ishundhanunshi khadganshcha chakrani cha parashvadhan
32.12
सायुधानुद्यतान्बाहूनुद्यतान्यायुधानि च
चिच्छेद द्विषतां पार्थः शिरांसि च सहस्रशः
Sayudhanudyatanbahunudyatanyayudhani cha
Chichchheda dvishatam parthah shiransi cha sahasrashah
32.13
तस्मिन्सैन्ये महावर्ते पातालावर्तसंनिभे
निमग्नं तं रथं मत्वा नेदुः संशप्तका मुदा
Tasminsainye mahavarte patalavartasannibhe
Nimagnam tam ratham matva neduh sanshaptaka muda
32.14
स पुरस्तादरीन्हत्वा पश्चार्धेनोत्तरेण च
दक्षिणेन च बीभत्सुः क्रुद्धो रुद्रः पशूनिव
Sa purastadarinhatva pashchardhenottarena cha
Dakshinena cha bibhatsuh kruddho rudrah pashuniva
32.15
अथ पाञ्चालचेदीनां सृञ्जयानां च मारिष
त्वदीयैः सह संग्राम आसीत्परमदारुणः
Atha panchalachedinam srinjayanam cha marisha
Tvadiyaih saha sangrama asitparamadarunah
32.16
कृपश्च कृतवर्मा च शकुनिश्चापि सौबलः
हृष्टसेनाः सुसंरब्धा रथानीकैः प्रहारिणः
Kripashcha kritavarma cha shakunishchapi saubalah
Hrishtasenah susanrabdha rathanikaih praharinah
32.17
कोसलैः काशिमत्स्यैश्च कारूषैः केकयैरपि
शूरसेनैः शूरवीरैर्युयुधुर्युद्धदुर्मदाः
Kosalaih kashimatsyaishcha karushaih kekayairapi
Shurasenaih shuravirairyuyudhuryuddhadurmadah
32.18
तेषामन्तकरं युद्धं देहपाप्मप्रणाशनम्
शूद्रविट्क्षत्रवीराणां धर्म्यं स्वर्ग्यं यशस्करम्
Teshamantakaram yuddham dehapapmapranashanam
Shudravitkshatraviranam dharmyam svargyam yashaskaram
32.19
दुर्योधनोऽपि सहितो भ्रातृभिर्भरतर्षभ
गुप्तः कुरुप्रवीरैश्च मद्राणां च महारथैः
Duryodhanopi sahito bhratribhirbharatarshabha
Guptah kurupraviraishcha madranam cha maharathaih
32.20
पाण्डवैः सहपाञ्चालैश्चेदिभिः सात्यकेन च
युध्यमानं रणे कर्णं कुरुवीरोऽभ्यपालयत्
Pandavaih sahapanchalaishchedibhih satyakena cha
Yudhyamanam rane karnam kuruvirobhyapalayat
32.21
कर्णोऽपि निशितैर्बाणैर्विनिहत्य महाचमूम्
प्रमृद्य च रथश्रेष्ठान्युधिष्ठिरमपीडयत्
Karnopi nishitairbanairvinihatya mahachamum
Pramridya cha rathashreshthanyudhishthiramapidayat
32.22
विपत्रायुधदेहासून्कृत्वा शत्रून्सहस्रशः
युक्त्वा स्वर्गयशोभ्यां च स्वेभ्यो मुदमुदावहत्
Vipatrayudhadehasunkritva shatrunsahasrashah
Yuktva svargayashobhyam cha svebhyo mudamudavahat
32.23
धृतराष्ट्र उवाच
यत्तत्प्रविश्य पार्थानां सेनां कुर्वञ्जनक्षयम्
कर्णो राजानमभ्यर्च्छत्तन्ममाचक्ष्व संजय
Dhritarashtra uvacha
Yattatpravishya parthanam senam kurvanjanakshayam
Karno rajanamabhyarchchhattanmamachakshva sanjaya
32.24
के च प्रवीराः पार्थानां युधि कर्णमवारयन्
कांश्च प्रमथ्याधिरथिर्युधिष्ठिरमपीडयत्
Ke cha pravirah parthanam yudhi karnamavarayan
Kanshcha pramathyadhirathiryudhishthiramapidayat
32.25
संजय उवाच
धृष्टद्युम्नमुखान्पार्थान्दृष्ट्वा कर्णो व्यवस्थितान्
समभ्यधावत्त्वरितः पाञ्चालाञ्शत्रुकर्शनः
Sanjaya uvacha
Dhrishtadyumnamukhanparthandrishtva karno vyavasthitan
Samabhyadhavattvaritah panchalanshatrukarshanah
32.26
तं तूर्णमभिधावन्तं पाञ्चाला जितकाशिनः
प्रत्युद्ययुर्महाराज हंसा इव महार्णवम्
Tam turnamabhidhavantam panchala jitakashinah
Pratyudyayurmaharaja hansa iva maharnavam
32.27
ततः शङ्खसहस्राणां निस्वनो हृदयंगमः
प्रादुरासीदुभयतो भेरीशब्दश्च दारुणः
Tatah shankhasahasranam nisvano hridayangamah
Pradurasidubhayato bherishabdashcha darunah
32.28
नानावादित्रनादश्च द्विपाश्वरथनिस्वनः
सिंहनादश्च वीराणामभवद्दारुणस्तदा
Nanavaditranadashcha dvipashvarathanisvanah
Sinhanadashcha viranamabhavaddarunastada
32.29
साद्रिद्रुमार्णवा भूमिः सवाताम्बुदमम्बरम्
सार्केन्दुग्रहनक्षत्रा द्यौश्च व्यक्तं व्यघूर्णत
Sadridrumarnava bhumih savatambudamambaram
Sarkendugrahanakshatra dyaushcha vyaktam vyaghurnata
32.30
अति भूतानि तं शब्दं मेनिरेऽति च विव्यथुः
यानि चाप्लवसत्त्वानि प्रायस्तानि मृतानि च
Ati bhutani tam shabdam menireti cha vivyathuh
Yani chaplavasattvani prayastani mritani cha
32.31
अथ कर्णो भृशं क्रुद्धः शीघ्रमस्त्रमुदीरयन्
जघान पाण्डवीं सेनामासुरीं मघवानिव
Atha karno bhrisham kruddhah shighramastramudirayan
Jaghana pandavim senamasurim maghavaniva
32.32
स पाण्डवरथांस्तूर्णं प्रविश्य विसृजञ्शरान्
प्रभद्रकाणां प्रवरानहनत्सप्तसप्ततिम्
Sa pandavarathansturnam pravishya visrijansharan
Prabhadrakanam pravaranahanatsaptasaptatim
32.33
ततः सुपुङ्खैर्निशितै रथश्रेष्ठो रथेषुभिः
अवधीत्पञ्चविंशत्या पाञ्चालान्पञ्चविंशतिम्
Tatah supunkhairnishitai rathashreshtho ratheshubhih
Avadhitpanchavinshatya panchalanpanchavinshatim
32.34
सुवर्णपुङ्खैर्नाराचैः परकायविदारणैः
चेदिकानवधीद्वीरः शतशोऽथ सहस्रशः
Suvarnapunkhairnarachaih parakayavidaranaih
Chedikanavadhidvirah shatashotha sahasrashah
32.35
तं तथा समरे कर्म कुर्वाणमतिमानुषम्
परिवव्रुर्महाराज पाञ्चालानां रथव्रजाः
Tam tatha samare karma kurvanamatimanusham
Parivavrurmaharaja panchalanam rathavrajah
32.36
ततः संधाय विशिखान्पञ्च भारत दुःसहान्
पाञ्चालानवधीत्पञ्च कर्णो वैकर्तनो वृषः
Tatah sandhaya vishikhanpancha bharata duhsahan
Panchalanavadhitpancha karno vaikartano vrishah
32.37
भानुदेवं चित्रसेनं सेनाबिन्दुं च भारत
तपनं शूरसेनं च पाञ्चालानवधीद्रणे
Bhanudevam chitrasenam senabindum cha bharata
Tapanam shurasenam cha panchalanavadhidrane
32.38
पाञ्चालेषु च शूरेषु वध्यमानेषु सायकैः
हाहाकारो महानासीत्पाञ्चालानां महाहवे
Panchaleshu cha shureshu vadhyamaneshu sayakaih
Hahakaro mahanasitpanchalanam mahahave
32.39
तेषां संकीर्यमाणानां हाहाकारकृता दिशः
पुनरेव च तान्कर्णो जघानाशु पतत्रिभिः
Tesham sankiryamananam hahakarakrita dishah
Punareva cha tankarno jaghanashu patatribhih
32.40
चक्ररक्षौ तु कर्णस्य पुत्रौ मारिष दुर्जयौ
सुषेणः सत्यसेनश्च त्यक्त्वा प्राणानयुध्यताम्
Chakrarakshau tu karnasya putrau marisha durjayau
Sushenah satyasenashcha tyaktva prananayudhyatam
32.41
पृष्ठगोपस्तु कर्णस्य ज्येष्ठः पुत्रो महारथः
वृषसेनः स्वयं कर्णं पृष्ठतः पर्यपालयत्
Prishthagopastu karnasya jyeshthah putro maharathah
Vrishasenah svayam karnam prishthatah paryapalayat
32.42
धृष्टद्युम्नः सात्यकिश्च द्रौपदेया वृकोदरः
जनमेजयः शिखण्डी च प्रवीराश्च प्रभद्रकाः
Dhrishtadyumnah satyakishcha draupadeya vrikodarah
Janamejayah shikhandi cha pravirashcha prabhadrakah
32.43
चेदिकेकयपाञ्चाला यमौ मत्स्याश्च दंशिताः
समभ्यधावन्राधेयं जिघांसन्तः प्रहारिणः
Chedikekayapanchala yamau matsyashcha danshitah
Samabhyadhavanradheyam jighansantah praharinah
32.44
त एनं विविधैः शस्त्रैः शरधाराभिरेव च
अभ्यवर्षन्विमृद्नन्तः प्रावृषीवाम्बुदा गिरिम्
Ta enam vividhaih shastraih sharadharabhireva cha
Abhyavarshanvimridnantah pravrishivambuda girim
32.45
पितरं तु परीप्सन्तः कर्णपुत्राः प्रहारिणः
त्वदीयाश्चापरे राजन्वीरा वीरानवारयन्
Pitaram tu paripsantah karnaputrah praharinah
Tvadiyashchapare rajanvira viranavarayan
32.46
सुषेणो भीमसेनस्य छित्त्वा भल्लेन कार्मुकम्
नाराचैः सप्तभिर्विद्ध्वा हृदि भीमं ननाद ह
Susheno bhimasenasya chhittva bhallena karmukam
Narachaih saptabhirviddhva hridi bhimam nanada ha
32.47
अथान्यद्धनुरादाय सुदृढं भीमविक्रमः
सज्यं वृकोदरः कृत्वा सुषेणस्याच्छिनद्धनुः
Athanyaddhanuradaya sudridham bhimavikramah
Sajyam vrikodarah kritva sushenasyachchhinaddhanuh
32.48
विव्याध चैनं नवभिः क्रुद्धो नृत्यन्निवेषुभिः
कर्णं च तूर्णं विव्याध त्रिसप्तत्या शितैः शरैः
Vivyadha chainam navabhih kruddho nrityanniveshubhih
Karnam cha turnam vivyadha trisaptatya shitaih sharaih
32.49
सत्यसेनं च दशभिः साश्वसूतध्वजायुधम्
पश्यतां सुहृदां मध्ये कर्णपुत्रमपातयत्
Satyasenam cha dashabhih sashvasutadhvajayudham
Pashyatam suhridam madhye karnaputramapatayat
32.50
क्षुरप्रणुन्नं तत्तस्य शिरश्चन्द्रनिभाननम्
शुभदर्शनमेवासीन्नालभ्रष्टमिवाम्बुजम्
Kshurapranunnam tattasya shirashchandranibhananam
Shubhadarshanamevasinnalabhrashtamivambujam
32.51
हत्वा कर्णसुतं भीमस्तावकान्पुनरार्दयत्
कृपहार्दिक्ययोश्छित्त्वा चापे तावप्यथार्दयत्
Hatva karnasutam bhimastavakanpunarardayat
Kripahardikyayoshchhittva chape tavapyathardayat
32.52
दुःशासनं त्रिभिर्विद्ध्वा शकुनिं षड्भिरायसैः
उलूकं च पतत्रिं च चकार विरथावुभौ
Duhshasanam tribhirviddhva shakunim shadbhirayasaih
Ulukam cha patatrim cha chakara virathavubhau
32.53
हे सुषेण हतोऽसीति ब्रुवन्नादत्त सायकम्
तमस्य कर्णश्चिच्छेद त्रिभिश्चैनमताडयत्
He sushena hatositi bruvannadatta sayakam
Tamasya karnashchichchheda tribhishchainamatadayat
32.54
अथान्यमपि जग्राह सुपर्वाणं सुतेजनम्
सुषेणायासृजद्भीमस्तमप्यस्याच्छिनद्वृषः
Athanyamapi jagraha suparvanam sutejanam
Sushenayasrijadbhimastamapyasyachchhinadvrishah
32.55
पुनः कर्णस्त्रिसप्तत्या भीमसेनं रथेषुभिः
पुत्रं परीप्सन्विव्याध क्रूरं क्रूरैर्जिघांसया
Punah karnastrisaptatya bhimasenam ratheshubhih
Putram paripsanvivyadha kruram krurairjighansaya
32.56
सुषेणस्तु धनुर्गृह्य भारसाधनमुत्तमम्
नकुलं पञ्चभिर्बाणैर्बाह्वोरुरसि चार्दयत्
Sushenastu dhanurgrihya bharasadhanamuttamam
Nakulam panchabhirbanairbahvorurasi chardayat
32.57
नकुलस्तं तु विंशत्या विद्ध्वा भारसहैर्दृढैः
ननाद बलवन्नादं कर्णस्य भयमादधत्
Nakulastam tu vinshatya viddhva bharasahairdridhaih
Nanada balavannadam karnasya bhayamadadhat
32.58
तं सुषेणो महाराज विद्ध्वा दशभिराशुगैः
चिच्छेद च धनुः शीघ्रं क्षुरप्रेण महारथः
Tam susheno maharaja viddhva dashabhirashugaih
Chichchheda cha dhanuh shighram kshuraprena maharathah
32.59
अथान्यद्धनुरादाय नकुलः क्रोधमूर्च्छितः
सुषेणं बहुभिर्बाणैर्वारयामास संयुगे
Athanyaddhanuradaya nakulah krodhamurchchhitah
Sushenam bahubhirbanairvarayamasa sanyuge
32.60
स तु बाणैर्दिशो राजन्नाच्छाद्य परवीरहा
आजघ्ने सारथिं चास्य सुषेणं च ततस्त्रिभिः
चिच्छेद चास्य सुदृढं धनुर्भल्लैस्त्रिभिस्त्रिधा
Sa tu banairdisho rajannachchhadya paraviraha
Ajaghne sarathim chasya sushenam cha tatastribhih
Chichchheda chasya sudridham dhanurbhallaistribhistridha
32.61
अथान्यद्धनुरादाय सुषेणः क्रोधमूर्छितः
अविध्यन्नकुलं षष्ट्या सहदेवं च सप्तभिः
Athanyaddhanuradaya sushenah krodhamurchhitah
Avidhyannakulam shashtya sahadevam cha saptabhih
32.62
तद्युद्धं सुमहद्घोरमासीद्देवासुरोपमम्
निघ्नतां सायकैस्तूर्णमन्योन्यस्य वधं प्रति
Tadyuddham sumahadghoramasiddevasuropamam
Nighnatam sayakaisturnamanyonyasya vadham prati
32.63
सात्यकिर्वृषसेनस्य हत्वा सूतं त्रिभिः शरैः
धनुश्चिच्छेद भल्लेन जघानाश्वांश्च सप्तभिः
ध्वजमेकेषुणोन्मथ्य त्रिभिस्तं हृद्यताडयत्
Satyakirvrishasenasya hatva sutam tribhih sharaih
Dhanushchichchheda bhallena jaghanashvanshcha saptabhih
Dhvajamekeshunonmathya tribhistam hridyatadayat
32.64
अथावसन्नः स्वरथे मुहूर्तात्पुनरुत्थितः
अथो जिघांसुः शैनेयं खड्गचर्मभृदभ्ययात्
Athavasannah svarathe muhurtatpunarutthitah
Atho jighansuh shaineyam khadgacharmabhridabhyayat
32.65
तस्य चाप्लवतः शीघ्रं वृषसेनस्य सात्यकिः
वराहकर्णैर्दशभिरविध्यदसिचर्मणी
Tasya chaplavatah shighram vrishasenasya satyakih
Varahakarnairdashabhiravidhyadasicharmani
32.66
दुःशासनस्तु तं दृष्ट्वा विरथं व्यायुधं कृतम्
आरोप्य स्वरथे तूर्णमपोवाह रथान्तरम्
Duhshasanastu tam drishtva viratham vyayudham kritam
Aropya svarathe turnamapovaha rathantaram
32.67
अथान्यं रथमास्थाय वृषसेनो महारथः
कर्णस्य युधि दुर्धर्षः पुनः पृष्ठमपालयत्
Athanyam rathamasthaya vrishaseno maharathah
Karnasya yudhi durdharshah punah prishthamapalayat
32.68
दुःशासनं तु शैनेयो नवैर्नवभिराशुगैः
विसूताश्वरथं कृत्वा ललाटे त्रिभिरार्पयत्
Duhshasanam tu shaineyo navairnavabhirashugaih
Visutashvaratham kritva lalate tribhirarpayat
32.69
स त्वन्यं रथमास्थाय विधिवत्कल्पितं पुनः
युयुधे पाण्डुभिः सार्धं कर्णस्याप्याययन्बलम्
Sa tvanyam rathamasthaya vidhivatkalpitam punah
Yuyudhe pandubhih sardham karnasyapyayayanbalam
32.70
धृष्टद्युम्नस्ततः कर्णमविध्यद्दशभिः शरैः
द्रौपदेयास्त्रिसप्तत्या युयुधानस्तु सप्तभिः
Dhrishtadyumnastatah karnamavidhyaddashabhih sharaih
Draupadeyastrisaptatya yuyudhanastu saptabhih
32.71
भीमसेनश्चतुःषष्ट्या सहदेवश्च पञ्चभिः
नकुलस्त्रिंशता बाणैः शतानीकश्च सप्तभिः
शिखण्डी दशभिर्वीरो धर्मराजः शतेन तु
Bhimasenashchatuhshashtya sahadevashcha panchabhih
Nakulastrinshata banaih shatanikashcha saptabhih
Shikhandi dashabhirviro dharmarajah shatena tu
32.72
एते चान्ये च राजेन्द्र प्रवीरा जयगृद्धिनः
अभ्यर्दयन्महेष्वासं सूतपुत्रं महामृधे
Ete chanye cha rajendra pravira jayagriddhinah
Abhyardayanmaheshvasam sutaputram mahamridhe
32.73
तान्सूतपुत्रो विशिखैर्दशभिर्दशभिः शितैः
रथे चारु चरन्वीरः प्रत्यविध्यदरिंदमः
Tansutaputro vishikhairdashabhirdashabhih shitaih
Rathe charu charanvirah pratyavidhyadarindamah
32.74
तत्रास्त्रवीर्यं कर्णस्य लाघवं च महात्मनः
अपश्याम महाराज तदद्भुतमिवाभवत्
Tatrastraviryam karnasya laghavam cha mahatmanah
Apashyama maharaja tadadbhutamivabhavat
32.75
न ह्याददानं ददृशुः संदधानं च सायकान्
विमुञ्चन्तं च संरम्भाद्ददृशुस्ते महारथम्
Na hyadadanam dadrishuh sandadhanam cha sayakan
Vimunchantam cha sanrambhaddadrishuste maharatham
32.76
द्यौर्वियद्भूर्दिशश्चाशु प्रणुन्ना निशितैः शरैः
अरुणाभ्रावृताकारं तस्मिन्देशे बभौ वियत्
Dyaurviyadbhurdishashchashu pranunna nishitaih sharaih
Arunabhravritakaram tasmindeshe babhau viyat
32.77
नृत्यन्निव हि राधेयश्चापहस्तः प्रतापवान्
यैर्विद्धः प्रत्यविध्यत्तानेकैकं त्रिगुणैः शरैः
Nrityanniva hi radheyashchapahastah pratapavan
Yairviddhah pratyavidhyattanekaikam trigunaih sharaih
32.78
दशभिर्दशभिश्चैनान्पुनर्विद्ध्वा ननाद ह
साश्वसूतध्वजच्छत्रास्ततस्ते विवरं ददुः
Dashabhirdashabhishchainanpunarviddhva nanada ha
Sashvasutadhvajachchhatrastataste vivaram daduh
32.79
तान्प्रमृद्नन्महेष्वासान्राधेयः शरवृष्टिभिः
राजानीकमसंबाधं प्राविशच्छत्रुकर्शनः
Tanpramridnanmaheshvasanradheyah sharavrishtibhih
Rajanikamasambadham pravishachchhatrukarshanah
32.80
स रथांस्त्रिशतान्हत्वा चेदीनामनिवर्तिनाम्
राधेयो निशितैर्बाणैस्ततोऽभ्यार्च्छद्युधिष्ठिरम्
Sa rathanstrishatanhatva chedinamanivartinam
Radheyo nishitairbanaistatobhyarchchhadyudhishthiram
32.81
ततस्ते पाण्डवा राजञ्शिखण्डी च ससात्यकिः
राधेयात्परिरक्षन्तो राजानं पर्यवारयन्
Tataste pandava rajanshikhandi cha sasatyakih
Radheyatparirakshanto rajanam paryavarayan
32.82
तथैव तावकाः सर्वे कर्णं दुर्वारणं रणे
यत्ताः सेनामहेष्वासाः पर्यरक्षन्त सर्वशः
Tathaiva tavakah sarve karnam durvaranam rane
Yattah senamaheshvasah paryarakshanta sarvashah
32.83
नानावादित्रघोषाश्च प्रादुरासन्विशां पते
सिंहनादश्च संजज्ञे शूराणामनिवर्तिनाम्
Nanavaditraghoshashcha pradurasanvisham pate
Sinhanadashcha sanjagye shuranamanivartinam
32.84
ततः पुनः समाजग्मुरभीताः कुरुपाण्डवाः
युधिष्ठिरमुखाः पार्थाः सूतपुत्रमुखा वयम्
Tatah punah samajagmurabhitah kurupandavah
Yudhishthiramukhah parthah sutaputramukha vayam