UtshovChapter 41
41.1
संजय उवाच
त्वरमाणः पुनः कृष्णः पार्थमभ्यवदच्छनैः
पश्य कौरव्य राजानमपयातांश्च पाण्डवान्
Sanjaya uvacha
Tvaramanah punah krishnah parthamabhyavadachchhanaih
Pashya kauravya rajanamapayatanshcha pandavan
41.2
कर्णं पश्य महारङ्गे ज्वलन्तमिव पावकम्
असौ भीमो महेष्वासः संनिवृत्तो रणं प्रति
Karnam pashya maharange jvalantamiva pavakam
Asau bhimo maheshvasah sannivritto ranam prati
41.3
तमेतेऽनु निवर्तन्ते धृष्टद्युम्नपुरोगमाः
पाञ्चालानां सृञ्जयानां पाण्डवानां च यन्मुखम्
निवृत्तैश्च तथा पार्थैर्भग्नं शत्रुबलं महत्
Tametenu nivartante dhrishtadyumnapurogamah
Panchalanam srinjayanam pandavanam cha yanmukham
Nivrittaishcha tatha parthairbhagnam shatrubalam mahat
41.4
कौरवान्द्रवतो ह्येष कर्णो धारयतेऽर्जुन
अन्तकप्रतिमो वेगे शक्रतुल्यपराक्रमः
Kauravandravato hyesha karno dharayaterjuna
Antakapratimo vege shakratulyaparakramah
41.5
असौ गच्छति कौरव्य द्रौणिरस्त्रभृतां वरः
तमेष प्रद्रुतः संख्ये धृष्टद्युम्नो महारथः
Asau gachchhati kauravya draunirastrabhritam varah
Tamesha pradrutah sankhye dhrishtadyumno maharathah
41.6
सर्वं व्याचष्ट दुर्धर्षो वासुदेवः किरीटिने
ततो राजन्प्रादुरासीन्महाघोरो महारणः
Sarvam vyachashta durdharsho vasudevah kiritine
Tato rajanpradurasinmahaghoro maharanah
41.7
सिंहनादरवाश्चात्र प्रादुरासन्समागमे
उभयोः सेनयो राजन्मृत्युं कृत्वा निवर्तनम्
Sinhanadaravashchatra pradurasansamagame
Ubhayoh senayo rajanmrityum kritva nivartanam